
香巴噶舉教言集NG32ཉིན་ཞག་ཕྲུགས་གཅིག་གི་བྱ་བའི་རིམ་པ་བཞུགས་སོ།།
1-516
༄༅། །ཉིན་ཞག་ཕྲུགས་གཅིག་གི་བྱ་བའི་རིམ་པ་བཞུགས་སོ།།
༄། །ཉལ་བའི་རྣལ་འབྱོར་བཤད་པ།
༄༅། །ཉིན་ཞག་ཕྲུགས་གཅིག་གི་བྱ་བའི་རིམ་པ་བཞུགས་སོ།། ༄༅། །རྒྱ་གར་སྐད་དུ། །ཨ་ཧོ་རཱ་ཏྲ་ཨེ་ཀ་ཡུ་ཀ་ཀྲ་མ་ཀ་རི། བོད་སྐད་དུ། ཉིན་ཞག་ཟུང་གཅིག་གི་བྱ་བའི་རིམ་
པ། ཐམས་ཅད་མཁྱེན་པ་ལ་ཕྱག་འཚལ་ལོ། །བྱམས་བརྩེའི་ཐུགས་ནི་ཐུགས་བརྟན་ལྡན་པ། དག་གི་མཁྱེན་རབ་ཡལ་གའི་ངོས། །གསལ་བའི་ལེགས་བཤད་འདབ་ཕྲེང་ཅན། །གང་ན་བཞུགས་དེར་ཕྱག་འཚལ་ལོ། །འདིར་ནི་
ཉིན་ཞག་ཟུང་གཅིག་གི །བྱ་བ་དག་ལ་འབད་པས་ཀྱང་། །ཡིད་བརྟན་མི་རུང་སྐྱེས་བུའི་ཚེ། །དོན་ཡོད་འགྱུར་སླད་འདིར་ངེས་བྱ། །བདག་ཅག་རྣམས་ཀྱི་འདྲེན་པ་དམ་པ་རྣམས་ཀྱི་ཡང་འདྲེན་པ་དམ་
པ། མཁས་པའི་དབང་པོ་མཁན་ཆེན་མཆིམས་ཐམས་ཅད་མཁྱེན་པ་ཞེས་སྐྱེ་བོ་ཀུན་ལ་རབ་ཏུ་གྲགས་པ་དེའི་གསུང་ལས། འདིར་ཉིན་ཞག་ཕྲུགས་གཅིག་གི་བྱ་ཆ་དགེ་སྦྱོར་གྱི་རིམ་པ་རྣམས་སྟོན་པ་
ཡིན། འདིར་བསྟན་པ་བཞིན་ཉིན་མཚན་དུ་སྒོ་གསུམ་དགེ་སྦྱོར་ལ་བཀོལ་བས། ཉིན་ཞག་མཐུད་པས་ཟླ་བ། ཟླ་བ་མཐུད་པས་ལོ། ལོ་མཐུད་པས་མི་ཚེ་རིལ་པོ་དགེ་སྦྱོར་ལ་བཀོལ་བས་འགྲོ་བས་
དོན་ཆེན་པོ་འགྲུབ་པ་ལགས་ཞེས་གསུང་སྐད་པས། འདིར་ཡང་ཉིན་ཞག་ཕྲུགས་གཅིག་གི་བྱ་ཆ་ཆོས་སྤྱོད་ཀྱི་རིམ་པ་བྱེད་ཚུལ་སྟོན་ཏོ། །དེ་ལ་ཉིན་ཞག་ཕྲུགས་གཅིག་གི་བྱ་ཆའི་ཐོག་མ་ཐོ་རངས་ནས་རྩོམ་སྟེ། 
1-517
དེའི་སྔོན་དུ་ཡང་ཉལ་བས་འགྲོ་བས་ཉལ་བའི་རྣལ་འབྱོར་ནི། ཀཱ་རི་ཀ་ལས། མཚན་མོ་ཆ་གསུམ་བགོ་བྱ་སྟེ། །ཞེས་གསུངས་པ་ལྟར་ཆ་དང་པོ་སྲོད་ཀྱི་དགེ་སྦྱོར་རྫོགས་པ་དང་། ཆ་གཉིས་
པ་ལ་ཉལ་ཏེ། བཤེས་པའི་སྤྲིང་ཡིག་ལས། རིགས་པའི་བདག་ཉིད་ཉིན་བར་མཐའ་དག་དང་། །མཚན་མོ་ཐུན་གྱི་སྟོད་སྨད་འདས་ནས་ནི། །མནལ་ཚེ་འབྲས་བུ་མེད་པར་མི་འགྱུར་བར། །དྲན་དང་ལྡན་ཞིང་
དེ་དག་རབ་ཏུ་མནོལ། །ཞེས་སོ། །དེའི་ཚེ་ལུས་ཀྱི་འདུག་སྟངས་ནི། ཀཱ་རི་ཀ་ལས། སེངྒེའི་ཉལ་ཐབས་བཞིན་དུ་བྱ། །ཞེས་དང་། བྱང་ཆུབ་སེམས་དཔའི་སྤྱོད་འཇུག་ལས། མགོན་པོ་མྱ་ངན་འདས་གཟིམས་ལྟར། །
འདོད་པའི་ཕྱོགས་སུ་ཉལ་བར་བྱ། །ཞེས་གསུངས་པ་ལྟར་བྱ་སྟེ། དེ་ཡང་ཁྱེའུ་བཞིའི་ཏིང་ངེ་འཛིན་གྱི་མདོ་ལས། དབུ་ཤར་དང་ཞལ་བྱང་དུ་བསྟན་པ་དང་། མྱ་ངན་འདས་པ་དང་། འདུལ་བ་ལུང་
ལས། དབུ་བྱང་ཕྱོགས་སུ་བསྟན་ནས་གཟིམས་པར་བཤད་དོ། །དེའི་རྒྱུ་མཚན་ནི། བྱང་ཕྱོགས་སུ་བསྟན་པ་གསལ་བར་འགྱུར་རོ་ཞེས་གསུངས་པར་བསྟན་ཏོ་ཞེས་སོ། །དེའི་ཕྱིར་གནས་ཁང་སྟབས་བདེ་ན་མགོ་བྱང་
དུ་བསྟན་ལ་གློ་གཡས་པས་ཕབ་ཏེ། རྐང་པའི་བོལ་གཡས་པའི་སྟེང་དུ་གཡོན་བཞག ལག་པ་གཡས་པ་འགྲམ་པའི་འོག་ཏུ་བཅུག་གཡོན་པ་སྤྱི་མགོའི་སྟེང་དུ་བརྐྱང་ནས་ལུས་ཆོས་གོས་ལ་སོགས་པས་གཡོགས་ནས་ཉལ་ཏེ། 
1-518
དེ་སྐད་དུ་བྱང་ཆུབ་སེམས་པའི་སོ་སོར་ཐར་པ་ལས་ཀྱང་། དེ་ཉལ་བ་ན་གློ་གཡས་པས་ཉལ་བར་བྱེད་དོ། །རྐང་པའི་སྟེང་དུ་རྐང་པ་བཞག་ནས་ལུས་ཆོས་གོས་དག་གིས་ཤིན་ཏུ་གཡོགས་
ཤིང་། དྲན་པ་དང་ཤེས་བཞིན་དུ་སྣང་བའི་འདུ་ཤེས་དང་ལྡང་བའི་འདུ་ཤེས་སུ་ཉལ་བར་བྱེད་ཞེས་གང་གསུངས་པ་ལྟ་བུའོ། །བསམ་པ་ཡང་དེ་ཉིད་ལས། ཇི་སྐད་བཤད་པ་ལྟ་བུར་ལྡང་བ་
དང་སྣང་བའི་འདུ་ཤེས་སུ་བྱ་སྟེ། ཀཱ་རི་ཀ་དང་། སྤྱོད་པ་བསྡུས་པའི་སྒྲོན་མ་ལས་ཀྱང་། ལྡང་དང་སྣང་བའི་འདུ་ཤེས་ཀྱིས། །ཞེས་དང་། ཤེས་བཞིན་མྱུར་དུ་ལྡང་སེམས་ལ། །ཐོག་མ་ཉིད་དུ་
ངེས་པར་སྦྱར། །ཞེས་སོ། །གཞན་ཡང་ཕྱག་ལེན་ལ་འདི་ལྟར་མཛད་པར་སྣང་སྟེ། ད་ནང་ཐོ་རང་ནས་ད་ལྟ་ཉལ་བའི་བར་ལ་ཆོས་དང་མཐུན་མི་མཐུན་ཇི་ལྟར་དུ་གྱུར་སྙམ་དུ་སེངྒེ་རྣམ་
པར་བརྩེ་བའི་ལྟ་སྟངས་ཀྱིས་བལྟས་ལ་ཆོས་དང་མཐུན་པར་སྣང་ན་ཨ་རེ་དགའ་གོ་བཅད་དེ་རིང་ཉིན་གང་པོར་དོན་ཡོད་པར་དུས་འདས་སྙམ་དུ་སྤྲོ་དགའ་སྒོམ་ཞིང་། དགེ་བ་དེ་ལ་བརྟེན་
ནས་རྫོགས་པའི་སངས་རྒྱས་ཐོབ་པར་གྱུར་ཅིག་ཅེས་བསྔོ་བས་རྒྱས་གདབ། ཆོས་དང་མི་མཐུན་པར་སྣང་ན་རང་གི་སེམས་ལ་ཁྲེལ་སྔས་བྱས་ནས། སླན་ཆད་དེ་ལྟ་བུའི་བྱ་བ་ལ་མི་འཇུག་སྙམ་དུ་བསམ་ཞིང་། 
1-519
སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་དོ་རེའི་ཆ་ལ་གཉིད་ཀྱི་སྙོམ་པ་བསལ་ཏེ་ཁམས་རྟས་པར་བྱས་ལ་ནང་པར་སྔ་མོ་ནས་དགེ་བའི་སྦྱོར་
བ་ལ་བརྩོན་པར་བྱ་སྙམ་དུ་བསམས་ལ་ཆོས་སེམས་ཤིང་ཉལ་བར་བྱའོ། །དེ་ཡང་གོས་ཚགས་མ་བཤིག་པར་ཉལ་བ་ནི་རྒྱ་གར་གི་རབ་ཏུ་བྱུང་བ་རྣམས་ཀྱི་ལུགས་ཡིན་སྐད་དེ། ཇོ་བོ་
ཉིད་ཀྱང་སྐུ་ནས་བགྲེས་ཏེ་འདའ་ཀའི་དུས་སུ་ཡང་སྐུ་ཆིངས་དམ་པོ་ཡོད་པ་དགྲོལ་བར་བརྩམས་པས། ང་ཏིར་ཐི་ཀ་ནི་མིན་ཅེས་གསུང་སྐད། དེའི་དོན་ང་མུ་སྟེགས་ཅན་ནི་མིན་ཅེས་པའོ། །
གཞན་ཡང་བོད་ཀྱི་རབ་ཏུ་བྱུང་བ་ཕལ་ཆེར་གཅེར་པུར་མལ་དུ་ཉལ་བ་ལ། ཇོ་བོ་མ་མཉེས་པར་བོད་ཀྱི་རབ་ཏུ་བྱུང་བ་བུ་ཆུང་འདྲ་གསུང་སྐད། དེས་ན་གོས་ཚགས་མ་བཤིག་པར་
ཉལ་བ་ཕྱག་ལེན་བཟང་བས་དེང་སང་གི་རབ་ཏུ་བྱུང་བ་གོ་ཆ་ཆེ་དག་ཀྱང་དེ་ལྟར་མཛད་པར་སྣང་ངོ་། །དེ་ནས་མཚན་མོའི་ཆ་གསུམ་པ་ལ་བབ་པ་ན་ལྡང་བར་བྱ་སྟེ། ཀཱ་
རི་ཀཱ་ལས། ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་དོན་བྱ། །ཞེས་གང་གསུངས་པ་ལྟར་ནམ་སུམ་ཆ་བཞི་ཆ་ཙམ་ལུས་པའམ། ཐོ་རང་སྐར་ཁོངས་གཅིག་ཙམ་ལུས་པ་ན་ངེས་པར་མལ་ནས་ལངས་ཏེ་ཁ་དོན་ལ་སོགས་པ་བྱའོ། །
1-520
ཁ་དོན་བྱེད་ན་སྐྱབས་འགྲོ་སེམས་བསྐྱེད་སྔོན་དུ་བཏང་སྟེ། ཇི་སྐད་དུ་བསླབ་པ་ཀུན་ལས་བཏུས་པ་ལས། ཁམས་གསུམ་ཕན་མཛད་གཅིག་པུ་དེའི་གསུང་མཉན་ཕྱིར། །ལྷ་དང་ཀླུ་དང་གྲུལ་བུམ་དྲི་ཟ་
གནོད་སྦྱིན་དང་། །མཁའ་ལྡིང་ལྷ་མིན་མིའམ་ཅི་དབང་འདྲེ་ལ་སོགས། །དགར་བཅས་ཉན་པར་མོས་ཤིང་ཡིད་དད་འདིར་ཤོག་ཅིག །ཅེས་བརྗོད་ནས་གཙུག་ལག་གི་ཚིགས་སུ་བཅད་པ་གདོན་ནོ། །ཡང་ན་བྱམས་སྙིང་
རྗེ་བྱང་ཆུབ་ཀྱི་སེམས་བསྒོམ་པ་ལ་སོགས་པ་བྱ་སྟེ། དཔལ་བྱང་ཆུབ་བཟང་པོས་རྣལ་འབྱོར་གྱི་མཚན་ཉིད་ཀྱི་བདེན་པ་ལས། །ནམ་གྱི་ཆ་སྨད་གཉིད་ལས་སད། །བདག་མ་གཏོགས་པའི་སེམས་ཅན་ལ། །
ཐོག་མ་ཉིད་དུ་སྙིང་རྗེ་བསྒོམ། །དེ་ནས་བདག་ཉིད་ལ་བལྟས་ནས། །དེང་གི་ཉིན་ཞག་འདི་ལ་ནི། །སློང་བའི་སེམས་ཅན་དག་ལ་ནི། །ཇི་སྲིད་འོངས་ཀྱང་སེར་སྣའི། །དྲི་མས་མི་གོས་ཉིད་དུ་
བྱ། །ཞེས་པ་ལ་སོགས་པ་གང་གསུངས་པ་ལྟ་བུའོ། ། གོས་ཚགས་ནི་ནམ་མ་ལངས་པའི་གོང་རོལ་དུ་བྱེད་པ་གང་ཟག་དམ་པ་རྣམས་ཀྱི་ཕྱག་ལེན་ཡིན་ལ། གལ་ཏེ་གོས་ཚགས་མ་བཤིག་པས་
བྱེད་མི་དགོས་པ་ཞིག་ཡིན་ནའང་དེའི་ཚེ་ངེས་པར་བཅོས་པར་བྱའོ། །རྣམ་པ་གཅིག་ཏུ་ན་འཚོ་བའི་ཡོ་བྱད་དག་གི་ནང་ནས་མཚན་མོ་བགོ་བར་བྱ་བའི་ཤམ་ཐབས་ཀྱི་གཟན་གྱི་གཟན་དང་། 
1-521
ཉིན་པར་བགོ་བར་བྱ་བའི་ཤམ་ཐབས་དང་རྔུལ་གཟན་འབྱོར་བ་དག་གིས་ནི་དེ་དག་བརྗོད་དགོས་པའི་ཕྱིར་ཡང་དེ་ལྟར་བྱའོ། །འཚོ་བའི་ཡོ་བྱད་བཅུ་གསུམ་ནི། མདོ་རྩ་ལ་ལས། རྣམ་སྦྱར་དང་།
བླ་གོས་དང་། མཐང་གོས་དང་། ཤམ་ཐབས་དང་། ཤམ་ཐབས་ཀྱི་གཟན་དང་། རྔུལ་གཟན་དང་། རྔུལ་གཟན་གྱི་གཟན་དང་། གདོང་ཕྱིས་དང་། རྣག་གཟན་དང་། གཡན་པ་དགབ་པ་དང་། སྐྲ་བཟེད་དང་། གདིང་བ་དང་། དབྱར་
གྱི་གོས་རས་ཆེན་བཅང་བར་བྱའོ་ཞེས་པའོ། །དེ་ཡང་བདག་ཅག་གི་སྟོན་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ཝ་ར་ན་སིར་དྲང་སྲོང་སྨྲ་བ་རི་དྭགས་ཀྱི་ནགས་སུ་གཤེགས་
ཏེ་འཁོར་ལྔ་སྡེ་བཟང་པོ་དང་། འདོད་པའི་ལྷ་བརྒྱད་ཁྲི་དང་བཅས་པ་ལ་བདེན་པ་བཞི་ལན་གསུམ་དུ་བཟླས་པ་རྣམ་པ་བཅུ་གཉིས་ཀྱི་ཆོས་ཀྱི་འཁོར་ལོ་བསྐོར་བས། གང་གི་ཚེ་ལྔ་སྡེ་
བཟང་པོས་ཡེ་ཤེས་ཁོང་དུ་ཆུད་དེ་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་གྱུར་པ་དེའི་ཚེ། སྔོན་གོམས་པའི་སྦྱོར་བས་ཤམ་ཐབས་ཁྱིམ་པ་བཞིན་དུ་གྱོན་པར་བྱེད་ནས། བྲམ་ཟེ་
དང་ཁྱིམ་བདག་དང་པ་ཅན་དག་གིས་མཐོང་ནས་སྨྲས་པ། འཕགས་པ་དག་ཇི་ལྟར་ཁྱེད་ཅག་ཤམ་ཐབས་གསོལ་བ་འདི་ལྟར། ནོར་ཅན་དག་དང་དེད་དཔོན་དག་འཚལ་བར་བགྱིད་དོ་ཞེས་ཟེར་བའི་སྐབས་དེ། 
1-522
དགེ་སློང་རྣམས་ཀྱི་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱི་དགོངས་པ། ཁྱིམ་པ་དག་ཟེར་བ་བདེན་གྱིས། ངས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱི་ཉན་ཐོས་དག་ཤམ་
ཐབས་ཇི་ལྟར་གྱོན་པར་གྱུར་སྙམ་དུ་ཐུགས་ལ་དགོངས་པ་དང་། ལྷ་རྣམས་ཀྱིས་གསོལ་པ། བཙུན་པ་གནས་གཙང་མའི་ལྷ་རྣམས་ཇི་ལྟ་བ་བཞིན་ནོ་ཞེས་པ་དང་། བཅོམ་ལྡན་འདས་ཉིད་ཀྱིས་ཀྱང་གནས་
གཙང་མའི་ལྷ་རྣམས་ཇི་ལྟར་བར་མངོན་སུམ་དུ་མཁྱེན་ཏེ་བཀའ་རྩལ་པ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པ་བྱ་སྟེ། ཤམ་ཐབས་བཟླུམ་པོར་བེག་བེར་བསླབ་པར་
བྱའོ་ཞེས་སོ། །བཟླུམ་པོའི་དོན་ནི་ཤམ་ཐབས་ཀྱི་མ་མཐའ་རིང་ཐུང་མ་ཡིན་པར་མཉམ་པའོ། །དེ་ཡང་མདུན་དུ་བལྟབ་མ་ཅུང་ཟད་དང་རྒྱབ་ཏུའང་དེ་ལྟར་འོང་པར་བྱས་ཏེ་གོན་པ་ནི་སྣར་
ཐང་པའི་གང་ཟག་དམ་པ་རྣམས་ཀྱི་ཕྱག་ལེན་ནོ། །ཡང་གང་གི་ཚེ་དྲུག་སྡེ་དག་རབ་ཏུ་བྱུང་བ་དེའི་ཚེ་དེ་དག་ཤམ་ཐབས་ཧ་ཅང་བརྩེམས་པར་བགོ་བར་བརྩམས་པ་ན་བྲམ་ཟེ་ཁྱིམ་
བདག་དད་པ་ཅན་དག་གིས་མཐོང་ནས་འཕགས་པ་དག་དྭ་དག་དང་བརྒྱན་པོ་དང་ནལ་གྱི་བུ་དག་ཤམ་ཐབས་འདི་ལྟར་འཚལ་བས་འདི་ནི་ཚུལ་དང་མཐུན་པ་མ་ལགས་ཀྱིས། དད་པ་ཅན་ཤམ་ཐབས་ཧ་ཅང་བརྩེངས་པར་མ་གསོལ་ཅིག 
1-523
དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོངས་པ་གང་ལགས། ཀྱེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་བསླབ་པར་གྱུར་པའོ། །དེ་ནས་
དེ་དག་རྒྱ་ཆེར་སྨོད་པ་ལ་ཞུགས་པ་དགེ་སློང་རྣམས་ཀྱིས་ཐོས་ནས། བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱི་དགོངས་པ་ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་རྩལ་པ།
དགེ་སློང་དག་དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཤམ་ཐབས་ཧ་ཅང་རྩེངས་པ་མ་ཡིན་པར་བགོ་བར་བསླབ་པར་བྱའོ་ཞེས་སོ། །
ཧ་ཅང་རྩེངས་པ་ནི་པུས་མོ་གཉིས་ལས་གོང་དུ་ཐབ་བ་ལྟ་བུ་སྟེ་དེ་ལྟ་མ་ཡིན་པར་རོ། །ཡང་དྲུག་སྡེ་དག་ཧ་ཅང་འཇོལ་བར་བགོ་བར་བརྩམས་པ་དང་། འཕགས་པ་དག་ཏག་ཀའི་
ཡུལ་ན་གནས་པའི་བུད་མེད་དག་དང་རིགས་ཀྱི་མནའ་མ་དག་ཤམ་ཐབས་འདི་ལྟར་འཚལ་བས་ཞེས་པ་ལ་སོགས་པ་ནས་ཤམ་ཐབས་ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ། །ཧ་
ཅང་འཇོལ་བ་ནི་ལོང་བུ་ལ་རེག་པ་སྟེ་དེ་ལྟ་མ་ཡིན་པར་རོ། །ཡང་དྲུག་སྡེ་དག་ཤམ་ཐབས་གྱོན་པ་ན་མདུན་འཕྱང་བར་བྱེད་ནས། འཕགས་པ་དག་བྱིས་པ་ཁྱེའུ་དག་དང་། ཆང་གི་ར་རོ་བ་དག་དང་འབྱུང་པོ་དང་ཤ་ཟས་བརླམས་པ་དག་ཤམ་ཐབས་འདི་ལྟར་འཚལ་བས་ཞེས་པ་ལ་སོགས་པ་ནས། 
1-524
ཤམ་ཐབས་གླང་པོ་ཆེའི་སྣ་ལྟར་མ་ཡིན་པར་བགོ་བར་བསླབ་པར་བྱའོ། །དེ་ནི་ཤམ་ཐབས་ཀྱི་མདུན་རོལ་གྱི་སྣ་འཕྱངས་པ་གླང་པོ་ཆེའི་སྣ་ལྟར་ནར་བ་མ་ཡིན་པར་ཞེས་པའི་དོན་ཏོ། །
མདོ་རྩ་བ་ལས། གྲྭ་གླང་པོ་ཆེའི་སྣ་ལྟར་ནར་བ་མ་ཡིན་པར་རོ་ཞེས་སོ། །ཡང་དྲུག་སྡེ་དག་ཤམ་ཐབས་གྱོན་པ་ན་གློ་དག་ཏུ་ལྟེབས་པར་བྱེད་ནས། འཕགས་པ་དག་གར་མཁན་དག་
ཚོགས་ཀྱི་ནང་དུ་ཤམ་ཐབས་འདི་ལྟར་འཚལ་བས་ཞེས་པ་ལ་སོགས་པ་ནས། ཤམ་ཐབས་ཏ་ལའི་ལོ་མ་ལྟར་བལྟབ་པ་མ་ཡིན་པར་བགོ་བར་བསླབ་པར་བྱའོ། །དེ་ནི་ལྟེ་བའི་གོང་རོལ་དུ་
ཏ་ལའི་ལོ་མ་ལྟར་ལྡེབས་ཤིང་འདུག་པ་མ་ཡིན་པར་ཞེས་པའི་དོན་ཏེ། དེ་ཉིད་ལས། གོང་དུ་མ་ལྡེབས་པར་རོ་ཞེས་སོ། །ཡང་དྲུག་སྡེ་དག་ཤམ་ཐབས་གྱོན་པ་ན་གློར་བལྟབ་ཏེ་ཕུར་
མ་ལྟར་འཇོག་པར་བྱེད་ནས། འཕགས་པ་དག་ནོར་ཅན་དག་དང་ཚོང་དཔོན་དག་དང་དེད་དཔོན་དག་དང་བུད་མེད་དག་ཤམ་ཐབས་འདི་ལྟར་འཚལ་བས་ཞེས་པ་ལ་སོགས་པ་ནས། ཤམ་ཐབས་འབྲུའི་ཕུར་
མ་ལྟར་མ་ཡིན་པར་བགོ་བར་བསླབ་པར་བྱའོ། །དེ་ནི་གློ་དག་ནས་སྐ་རགས་ཀྱི་བར་དུ་ཕུར་མ་ལྟར་འདུག་པ་མ་ཡིན་པར་ཞེས་པའོ། །ཡང་དྲུག་སྡེ་དག་ཤམ་ཐབས་གྱོན་པ་ན་ལྟེ་བའི་འོག་དུ་སྦྲུལ་མགོའི་གདེངས་ཀ་ལྟར་བྱེད་ནས། 
1-525
འཕགས་པ་དག་བརྒྱན་པོ་བགྱིད་པ་དག་ཤམ་ཐབས་འདི་ལྟར་འཚལ་བས་ཞེས་པ་ལ་སོགས་པ་ནས། ཤམ་ཐབས་སྦྲུལ་མགོའི་གདེངས་ཀ་ལྟར་མ་ཡིན་པར་བགོ་བར་བསླབ་པར་བྱའོ། །དེ་ནི་མདུན་གྱི་བལྟར་
པ་དག་ཕྱིར་བཟློག་པ་མ་ཡིན་པར་ཞེས་པའི་དོན་ཏོ། །དེ་ལྟར་ན་དྲུག་པོ་དག་གིས་ནི་ཤམ་ཐབས་བཟླུམ་པོར་བགོ་བའི་ཐབས་བསྟན་པས་དེ་ལྟར་འོང་བར་བྱས་ཏེ་ཅི་ནས་ཀྱང་ཤཱཀྱའི་སྲས་
ཀྱི་སློབ་མར་ཁས་ལེན་པ་དག་གིས་ཤམ་ཐམས་བཟླུམ་པོར་བགོ་བར་བསླབ་པར་བྱའོ། །དེ་ལྟར་གོས་ཚགས་ལེགས་པར་ཟིན་པའི་རྗེས་སུ་བླ་གོས་ལ་མི་རེག་པར་གཙང་སྦྲའི་ཀུན་ཏུ་སྤྱོད་པ་བཤང་
གཅི་འདོར་བ་ལ་སོགས་པ་བྱས་ནས་ཁྲུས་བྱའོ། །དེ་ནི་འདི་ལྟར་རང་ཉིད་མི་གཙང་བས་སྦགས་པའི་ལག་པ་གཡོན་པ་རས་ལ་སོགས་པ་གཙང་མས་དཀྲིས་ཏེ་སྣོད་གཙང་མར་ཆུ་ཡོད་པ་བླངས་
ནས་གཡས་པའི་ཁྱོར་བར་ཆུ་བླུགས་ཏེ་ཁའི་དྲི་མ་དག་པར་བྱ་བའི་དོན་དུ་ལན་གསུམ་གྱི་བར་དུ་བཀྲུའོ། ། དེ་ནས་ལག་པའི་འཁྲིག་མཚམས་སམ། དཔུང་པ་མན་ཆད་བཀྲུས་ལ། སླར་ཡང་གཡས་པའི་
ཁྱོར་བར་ཆུ་བླུགས་པ་མིག་ལ་བསྣུན་ནས་གདོང་བཀྲུ་བ་ནི་གང་ཟག་དམ་པ་རྣམས་ཀྱི་ཕྱག་ལེན་ནོ། །གསུང་ལས་ཀྱང་། བཙུན་ཆུང་ལ་སོགས་པ་མ་གོམས་པ་དག་བྱིས་པ་ཁྲུས་བྱེད་པ་བཞིན་ཁར་ཆུ་བླུག་ནས་ཁའི་ཆུ་དེས་གདོང་པ་འཁྲུད་པ་ཡོད་དེ། 
1-526
དེ་མི་ལེགས་པས་འདི་ལྟར་ལག་པའི་ཆུ་དེ་མིག་གི་ཐད་ཀར་བསྣུན་ཏེ་བཀྲུས་པས་མིག་དེ་ཚད་པའི་ཡུལ་ཡིན་པས་མིག་ལ་ཕན། མིག་དེ་གདོང་པའི་དཀྱིལ་ལྟ་བུ་ན་ཡོད་པས་འཁྲུད་པའང་
བདེ་བས་དེ་བཞིན་བྱའོ་ཞེས་ཀྱང་གསུང་གསུང་ངོ་། །སྐབས་འདིར་གཙུག་ལག་གི་ཚིགས་སུ་བཅད་པ་སྦྱིན་པའི་སྨོན་ལམ་དུ་གཏོགས་པ་གདོན་སྟེ། ཚིག་ལེའུར་བྱས་པ་སུམ་བརྒྱ་པ་ལས་ཀྱང་། ཁྲོན་པ་ལ་
སོགས་རྣམས་ནས་ཆུ་བླངས་ནས། །ཁྲོན་པ་ལ་སོགས་བྱེད་པའི་ཆུ་ལྷ་ལ། །སྦྱིན་པའི་རབས་མཐུན་ཚིགས་བཅད་གདོན་པར་བྱ། །འཐུང་དང་ཁྲུས་བྱེད་པ་ནའང་དེ་བཞིན་བརྗོད། །ཞེས་སོ། །འོན་ཀྱང་ཕྱག་ལེན་ལ་
འདི་ལྟར་མཛད་པར་སྣང་ཏེ། ཆུའི་སྦྱིན་པ་འདི་ལ་རྟེན་ནས་ཀླུའི་རྒྱལ་པོ་ཉཻ་དགའ་འོ་དང་དགའ་བོ་ལ་སོགས་པ་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་མངོན་པར་རྫོགས་པར་སངས་རྒྱ་བར་འགྱུར་ཅིག་ཅེས་པའོ། །དེ་ལྟར་ཁྲུས་བྱས་པའི་ཆུའི་ཟིལ་པ་རྣམས་གདོང་ཕྱིས་དང་ལག་ཕྱིས་ཀྱིས་ཕྱིས་ལ་ཆོས་གོས་བགོ་བར་བྱས་ཏེ། དེ་ནི་འདི་ལྟར་དགེ་
སློང་དག་ཆོས་གོས་གྱོན་པ་ན། ཇི་ལྟར་བགོ་བ་མི་ཤེས་ནས་བཀའ་རྩལ་པ། དེ་ལྟ་བས་ན་དགེ་སློང་རྣམས་ཀྱི་ཆོས་གོས་བཟླུམ་པོར་བགོ་བར་བསླབ་པར་བྱའོ་ཞེས་སོ། །ཡང་དྲུག་སྡེ་དག་ཆོས་གོས་ཧ་ཅང་རྩེངས་པར་གྱོན་པར་བྱེད་ནས། 
1-527
བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་དྭ་དག་དང་བརྒྱན་པོ་དག་དང་ནལ་གྱི་བུ་དག་སྟོད་གཡོགས་འདི་ལྟར་འཚལ་བས་ཞེས་པ་ལ་སོགས་ནས། ཆོས་གོས་
ཧ་ཅང་རྩེངས་པ་མ་ཡིན་པར་བགོ་བར་བསླབ་པར་བྱའོ། །ཡང་དྲུག་སྡེ་དག་ཆོས་གོས་ཧ་ཅང་འཇོལ་བར་གྱོན་པར་བྱེད་པ་ན། འཕགས་པ་དག་ཏག་ཀའི་ཡུལ་ན་གནས་པའི་མི་དག་དང་རིགས་
ཀྱི་མནའ་མ་དག་སྟོད་གཡོགས་འདི་ལྟར་འཚལ་བར་ཞེས་པ་ནས། ཆོས་གོས་ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ། །འདིས་ནི་རྣམ་སྦྱར་ཡང་དེ་ལྟར་བགོ་བར་བསྟན་ཏོ།། །།
༄། །ཕྱག་བྱ་བའི་གནས་དང་གནས་མ་ཡིན་པ་བཤད་པ།
ད་ནི་
ཕྱག་བྱ་བའི་གནས་དང་གནས་མ་ཡིན་པ་བཤད་པར་བྱ་སྟེ། ལུང་ལས་བཅོམ་ལྡན་འདས་ལ་ཉེ་བར་འཁོར་གྱིས། བཙུན་པ་ཕྱག་བགྱི་བ་དུ་མཆིས། ཉེ་བར་འཁོར་ལྔ་སྟེ། ཁྱིམ་པས་རབ་ཏུ་བྱུང་
བ་ལ་དང་། གཞོན་པས་རྒན་པ་ལ་དང་། དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས། དགེ་སློང་དེ་རིང་བསྙེན་པར་རྫོགས་པ་ལ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ལ་ལྷ་དང་བཅས་པའི་འཇིག་རྟེན་གྱིས་ཕྱག་བྱའོ་ཞེས་གསུངས་སོ། །དེ་ནི་འདི་ལྟར་ཁྱིམ་པས་རབ་ཏུ་བྱུང་བ་ལ་ཕྱག་མ་བྱས་ཀྱང་ཉེས་པ་མེད་ལ། རབ་ཏུ་བྱུང་བ་བསོད་ནམས་བསགས་པའི་ཞིང་ཡིན་པའི་ཕྱག་བྱས་ན་བསོད་ནམས་འབྱུང་བས་ཕྱག་བྱའོ། །
1-528
བསྙེན་པར་མ་རྫོགས་པ་ནི་དགེ་ཚུལ་དང་དགེ་སློབ་མ་དང་དགེ་ཚུལ་མ་སྟེ་དེ་དག་མཚན་མཐུན་པ་དག་ནི་གཞོན་པས་རྒན་པ་དང་། བསྙེན་པར་རྫོགས་པ་ལ་ཕྱག་བྱའོ། །མཚན་ཐ་དད་པ་
ནི། དགེ་ཚུལ་མས་ནི་དགེ་ཚུལ་ལའང་ཕྱག་བྱ་སྟེ་སྡོམ་པས་མཉམ་ཡང་རྟེན་གྱིས་ཁྱད་པར་དུ་འཕགས་པའོ། །དགེ་ཚུལ་གྱིས་ནི་དགེ་ཚུལ་མ་ལ་ཕྱག་མི་བྱ་སྟེ་སྡོམ་པས་མཉམ་ཞིང་རྟེན་གྱིས་
ཁྱད་པར་དུ་འཕགས་པས་སོ། །དགེ་སློབ་མ་དང་དགེ་སློང་མས་ནི་དགེ་ཚུལ་ལ་ཕྱག་མི་བྱ་སྟེ་འདི་རྟེན་གྱི་ཁྱད་པར་དུ་འཕགས་ཀྱང་སྡོམ་པས་འདི་གཉིས་མཆོག་ཡིན་པའི་ཕྱིར་རོ། །དགེ་སློང་
ལ་ནི་དགེ་སློང་མ་བསླབ་པ་ཆེར་རྒན་ཀྱང་ཕྱག་བྱ་སྟེ། སྡོམ་པས་མཉམ་ཡང་རྟེན་གྱིས་དགེ་སློང་མཆོག་ཡིན་པའི་ཕྱིར་དང་། ལྕི་བའི་ཆོས་བརྒྱད་ལས། དགེ་སློང་མ་བསྙེན་པར་རྫོགས་ནས་ལོ་བརྒྱ་
ལོན་ཡང་དགེ་སློང་གསར་བུ་ལ་ཕྱག་བྱ་བར་གསུངས་པའི་ཕྱིར་རོ། །རྒྱུ་མཚན་འདིའི་ཕྱིར་ན་དགེ་སློང་མ་ལ་ནི་དགེ་སློང་གི་རྣམ་པ་ཐམས་ཅད་དུ་འདུད་པར་མི་བྱའོ། །རབ་ཏུ་བྱུང་བ་
ཡིན་ཀྱང་ཕྱག་བྱ་བའི་གནས་མ་ཡིན་པ་དུ་མ་ཡོད་དེ། བཅོམ་ལྡན་འདས་ལ་ཉེ་བར་འཁོར་གྱིས་ཞུས་པ། བཙུན་པ་ཕྱག་མི་བགྱི་བ་དུ་མཆིས། ཉེ་བར་འཁོར་སུམ་ཅུ་རྩ་གཉིས་ཏེ། བསྡིགས་པའི་ལས་བྱས་པ་དང་། 
1-529
བསྐྲད་པའི་ལས་བྱས་པ་དང་། ཕྱིར་འགྱེད་པའི་ལས་བྱས་པ་དང་། མ་མཐོང་བས་གནས་ནས་ཕྱུང་བ་དང་། ཕྱིར་མི་འཆོས་པས་གནས་ནས་ཕྱུང་པ་དང་། སྡིག་པ་ཅན་གྱི་ལྟ་བའི་རྣམ་པ་མི་གཏོང་
བས་གནས་ནས་ཕྱུང་བ་དང་། སྤོ་བ་བྱེད་པ་དང་། གཞི་ནས་སྤོ་བ་བྱེད་པ་དང་། མགུ་བ་སྤྱོད་པ་དང་། གཞི་ནས་མགུ་བ་སྤྱོད་པ་དང་། བསླབ་པ་བྱིན་པ་དང་། ཟ་མ་དང་། མ་ནིང་
དང་། དགེ་སློང་མ་སུན་བྱུང་བ་དང་། རྐུ་ཐབས་སུ་གནས་པ་དང་། ཐ་དད་པར་གནས་པ་དང་། གནས་པར་མི་བྱ་བ་དང་། མ་བསད་པ་དང་། ཕ་བསད་པ་དང་། དགྲ་བཅོམ་པ་བསད་པ་དང་།
དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བ་དང་། གཅེར་བུ་དང་། གོས་གཅིག་པ་དང་། སྙོམ་པར་ཞུགས་པ་དང་། རྒྱབ་ཀྱི་ཕྱོགས་པ་དང་། སོ་ཤིང་ཟ་བ་
དང་། གཅི་བ་བྱེད་པ་དང་། ཁྱིམ་གཞན་དུ་འདུག་པའོ་ཞེས་སོ། །དེ་དག་ལས་ཁྱིམ་གཞན་དུ་འདུག་པ་མ་གཏོགས་པ་དག་ལ་ནི་ཁྱིམ་པས་ཀྱང་ཕྱག་བྱ་བ་མ་ཡིན་ཏེ། རྒྱ་ཆེར་འགྲེལ་པར།
མ་གཏོགས་པ་གཞན་ཐམས་ཅད་ནི་ཁྱིམ་པས་ཕྱག་མི་བྱ་བར་རིགས་ཏེ། འདི་ལྟར་སྤོ་བ་ལ་སོགས་པ་སྤྱོད་པ་ནི་སྡིག་པ་ཆེན་པོ་དང་ལྡན་པ་ཡིན་པས་དགེ་ལ་ཡང་ཁྱིམ་པས་ཕྱག་མི་བྱ་བར་རིགས་ལ་ནན་ཏུར་བྱས་པ་དག་ཀྱང་སྤངས་པ་ཡིན་པའི་ཕྱིར་རོ། །
1-530
རབ་ཏུ་བྱུང་བ་ཁྱིམ་གཞན་ན་འདུག་པ་ལ་ནི་ཁྱིམ་པས་ཕྱག་བྱ་དགོས་ཏེ། དེ་ཉིད་ལས། ཁྱིམ་གཞན་ནི་ཁྱིམ་པ་རྣམས་ཀྱི་སྤྱོད་ཡུལ་ཡིན་པའི་ཕྱིར། རབ་ཏུ་བྱུང་བ་ཁྱིམ་གཞན་ན་འདུག་
པ་དག་ལ་ཡང་ཁྱིམ་པས་ཕྱག་བྱ་དགོས་ཞེས་སོ། །གཞན་ཡང་མདོ་རྩ་བ་ལས། སྦགས་པ་ལ་ཕྱག་མི་བྱའོ། །སྦགས་པས་ཕྱག་མི་བྱའོ། །དེས་བདག་གིར་མི་བྱའོ། །སྦགས་པ་ལས་མི་བྱའོ་ཞེས་གསུངས་
ཏེ། དེ་ནི་འདི་ལྟར་ལུང་ལས། བཅོམ་ལྡན་འདས་ཀྱིས་ནད་པ་ལ་བལྟ་བར་བྱའོ་ཞེས་བཀའ་རྩལ་པ་དང་། ནད་པ་ལ་བལྟ་བའི་དགེ་སློང་རྒན་པོ་དག་ཀྱང་འོང་། གཞོན་ནུ་དག་ཀྱང་འོང་པས།
གཞོན་ནུ་གང་ཡིན་པ་དེ་དག་ནི་དེ་ལ་ཕྱག་འཚལ་བར་བྱེད། རྒན་པོ་གང་ཡིན་པ་དེ་དག་ལ་ནི་ནད་པ་དེ་ཕྱག་འཚལ་བར་བྱེད་པས་སྐྱོ་བར་གྱུར་ནས། བཀའ་རྩལ་པ། སྦགས་པ་
ལ་ཕྱག་མི་བྱ། སྦགས་པས་ཕྱག་མི་བྱ། སྦགས་པས་ཕྱག་བདག་གིར་མི་བྱ། སྦགས་པ་ལས་ཕྱག་བདག་གིར་མི་བྱའོ། ། སྦགས་པ་ལ་ཕྱག་བྱེད་དམ། སྦགས་པས་ཕྱག་བྱེད་ན་འགལ་ཚབས་ཅན་དུ་འགྱུར་
རོ་ཞེས་སོ། །སྦགས་པ་ནི་དེ་ཉིད་ལས། བཙུན་པ་སྦགས་པ་དུ་ཞིག་མཆིས་ལགས། ཉེ་བར་འཁོར་སྦགས་པ་ནི་གཉིས་ཏེ། ཟས་ཀྱིས་སྦགས་པ་དང་། མི་གཙང་བས་སྦགས་པའོ། །དེ་ལ་ཟས་ཀྱིས་སྦགས་པ་ནི་སོ་ཤིང་དང་བཟའ་བ་དང་བཏུང་བ་དང་འབྲས་བུ་དང་རྩ་བ་ལ་སོགས་པ་ཟ་བས་བྲེལ་བའོ། །
1-531
མི་གཙང་བས་སྦགས་པ་ནི་བཤང་བ་དང་གཅི་བ་དང་དེ་དག་བཀྲུ་བ་མི་གཙང་བའི་གནས་ཀྱི་བྱི་དོར་བྱ་བ་བྱེད་པའོ་ཞེས་གསུངས་པས་དེ་ལྟ་བུའོ། །ཡང་མདོ་རྩ་བ་ལས། འདི་ལ་
གཅེར་བུ་ཉིད་དང་གོས་གཅིག་པ་ཉིད་ནི་སྦགས་པ་དང་འདྲའོ་ཞེས་གསུངས་ཏེ། གླེང་གཞི་ནི་མཉན་ཡོད་ནའོ། །དགེ་སློང་གཉིས་ཞི་གནས་ཁང་གཅིག་ན་གནས་ཏེ། དེ་གཉིས་ལས་གཅིག་གིས་གཞོན་ནུ་གཞན་
ཞིག་རབ་ཏུ་བྱུང་བ་དང་། དེ་རབ་ཏུ་གཉིད་ཆེ་བས་རིང་ཞིག་ན་ལྡང་བ་དང་དེ་ལ་མཁན་པོ་རྟག་ཏུ་གཤེའོ། །ཇི་ཙམ་དུས་གཞན་ཞིག་ན་རིང་ཞིག་གཉིད་ཀྱི་ལོག་པ་དང་། སྔ་མོར་
ལངས་ཏེ་རྔུལ་གཟན་དང་ཤམ་ཐབས་གྱོན་ནས་མཁན་པོའི་དྲུང་དུ་སོང་བ་དང་། དེ་ཡང་ལངས་ཏེ་ཤམ་ཐབས་གྱོན་ཞིང་འདུག་པ་དེའི་རྐང་པ་ལ་མགོ་བོས་ཕྱག་འཚལ་བ་དང་། དེ་སྐྲ་དང་ཁ་
སྤུ་བྲེགས་ནས་རིང་པོ་མ་ལོན་པས་དེ་ལངས་པའི་མགོ་ལ་མཁན་པོའི་ཤམ་ཐབས་ཐོགས་ནས་ལྷུང་སྟེ་སྒྲེན་མོར་གྱུར། དེའི་རྔུལ་གཟན་ཡང་ལྷུང་པར་གྱུར་ནས་གཉིས་ཀ་སྒྲེན་མོར་གྱུར་ཏེ་མི་མཛེས་
པར་འདུག་པ། གནས་ཁང་གཅིག་ན་གནས་པས་མཐོང་སྟེ། དེས་ཚེ་དང་ལྡན་པ་དག་བཟང་ངོ་ཇི་ལྟར་སྐྱེས་བུའི་མཚན་དང་ལྡན་པར་ངས་ད་གདོད་ཤེས་སོ་སྨྲས་པ་དང་། གཉིས་ཀ་སྐྱེངས་ཏེ་སྤོབས་པ་མེད་པར་སོང་ནས། 
1-532
དེས་དེ་ལ་སྤྱོས་པ་དང་། དེ་ལ་དགེ་སློང་དག་གིས་སྨྲས་པ། ཚེ་དང་ལྡན་པ་ཁྱོད་ལ་རྟག་ཏུ་གཤེ་བར་གྱུར་ན་ཁྱོད་ཀྱིས་ཅི་ཞིག་བྱས། དེས་སྨྲས་པ། འདི་དང་སྔོན་ནི་ལྷན་ཅིག་
འདུམ་པར་རུང་ན་ད་ནི་འདུམ་པར་མི་རུང་བས་ག་ཤེད་གཅིག་ཏུ་འགྲོ་བར་བྱའོ། །དེ་དག་གིས་ཅི་ལས་གྱུར་ཅེས་སྨྲས་པ་དང་། དེས་ཇི་ལྟར་གྱུར་པར་རྒྱས་པར་སྨྲས་སོ། །དེ་དག་གིས་
ཚེ་དང་ལྡན་པ་ཁྱོད་ཀྱིས་ཉེས་པས་གཤེ་བ་ནི་གནས་ཡིན་ནོ་ཞེས་སྨྲས་པ་དང་། དེ་ཅང་མི་སྨྲ་བར་གྱུར་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། དགོངས་པ།
ཉེས་དམིགས་གང་ཡིན་པ་དེ་ནི་དེ་ལྟ་བུ་ལས་གྱུར་ཏོ་སྙམ་དུ་ཐུགས་ཀྱིས་མཁྱེན་ནས་བཀའ་རྩལ་པ། དགེ་སློང་དག་དེ་ལྟ་བས་ན་ཆོས་གོས་གཅིག་གྱོན་པ་དེས་ཀྱང་ཕྱག་མི་བྱ། ཆོས་
གོས་གཅིག་གྱོན་པ་ལ་ཡང་ཕྱག་མི་བྱ། ཆོས་གོས་གཅིག་གྱོན་པས་ཕྱག་བྱེད་པ་ཡང་བདག་གིར་མི་བྱའོ། །དགེ་སློང་དག་ཆོས་གོས་གཅིག་གྱོན་པས་ཕྱག་བྱེད་དམ། ཆོས་གོས་གཅིག་གྱོན་པ་ལ་ཕྱག་
བྱེད་དམ། ཆོས་གོས་གཅིག་གྱོན་པས་ཕྱག་བྱེད་པ་བདག་གིར་བྱེད་ན་འགལ་ཚབས་ཅན་དུ་འགྱུར་རོ་ཞེས་སོ། །གཅེར་བུ་ནི་གོས་མེད་པ་དང་། གོས་གཅིག་པ་ནི་མཐང་གོས། ཤམ་ཐབས་ཙམ་གྱོན་པ་ཞིག་གོ །
1-533
ཕྱག་འཚལ་བའི་གནས་ཀྱང་ཉི་མ་དང་ཟླ་བ་དང་ནོར་བུ་ལ་སོགས་པའི་འོད་ཀྱིས་སྣང་བ་དང་བཅས་པའི་སར་ཕྱག་བྱའི་མུན་པའི་ཁྲོད་དུ་ནི་མ་ཡིན་ཏེ། ལུང་ལས། དགེ་སློང་ཞིག་ཆབ་
ལུད་བོད་སྟེ་ན་བ་དེས་ས་ལ་མཆིལ་མ་བོར་བས་མལ་གྱི་གཡས་གཡོན་གཉིས་མི་མཛེས་པར་བྱས་སོ། །དེའི་ཚེ་དེའི་ལྷན་ཅིག་གནས་པ་ནངས་པར་ལངས་ཏེ་གནས་ཁང་དུ་ཞུགས་ནས་ཕྱག་བྱས་
ཏེ་ནད་དྲིས་ནས་བྱུང་ངོ་། །དེས་ཕྱག་འཚལ་བ་ན་འཔྲལ་བ་ལ་མཆིལ་མའི་ཐལ་བ་དེ། དགེ་སློང་རྣམས་ཀྱིས་མཐོང་སྟེ་སྨྲས་པ། ཚེ་དང་ལྡན་པ་གང་དུ་ཁྱོད་ཀྱི་འཔྲལ་བ་ལ་མཆིལ་མ་
འདི་རེག དེས་སྨྲས་པ། མཁན་པོ་ཆབ་ལུད་ན་ན། དེས་ས་ལ་མཆིལ་མ་བོར་བར་མ་གྱུར་གྲང་། རེ་ཤིག་ལྟའོ་ཞེས་དེ་གནས་ཁང་དུ་ཞུགས་པ་དང་། མལ་གྱི་གཡས་གཡོན་དུ་མཆིལ་མ་བོར་
བ་མཐོང་ངོ་། །དེ་དགེ་སློང་དག་ལ་བསྙད་པ་དང་། དགེ་སློང་དག་འཕྱ་ཞིང་སྨོད་པར་བྱེད་པའི་སྐབས་དེ། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཀའ་སྩལ་པ། དགེ་སློང་གིས་གནས་
མལ་བཅས་པར་མཆིལ་མ་དོར་བར་ཡང་མི་བྱ། མུན་པར་ཕྱག་བྱེད་པས་མགོས་གཏུག་པར་ཡང་མི་བྱའི། ཚིག་ཙམ་གྱིས་ཕྱག་བྱ་ཞིང་གང་ཅུང་ཟད་བྱ་བ་ཡོད་ནའང་ཚིག་ཙམ་གྱིས་དྲི་བར་བྱའོ། །
1-534
གཞན་ཡང་གང་ལ་ཆམ་པ་དང་ཁ་ཆུ་བོད་པ་དེས་མཆིལ་མའི་སྣོད་ཉེ་བར་གཞག་པར་བྱའོ་ཞེས་སོ། །དོན་དེ་ཉིད་མདོ་རྩ་བ་ལས་ཀྱང་། ཕྱག་འཚལ་བའི་གནས་མུན་ཁྲོད་ཕྱག་དང་བཅས་པའི་
ཚིག་བརྗོད་པར་བྱའོ་ཞེས་གསུངས་སོ། །དེའི་ཕྱིར་མུན་པའི་ཁྲོད་དག་ཏུ་མཁན་པོ་དང་སློབ་དཔོན་དག་ལ་བྱ་བ་ཞུ་ནའང་མགོ་བོས་གཏུག་པར་མི་བྱའོ། །མཁན་པོ་ཕྱག་འཚལ་ལོ་ཞེས་ཕྱག་དང་བཅས་
པའི་ཚིག་དོན་དེ་ཉིད་མདོ་རྩ་བ་ལས་ཀྱང་། ཕྱག་འཚལ་བའི་གནས་མུན་ཁྲོད་དུ་ཕྱག་དང་བཅས་པའི་ཚིག་བརྗོད་པར་བྱའོ་ཞེས་གསུངས། བརྗོད་ནས་བྱ་བ་ཞུ་བར་བསྟན་ལ། གར་བབ་བབ་ཏུ་མཆིལ་
མ་དང་ལུད་པ་འདོར་བའང་བཀག་པ་ཡིན་ནོ། །ཡང་ཕྱག་གི་དོན་ནི་ལུས་ཐམས་ཅད་ཀྱི་ཕབ་སྟེ་ཡན་ལག་ལྔས་བཙལ་བ་དང་། སྒྱིད་པ་ནས་བཟུང་སྟེ་མགོ་བོས་གཏུག་པ་ཡིན་ནོ། །དེ་སྐད་
དུ་ཡང་ཉེ་བར་འཁོར་གྱིས། བཙུན་པ་བྲམ་ཟེ་པདྨའི་སྙིང་པོས། ནམ་འཁོར་གྱི་ནང་ན་མཆིས་སམ། སྟན་ལས་འཕགས་སམ། གཙུག་གཏོར་དང་གདུགས་ཕོག་པ་དེའི་ཚེ་བདག་ཕྱག་འཚལ་བར་གོའུ་ཏ་མ་ཁྱོད་
ཀྱིས་གཟུང་དུ་གསོལ་ཞེས་གསོལ་བ་གང་ལགས་པ། འཕགས་པའི་ཆོས་འདུལ་བ་ལ་དེ་ལྟ་བུ་དག་ཕྱག་འཚལ་བར་ཆུད་དམ། ཉེ་བར་འཁོར་ཕྱག་བྱ་བ་མ་ཡིན་གྱི། དེ་ནི་གུས་པར་སྨྲ་བའི་ཚིག་ཙམ་དུ་ཟད་ཀྱི་ལུས་འདུད་པ་དང་། 
1-535
ཚིག་ཏུ་འབྱིན་པ་གང་ཡིན་པ་དེ་ནི་མཆོད་པ་ཡིན་ནོ། །ཉེ་བར་འཁོར་འོན་ཀྱང་འཕགས་པའི་ཆོས་འདུལ་བ་ལ་ནི་ཕྱག་གཉིས་ཏེ། ཡན་ལག་ལྔ་པ་དང་། བྱིན་པ་ལ་འཁྱུད་པའོ་ཞེས་སོ། །
དེ་དག་གིས་ནི་ཕྱག་མི་བྱ་བའི་དམིགས་བསལ་དུ་མ་ཞིག་བསྟན་ཏོ། །འོན་ཀྱང་འདི་ལ་ཡང་དམིགས་བསལ་ཡོད་དེ། ཕྱག་བྱ་བའི་འོས་སུ་གྱུར་པ་ཞིག་དེའི་ཚེ་ཕྱག་མ་བྱས་པས་རྒྱུད་འཁྲུགས་
པ་ལ་སོགས་པའི་ཉེས་དམིགས་ཆེན་པོར་གྱུར་བར་མཐོང་ན་དགོས་པའི་དབང་གིས་སྔོན་གྱི་གནས་སྐབས་དྲན་པར་བྱས་ནས་ཕྱག་བྱ་སྟེ། མདོ་རྩ་བ་ལས། འདས་པ་ན་ཕྱག་བྱ་བ་ཡིན་པ་ལ་
ནི་ཕྱག་མི་བྱ་བ་ཉིད་མ་ཡིན་ནོ་ཞེས་དང་། ལུང་ལས་ཀྱང་། དགེ་སློང་རྒན་པོ་ཁྲོས་པའི་དབང་གིས་སྡོམ་པ་རྒྱུན་ཆད་དེ་སྦྲུལ་དུ་གྱུར་པ་ལ། དགེ་སློང་གཅིག་ཤོས་ཀྱི་སྔོན་གྱི་རྒྱུད་
དེ། མངོན་དུ་བྱས་ཏེ་གདུད་པར་བྱའོ་ཞེས་གསུངས་པ་ཡིན་ནོ། །ཡང་དགེ་འདུན་འདུས་པ་ལ་སྤྱིར་ཕྱག་བྱས་ནས་དེའི་ཁོངས་སུ་གཏོགས་པའི་སློབ་དཔོན་ལ་སོགས་པ་དག་ལ་ནི་སོ་སོར་ཕྱག་བྱེད་
མི་དགོས་ཏེ། དེ་དག་ལ་ཕྱག་བྱས་པ་ཡིན་པའི་ཕྱིར་རོ། །དེ་སྐད་དུའང་མདོ་རྩ་བ་ལས། ཚངས་པའི་ཕྱག་གིས་ནི་དེ་བྱས་པ་ཉིད་ཡིན་ནོ་ཞེས་སོ། །ཚངས་པའི་ཕྱག་ནི་དགེ་འདུན་ཐམས་ཅད་གནས་གཅིག་ཏུ་འཚོགས་པ་ལ་སྤྱིར་ཕྱག་བྱེད་པའོ། །
1-536
ཡང་ཕྱག་འཚལ་བའི་གནས་སྐབས་དག་ཏུ་གང་ཟག་གིས་ཕྱག་བཙལ་བ་ལ་ཡུལ་གྱིས་ཀྱང་ཨ་རོཀྵ་ཞེས་པའམ། ནད་མེད་གཅིག་ཅེས་བརྗོད་པར་བྱ་སྟེ། དེ་ཉིད་ལས། ཕྱག་འཚལ་བ་ལ་ཨ་རོཀྵ་ཞེས་
མི་བྱ་བར་མི་བྱའོ་ཞེས་སོ།། །། དེ་ལྟར་ཕྱག་བྱ་བའི་གནས་གནས་དང་མ་ཡིན་པ་བསྟན་ནས། ད་ནི་ཐོ་རངས་ལངས་ནས་ཁྲུས་བྱས་པའི་རྗེས་སུ་ཕྱག་བྱེད་དགོས་པས་གནས་ཁང་གཅིག་ན་བླ་
མ་དང་བདེ་བར་གཤེགས་པའི་སྐུ་གཟུགས་གང་ལ་ཕྱག་བྱ་ཞེ་ན། རྒྱ་འདུལ་ནི་སངས་རྒྱས་ལ་ཕྱག་བྱ་སྟེ། དེ་ལས་ལྷག་པའི་ཞིང་གཞན་མེད་པའི་ཕྱིར་དང་། ཀཱ་རི་ཀཱ་ལྔ་བཅུ་པ་ལས།
གདོང་དང་པོའི་དྲི་བཀྲུས་ནས། རྫོགས་སངས་རྒྱས་ལ་གུས་བཅས་ཕྱག་བྱ་ཞེས་དང་། སུམ་བརྒྱ་པ་ལས་ཀྱང་། བླ་མ་ལས་སྔར་ནང་པར་ལངས་ནས་ནི། གདོང་དག་བཀྲུས་ནས་བདེ་གཤེགས་ཕྱག་འཚལ་ཏེ། དེ་
ནས་བླ་མ་གུས་བཅས་ཕྱག་བྱས་ནས། བཏུད་དེ་སྐུ་ལ་མཉམ་མམ་ཞེས་དྲི་ཞིང་ཞེས་གསུངས་པའི་ཕྱིར་རོ་ཞེས་ཟེར་རོ། །རྨ་ཚོ་ནི་ཡོན་ཏན་གྱི་ངོས་ནས་སངས་རྒྱས་པས་ལྷག་པའི་ཞིང་གཞན་
མེད་མོད་ཀྱི་བཀའ་དྲིན་གྱིས་ངོས་ནས་བླ་མ་ཆེ་བས་སངས་རྒྱས་ལས་ལྷག་པའི་ཞིང་གཞན་མེད་པའང་མ་གྲུབ་ལ། ཀཱ་རི་ཀཱ་དག་ཏུ་བཤད་པའང་གནས་ཁང་སོ་སོའི་དབང་དུ་མཛད་པའི་ཕྱིར་སྒྲུབ་བྱེད་དུ་མི་རུང་ངོ་། །
1-537
གནོད་བྱེད་ནི་བཅོམ་ལྡན་འདས་ཉིད་ཀྱིས། རྒན་ནམ་ཡང་ན་གཞོན་ཡང་རུང་། གང་ལས་ཆོས་ནི་རྣམ་ཤེས་པ། །དེ་ལ་གུས་པར་ཕྱག་བྱ་སྟེ། །ཟླ་བ་ཚེས་ལ་ཇི་བཞིན་ནོ། །ཞེས་གསུངས་པའི་དང་
པོར་བླ་མ་ལ་ཕྱག་བྱའོ་ཞེས་ཟེར་རོ། །བདག་གིས་ནི་འདི་ལྟར་མཐོང་སྟེ། མདོ་ལས། ས་དང་བར་སྣང་དང་ནི་ལྷ་ཡུལ་ན། །བདེ་གཤེགས་ཁྱོད་མཉམ་མ་མཆིས་ལྷག་ཅི་སྨོས། །ཅེས་དང་། ལྷ་དང་
བཅས་པའི་འཇིག་རྟེན་ཐམས་ཅད་ན། །སངས་རྒྱས་དང་ནི་ལྷག་པའི་མཚུངས་པ་མེད། །ཅེས་པ་ལ་སོགས་པའི་ལུང་དུ་མ་ཡོད་པའི་ཕྱིར་སངས་རྒྱས་པས་ལྷག་པའི་ཞིང་གཞན་མེད་པར་ཡང་གྲུབ་ལ། སུམ་
བརྒྱ་པར་བཤད་ཡང་གནས་ཁང་སོ་སོའི་དབང་དུ་བྱས་པར་མི་གསལ་བའི་ཕྱིར་ལུང་དེ་ནི་གཞན་དུ་དྲང་པར་མི་ནུས་སོ། །གལ་ཏེ་གཞན་དུ་འདྲེན་པར་བྱེད་ནའང་འདུལ་བ་ཚིག་ལེའུར་བྱས་པ་
ལས། བརྟུལ་ཞུགས་ཅན་གྱི་བླ་མ་བས། །སྔར་ཉིད་མལ་ནས་ལངས་ནས་ནི། །སོ་ཤིང་བཅས་ནས་དེ་འོག་ཏུ། །སྟོན་པ་ལ་ནི་ཕྱག་བྱ་འོ། །དེ་ནས་རབ་གུས་སྐྱེད་པ་ཡིས། །བླ་མ་ལ་ནི་
ཕྱག་བྱ་ཞེས། །གསུངས་པའི་འདིའི་ལན་གདབ་དགོས་སོ། །ཡང་ལུང་ལས། རྒན་ནམ་ཡང་ན་གཞོན་ཡང་རུང་། །ཞེས་པ་ལ་སོགས་པའང་རྫོགས་སངས་རྒྱས་དང་བླ་མ་ལྷན་ཅིག་ན་འདུག་པ་ལ། དང་པོར་བླ་མ་ལ་ཕྱག་བྱེད་དགོས་པའི་སྒྲུབ་བྱེད་དུ་བྱེད་པ་འདི་ནི་མཚར་ཆེའོ། །
1-538
དེ་གཉིས་ལྷན་གཅིག་ཏུ་བཞུགས་པ་ལ་མ་ཡིན་པ་ནི་དེ་ཉིད་ལས་ཉེ་རྒྱལ་དང་སྤང་ནས་སྐྱེས་སྟོན་པའི་དྲུང་དུ་ཚངས་པར་སྤྱོད་པ་སྤྱད་པའི་དོན་དུ་མཐར་ཀྱིས་དོང་བ་ན། རྟ་ཐུལ་
ཉིན་མོ་སྤྱོད་པའི་ཕྱིར་ཤིང་ལྗོན་པ་ཞིག་གི་དྲུང་ན་འདུག་པ་མཐོང་ནས། ཉེ་རྒྱལ་གྱིས་སྤང་ནས་སྐྱེས་ལ་སྨྲས་པ། ཀྱེ་བཅོམ་ལྡན་འདས་ལ་བསྙེན་བཀུར་བྱའམ། གང་ལས་ཆོས་ཐོས་པ་དེ་ལ་
བྱ། དེས་སྨྲས་པ། གང་ལས་ཆོས་ཐོས་པ་དེ་ལ་བྱའོ། །དེ་ནས་རྟ་ཐུལ་ལ་ཕྱག་བྱས་ནས། བཅོམ་ལྡན་འདས་གང་ན་བ་དེར་སོང་བ་དང་། བཅོམ་ལྡན་འདས་ཀྱིས་ཀྱང་དེ་གཉིས་ཐག་རིང་པོ་
ཁོ་ན་ནས་གཟིགས་སོ་ཞེས་གསུངས་པའི་ཕྱོར་རོ། །གཞན་ཡང་འདི་ནི་དང་པོ་བླ་མ་ལ་ཕྱག་བྱེད་དགོས་པའི་སྒྲུབ་བྱེད་མ་ཡིན་པར་མ་ཟད་ཀྱི། ཆོས་འདི་པའི་དབང་དུ་བྱས་ནས་བསླབ་པ་
རྒན་པོ་དག་གིས་གཞོན་ནུ་དག་ལས་ཆོས་ཐོས་ན་དེ་ལ་ཕྱག་བྱའོ་ཞེས་པའི་སྒྲུབ་བྱེད་ཀྱང་མ་ཡིན་ཏེ། འདི་བཅོམ་ལྡན་འདས་ཉིད་ཀྱིས་གསལ་པོར་བསྟན་ཟིན་ཏོ། །ཇི་སྐད་དུ་ཞེ་ན། མྱ་
ངན་ལས་འདས་པ་ལས། བཀའ་རྩལ་པ། རྒན་ནམ་ཡང་ན་གཞོན་ཡང་རུང་ཞེས་པ་ལ་སོགས་པ་ནི་མ་འོངས་པའི་དུས་ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ངས་བསྟན་པ་ཡིན་གྱི་ཉན་ཐོས་ཀྱི་ཐེག་པ་རྣམས་ཀྱི་ཕྱིར་དེ་སྐད་བསྟན་པ་ན་མ་ཡིན་ནོ་ཞེས་གསུངས་པའི་ཕྱིར་རོ། །
1-539
དེའི་ཕྱིར་ཆོས་འདི་པའི་དབང་དུ་བྱས་ན་རང་པས་བསླབ་པ་གཞོན་པ་དང་། ཁྱིམ་པ་དང་ཚུལ་ཁྲིམས་འཆལ་པ་དག་ལས་ཆོས་ཐོས་ན་ཡང་གཞན་ཞབས་ཐོག་སྲི་ཞུ་རྣམས་སྒྲུབ་པར་བྱའི་ཕྱག་བྱ་
བ་ནི་མ་ཡིན་ནོ། །འདི་ནི་རྒྱུད་སྡེ་དག་ལས་ཀྱང་འབྱུང་སྟེ་མངས་སུ་དོགས་པས་མ་སྤྲོས་སོ། །དེས་ན་ཨུ་དུམ་འབའ་རའི་མེ་ཏོག་ལྟར་ཆེས་རྙེད་པར་དཀའ་བའི་ཐུབ་པའི་བསྟན་པ་འདི་
ལ་གཞོན་ནུ་ལ་རབ་ཏུ་བྱུང་ནས་རྣམ་པར་དག་པའི་བརྟུལ་ཞུགས་དྲི་མ་མེད་པའི་ཁུར་ཡུན་རིང་དུ་བཟུང་པའི་གནས་བརྟན་རྒན་རབས་དེ་དག་ནི་ལྷ་དང་བཅས་པའི་འཇིག་རྟེན་གྱི་མཆོད་པའི་
གནས་ཡིན་ནོ། །དེའི་ཕྱིར་བུ་དག་གིས་ཀྱང་ཁས་བླངས་པའི་ཚུལ་ཁྲིམས་ཉེས་ལྟུང་གི་དྲི་མས་ནག་ནོག་ཏུ་མི་འགྱུར་བར་དྲན་པ་དང་ཤེས་བཞིན་དང་བག་ཡོད་པ་སེམས་སྲུང་པ་ལ་བརྩོན་པར་
གྱིས་ཤིག དེ་དག་ནི་ཞར་ལ་འོངས་པའོ།། །།
༄། །ལག་ལེན་ལ་ཇི་ལྟར་བྱ་བ་བཤད་པ།
ད་ནི་ལག་ལེན་ལ་ཇི་ལྟར་བྱ་ཞེ་ན། སྣར་ཐང་པ་ཞེས་ཕྱོགས་ཀུན་ཏུ་གྲགས་པར་གྱུར་པའི་བླ་མ་དེ་དག་ནི་རྣམ་པར་དག་པའི་ཚུལ་
ཁྲིམས་དང་ལྡན་ཞིང་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཐུགས་རྒྱུད་བརླན་པའི་ཐེག་པ་ཆེན་པའི་དགེ་བའི་བཤེས་གཉེན་ཤ་སྟག་སྟེ། དེ་དག་ནི་བླ་མ་ལྔ་བཅུ་པ་ལས། སློབ་དཔོན་དང་ནི་རྡོ་རྗེ་འཛིན། །
1-540
ཐ་དད་པར་ནི་མི་བརྟག་གོ །ཞེས་དང་། སློབ་དཔོན་ཆེན་པོ་ཨིནྟྲ་བྷུ་ཏིས། བླ་མ་སངས་རྒྱས་བླ་མ་ཆོས། །བླ་མ་དེ་བཞིན་དགེ་འདུན་ཏེ། །བླ་མ་དཔལ་ལྡན་རྡོ་རྗེ་ཅན། །ཞེས་དང་། སློབ་
དཔོན་དེ་ཉིད་ཀྱིས་ཡེ་ཤེས་གྲུབ་པ་ལས་ཀྱང་། བླ་མ་སངས་རྒྱས་ཆོས་འགྱུར་ཞིང་། །དགེ་འདུན་ཡང་ནི་དེ་བཞིན་ཏེ། །དེ་ཡི་དྲིན་གྱིས་ཤེས་འགྱུར་བས། །དེ་བས་དཀོན་མཆོག་གསུམ་ཡིན་ནོ། །ཞེས་པ་
ལ་སོགས་པ་ཐེག་པ་ཆེན་པོའི་གཙུག་ལག་དག་ལས་མང་དུ་འབྱུང་སྟེ། དེ་དག་གི་རྗེས་སུ་འབྲང་ནས། བདེ་བ་དང་ལེགས་པ་ཐམས་ཅད་ཀྱི་རྩ་བ་བླ་མ་དམ་པ་སངས་རྒྱས་སུ་བལྟ་
བར་བྱ་བ་ཡིན་པའི་ཕྱིར་དང་པོར་བླ་མའི་ཕྱག་མཛད་པ་ཡིན་ནོ། །དེ་ནི་འདི་ལྟར་བླ་མའི་དྲུང་དུ་ལུས་ངག་ཡིད་གསུམ་གུས་པའི་སྒོ་ནས་ཕྱག་གསུམ་དང་། པུས་མོ་གཡས་པའི་ལྷ་ང་
ས་ལ་རེག་པའི་ཞེ་ས་གསུམ་གྱི་བར་པ་བྱས་ཏེ། ཐུགས་དམ་གྱིས་བསྙེལ་བ་མ་ལགས་པ་དགུང་ལ་སྐུ་ཁམས་བདེ་བར་བཞུགས་ལགས་སམ་ཞེས་བསྙུན་རྨེད་པ་ཞུའོ། །དེའི་དོན་ནི་ཀཱ་རི་ཀཱ་
ལས། ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །ཞེས་པའི་དོན་ཏོ། །ཡང་ཞེས་པ་གཅིག་སྟེ་ཞེ་ས་གསུམ་དང་ཕྱག་གསུམ་དང་བྱས་ནས་སྐུ་གསུང་ཐུགས་ཀྱི་རྟེན་རྣམས་ཀྱི་སྤྱན་སྔར་དོང་སྟེ། 
1-541
དད་པའི་ཧུར་ཀ་བསྐྱེད་ནས་འོག་ནས་འཆད་པར་འགྱུར་བའི་ཡན་ལག་བདུན་པ་རྒྱས་བསྡུས་ཇི་ལྟར་འདོད་པ་བཞིན་བྱའོ། །དེ་ནས་ཚ་བའི་དུས་ལ་བབ་པ་ན་དགེ་འདུན་སྡུད་པའི་བརྡའ་དུང་གི་
སྒྲ་བྱུང་བ་དང་རིང་པོ་མ་ལོན་པར་གྲལ་དུ་འདུ་བར་བྱ་སྟེ། དགེ་འདུན་གྱི་ནང་ཁྲིམས་ཀྱི་ཡི་གེ་ལས་ཀྱང་། དུང་མ་བུས་པར་མི་འདུ་ཞིང་བུས་ནས་དུང་རྡེག་མི་བྱ་བ་དང་
ཞེས་གསུངས་པའི་ཕྱིར་རོ། །དེ་ནས་གནས་ཁང་དེ་ནས་སྐུ་གསུང་ཐུགས་ཀྱི་རྟེན་བཞུགས་པའམ། དགེ་སློང་བཞིར་ལོངས་ན་དགེ་འདུན་དུ་ཚང་བ་ཡིན་པས་དེ་དག་ལ་ཕྱག་བྱ་ཞིང་། བཞིར་མ་ལོངས་ན་
རང་བས་རྒན་པ་གང་འདུག་པ་མེད་ལ་ཕྱག་བྱས་ནས་རང་བས་རྒན་པའི་རྒན་གྲལ་མགོ་དང་གཞོན་པའི་གྲལ་བཞུགས་དུ་མི་བསྡད་པར་ཐོབ་སྐལ་གང་ཡིན་པ་ལའོ། །གལ་ཏེ་རྒན་གཞོན་མཉམ་པར་
གྱུར་ན་ནི་ཇི་ལྟར་སྔ་རིམ་ནས་བསྡད་པར་བྱ་སྟེ། མདོ་རྩ་བ་ལས། སྔར་འོངས་པ་དང་པོ་ཡིན་ནོ། །ཞེས་སོ། །དེ་ནས་དགེ་འདུན་ཐམས་ཅད་འདུས་པ་དང་། དགེ་འདུན་གྱི་གནས་བརྟན་དགེ་
བའི་བཤེས་གཉེན་དེ་བྱོན་པའི་ཚེ་དགེ་འདུན་ཐམས་ཅད་བཞེངས་ནས་ཕྱག་གསུམ་དང་ཞེ་ས་གཅིག་བྱ་སྟེ་འཁོད་བཞུགས་པ་ན། དབུ་མཛད་དེ་གོམ་པ་གང་ནང་དུ་ནུར་ཏེ་ཞེ་ས་གཅིག་བྱས་ཏེ་བསྙུན་རྨེད་པ་གོང་བཞིན་བྱའོ། །
1-542
དགེ་བའི་བཤེས་གཉེན་དེས་ཀྱང་སྙོམས་པར་མཆིས་དགེ་འདུན་བདེ་བར་བཞུགས་ལགས་སམ་ཞེས་པའོ། །དེ་ནས་ཐམས་ཅད་ཀྱིས་ཞེ་ས་གཅིག་དང་ཕྱག་གསུམ་བྱའོ། །དེ་ནས་སོ་སོ་ནས་དགེ་འདུན་ཐམས་ཅད་འཚལ་
བར་བསམས་ལ་ཕྱག་གསུམ་དང་ཞེ་ས་གོང་བཞིན་བྱས་ནས། ཚེ་དང་ལྡན་པ་གཞོན་གཅིག་གི་དགེ་འདུན་དབུ་མཛད་ཐུགས་དམ་གྱིས་ཞེས་པའི་བསྙུན་རྨེད་བྱ་ཞིང་། དབུ་མཛད་དེས་ཀྱང་། དགེ་འདུན་སྙོམ་པར་
མཆིས་ཚེ་དང་ལྡན་པ་བདེ་ལགས་སམ་ཞེས་པ་དང་། ཡང་ཞེ་ས་དང་ཕྱག་གསུམ་མཛད་དེ། དེ་ལ་ཕྱག་སྐོར་ཞེས་པའི་བསྙུན་རྨེད་ཐ་སྙད་མཛད་པར་སྣང་ངོ་། །དེ་ནས་གྲལ་མགོ་མས་མ་བཞུགས་
པར་གཞན་རྣམས་ཀྱིས་བཞུགས་ན་ཆེ་བཅོས་སུ་འགྲོ་བས་གོང་ནས་རིམ་པ་ལྟར་བཞུགས་པ་ནི་དམ་པ་རྣམས་ཀྱི་ཕྱག་ལེན་ཏོ། །བཞུགས་ཚུལ་ནི་གྲོལ་མགོ་མས་གཙུག་འདུག་མི་བྱ་ཞེས་ཏེ་དཀྱིལ་དཀྲུང་
བཅས་ནས་ལྷུན་ཆགས་པར་བྱའོ། །གྲལ་དབུས་པས་རྐང་པ་མི་བརྐྱང་ཞེས་ཏེ་འདི་ནི་ཐམས་ཅད་ཀྱིས་མི་བྱ་མོད་ཀྱི། ཁྱད་པར་དུ་གྲལ་དབུས་མ་དག་གིས་དེ་ལྟར་བྱས་པས་གྲལ་མགོ་མ་ལ་
ཆེར་གནོད་པའི་ཕྱིར་རོ། །དེས་ན་ཕྱེད་དཀྱིལ་ལྟ་བུས་འདུག་པར་བྱའོ། །གྲལ་གཞུག་པས་དཀྱིལ་དཀྲུང་མི་བྱ་ཞེས་ཏེ། དེ་ལྟར་བྱས་ན་ཆེ་བཅོས་སུ་འགྱུར་བར་པུས་བཙུགས་པའམ། ཙོག་འདུག་གིས་སོ། །དེ་ལྟར་གྲལ་དུ་བཀོད་པ་ལ་གསོལ་ཟས་འདྲེན་པའི་ཚུལ་ནི། 
1-543
སྔ་དྲོ་དང་པོ་གསོལ་ཟས་འདྲེན་པའི་གོང་རོལ་དུ་ཞལ་བསིལ་འདྲེན་པ་དང་མི་འདྲེན་པའི་ལུགས་གཉིས་ལས་འདིར་ནི་ཞལ་བསིལ་མི་འདྲེན་པའི་ལུགས་དེ་མཛད་པར་སྣང་སྟེ། དེའི་གོང་རོལ་དུ་གདོང་
དང་པའི་དྲི་མ་བཀྲུས་ནས་ཁྲུས་བྱས་པའི་རྗེས་ཐོགས་ཡིན་པའི་ཕྱིར་རོ། །དེ་ལས་གཞན་དུ་མ་སྦགས་པར་ཡོད་ཀྱང་ཟས་དང་བཏུང་བ་འདྲེན་པའི་གོང་རོལ་དུ་ཞལ་བསིལ་ངེས་པར་འདྲེན་ཏེ། བད་
གན་གྱི་བརླངས་ཀྱིས་ཁ་དྲི་མ་ཅན་དུ་གྱུར་པས་ལོངས་སྤྱད་དུ་མི་རུང་པའི་ཕྱིར་རོ། །དེ་སྐད་དུའང་མདོ་རྩ་བ་ལས། ཁ་དྲི་མ་ཅན་གྱི་བཟའ་བ་དང་བཏུང་བ་དག་ཀྱང་ངོ་ཞེས་
སོ། །འོ་ན་སྔ་དྲོ་ཡང་དེ་ལྟར་འགྱུར་བ་མ་ཡིན་ནམ་ཞེ་ན། ཁྲུས་བྱས་ནས་རིང་དུ་མ་ལོན་པས་དེ་ལྟར་འགྱུར་བའི་སྐྱོན་མེད་པར་དགོངས་སོ། །དེ་ནས་བླ་གོས་ལེགས་པར་གྱོན་པའི་
དགེ་ཚུལ་ཞིག་གིས་བྱིན་ལེན་སྟོབས་པར་བྱེད་དེ། དེ་ཡང་གསུང་ལས་ཟན་དེ་ལོངས་སྤྱད་བྱའི་གཙོ་བོ་ཡིན་པས་འགྲོན་ལ་བསྟན་བྱ་ན་དེ་འདྲེན་མཁན་ལ་བསྟན་ནས་ཞེས་སོ། །དེའི་ཚེ་འདྲེན་མཁན་
གྱིས་སཾ་པྲཱཔྟ་ཞེས་བརྗོད་པར་བྱ། ཞིང་དེ་མ་བརྗོད་པར་གནས་བརྟན་གྱིས་བླང་བར་མི་བྱ་སྟེ། མདོ་རྩ་བ་ལས། རྒན་པའི་མཐར་སཾ་པྲཱཔྟ་ཞེས་མ་བརྗོད་པར་དང་པོར་བླང་བར་མི་བྱའོ་ཞེས་སོ། །
1-544
ཇོ་བོའི་ཞལ་ནས་ཀྱང་ཁོ་བོ་ངན་པར་ཐལ་ཞེས་གསུང་སྐད། དྲུང་ན་ཡོད་པ་དག་གིས་ཅི་ནོངས་ལགས་ཞུས་པས། སཾ་པྲཱཔྟ་མ་བརྗོད་པར་ཟས་བླངས་ཞེས་གསུངས། ཅུང་ཞིག་ན་ཁོ་བོ་བཟང་པོར་
ཐལ་ཕྱིར་བཅོས་བྱས་ཞེས་གསུང་ནས་ཕྱག་ལེན་བཟང་པོ་དེ་ལྟར་མཛད་ཅེས་གསུང་སྐད་དོ། །དེའི་དོན་ནི་དུག་ཅན་རྣམས་དུག་མེད་པར་བྱས་ནས་དག་པར་བྱེད་པ་སྟེ། འདུལ་བ་ཚིག་ལེའུར་བྱས་པ་
ལས། རྒན་པའི་མདུན་དུ་འདྲེན་པ་ཡིན། སཾ་པྲཱཔྟ་བརྗོད་བྱ་སྟེ། དེ་སྒྲ་བཟའ་དང་བཏུང་བ་རྣམས། །ཤིན་ཏུ་དག་པར་བྱ་ཕྱིར་ཡིན། །ཞེས་སོ། །གླེང་བཞི་ནི་བཅོམ་ལྡན་འདས་འོད་མའི་ཚལ་ན་བཞུགས་
སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན་ཁྱིམ་བདག་ཤིན་ཏུ་བཟང་པོ་ཞེས་པ་ནོར་མང་ཞིང་ལོངས་སྤྱོད་ཆེ་བ་གཅེར་བུ་པ་ལ་དད་པ་ཞིག་གི་ཆུང་མ་སེམས་ཅན་དང་ལྡན་པར་
འདུག་ཏོ། །བཅོམ་ལྡན་འདས་ཀྱང་རྒྱལ་པོའི་ཁབ་དུ་བསོད་སྙོམས་ཀྱི་ཕྱིར་རྒྱུ་ཞིང་གཤེགས་པ་ན། ཤིན་ཏུ་བཟང་པོས་ཆུང་མ་ཁྲིད་ནས། བཅོམ་ལྡན་འདས་ལ་བདག་གི་མཆིས་འབྲང་འདི་ལ་སེམས་ཅན་ཞུགས་
པར་པར་གྱུར་ན་ཅི་ཞིག་དུ་བཙའ་བར་འགྱུར་བཀའ་རྩལ་པ། བུ་ཕོར་བཙའ་བར་འགྱུར། རིགས་གསལ་བར་འགྱུར། ལྷ་དང་མིའི་དཔལ་མྱོང་བར་འགྱུར། ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་ཐོབ་པར་འགྱུར་རོ། །
1-545
དེ་ནས་བཟའ་བ་དང་བཅའ་བ་དག་གིས་ལྷུང་བཟེད་བཀང་སྟེ་ཕུལ་ལོ། །དེའི་ཚེ་ཧ་ཅང་མི་རིང་བ་ཞིག་ན་གཅེར་བུ་བ་ཞིག་འདུག་པ་དེས་བསམ་པ། བདག་ཅག་ལ་བསླང་བའི་ཁྱིམ་གཅིག་
པུ་ཞིག་ཡོད་པ་དེ་ཡང་། དགེ་སྦྱོང་གོའུ་ཏ་མས་ཁ་དྲངས་ཀྱིས་སོང་ལ་ཅི་ལུང་བསྟན་བལྟའོ་སྙམ་ནས་སོང་སྟེ་སྨྲས་པ། ཁྱིམ་བདག་དགེ་སྦྱོང་གོའུ་ཏ་མ་འོངས་པར་གྱུར་ཏམ། བྱོན་ཏོ། །ཅི་
ཞིག་ལུང་བསྟན། བདག་གིས་དེ་ལ་ཆུང་མ་བསྟན་ཏེ་དྲིས་པ་དང་། སྔར་གྱི་དེ་དག་ལུང་བསྟན་ཏོ་ཞེས་སྨྲས་སོ། །གཅེར་བུ་པ་དེ་རྩིས་མཁས་པ་ཞིག་ཏེ། རྡོ་རྒྱུས་དཀར་པོ་བླངས་ཏེ་བརྩིས་
པ་དང་། དེ་ཁོ་ན་ལྟར་མཐོང་ནས་བསམས་པ། དེའི་རྗེས་སུ་བསྔགས་ན། གོའུ་ཏ་མ་ལ་དད་པར་འགྱུར་དུ་དོགས་ནས་ལག་པ་དཀྱོག་ཅིང་བཞིན་བསྒྱུར་བ་དང་། འཕགས་པ་ཅིའི་ཕྱིར་དེ་ལྟར་དུ་
མཛད། ཁྱིམ་བདག་འདི་ལ་ཅུང་ཟད་ནི་བདེན། ཅུང་ཟད་ནི་བརྫུན་ཏེ། བུ་ཕོར་སྐྱེ་བ་ནི་བདེན་ལ། གསལ་བ་ནི་མེའི་མིང་སྟེ། སྐལ་བ་ཆུང་ངུ་དེ་བཙལ་མ་ཐག་ཁྱིམ་མེས་འཚིག་པར་འགྱུར་
རོ། །མིར་གྱུར་པ་ལྷའི་དཔལ་མྱོང་བ་འགའ་ཡང་མེད་པས་དེ་ནི་བརྫུན་ལ། འདི་བཟའ་བ་དང་བགོ་བ་མེད་པས་རབ་ཏུ་འབྱུང་བ་བདེན་གྱིས་དགྲ་བཅོམ་པར་འགྱུར་བ་ནི་བརྫུན་ཏེ། གོའུ་ཏ་མ་ཡང་དགྲ་བཅོམ་པ་མ་ཡིན་ན་དེའི་ཉན་ཐོས་ལ་ལྟ་སྨོས་ཀྱང་ཅི་དགོས་ཞེས་སྨྲས་པ་དང་། 
1-546
ཁྱིམ་བདག་མི་དགའ་བར་གྱུར་ནས་སྨྲས་པ། འདི་ལ་བདག་གིས་ཇི་ལྟར་སྒྲུབ་པར་བགྱི། གཅེར་བུ་པས་སྨྲས་པ། བདག་ཅག་ནི་རབ་ཏུ་བྱུང་བ་སྟེ་ཁྱོད་ཉིད་ཤེས་སོ་ཞེས་སྨྲས་ཏེ་དེང་ངོ་། །
དེ་ནས་ཁྱིམ་བདག་གིས་སྨན་མ་ཡིན་པ་སྦྱིན་པར་བརྩམས་པ་དང་དེ་ཡང་དེ་ལ་སྨན་དུ་གྱུར་ཏོ། ། ཡང་བཀུ་མཉེ་བར་བརྩམས་པ་དང་གཡས་གཡོན་དག་ཏུ་བྲོས་ཏེ་གསད་པར་མ་ནུས་ནས་
དེའི་སྡུག་བསྔལ་གྱི་ཚོར་བས་ཆུང་མ་དུ་བར་བརྩམས་པ་དང་། ཁྱིམ་མཚེས་དག་རིང་པར་སོང་སྟེ་ཅིའི་ཕྱིར་དུ་ཞེས་དྲིས་པ་དང་ཁྱིམ་བདག་གིས་སྨྲས་པ། གདོན་མི་ཟ་བར་བཙའ་བའི་དུས་ལ་
བབ་པོ་ཞེས་སྨྲས་པ་དང་། དེ་དག་དོང་ངོ་། །དེ་ནས་ཁྱིམ་བདག་གིས་བསམས་པ་འདི་འདིར་གསད་མི་ནུས་ཀྱིས་དབེན་པ་ཞིག་ཏུ་བྱའོ་སྙམ་དེ། ཅི་ནས་འཆི་བར་འགྱུར་བ་དེ་ལྟར་བྱས་པས་
ཆུང་མ་ཤི་བར་གྱུར་ནས་སྦས་ཏེ་ཁྱིམ་དུ་འཁྱེར་ནས། ཤེས་ལྡན་དག་ཁོ་བོའི་ཆུང་མ་ཤིའོ་ཞེས་བྱས་ཏེ་དུར་ཁྲོད་འཁྱེར་ཏོ། །གཅེར་བུ་པ་དག་གིས་དེ་ཐོས་པ་དང་ཆེས་དགའ་སྟེ་གདུགས་
དང་རྒྱལ་མཚན་དག་ཐོགས་ནས་གྲོང་ཁྱེར་གྱི་ལམ་པོ་ཆེ་དག་ཏུ། ཤེས་ལྡན་དག་གོའུ་ཏ་མས་ཤིན་ཏུ་བཟང་པོའི་ཆུང་མ་ལ་བུ་ཕོ་བཙའ་བར་འགྱུར་བ་ལ་སོགས་པ་ལུང་བསྟན་པ་དེ་ཤི་ནས་དུར་ཁྲོད་དུ་འཁྱེར་ཏོ། །
1-547
ཤིང་གང་ལ་རྩ་བ་མེད་པ་དེ་ལ་ཡལ་ག་དང་ལོ་མ་དག་ག་ལ་ཡོད་ཅེས་ཟེར་རོ། །སྐབས་འདི་ལ་བཅོམ་ལྡན་འདས་ལ་ནི་མ་མཁྱེན་པའམ། མ་གཟིགས་པ་ཅུང་ཟད་ཀྱང་མེད་པས་
བཀའ་སྩལ་པ། ཀུན་དགའ་བོ་སོང་ལ་དེ་བཞིན་གཤེགས་པ་དུར་ཁྲོད་དུ་གཤེགས་པར་བཞེད་ཀྱིས། དགེ་སློང་དག་ལས་དེ་བཞིན་གཤེགས་པ་དང་ལྷན་ཅིག་འགྲོ་བར་སྤྲོ་བ་དེས་ཆོས་གོས་དག་སོ་སོ་
ནས་ལོང་ཤིག་ཆེས་བསྒོ་ཤིག དེ་ནས་ཀུན་དགའ་བོ་དེ་ལྟར་བསྒོ་བ་དང་། དགེ་སློང་རྣམས་འདུས་ཏེ་བཅོམ་ལྡན་འདས་དང་ལྷན་ཅིག་དུར་ཁྲོད་དུ་གཤེགས་པར་གྱུར་ཏོ། །རྒྱལ་པོ་གཟུགས་ཅན་སྙིང་པོ་
ཡང་བཅོམ་ལྡན་འདས་དུར་ཁྲོད་དུ་གཤེགས་པ་ལས་ན་ཤིན་ཏུ་བཟང་པོའི་ཆུང་མ་ལ་བརྟེན་ཏེ་གདུལ་བྱའི་དོན་ཆེན་པོ་ཞིག་མཛད་པར་འགྱུར་རོ་སྙམ་ཏེ་འཁོར་དང་བཅས་པ་དང་། ལྷ་དང་མིར་
བཅས་པའི་སྐྱེ་བོའི་ཚོགས་ཆེན་པོ་དེར་འདུས་པར་གྱུར་ཏོ། །དེའི་ཚེ་བཅོམ་ལྡན་འདས་ཞལ་འཛུམ་མཛད་ཅིང་སྐྱེ་བོའི་གུང་ལ་བཞུགས་པ་དང་། གཅེར་བུ་པ་དག་གིས་བསམས་པ། འདི་འཛུམ་པ་བྱེད་ཅིང་
འདི་ན་འདུག་པ་ལས་ན། སེམས་ཅན་ནི་མ་ཤི་བར་ངེས་སོ་སྙམ་ནས་སྨྲས་པ། ཁྱིམ་བདག་སེམས་ཅན་སྐལ་བ་ཆུང་ངུ་འདི་ནི་མ་ཤིའོ། །དེས་སྨྲས་པ། འཕགས་པ་དེ་ལྟར་གྱུར་ན་ཇི་ལྟར་བསྒྲུབ་བར་བགྱི། 
1-548
ཁྱིམ་བདག་ཁོ་བོ་ནི་བསླབ་པ་བླངས་པ་ཡིན་གྱིས་ཁྱོད་ཉིད་ཤེས་སོ་ཞེས་སྨྲས་པ་དང་། དེས་བུད་ཤིང་གཅེར་ཏེ་ཆུང་མའི་རོ་མེའི་ཕུང་པོའི་ནང་དུ་བཅུག་སྟེ་བསྲེགས་པ་དང་། དེའི་ལུས་ཐམས་
ཅད་ཚིག་ཀྱང་ལྟོའི་ཉེ་འཁོར་མ་ཚིག་པར་འདུག་པ་རྡོལ་ནས་པདྨ་བྱུང་སྟེ། དེའི་སྙིང་པོ་ལ་གཞོན་ནུ་གཟུགས་བཟང་ཞིང་བལྟ་ན་སྡུག་པ་ཞིག་འདུག་པ་སྲོག་ཆགས་བརྒྱ་སྟོང་དག་གིས་མཐོང་ནས་
ངོ་མཚར་ཆེར་སྐྱེ་ཞིང་། གཅེར་བུ་པ་དག་གི་ང་རྒྱལ་དང་རྒྱགས་པ་དག་ཉམས་པར་གྱུར་ཏོ། །དེའི་ཚེ་ཤིན་ཏུ་བཟང་པོ་ལ་བཀའ་སྩལ་པ། ཁྱིམ་བདག་གཞོན་ནུ་ལོང་ཤིག དེ་གཅེར་བུ་པའི་
གདོང་དུ་བལྟ་བ་ན། དེས་སྨྲས་པ་ཁྱིམ་བདག་མེ་ཕུང་འབར་བའི་ནང་དུ་ཞུགས་ནས་འཚིག་པར་མི་འགྱུར་རམ། དེ་སྐད་སྨྲས་པ་དང་དེས་མ་བླངས་སོ། །དེ་ནས་འཚོ་བྱེད་གཞོན་ནུས་གསོས་ལ་
བཀའ་རྩལ་པ། འཚོ་བྱེད་གཞོན་ནུ་ལོང་ཤིག དེས་ཐེ་ཚོམ་མེད་པར་མེ་ཕུང་དུ་ཞུགས་ཏེ་བླངས་སོ། །དེ་ལ་བཀའ་རྩལ་པ། འཚོ་བྱེད་དེ་ཁྱོད་ཉམས་པའི་གནོད་པ་དག་ཏུ་མ་གྱུར་ཏམ། གསོལ་
པ། བདག་རྒྱལ་པོའི་ཕོ་བྲང་དུ་སྐྱེས་པར་གྱུར་ཀྱང་བཅོམ་ལྡན་འདས་ཀྱི་བྱིན་བརླབས་ཀྱིས་ཞུགས་ཀྱི་ཕུང་པོ་ཙནྡན་ས་མཆོག་ལྟར་བསིལ་བར་གྱུར་པ་འདི་ལྟ་བུ་ནི་སྔོན་ཆད་མ་མྱོང་ལགས་སོ། །
1-549
དེའི་ཚེ་བཀའ་སྩལ་པ། ཁྱིམ་བདག་གཞོན་ནུ་ལོང་ཤིག དེ་ལོག་པར་ལྟ་བ་ལ་ཕྱོགས་པས་ལེན་པར་མི་བྱེད་ཅིང་། གཅེར་བུ་པའི་གདོང་དུ་བལྟ་བ་ན། དེས་སྨྲས་པ། ཁྱིམ་བདག་མེས་ནི་ཐམས་
ཅད་འཚིག་པ་ཡིན་ན་སྐལ་བ་ཆུང་བ་འདི་མ་ཚིག་པ་ལས་ན། འདི་ཁྱིམ་དུ་འཁྱེར་ན་ཁྱིམ་ཡང་འཚིག་ཅིང་ཁྱོད་ཀྱི་སྲོག་གི་བར་ཆད་དུ་འགྱུར་བར་ངེས་སོ། །དེས་བསམས་པ་བདག་ལས་
གཅེས་པ་མེད་དོ་སྙམ་ནས་མ་བླངས་པ་དང་། བཀའ་སྩལ་པ། རྒྱལ་པོ་ཆེན་པོ་གཞོན་ནུ་ལོང་ཤིག དེས་བླངས་ཏེ་བཅོམ་ལྡན་འདས་ཁྱེའུ་འདིའི་མིང་ཅིར་གདགས། བཀའ་སྩལ་པ། འདི་མེའི་ནང་དུ་སྐྱེས་
པས་འདིའི་མིང་མེ་སྐྱེས་ཞེས་བྱ་བར་གདགས་སོ། །དེ་ནས་མེ་སྐྱེས་མ་མ་བརྒྱད་ལ་གཏད་ནས་བསྐྱེད་བསྲིངས་སོ། །དེའི་ཞང་པོ་ཟོང་ཐོགས་ཏེ་ཡུལ་གཞན་དུ་སོང་བ་དེས་ཇི་ལྟར་གྱུར་པའི་གཏམ་
ཐོས་ཏེ། དེ་བརྫུན་དུ་མ་གྱུར་ཏམ་སྙམ་ནས་ཁྱིམ་མཚེས་དག་ལ་དྲིས་པ་དང་ཇི་ལྟར་གྱུར་པ་དེ་ལྟར་བརྗོད་དོ། །དེས་ནས་དེ་ཤིན་ཏུ་བཟང་པོའི་གན་དུ་སོང་སྟེ་སྨྲས་པ། ཁྱོད་ཀྱིས་
མི་རིགས་པ་ཞིག་བྱས་སོ། །ཅི་ཞིག་བྱས། ཁྱོད་ཀྱིས་ངའི་སྲིང་མོ་ལ་སེམས་ཅན་ཞུགས་པའི་འཆི་བར་འགྱུར་བ་དེ་ལྟར་བྱས་པས་འཆི་བའི་དུས་ལ་བབ་བར་བྱས་སོ། །དེས་ན་ཁྱེའུ་དབང་ཐང་ཅན་རྒྱལ་པོའི་ཕོ་བྲང་ན་འདུག་པས་དེ་བླངས་ན་དེ་ལྟ་ན་ལེགས་གལ་ཏེ་མི་ལེན་ན་གཉེན་དུ་ཡང་མི་རྩི་རབས་ཡིག་ཡང་འདོར་ཞིང་སྲང་དང་ལམ་གྱི་སུམ་མདོ་ལ་སོགས་པ་དག་ཏུ་ཤིན་ཏུ་བཟང་པོས་བདག་གི་སྲིང་མོ་བསད་དེ་ཆུང་མ་གསོད་པའི་འདི་ལ་གསུས་ཀྱང་གཏམ་འདྲེ་བར་མི་བྱའོ་ཞེས་མི་སྙན་པ་བསྒྲག་ཅིང་། 
1-550
རྒྱལ་པོའི་གནོད་པའང་བྱེད་དུ་གཞུག་གོ་ཞེས་སྨྲས་པ་དང་། དེས་བསམས་པ་འདི་སྐད་སྨྲ་བ་དེ་ང་སྦྱར་ན་དེ་ལྟར་བྱེད་ངེས་སོ་སྙམ་ནས། རྒྱལ་པོའི་གན་དུ་དོང་སྟེ་རྐང་པ་གཉིས་ལ་
ཕྱག་འཚལ་ནས་སྨྲས་པ། ལྷ་བདག་གི་ཉེ་དུ་པོའི་མཆིད་ནས་འདི་སྐད་ཅེས་ཇི་ལྟར་གྱུར་པ་གསོལ་ནས། དེའི་སླད་དུ་གཞོན་ནུ་མེ་སྐྱེས་བདག་ལ་སྩལ་བའི་རིགས་སོ་ཞེས་པ་དང་། ཁྱིམ་བདག་
གཞོན་ནུ་མེ་སྐྱེས་ངས་ཁྱོད་ལ་བླངས་པ་མ་ཡིན་གྱི། བཅོམ་ལྡན་འདས་ཀྱིས་ང་ལ་གཏད་པ་ཡིན་པས་གལ་ཏེ་དགོས་ན་བཅོམ་ལྡན་འདས་ལ་ཞུས་ཤིག བཅོམ་ལྡན་འདས་ཀྱི་ཞབས་ལ་ཕྱག་འཚལ་
ཏེ་བདག་གི་ཉེ་དུ་པོའི་མཆིད་ནས་ཞེས་པ་ལ་སོགས་པ་ཇི་ལྟར་གྱུར་པ་གསོལ་ཏེ། དེའི་སླད་དུ་བདག་ལ་རྩལ་དུ་གསོལ་ཞེས་པ་དང་། ཀུན་དགའ་བོ་རྒྱལ་པོའི་གན་དུ་བཏང་སྟེ་གཞོན་
ནུ་མེ་སྐྱེས་བྱིན་ཅིག་སར་བཀའ་རྩལ་པ་དང་། དེ་བཞིན་འཚལ་ལོ་ཞེས་གསོལ་ཏེ་ཁྱིམ་བདག་ལ་སྨྲས་པ། གཞོན་ནུ་འདི་ངས་བསྐྱེད་པ་ཡིད་དུ་འོང་བ་སྡུག་པ་ཡིན་པས་ཉིན་རེ་ཞིང་ལན་
གསུམ་དུ་བལྟ་བའི་ཕྱིར་གཏོང་ན་སྦྱིན་པར་བྱའོ། །ཞེས་སྨྲས་ནས་རྒྱན་ཐམས་ཅད་ཀྱིས་བརྒྱན་ཏེ་གླང་པོ་ཆེ་ལ་བསྐྱོན་ནས་བཏང་ངོ་། །ཇི་ཙམ་དུས་གཞན་ཞིག་ན་ཕ་འཆི་བའི་དུས་བྱས་ནས་རང་ཉིད་ཁྱིམ་དུ་གནས་པ་དང་། 
1-551
ལྷ་དང་མིའི་དཔལ་མྱོང་བར་གྱུར་ཏེ། དཀོན་མཆོག་གསུམ་ལ་དད་ཅིང་སྐྱབས་སུ་སོང་ནས་ཕྱོགས་གང་དུ་བདག་གི་མ་བསད་པའི་ཕྱོགས་དེར་གཙུག་ལག་ཁང་རྩིག་ཏུ་བཅུག་ནས། ཡོ་བྱད་ཐམས་ཅད་ཕུན་
སུམ་ཚོགས་པར་སྦྱར་ཏེ་ཕྱོགས་བཞིའི་དགེ་འདུན་ལ་ཕུལ་ལོ། །གནས་བརྟན་དག་གིས་ཀྱང་མདོ་སྡེ་དག་ལས། བཅོམ་ལྡན་འདས་རྒྱལ་པོའི་ཁབ་ན་དཀུ་མཉེད་པའི་ཚལ་ན་བཞུགས་སོ་ཞེས་སྦྱར་ཏོ། ། དེ་ནས་
དུས་གཞན་ཞིག་གི་ཚེ། རྒྱལ་པོའི་ཁབ་དང་ཙམ་པའི་བར་ན་ཥོ་གམ་གྱི་གནས་ཤིག་ཡོད་པ་དེའི་ཥོ་གམ་པ་འཆི་བའི་དུས་ལ་བབ་ནས་གནོད་སྦྱིན་གདུག་པ་ཞིག་ཏུ་སྐྱེས་པ་དང་། དེས་
བུའི་རྨི་ལམ་དུ་བུ་ཁྱོད་ཀྱིས་གནས་འདིར་གནོད་སྦྱིན་གྱི་རྟེན་ཚུགས་ལ་དྲིལ་ཐོགས་ཤིག་དང་། དེར་གང་ཟག་དག་ཟོང་ལས་ཥོ་གམ་མི་འཇལ་བར་འགྲོ་བར་བྱེད་པའི་དེའི་ཚེ། དྲིལ་དེ་སྒྲ་འབྱིན་
པར་བྱེད་ཅིང་། དེ་དག་ཕྱིར་ལྡོག་པ་ལས་ཥོ་གམ་ཆོད་པར་འགྱུར་རོ་ཞེས་བསྟན་ཏོ། །དེས་ཇི་སྐད་བསྟན་པ་བཞིན་རྟེན་བཙུགས་ནས་དྲིལ་ཡང་བཏགས་སོ། །དེའི་ཚེ་གྲོང་ཁྱེར་ཙམ་པ་ན་བྲམ་ཟེ་
གཅིག་གི་ཆུང་མ་བྲམ་ཟེ་མོ་ཞིག་ཡོད་པ་དེས་བསམས་པ། བྲམ་ཟེ་སྒྲུབ་པའི་ནོར་དག་སྤྱོད་ཅིང་ལས་ཅི་ཡང་མི་བྱེད་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། ཚོང་འདུས་སུ་སོང་སྟེ་རས་བལ་ཉོས་ནས་སེལ་གྱིས་ཞག་པར་བྱས་ཤིང་བཀལ་ཏེ་ཐ་ག་པ་མཁས་པ་ལ་ཀར་ཤ་པ་ན་སྟོང་རི་བའི་ཟུང་གཅིག་འཐག་ཏུ་བཅུག་ནས་བྲམ་ཟེ་ལ་སྨྲས་པ། 
1-552
རས་ཟུང་འདི་ཀར་ཤ་པ་ན་སྟོང་རི་བ་ལགས་ཀྱིས། ཚོང་འདུས་སུ་བཞུད་ལ་དེ་ལྟར་ཉོ་བ་རྙེད་ན་རྩོལ་ཅིག གལ་ཏེ་མ་རྙེད་ན་ཚོང་འདུས་མ་ཡིན་ཞེས་སྨྲས་ལ་གཞན་དུ་བཞུད་
པར་མཛོད་ཅིག དེས་ཀྱང་དེ་གདུགས་ཀྱི་ཡུ་བའི་ནང་དུ་བཅུག་ནས་ཁྱེར་ཏེ་ཚོང་འདུས་སུ་སོང་བ་དང་། དེ་ལྟར་ཉོ་བ་མ་རྙེད་ནས་ཇི་ལྟར་བསྒོ་བ་ལྟར་བྱས་ཏེ་འདྲེན་པ་དག་དང་
ལྷན་ཅིག་རྒྱལ་པོའི་ཁབ་ཏུ་དོང་ངོ་། །དེ་ནས་ཥོ་གམ་གྱི་གནས་སུ་ཕྱིན་པ་དང་། ཥོ་གམ་དག་བཅད་དེ་སོང་བ་དང་། དྲིལ་སྒྲ་འབྱིན་པར་བྱེད་ནས་སྨྲས་པ། ཤེས་ལྡན་དག དྲིལ་སྒྲ་འབྱིན་
པ་ལས་ན་ཥོ་གམ་ལེགས་པར་མ་ཕུལ་གྱིས། ཡང་ཥོ་གམ་དག་གཅད་དོ་ཞེས་སྨྲས་ཏེ་འདྲེན་པ་དག་ཕྱིར་བཀུགས་བཙལ་བ་ན་ཤོ་གམ་མ་ཕུལ་བ་འགའ་ཡང་མེད། ཡང་སྔ་མ་བཞིན་གྱུར་
པ་དང་། འདྲེན་པ་དག་ངེད་ཁྱེད་ཅག་ཆོམ་པ་བྱེད་པར་སེམས་སམ། ཅིའི་ཕྱིར་ཡང་དང་ཡང་འགུགས་པར་བྱེད་ཅེས་སྨོད་པར་བྱེད་དོ། །དེ་ནས་འདྲན་པ་དེ་དག་ཚོམ་གཉིས་སུ་བྱས་ཏེ་བཀྱེ་བ་
དང་། གང་ན་བྲམ་ཟེ་མེད་པ་དེ་དག་ནི་དོང་ངོ་། །གཅིག་ཤོས་འགྲོ་བའི་ཚེ་དྲིལ་དེ་སྒྲ་འབྱིན་པར་བྱེད་ནས། དེ་དག་གིས་ཀྱང་ཚོམ་པ་གཉིས་སུ་བྱས་ཤིང་བཀྱེ་བ་དང་བྲམ་ཟེ་གཅིག་པུ་ལུས་པ་དེ་དག་གིས་བཟུང་ངོ་། །
1-553
དེས་བདག་ལ་ཅུང་ཟད་ཀྱང་མེད་ཀྱིས་ཚོལ་གཅིག་ཅེས་སྨྲས་པ་དང་། བཙལ་ཀྱང་ཅི་ཡང་མ་རྙེད་ནས་བཏང་བ་དང་དྲིལ་སྒྲ་འབྱིན་པར་བྱེད་ནས། ཕྱིར་བཀུག་སྟེ། ཀྱེ་བྲམ་ཟེ་ལྷའི་བྱིན་བརླབས་ནི་
དེ་ལྟར་གྱུར་ན། ཁྱེད་བདེན་པར་སྨྲོས་ཤིག་དང་ཁྱོད་ལ་ཤོ་གམ་མི་ལེན་ཏོ། །དེས་གདུགས་ཀྱི་རྩ་བའི་ནང་ནས་རས་ཟུང་ཕྱུང་སྟེ་བསྟན་པ་དང་། དེ་དག་ཀྱེ་མ་ལྷའི་བྱིན་བརླབས་ནི་འདི་
འདྲའོ་ཞེས་ངོ་མཚར་སྐྱེས་རས་ཡ་གཅིག་ཕྱེ་སྟེ་ལྷ་ལ་བསྟན་ཏོ། །བྲམ་ཟེས་སྨྲས་པ། ཁྱོད་ཥོ་གམ་མི་ལེན་ཏོ་ཞེས་ཟེར་ན་ད་ཐམས་ཅད་འཕྲོག་གམ། དེ་དག་གིས་སྨྲས་པ། ལྷ་ལ་བསྟན་
པར་ཟད་ཀྱི་ལོང་ལ་སོང་ཤིག དེས་གདུགས་ཀྱི་རྩ་བའི་ནང་དུ་བཅུག་ཏེ་རྒྱལ་པོའི་ཁབ་ཏུ་ཕྱིན་ཏོ། །དེས་ཚོང་འདུས་སུ་རས་ཟུང་དེ་བཀྲམ་པ་ན་ཀར་ཤ་པ་ན་སྟོང་གིས་ཉོ་བ་
སུ་ཡང་མེད་ནས་ཚོས་འདུས་ཀྱང་ཚོང་འདུས་མ་ཡིན་ནོ་སྨྲས་པ་དང་། གཞོན་ནུ་མེ་སྐྱེས་གླང་པོ་ཆེ་ལ་ཞོན་ནས་ཕོ་བྲང་ནས་ཕྱིར་བྱུང་སྟེ་རང་གི་ཁྱིམ་དུ་འགྲོ་བས་ཐོས་ནས། བྲམ་
ཟེ་ཅིའི་ཕྱིར་དེ་སྐད་སྨྲ་བར་བྱེད། ཁྱིམ་བདག་རས་ཟུང་འདི་ལྟ་བུ་ཀར་ཤ་པ་ན་སྟོང་གིས་ཉོ་བ་སུ་ཡང་མ་མཆིས་པས་སོ། །དེས་དེ་ལྟས་ནས། བྲམ་ཟེ་རས་གཅིག་ནི་མ་སྤྱད་པ་ཞིག་ཏེ་ཀར་ཤ་པ་ན་ལྔ་བརྒྱ། 
1-554
གཅིག་ནི་སྤྱད་པ་སྟེ་ཉིས་བརྒྱ་ལྔ་བཅུ་རིའོ། །འདི་ཁྱོད་ལ་མངོན་སུམ་བསྟན་གྱིས་ལྟོས་ཤིག་ཅེས་སྨྲས་ཏེ་ནམ་མཁའ་ལ་བོར་བ་དང་། གཅིག་ནི་བརྐྱང་ཏེ་འདུག་ལ། གཅིག་ནི་ཕྱིར་ལྷུང་ངོ་། །ཡང་
ཚེར་མའི་ཐོག་དུ་བོར་བ་ན། གཅིག་ནི་མ་ཐོགས་པར་སོང་ཞིང་། གཅིག་ནི་ཐོགས་པར་མཐོང་ནས་བྲམ་ཟེ་ངོ་མཚར་དུ་གྱུར་ཏེ། ཁྱོད་རིན་ཇི་ཙམ་གྱིས་བཞེད་པ་དེ་ཙམ་གྱིས་སྣོམས་ཤིག མེ་
སྐྱེས་ཀྱིས་སྨྲས་པ། བྲམ་ཟེ་ཁྱོད་ཉིད་ལ་མཆོད་པའི་ཕྱིར་ཀར་ཤ་པ་ན་སྟོང་སྦྱིན་ནོ་ཞེས་སྨྲས་ཏེ་བྱིན་ནོ། །དེ་ནས་སྤྱད་པ་དེ་ནི་ཁྱེའུ་ཞིག་ལ་བྱིན། མ་སྤྱད་པ་ཁྲུས་རས་སུ་
བྱས་སོ། །དེ་དུས་གཞན་ཞིག་ན་རྒྱལ་པོ་གཟུགས་ཅན་སྙིང་པོའི་ཁང་བཟངས་ཀྱི་སྟེང་ན་བློན་པོའི་ཚོགས་ཀྱིས་སྐོར་བའི་ཚེ། མེ་སྐྱེས་ཀྱི་ཁྲུས་རས་ཁང་པའི་སྟེང་ན་སྐམ་དུ་བཅུག་པ་རླུང་གིས་
ཁྱེར་བ་རྒྱལ་པོའི་ཕང་དུ་ལྷུང་བ་དང་། ཤེས་ལྡན་དག་རྒྱལ་པོ་ལ་དགོས་པའི་གོས་འདི་ལྟ་བུ་ག་ལས་འོངས། དེ་དག་གིས་སྨྲས་པ། རྒྱལ་པོ་ང་ལས་ནུ་ལ་དགུང་བདུན་དུ་རིན་པོ་
ཆེའི་ཆར་བབ་པོ་ཞེས་ཐོས་ན་ལྷ་ལ་ཡང་ནམ་བཟའི་ཆར་བབ་པ་ལས་ན་རིན་པོ་ཆེའི་ཆར་བབ་པར་འགྱུར་རོ། །དེའི་ཚེ་མེ་སྐྱེས་དེར་འོངས་པ་དང་། རྒྱལ་པོས་སྨྲས་པ། གཞོན་ནུ་ཁྱོད་བཅོམ་ལྡན་འདས་ཀྱིས་ལྷ་དང་མིའི་དཔལ་མྱོང་པར་འགྱུར་རོ་ཞེས་ལུང་བསྟན་ལ། 
1-555
ང་ལ་ཡང་ལྷའི་གོས་ནམ་མཁའ་ལས་ལྷུང་བ་འདི་ལྟ་བུ་ཡོད་ཀྱིས་དེ་ཁྱོད་ཁྱེར་ཅིག དེས་དེ་བརླངས་ཏེ་བརྟགས་པ་ན་རང་གི་ཁྲུས་རས་ཡིན་པར་མཐོང་ནས་ཅུང་ཟད་བགད་དེ་སྨྲས་པ།
ལྷ་འདི་བདག་གི་ཁྲུས་རས་བསེར་མས་འཚལ་ནས་འདིར་མཆིས་པ་ལགས་སོ། །རྒྱལ་པོས་སྨྲས་པ། ལྷ་དང་མིའི་དཔལ་ཡང་མྱོང་བར་གྱུར་ཏམ། ལྷ་མྱོང་བར་གྱུར་ཏོ། །དེ་ལྟ་ན་ད་ཅིའི་ཕྱིར་སྤྱན་
འདྲེན་པར་མི་བྱེད། ལྷ་སྤྱན་འདྲེན་པར་བགྱིད་དོ་ཞེས་སྨྲས་ཏེ་དྲངས་པ་དང་། རྒྱལ་པོའི་བུད་མེད་ཀྱི་འཁོར་ཕྱི་པ་དག་མཐོང་ནས་དབང་པོ་ཕྱིར་རློན་པར་བྱེད་པ་ན། ལྷ་ཅིའི་སླད་དུ་དེ་
ལྟར་མཛད། གཞོན་ནུ་མནའ་མ་ཡིན་པས་དེ་ལྟར་བྱས་སོ། །ལྷ་དེ་ལྟ་མ་ལགས་ཀྱིས་བུད་མེད་ཀྱི་འཁོར་ཕྱི་པ་དག་ལགས་སོ། །དེ་ངོ་མཚར་ཆེར་སྐྱེས་ནས་བུད་མེད་ཀྱི་འཁོར་བར་མ་དག་
མཐོང་པ་ལའང་དེ་བཞིན་དུ་སྦྱོར་རོ། །དེ་ནས་བར་སྒོའི་ཕྱོགས་རིན་པོ་ཆེའི་རང་བཞིན་ལས་གྱུར་པ་རྫིང་ཆུས་གང་ལྟ་བུ་ན་ཉ་དག་རྒྱུ་བ་འདྲ་བའི་འཁྲུལ་འཁོར་གྱི་སྦྱོར་བ་བྱས་པ་
མཐོང་སྟེ། དེར་འགྲོ་བར་འདོད་ནས་ལྷམ་བུད་པར་བརྩམས་པ་དང་། མེ་སྐྱེས་ཀྱིས། ལྷ་ཅིའི་སླད་དུ་ཆགས་བསིལ་བར་མཛད། ཆུ་ལ་འབོག་པའི་ཕྱིར་རོ། །ལྷ་འདི་ནི་ཆབ་མ་ལགས་ཏེ་རིན་པོ་ཆེའི་ས་བཞི་ལ་འཁྲུལ་འཁོར་གྱི་སྦྱོར་བས་ཉ་དག་རྒྱུ་བར་སྣང་བ་ལགས་སོ། །
1-556
དེ་ལ་རྒྱལ་པོ་དེ་ཡིད་མ་ཆེས་པ་དང་། དེས་སོར་གདུབ་འཕངས་པ་སྒྲ་དང་བཅས་ནས་རིན་པོ་ཆེའི་ས་གཞིའི་སྟེང་དུ་འཇོལ་བར་གྱུར་པ་མཐོང་ནས་ངོ་མཚར་ཆེར་སྐྱེས་ཏེ་ནང་དུ་སོང་
ནས་སེངྒེའི་ཁྲི་ལ་འདུག་གོ །མནའ་མ་དག་རྐང་པ་ལ་ཕྱག་འཚལ་དུ་འོངས་པ་དག་ལས་མཆི་མ་བྱུང་བ་དང་། རྒྱལ་པོས་སྨྲས་པ། གཞོན་ནུ་ཅིའི་ཕྱིར་འདི་དག་ངུ་། ལྷ་འདི་དག་ངུ་བ་
མ་ལགས་ཏེ། ལྷའི་ནམ་བཟའ་ལ་ཤིང་གི་དུད་པའི་དྲི་གདབ་བས་དེས་འདི་དག་མཆི་མ་བྱུང་བར་གྱུར་ཏོ། ། དེ་ནས་རྒྱལ་པོ་ལྷ་དང་མིའི་དཔལ་ལ་སྤྱོད་ཅིང་ཕྱིར་མི་ལྡོག་པ་ན། རྒྱལ་
པོའི་བྱ་བ་དག་ཉམས་པར་གྱུར་ནས། བློན་པོ་དག་གིས་གཞོན་ནུ་མ་སྐྱེས་དགྲ་བཏང་ནས། བློན་པོ་དག་གིས་མཆིད་ནས་རྒྱལ་པོའི་བྱ་བ་དང་བྱེད་པར་ཉམས་པར་འགྱུར་བས་གཤེགས་པའི་དུས་ལ་
བབ་པོ་ཞེས་གསོལ་ཏོ། །དེའི་ཚེ་མ་སྐྱེས་དགྲས་མེ་སྐྱེས་ཀྱི་ནོར་བུ་གཅིག་རྐུས་ཏེ། ཁྱེའུ་ཞིག་གི་ལག་ཏུ་གཏད་པ་དང་། དེ་གང་ནས་བླངས་པ་དེར་ཕྱིར་ལོག་གོ །མ་སྐྱེས་དགྲས་ཁྱེའུ་ལ་
ནོར་བུ་བལྟས་ཁྱེར་ཤོག་ཅེས་སྨྲས་པ་དང་། དེས་ཆང་པ་ཕྱེ་སྟེ་སྨྲས་པ། གཞོན་ནུ་གང་ན་མཆིས་མ་འཚལ་ཏོ། །དེས་དེ་བརྡེག་པར་བརྩམས་པ་དང་། མེ་སྐྱེས་ཀྱིས། གཞོན་ནུ་འདི་ལ་ཅིའི་ཕྱིར་རྡེག་པར་བྱེད། 
1-557
ཁྱིམ་བདག་ཁོ་བོ་ནི་རྐུན་མ་ཡིན་ན། འདི་ནི་རྐུན་ཆེན་ཞིག་སྟེ། བདག་གིས་ཁྱོད་ཀྱི་ནོར་བུ་བརྐུས་པ་དེ་ཡང་འདིས་བརྐུས་སོ། །གཞོན་ནུ། ཁྱོད་ཀྱིས་ཀྱང་མ་བརྐུས། འདིས་ཀྱང་མ་བརྐུས་ཏེ་
གང་ནས་བླངས་པ་དེ་ཉིད་དུ་ཕྱིར་སོང་སྟེ་འདུག་གོ །དེ་ལྟ་ནའང་གཞོན་ནུ་མ་ཁྱོད་ཉིད་ཀྱི་ཁྱིམ་ཡིན་གྱིས་ནོར་བུ་དང་། ནོར་རྫས་ཅི་དགོས་པ་ཅི་བདེར་ལོང་ཤིག དེས་སྐྱེངས་ནས་བསམ་
པ། ནམ་ཞིག་ན་བདག་གི་ཕ་འཆི་བའི་དུས་ལ་བབ་ནས། བདག་རྒྱལ་པོ་བྱེད་པ་དེའི་ཚེ་བླང་ངོ་སྙམ་མོ། །དེ་ནས་དུས་གཞན་ཞིག་གི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན་མེ་སྐྱེས་
ཀྱི་སྲིང་མོའི། གཅེར་བུ་པ་དགེ་མཉེན་དཔལ་སྦེད་ཅེས་བྱ་བ་འདུག་པ་ལ། མེ་སྐྱེས་ཀྱི་བསམས་པ། འདི་དགེ་འདུན་ལ་ཡོན་འབུལ་དུ་གཞུག་གོ་སྙམ་སྟེ། དཔལ་སྦེད་དགེ་འདུན་ལ་མཆོད་པ་དང་
ཡོན་ཕུལ་ཅིག་དང་ཁྱོད་ཀྱི་བསོད་ནམས་སུ་འགྱུར་རོ། །དཔལ་སྦེད་ཀྱི་སྨྲས་པ། ངས་དགེ་འདུན་ལ་མཆོད་ཅིང་ཡོན་དབུལ་བར་བྱ། ཁྱོད་ཀྱིས་ཀྱང་གང་པོ་ལ་སོགས་པའི་རབ་ཏུ་བྱུང་བ་དག་ལ་
བསྙེན་བཀུར་བྱོས་ཤིག མེ་སྐྱེས་ཀྱི་བསམས་པ་ཁས་མ་བླངས་ན་ཁོའི་མཆོད་པའི་བར་ཆད་དུ་འགྱུར་དུ་དོགས་ནས་ཁས་བླངས་སོ། །དེ་ནས་དཔལ་སྦེད་འདི་སྙམ་དུ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བཤོས་གསོལ་ན། 
1-558
ཕྱིས་གང་པོ་ལ་སོགས་པ་དག་ལ་ཟན་མ་བྱིན་དུ་དོགས་ནས། མེ་སྐྱེས་ཁྱོད་ཀྱིས་དང་པོ་ཟན་བྱིན་ཅིག་དང་། ངས་ཀྱང་ཕྱིས་དགེ་སྦྱོང་གོའུ་ཏ་མ་ཉན་ཐོས་ཀྱི་དགེ་འདུན་དག་ལ་ཟས་
སྦྱིན་ནོ། །དེས་ཀྱང་ཁས་བླངས་ཏེ་གང་པོ་གང་ན་འདུག་པར་ཕྱིན་ནས་གང་པོ་ཁྱོད་སང་བདག་གི་ཁྱིམ་དུ་གཅེར་བུ་པ་མང་པོ་དང་བཤོས་གསོལ་གྱིས་ཁས་ལོང་ཤིག གང་པོས་བསམས་པ། ཁྱིམ་
བདག་འདི་དགེ་སྦྱོང་གོའུ་ཏ་མས་སུན་པར་གྱུར་ནས་བདག་ཅག་ལ་དད་པར་གྱུར་པས་བདག་གི་རྙེད་པ་ལེགས་པར་རྙེད་དོ་སྙམ་ནས་ཁས་བླངས་སོ། །དེའི་ནུབ་མོ་ཟས་བསོད་པ་སྟ་གོན་བྱས་
ཏེ་སྤྱན་འདྲེན་པའི་དུས་ལ་བབ་པ་དང་སྤྱན་དྲངས་སོ། །དཔལ་སྦེད་དེའི་གན་དུ་འོངས་ཏེ་སྨྲས་པ། འཕགས་པ་གང་པོ་དགེ་སྦྱོང་གོའུ་ཏ་མ་ནི་ཁྱིམ་བདག་གི་ཁྱིམ་དུ་བཞུད་ཀར་སྒོའི་ཐེམ་
པ་ལ་ཞབས་བཞག་ནས་འཛུམ་པ་སྟོན་ཏོ། །དེའི་ཚེ་ཉན་ཐོས་ཀུན་དགའ་བོ་ཞེས་པས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས། དེ་བཞིན་གཤེགས་པ་དང་། དེ་བཞིན་གཤེགས་
པའི་ཉན་ཐོས་དག་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མཛད་ནས་ཅིའི་སླད་དུ་འཛུམ་པ་མཛད་ཅེས་ཞུས་པ་དང་། ཇི་ལྟར་ལུང་སྟོན་པར་བཞེད་པ་དེ་ལྟར་མཛད་པས་སྐྱེ་བ་མང་པོ་དག་དད་པར་གྱུར་གྱིས་ཁྱོད་ཀྱིས་ཀྱང་ཁྱིམ་བདག་མེ་སྐྱེས་ཀྱི་ཁྱིམ་དུ་འགྲོ་བའི་ཚེ་དེ་ལྟར་བྱ་བའི་རིགས་སོ་ཞེས་སྨྲས་པ་དང་། 
1-559
དེས་ཀྱང་ཁས་བླངས་སོ། །དེ་ནས་གང་པོ་གཅེར་བུ་བ་མང་པོས་སྐོར་ནས་མེ་སྐྱེས་ཀྱི་ཁྱིམ་དུ་འགྲོ་བའི་སྒོའི་ཐེམ་པ་ལ་རྐང་པ་བཞག་སྟེ་རྟ་གད་བགད་པ་དང་། གཅེར་བུ་པ་གཅིག་
གིས་རྐང་པ་ལ་བཏུད་དེ། སྐྱེས་བུ་དམ་པ་ཁྱེད་ལྟ་བུ་རྒྱུ་མེད་རྐྱེན་མེད་དུ་འཛུམ་པ་མི་མཛད་ན་ཞེས་དྲིས་པ་དང་། སྨྲས་པ་ཁྱེད་ཀྱང་ཆུ་བོ་དྲེགས་བྲལ་གྱི་འགྲམ་ན་སྤྲེའུ་ཕོ་
ཞིག་གིས་སྤྲེའུ་མོ་ཞིག་མཐོང་ནས། དེ་ལ་སེམས་རབ་ཏུ་ཆགས་ཏེ་སྤྲེའུ་མོ་དེ་ལ་ལྒོ་ལོ་སྙམ་ནས་བརྒྱུགས་པ་དང་འགྲེད་དེ། ཤིང་གི་རྩེ་མོ་ནས་རྟེག་གཅིག་འཆོས་ནས་དུས་ལས་འདས་སོ། །
དེ་ལ་ང་འདི་སྙམ་དུ་སེམས་ཅན་འདི་ནི་འདོད་པའི་རྒྱུས་སྡུག་བསྔལ་ཆེར་གྱུར་ཏོ་སྙམ་མོ། །མེ་སྐྱེས་ཀྱིས་ཐོས་ནས་བསམས་པ། བུ་ཟན་མོའི་བུ་གང་པོ་ནི་ཁབ་འཚོང་པ་དེ་སླར་ཁབ་
བདུང་པའི་ཁྱིམ་དུ་ཁབ་འཚོང་པར་སེམས་པ་བཞིན་ཏེ། ཅི་ནས་འདི་ལ་རྐྱལ་ཀ་ཞིག་བྱའོ་སྙམ་ནས། གཙང་ཞིང་བསོད་པའི་བཅའ་བ་དང་བཟའ་བས་ཕོར་པ་བཀང་ནས་སྟེང་དུ་ཚོད་མ་བླུགས་ཏེ་
བྱིན་ནོ། །གང་པོ་གཅིག་པུ་ལ་ཕོར་བུའི་ཞབས་སུ་ཚོད་མ་བླུགས་ནས་སྟེང་དུ་འབྲས་ཆེན་གྱིས་གཡོགས་ཏེ་བྱིན་ནོ། །དེའི་ཚེ་གཅེར་བུ་པ་ཕལ་དག་ཟ་ཞིང་འདུག་པ་དང་། གང་པོས་བསམས་པ་ང་ལ་སྟོན་པར་དམིགས་ཏེ་ཚོད་མ་ཞིམ་པོ་དང་ཁ་ཟས་བཟང་པོ་སྦྱིན་པར་བསམས་སོ་སྙམ་ནས་འདུག་གོ །
1-560
ཇི་ཙམ་ན་ཚོད་མ་དག་བྲིམས་ཟིན་པ་དང་། དེས་བསམས་པ་འདི་དག་བྲེལ་བས་བརྗེད་ཀྱིས་བདག་གིས་སྐུལ་ལོ་སྙམ་ནས། ཁྱིམ་བདག་ང་ལ་ནི་འབྲས་ཅན་འབའ་ཞིག་འོངས་ཀྱི་ཚོད་མ་ནི་མེད་
དོ་ཞེས་སྨྲས་པ་དང་། སླར་ཚིགས་སུ་བཅད་དེ་སྨྲས་པ། མི་མཐོང་བར་ནི་མཐོང་བར་བྱེད། །མཐོང་བར་བྱ་བ་མི་མཐོང་སྟེ། །དྲེགས་བྲལ་འགྲམ་གྱི་སྤྲེ་མཐོང་གི །ཕོར་བུའི་ནང་གི་ཚོད་མ་མིན། །
ཞེས་སྨྲས་ཏེ་ཕོར་བུའི་ཞབས་ན་ཚོད་མ་འདུག་པར་བསྟན་པ་དང་། གང་པོས་བསམས་པ་བདག་སྐྱེངས་པར་བྱས་ཀྱི། ཅི་ནས་ཀྱང་འཇིག་རྟེན་འདི་དང་ཕྱི་མ་གཉིས་ཀར་ཕན་པར་མི་འགྱུར་བ་དེ་
ལྟར་སྦྱིན་པའི་ཕན་ཡོན་བརྗོད་དོ་སྙམ་དུ་བསམ་པ་དང་། མེ་སྐྱེས་ཀྱི་དེ་སྐྱེངས་པར་ཤེས་ནས་གཞན་དུ་འདུག་གོ །དེ་ནས་འབྲས་ཅན་དག་ཟོས་ནས་སྦྱིན་པའི་ཡོན་ཏན་འདི་སྐད་དུ། སྦྱིན་བདག་
གིས་ནི་སྦྱིན་པའི་དུས། །དགེ་སྦྱོང་གཞན་ནི་ཟ་བའི་དུས། །ལྷག་མ་གཞན་ལ་འོངས་པའི་དུས། །བསོད་ནམས་མི་དགེ་ཡོད་མ་ཡིན། །ཞེས་སོ། །དེའི་ཚེ་སྒོ་བ་ཞིག་འདུག་པ་དེས་མཐོང་ནས། འདི་འདྲ་
བའི་སྡིག་ཅན་ཟས་ཟོས་ནས་སྲུང་ཡང་མི་ནུས་ལ་འདི་འདྲ་བའི་སྦྱིན་པའི་ཡོན་ཏན་བརྗོད་པས་འདི་ལ་རྐྱལ་ཀ་ཞིག་བྱའོ་སྙམ་ནས། འབྲས་ཁུ་བུམ་པ་གང་སྒོ་དྲུང་དུ་འཕོ་སྟེ། སྒོ་གཏན་གྱི་ཕྱེད་ཙམ་དྲངས་ཏེ་བཞག་པ་དང་། 
1-561
གཅེར་བུ་པ་ཕྱིར་བྱུང་པ་དང་། འབྲས་ཁུ་ལ་འགྲེད་དེ་མགོ་བོ་ཅུང་ཟད་སྣད་ནས་ཁྲག་བྱུང་ངོ་། །སྒོ་བ་དེས་ཚིགས་སུ་བཅད་དེ་སྨྲས་པ། སྒོ་གཏན་ཕྱུང་པའི་དུས་ལ་བབ། །འབྲས་ཁུ་འཕོ་
བའི་དུས་བབ་པས། །མགོ་བོ་སྣད་པའི་དུས་ཡིན་གྱིས། །དགེ་དང་མི་དགེའི་དུས་མེད་དོ། །ཞེས་སོ། །དེ་ནས་དེ་ཁྱིམ་བདག་དཔལ་སྦེད་ཅན་སོང་བ་དང་། དཔལ་སྦེད་ཀྱི་མཐོང་ནས་ཅི་ཉེས་ཞེས་དྲིས་
པ་དང་། དེས་སྨྲས་པ་མེ་སྐྱེས་ཀྱིས་འདི་འདྲ་བའི་གནོད་པ་བྱས་སོ། །དཔལ་སྦེད་ཀྱིས་སྨྲས་པ། ཁྱོད་ནི་གསོན་པོར་ཐར་གྱིས་སྡོད་ཅིག་དང་། ཅི་ནས་དགེ་སྦྱོང་གོའུ་ཏ་མ་ཉན་ཐོས་ཀྱི་དགེ་
འདུན་དང་བཅས་པ་ཁོ་མོའི་ཁྱིམ་ནས་གསོན་བཞིན་དུ་ཕྱིར་མི་འབྱུང་བར་བྱ་ཡིས་མི་དགའ་བར་མ་བྱེད་ཅིག་ཅེས་སྨྲས་སོ། ། དེ་ནས་དཔལ་སྦེད་ཀྱིས་བསམས་པ། དགེ་སྦྱོང་གོའུ་ཏ་མ་དེ་ཐམས་
ཅད་མཁྱེན་པ་ཡིན་ན་འགྲོན་ཏུ་བོས་ཀྱང་ཁས་ལེན་དུ་མི་གཏུབ་ལ། དེ་ལྟ་མ་ཡིན་ན་ཁས་ལེན་ཏོ་སྙམ་ནས་བཅོམ་ལྡན་འདས་ཀྱིས་དྲུང་དུ་སོང་སྟེ། སང་བདག་གི་ཁྱིམ་དུ་དགེ་འདུན་
དང་ལྷན་ཅིག་བཤོས་གསོལ་བར་ཅི་སྣང་ཞེས་པ་དང་། དགོངས་པ་ཁས་མ་བླངས་ན་བདེན་པའི་བར་ཆད་དུ་འགྱུར་བས་ཁས་བླང་ངོ་སྙམ་ནས་གཤེགས་པར་ཞལ་གྱི་བཞེས་སོ། །དཔལ་སྦེད་ཀྱིས་བསམས་པ། 
1-562
འདི་ཐམས་ཅད་མཁྱེན་པ་མ་ཡིན་པས་དགྲའི་ལན་ལེན་ནོ་སྙམ་ནས། ཁྱིམ་དུ་སོང་སྟེ་སྒོ་དྲུང་དུ་དོང་ཆེན་པོ་བརྐོས་ནས། ནང་དུ་མེ་དག་དུ་བ་མེད་པས་བཀང་སྟེ་རྩས་གཡོགས་ནས་བཀབ་
ཏེ་བཞག་གོ །དུག་རྣོན་པོ་བཟའ་བ་དང་བཏུང་པ་སྦྱར་རོ། །དེ་ནས་མེ་སྐྱེས་ཀྱི་སྲིང་མོས་དཔལ་སྦེད་ལ་ཇོ་བོ་ཅི་ཞིག་མཛད་ཅེས་དྲིས་པ་དང་། དེས་སྨྲས་པ། དགྲ་གསད་པར་བྱའོ། །ཇོ་
བོ་ལ་དགྲ་སུ་ཞིག་མཆིས། དགེ་སྦྱོང་གོའུ་ཏ་མའོ། །ཇོ་བོ་ཁྱོད་ཀྱི་དགྲ་བཅོམ་ལྡན་འདས་ཡིན་ན་མཛའ་བོ་སུ་ཞིག་མཆིས་ཀྱིས་འདི་ལྟ་བུའི་ལས་མ་མཛད་ཅིག་ཅེས་སྨྲས་པ་དང་། བསམས་པ་
འདིའང་མེ་སྐྱེས་ཀྱི་གཉེན་དུ་འོང་སྟེ། གོའུ་ཏ་མ་ལ་དད་པས་གསང་ཤོར་བར་འགྱུར་རོ་སྙམ་ནས། དེས་མཛོད་ཀྱི་ནང་དུ་བཅུག་སྟེ་སྒོ་ལྕགས་བཅུག་ནས་བཞག་གོ །གང་པོ་ལ་སོགས་པ་གཅེར་
བུ་པ་རྣམས་ལ་དགྲ་གསད་པ་ལ་བལྟ་ཤོག་བྱས་ཏེ་ཡང་ཐོག་གི་སྟེང་དུ་འཁོད་ནས་ཇི་ལྟར་ཚིག་པ་དང་། ཡན་མན་དུ་ས་ལ་ཇི་ལྟར་འགྱེལ་བ་དག་བལྟའོ། །དེ་ནས་དཔལ་སྦེད་ཀྱི་
སྤྱན་འདྲེན་གྱི་དུས་གསོལ་བ་དང་། བཀའ་སྩལ་པ། ཀུན་དགའ་བོ་སོང་ལ་དགེ་སློང་དག་ལ་འདི་སྐད་དཔལ་སྦེད་ཀྱི་ཁྱིམ་དུ་དེ་བཞིན་གཤེགས་པ་མ་གཤེགས་པར་དགེ་སློང་སུ་ཡང་སྔར་སུའང་མ་འདོང་ཤིག 
1-563
དེ་ནས་ཀུན་དགའ་བོས་དགེ་སློང་དག་ལ་དེ་སྐད་ཅེས་བཀའ་སྩལ་ཏོ་ཞེས་བསྒོའོ། །དེའི་ཚེ་འོད་མའི་ཚལ་གྱི་ལྷ་བྲན་རྣམས་སྡུག་བསྔལ་ཞིང་ཡིད་མི་དགའ་སྟེ་མྱུར་བར་བཅོམ་ལྡན་འདས་ཀྱི་དྲུང་
དུ་སོང་ནས། བཅོམ་ལྡན་འདས་དཔལ་སྦེད་ཀྱི་ཁྱིམ་དུ་མི་གཤེགས་པར་གསོལ། བཅོམ་ལྡན་འདས་གྲོངས་པའི་སླད་དུ་དོང་ཆེན་པོའི་ནང་དུ་མེ་མདག་དག་གིས་བཀང་ངོ་ཞེས་གསོལ་པ་དང་། དུག་གསུམ་གྱི་
མེ་དག་ཀྱང་ཡེ་ཤེས་ཀྱི་ཆུས་ཞི་བར་གྱུར་ན། མེའི་ཐ་མ་དེས་ཅི་བྱར་ཡོད་ཀྱི་མྱ་ངན་མ་བྱེད་ཅིག ལྷ་བྲན་དག་གིས་གསོལ་པ། དེ་གཅིག་པུ་མ་ལགས་ཀྱི་དུག་རྣོན་པོ་མི་
བཟད་པས་ཟས་དང་བཏུང་བ་དག་སྦྱར་ལགས་སོ། །ལྷ། དུག་གི་གཉེན་པོ་ཡེ་ཤེས་ཀྱིས་ཉོན་མོངས་པའི་དུག་དག་ཀྱང་བཅོམ་ན་ཐ་མལ་པའི་དུག་དེས་ཅི་བྱར་ཡོད་ཅེས་བཀའ་སྩལ་ནས། དཔལ་སྦེད་
ཀྱི་སྒོ་དྲུང་དུ་བྱོན་ཏོ། །མེ་སྐྱེས་ཀྱི་སྲིང་མོས་བསམས་པ། ད་ནི་བཅོམ་ལྡན་འདས་དོང་གི་སྟེང་དུ་ཞབས་འཇོག་གོ །ད་ཙམ་དོང་གི་ཁ་རྩྭས་གཡོགས་པའི་ནང་དུ་ལྷུང་སྟེ་ཆོས་གོས་ཚིག་
པའི་དུད་བའང་བྱུང་ངོ་སྙམ་ནས་ཡིད་མི་དགའ་བར་དུ་ཞིང་འདུག་གོ །དེའི་ཚེ་བཅོམ་ལྡན་འདས་ཀྱིས་མེ་དོང་གི་སྟེང་དུ་ཞབས་བཞག་མ་ཐག་ཏུ་དེ་ཐམས་ཅད་མཚེའུ་པདྨ་དང་ཨུད་པ་ལ་ལ་སོགས་པས་བརྒྱན་པར་གྱུར་ཏོ། །
1-564
པདྨའི་སྙིང་པོ་ལ་ཞབས་བཞག་ཏེ་ནང་དུ་བྱོན་ཏོ། །གཅེར་བུ་པ་དག་ནི་ཞེད་ནས་བྲོས་ཏེ་སོང་ངོ་། །དཔལ་སྦེད་ནི་ངོ་མཚར་ཆེ་བའི་མིག་བགྲད་དེ་བལྟས་ནས་མེ་སྐྱེས་ཀྱི་སྲིང་མོའི་གན་
དུ་སོང་སྟེ། བཟང་མོ་ཚུར་ཤོག དེ་བཞིན་གཤེགས་པའི་ཞབས་ལ་ཕྱག་འཚོལ་ཅིག དེས་བསམས་པ་ནི་བདག་ལ་སླུ་བར་བྱེད་དོ་སྙམ་ན་སྙིང་རྗེ་བའི་ཚིག་གིས་སྨྲས་པ། སྡིག་པའི་གྲོགས་པོ་བླུས་
ཏེ་བསད་ན་བདག་ལ་བགམ་དུ་ཅི་ཞིག་ཡོད། སྨྲས་པ། བཟང་མོ་དེ་ལྟ་མ་ཡིན་གྱི། བཅོམ་ལྡན་འདས་བཀྲོངས་པར་མ་ནུས་པས་དེའི་དྲུང་དུ་འགྲོ་མ་ནུས་ཀྱིས་ང་ཁྲིད་ལ་སོང་ཤིག་ཅེས་
སྨྲས་པ་དང་། དགའ་ཆེས་ཏེ་ལྷན་ཅིག་ཏུ་སོང་ནས་ཞབས་ལ་ཕྱག་འཚལ་ཏེ་འདི་སྐད་ཅེས། བཙུན་པ་བཟོད་པར་མཛོད་ཅིག་ཁྱིམ་བདག་ནི་སྡིག་པའི་གྲོགས་པོས་བསླུས་པར་མི་དགེ་བའི་རྣམ་པ་འདི་
ལྟ་བུ་དག་བགྱིས་སོ་ཞེས་གསོལ་པ་དང་། བཅོམ་ལྡན་འདས་ཀྱིས་གླང་པོ་ཆེའི་སྣ་འདྲ་བའི་ཕྱག་བརྐྱང་ནས་གསུངས་པ་ཁྱིམ་བདག་ལོང་ཤིག་དང་བཟོད་དོ། །དེ་བཞིན་གཤེགས་པའི་མཛའ་བ་དང་དགྲར་བྱེ་
བྲག་མི་འབྱེད་ཀྱི་ཙནྡན་དང་གྲེའུར་མཚུངས་སོ། །དེ་ནས་དཔལ་སྦེད་མོས་པའི་ཡིད་ཀྱིས། བཙུན་པ་ཅུང་ཟད་བཞེས་ཤིག བདག་གིས་བཤོས་ད་སྡོད་སྦྱར་རོ་ཞེས་གསོལ་བ་དང་། ཁྱིམ་བདག་ཟས་ཀྱི་དུས་ལ་བབ་བོ་ཞེས་གསོལ་ན་ཅིའི་ཕྱིར་དེ་སྐད་དུ་སྨྲ། 
1-565
བཙུན་པ་བདག་ནི་སྡིག་པའི་གྲོགས་པོས་བསླུས་པས་བཅོམ་ལྡན་འདས་ལ་གནོད་པ་བྱ་བའི་ཕྱིར་དུག་རྣོན་པོས་ཞལ་ཟས་དང་སྐྱེམས་དག་སྦྱར་གྱི། དེ་དག་འཕོ་ལ་སྡོད་སྦྱར་ལགས་སོ། །བཀའ་སྩལ་པ།
ཁྱིམ་བདག་ཉོན་མོངས་པ་དུག་གསུམ་ཀྱང་སྐྱུགས་ཤིང་བོར་ན། དུག་ངན་པ་འདི་ལྟ་བུ་ཅི་ཞིག་བྱར་ཡོད་ཀྱི་ཁྱེར་ཏེ་ཤོག་ཤིག ཀུན་དགའ་བོས་དགེ་སློང་དག་ལ་རྒན་རིམས་སུ་འབྱོར་ཚོགས་ཞེས་
སྐད་མ་ཕྱུང་གི་བར་དུ་ཟན་མ་ཟ་ཞེས་བསྒོ་ཤིག དེས་ཀྱང་དེ་བཞིན་དུ་བསྒོའོ། །དེ་ནས་རྒན་རིམ་དུ་འབྱོར་ཚོགས་ཞེས་སྐད་ཕྱུང་པ་དང་། ཁ་ཟས་དང་སྐོམ་དག་དུག་མེད་པར་གྱུར་ཏོ་
ཞེས་སོ། །དེ་ནི་མདོ་རྩ་བ་ལས། རྒན་པའི་མཐར་སཾཔྲཔྟ་ཞེས་མ་བརྗོད་པར་དང་པོ་བླང་བར་མི་བྱའོ་ཞེས་གསུངས་ལས། དེའི་དོན་ནི་མཉམ་པར་གྱུར་ཅེས་པ་སྟེ་དུག་མེད་པར་གྱུར་པའོ། །དེའི་
ཕྱིར་དེ་སྐད་མ་བརྗོད་པར་དགེ་འདུན་གྱི་གནས་བརྟན་གྱིས་ཟས་ཆུང་དུ་ན་ལན་ཚྭ་ཙམ་ཡང་བླང་བར་མི་བྱ། གལ་ཏེ་བླངས་ན་འདས་པ་དང་བཅས་པར་འགྱུར་རོ་ཞེས་བཀའ་སྩལ་ཏོ། །དེ་
ནས་དུས་གཞན་ཞིག་གི་ཚེ་མ་སྐྱེས་དགྲ་ལྷ་སྦྱིན་གྱིས་བསླུས་ནས་ཕ་ཆོས་ཀྱི་རྒྱལ་པོ་སྲོག་དང་བྲལ་ནས་རང་གིས་ཅོད་པཎ་བཅིངས་ཏེ་རྒྱལ་པོ་བྱས་པའི་ཚེ། མེ་སྐྱེས་བོས་ཏེ་ཁྱིམ་བདག་ཁྱོད་དང་སྤུན་ཡིན་པས་ཁྱིམ་དག་བགོ་བར་བྱའོ། །
1-566
དེས་བསམ་པ་འདི་ནི་ཕ་བསད་ནས་རང་ཉིད་རྒྱལ་པོར་ཞུགས་པ་ཡིན་པས་གལ་ཏེ་ན་བདག་ཀྱང་བསད་པར་འགྱུར་དུ་འོང་ངོ་སྙམ་ནས། ལྷ་ཁྱོད་ཉིད་བཞེད་ན་བགོ་ཅི་འཚལ། ཁྱོད་ཀྱི་ཁབ་
དུ་ནི་བདག་མཆིའོ། །བདག་གི་སྡུམ་པར་ཁྱེད་གཤེགས་སུ་གསོལ། ལེགས་ཀྱིས་དེ་བཞིན་བྱའོ་ཞེས་བྱ་སྟེ་དེ་ལྟར་ཕྱིན་པ་དང་། དཔལ་དང་ལྡན་པའི་ཁྱིམ་དེ་མི་སྣང་བར་གྱུར་ནས་མེ་སྐྱེས་ག་ལ་
བ་དེ་ཉིད་དུ་བྱུང་ངོ་། །དེ་ལྟར་ལན་བདུན་གྱི་བར་དུ་མི་སྣང་བར་གྱུར་པ་དང་། མ་སྐྱེས་དགྲས་བསམས་པ། ད་ནི་ཐབས་ཀྱི་རྣམ་པ་གཞན་ཞིག་བྱའོ་སྙམ་ཏེ ཆོམ་རྐུན་དག་སོང་ལ་
མེ་སྐྱེས་ཀྱི་ནོར་བུ་བརྐུས་ཤིག་ཅེས་བསྒོ་བ་དང་། དེ་དག་སོང་སྟེ་སྐས་དང་ཐགས་པ་ལ་བརྟེན་ནས་འཛེག་པར་བརྩམས་སོ། །དེའི་ཚེ་ཁང་བཟང་ཀྱི་སྟེང་ན་བུད་མེད་ཀྱི་འཁོར་འཁོད་པས་རྐུན་
པོ་རྐུན་པོ་ཞེས་སྒྲ་ཕྱུང་བ་དང་། མེ་སྐྱེས་ཀྱིས་ཐོས་ནས་ཆོམ་རྐུན་དག་འདུག་པར་གྱུར་ཅེས་ཡིད་ལ་བསམས་ཤིང་ཚིག་ཏུ་བརྗོད་པས་ཇི་ལྟར་འཛེགས་པ་དེ་ཉིད་ན་འཁོད་པར་གྱུར་ཏོ། ། དེ་
ནས་ནམ་ལངས་པ་དང་སྐྱེ་བོ་ཕལ་པོ་ཆེའི་ཚོགས་ཀྱི་མཐོང་ནས་སྨྲས་པ། ཤེས་ལྡན་དག་རྒྱལ་པོ་སྡིག་ཅན་འདིས་ཕ་ཆོས་ཀྱི་རྒྱལ་པོ་སྲོག་དང་བྲལ་ནས། ད་ཁྱིམ་འཇོམ་པར་བྱེད་པ་དེ། 
1-567
ཅིའི་ཕྱིར་བདག་ཅག་གི་དང་དུ་བླང་བར་བྱ་ཞེས་ཟེར་རོ། །དེའི་ཚེ་མ་སྐྱེས་དགྲས་མེ་སྐྱེས་ཀྱི་གན་དུ་ཕོ་ཉ་བ་བཏང་སྟེ། ང་ལ་རྐྱེན་དུ་འགྱུར་བས་དེ་དག་ཐོང་ཤིག་ཅེས་བྱས་
པ་དང་། མེ་སྐྱེས་ཀྱིས་ཆོམ་རྐུན་དག་འདོང་བར་གྱུར་ཅིག་ཅེས་ཡིད་ལ་བསམས་ཤིང་ཚིག་ཏུ་བརྗོད་པས་དེ་དག་དོང་བར་གྱུར་ཏོ། །དེ་ནས་མེ་སྐྱེས་ཀྱིས་བསམས་པ། ཕ་ཆོས་ཀྱི་རྒྱལ་པོ་སྲོག་
དང་ཕྲལ་བ་འདིས་བདག་བསད་པར་འགྱུར་གོར་མ་ཆག་གི དེ་བས་ན་བཅོམ་ལྡན་འདས་ཀྱིས་ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ་ཞེས་ལུང་བསྟན་
པ་ཡིན་པས་བདག་དེར་སོང་ལ་རབ་ཏུ་འབྱུང་ངོ་སྙམ་ནས་ནོར་ཐམས་ཅད་ཕོངས་པ་དང་མགོན་མེད་པ་རྣམས་ལ་བྱིན་ནས་དེ་རྣམས་ནོར་དང་ལྡན་པར་བྱས་སོ། །དེ་ནས་མེ་སྐྱེས་བཅོམ་ལྡན་
འདས་ཀྱི་དྲུང་དུ་སོང་སྟེ། ཚུར་ཤོག་གིས་སྙེན་པར་རྫོགས་པར་གྱུར་ཅིང་། དགྲ་བཅོམ་པ་ཉིད་མངོན་སུམ་དུ་བྱས་པར་གྱུར་ཏོ། །དེའི་ཕྱིར་བདེ་བར་གཤེགས་པའི་གསུང་ནི་ཅི་ནས་ལུང་བསྟན་པ་དེ་
ལྟར་ཐོག་ཏུ་བབ་སྟེ། ཅི་ནས་ཀྱང་ཚུལ་འདི་ལྟ་བུས་བདེ་བར་གཤེགས་པའི་གསུང་ལ་ཡིད་ཆེས་པར་བྱས་ནས་སྡིག་པའི་ལས་ཕྲ་ཞིང་ཕྲ་བ་དག་ལ་ཡང་འཛེམ་པར་བྱ་ཞིང་། གཅིག་ཏུ་དཀར་བའི་ལས་ནི་བརྩོན་པ་ཆེན་པོས་སྒྲུབ་པར་བྱའོ་ཞེས་བྱ་བ་ནི་ཞར་ལ་འོངས་པའི་གདམས་པའོ། །
1-568
ཡང་གང་གི་ཚེ་ཟས་འདྲེམ་པར་བྱེད་པ་དེ་ནི་ཚེ། དགེ་འདུན་གྱི་གནས་བརྟན་གྱིས་སྙོམ་པར་བྲིམས་ཤིང་ཅེས་བརྗོད་པར་བྱའོ་དེ་འདྲེན་པར་བྱེད་པས་སྦྱིན་པའི་ཕྱིར་ཟས་ཉེ་བར་བཞག་པ་ན།
དགེ་འདུན་གྱི་གནས་བརྟན་གྱིས་སྙོམས་པར་བྲིམས་ཤིག་ཅེས་བགོ་བར་བྱའོ་ཞེས་དང་། འདུལ་བ་ཚིག་ལེའུར་བྱས་པ་ལས་ཀྱང་། གནས་བརྟན་གྱིས་ཀྱང་བདེན་པར་ནི། སྙོམས་པར་བྲིམས་ཤེས་བརྗོད་པར་བྱ་ཞེས་སོ། །
གླེང་གཞི་ནི། མཉན་ཡོད་དུ་ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་ལ་སྤྱན་དྲངས་པ་དང་། དགེ་འདུན་རྣམས་ནི་དོང་ངོ་། །བཅོམ་ལྡན་འདས་ནི་གཙུག་ལག་ཁང་ན་
བཞུགས་དེ་བཤོས་ཚུར་མནོས་སོ། །རྣམ་པ་ལྔའི་ཕྱིར་དེ་ལྟར་མཛད་དེ། ལྷ་རྣམས་ལ་ཆོས་འཆད་པ་དང་། ནད་པ་ལ་གཟིགས་པ་དང་། མལ་སྟན་དག་གཟིགས་པ་དང་། ནང་དུ་ཡང་དག་འཇོག་ལ་བཞུགས་
པ་དང་། ཉན་ཐོས་རྣམས་ཀྱི་འདུལ་བ་ལ་བསླབ་པའི་གནས་འཆའ་བར་བཞེད་པའོ། །འདིར་ནི་བསླབ་པ་བཅའ་བའི་དོན་དུ་སྟེ། དེའི་ཚེ་ཁྱིམ་བདག་དེ་རྒན་པ་ལ་དད་པས། རྒན་རིམས་སུ་མར་དང་
མར་ལ་བཙོས་པའི་བཅའ་བ་རྣམས་བྲིམས། བར་མ་དག་ལ་ནི་འབྲུ་མར་ལ་བཙོས་པའི་བཅའ་བ་དག་བྲིམས། གཞོན་ནུ་ལ་ནི་འབྲུ་མར་གྱི་ཚིགས་མ་དག་བྲིམས་སོ། །དེའི་ཚེ་ན་སྒྲ་གཅན་འཛིན་གྱིས་བཅོམ་ལྡན་འདས་ཀྱིས་བཤོས་མནོས་ནས་འོངས་པ་དང་། 
1-569
བཀའ་སྩལ་པ། དགེ་སློང་གི་དགེ་འདུན་བསོད་པའི་ཟས་ཀྱིས་ཚིམ་པར་བྱས་སམ། དེས་གསོལ་པ། བཙུན་པ་དགོས་པ་རྣམ་ཚིམ་མོ། །སྒྲ་གཅན་འཛིན་ཁྱོད་ཅིའི་ཕྱིར་རིད་ཅིང་ཉམ་ཆུང་ངུས་དེ་སྐད་དུ་
ཟེར། དེས་ཚིགས་སུ་བཅད་དེ། འབྲུ་མར་གྱིས་ནི་མཐུར་འགྱུར་ཏེ། །མར་གྱིས་ཀྱང་ནི་མདངས་སུ་འགྱུར། །འབྲུ་མར་གྱིས་ཚིགས་ཀྱི་ཚོད་མས་ནི། །མདང་མེད་སྟོབས་ལྟ་ག་ལ་མཆིས། །བཀའ་སྩལ་པ། སྒྲ་གཅན་
འཛིན་ཅི་ཡིན་པ་དེ་སྨྲོས་ཤིག དེས་ཇི་ལྟར་གྱུར་པ་ཞིབ་ཏུ་གསོལ་ཏོ། །བཀའ་སྩལ་པ། དེ་ན་གནས་བརྟན་སུ་ཞིག་འདུག བཅོམ་ལྡན་འདས་མཁན་པོ་མཆིས་སོ། །དེ་ནས་བཅོམ་ལྡན་འདས་ཀྱིས་དགེ་
སློང་གི་དགེ་འདུན་དག་བསྡུས་ནས་བཀའ་སྩལ་པ། དགེ་འདུན་གྱིས་གནས་བརྟན་དགེ་སློང་གིས་མཚུངས་པར་སྤྱད་པའི་ཆོས་ངས་བཅའ་བར་བྱ་སྟེ། དགེ་འདུན་གྱི་གནས་བརྟན་དགེ་སློང་གི་ཟན་འདྲིམ་པའི་ཚེ་
སྙོམས་པར་བྲིས་ཤིག་ཅེས་བསྒོ་ཤིག་ཅེས་སོ། །ཡང་ཚོད་མ་ལ་སོགས་པ་སྣ་རེ་ལ་དེ་ལྟར་སྨྲས་པ། བཀའ་སྩལ་པ། ལན་ཚྭའམ་དང་པོར་གང་བྲིམས་པ་དེའི་ཚེ་སྨྲོས་ཤིག་ཐམས་ཅད་ལ་ནི་
མ་ཡིན་ནོ། །དེ་ལྟར་མ་བྱས་ན་འདས་པ་དང་བཅས་པར་འགྱུར་རོ་ཞེས་སོ། །གལ་ཏེ་དྲང་པར་བྱ་བ་དག་མང་ལ་ཡུལ་དག་ཉུང་ན་ཅི་འབྱོར་པར་ཞེས་བྱ་སྟེ། མདོ་རྩ་བ་ལས། 
1-570
འཁོར་ལ་བལྟས་ཏེ་མང་ལ་ཟས་ཉུང་བ་ཉིད་ཡིན་ན་དེའི་ཚེ་སྔ་མ་བརྗོད་ཅིང་ཁྱད་མེད་པར་ཞེས་སོ། །གཞན་ཉིད་ཡིན་ན་ཅི་འབྱོར་པ་ཞེས་སོ་ཞེས་གསུངས་པ་ལྟ་བུའོ། །དེ་ལྟར་གསོལ་
ཟས་དྲངས་པ་དང་། གྲལ་མགོ་མས་ཟས་མ་བཅད་ཀྱི་བར་ལ་གཞན་རྣམས་ཀྱིས་ཀྱང་མི་བཅད་པར་དེའི་རྗེས་ལ་བྱའོ། །དེ་ཡང་ཟས་ལ་ཆ་བཞིར་བགོ་བར་བྱ་སྟེ། ཚངས་པར་སྤྱོད་པའི་བརྟུལ་ཞུགས་
ལ་གནས་པ་དག་དང་། མགོན་མེད་པ་སྡུག་བསྔལ་བ་དག་དང་། ལོག་པ་ངན་འགྲོར་ལྷུང་བ་རྣམས་དང་། རང་ཉིད་དོ། །དེ་སྐད་དུ། དཀོན་མཆོག་སྤྲིན་ལས། བསོད་སྙོམས་དེ་ལ་ཆ་གཅིག་ནི་ཚངས་པ་
མཚུངས་པར་སྤྱོད་པ་རྣམས་དང་། གཉིས་པ་ནི་སྡུག་བསྔལ་བ་རྣམས་དང་། གསུམ་པ་ནི་སེམས་ཅན་ལོག་པར་ལྷུང་བ་རྣམས་ཀྱི་སྤྱིར་གཞག་གོ །ཆ་བཞི་པ་ནི་བདག་ཟའོ་ཞེས་དང་། སྤྱོད་འཇུག་ལས་ཀྱང་།
ལོག་པར་ལྷུང་དང་མགོན་མེད་དང་། །བརྟུལ་ཞུགས་གནས་ལ་བགོ་བྱ་ཞིང་། །ཞེས་སོ། །ཡང་ན་གྲོགས་ཚངས་པ་མཚུངས་པར་སྤྱོད་པ་བགོ་བཤའ་བྱ་དགོས་པ་དག་མི་སྣང་ན། ཟས་དེ་འདི་ལྟར་ཆ་བཞིར་
ཡང་བྱར་རུང་སྟེ། སྤྱོད་པ་བསྡུས་པའི་སྒྲོན་མ་ལས། ཟས་དེ་ཆ་བཞིར་བགོ་བྱ་སྟེ། །དང་པོ་ལྷ་ལ་བཤོས་གཙང་དབུལ། །དེ་རྗེས་ཆོས་ཀྱི་སྲུང་མ་ལ། །གཏོར་མ་ཤིན་ཏུ་རྒྱ་ཆེན་བཏང་། །རང་གིས་ཟོས་ཤིང་འཐུངས་པ་ཡི། །
1-571
ལྷག་མ་འབྱུང་པོ་ཀུན་ལ་སྦྱིན། །ཞེས་སོ། །ཕྱག་ལེན་ལ་ལྷ་བཤོས་དང་གཏོར་མའང་ཕུད་ཀྱི་ཁོངས་སུ་བསྡུས་ནས་ཆ་གསུམ་དུ་མཛད་དེ། ཕུད་ཀྱི་ཆ་དང་། བར་གྱི་ཆ་དང་། ལྷག་མའི་ཆའོ། །དང་
པོ་ལ་ལྷ་བཤོས་དང་གཏོར་མ་གཉིས་ལས། དང་པོ་ནི་མཁན་པོ་དཔལ་ལྡན་གྲོའི་ཞལ་ནས། གདིང་ཀར་སྐུ་གཤེགས་ཀྱི་གསུང་གི་ཡི་དམ་དུ་ཡོད་པ་ལ་ལྷ་བཤོས་རེ་རེ་དབུལ་ཞེས་དང་། ཆུ་
མིག་པ་ཆེན་པོའི་གསུང་གི་ཡི་དམ་དུ་ཡོད་ཀྱང་ལྷ་བཤོས་གཅིག་དབུལ་ཞེས་གསུང་སྟེ། དེ་གཉིས་ལ་སྔ་མ་ལྟར་བྱས་ན་བློ་སྣ་མང་བ་དག་གི་བཤོས་དེ་ལྷ་བཤོས་ལ་མཛད་པའི་ཉེན་
ཡོད་ཅེས་གསུང་སྐད། དེས་ན་བླ་མ་དང་དཀོན་མཆོག་གསུམ་དབྱེར་མེད་ལ་དབུལ་བར་བསམས་ཏེ་ལྷ་བཤོས་གཅིག་བཅད་ནས་དེ་དག་ལ་དབུལ་ལོ་ཞེས་དང་། ཡང་གཅིག་བཅད་ནས་ཡི་དམ་གྱི་ལྷ་ལ་
དབུལ་ལོ་ཞེས་བརྗོད་ནས་དབུལ་གྱི་ཆོ་ག་གཞན་མི་དགོས་ཞེས་གསུང་གསུང་ངོ་། །ཡང་ན་བླ་མ་དང་ཡི་དམ་དབྱེར་མེད་དུ་བསམས་ནས་འབུལ་བའི་ལུགས་ཀྱང་ཡོད་ཅེས་སོ། །
༄། །གཏོར་མ་བཤད་པ།
གཏོར་མ་ནི། དགེ་བའི་
བཤེས་གཉེན་ཤར་བ་པའི་ཞལ་ནས། སྡེར་གཙང་མི་གཙང་བརྟག་ཏུ་ཡོད་ཅེས་གསུང་སྐད། དེའི་དོན་ནི་ཇོ་བོའི་ཆོས་ལུགས་བྱེད་པ་དག་གིས་གཏོར་མའང་དེའི་ལུགས་སུ་བྱེད་ན་སྡེར་གཙང་བ་ཡིན། གཏོར་མ་སྣ་ཚོགས་སུ་བྱེད་ན་མི་གཙང་བ་ཡིན་ཅེས་གསུང་སྐད། 
1-572
དེས་ན་ཕྱག་ལེན་པ་ལ་འཐེབ་སྐྱུ་གཉིས་བྱས་ཏེ་སྣོད་གཅིག་ཏུ་བཅུག་ནས། ཡུལ་ཆོས་སྐྱོང་དང་འགྲོ་དྲུག་སྤྱི་ལ་འབུལ་ལོ། །དེ་ལས་གཞན་དུ་དམ་པའི་ཆོས་འདུལ་བ་ལས། གཙུག་ལག་ཁང་སྐྱོང་
བ་དང་། འཕྲོག་མ་བུ་དང་བཅས་པ་ལ་གཏོར་མ་སྦྱིན་པ་ལ་སོགས་པའང་གསུངས་ཏེ། འདུལ་བ་ཚིག་ལེའུར་བྱས་པ་ལས་ཀྱང་། གཙུག་ལག་ཁང་གནས་ཀུན་ཏུ་ཡང་། །དུས་གསུམ་དུ་ནི་གཏོར་མ་སྦྱིན། །
དུས་དང་དུས་མིན་ཟ་བ་ཉིད། །གནོད་སྦྱིན་ཟས་ཕྱིར་འདོད་རྣམས་སྦྱིན། །བུ་དང་བཅས་པའི་འཕྲོག་མ་ལའང་། །གཙུག་ལག་ཁང་འདི་བསྲུང་ཕྱིར་དང་། །བསྟན་པ་ཡང་ནི་ཕུན་ཚོགས་ཕྱིར། །བདེ་གཤེགས་ཀྱིས་ནི་གཏོར་
མ་གསུང་། །ཞེས་སོ། །འོན་ཀྱང་དེ་དག་ཆོས་སྐྱོང་དང་འགྲོ་དྲུག་གི་ཁོངས་སུ་མ་འདུས་པ་མེད་པས་དམ་པ་རྣམས་ཀྱི་ཕྱག་ལེན་ལ་ལོགས་སུ་དེ་ལྟར་མ་མཛད་པར་སྔར་གྱི་ཁོངས་སུ་སྡུད་
པར་སྣང་ངོ་། །དེ་ལྟ་ན་ཡང་སྔོན་གྱི་སྐྱེས་བུ་དམ་པ་མཆིམས་པ་སྔ་མ་དག་གི་ཕྱག་ལེན་ལ་བྱང་ཆུབ་སེམས་དཔའ་སྒྲིབ་པ་རྣམ་སེལ་ལ་ལོགས་སུ་ལྷ་བཤོས་འབུལ་བར་མཛད་དེ། དེ་
ལྟར་བྱའོ་ཞེས་མཆིམས་ཐམས་ཅད་མཁྱེན་པའི་གསུང་ལས་མི་འབྱོན་ཀྱང་། སྔོན་ཚན་ཆུང་གུས་ཕྱག་ལེན་ལ་དེ་ལྟར་མཛད་ཅིང་སྣང་ངོ་ཞེས་ཁོ་བོའི་བླ་མ་དམ་པ་དག་གི་གསུང་ལས་ཐོས་སོ། །ཡང་། 
1-573
གཏོར་མའི་སྐབས་འདིར། གདིང་ཀར་སྐུ་གཤེགས་ཀྱི་ཞལ་ནས། དགེ་བའི་བཤེས་གཉེན་ལུང་ར་བའི་ཞལ་གསུང་གིས། གཏོར་མ། ལས་རྣམས་ཀུན་གྱི་སྔོན་དུ་འགྲོ། །ལས་རྣམས་ཀུན་གྱི་མཆོག་ཏུ་འགྱུར། །ལས་རྣམས་འགྲུབ་
པར་བྱེད་པའང་ཡིན། །ཅེས་གསུང་སྟེ། ཁ་འབར་མའི་གཟུགས་སྔགས་ཀྱིས་བྱིན་བརླབས་བྱས་པའི་གཏོར་མ་འདི་ལ་ཕན་ཡོན་བཞི་ཚན་གཉིས་ཡོད་ཅེས་གསུང་སྐད་དོ། །བཞི་ཚན་དང་པོ་ནི། སངས་རྒྱས་རྗེས་སུ་
དྲན་པ་དང་། འཆི་བ་སླུ་བ་དང་། ཚོགས་རྫོགས་པ་དང་། མྱུར་དུ་སངས་རྒྱས་འཐོབ་པའོ། །དང་པོ་ནི་དེ་བཞིན་གཤེགས་པ་བཞིའི་མཚན་བརྗོད་ནས་དེ་དག་དྲན་པར་བྱེད་པས་སངས་རྒྱས་རྗེས་སུ་དྲན་
པ་དང་། གཉིས་པ་ནི་ཀུན་དགའ་བོའི་འཆི་སླུ་བའི་དོན་དུ་གསུང་པས་འཆི་བ་སླུ་བ་སྟེ། དེ་ནི་འདི་ལྟར། བཅོམ་ལྡན་འདས་ཡུལ་སེར་སྐྱ་ན་བཞུགས་སོ། །དེའི་ཚེ་ཀུན་དགའ་བོ་བས་མཐའ་
ཞིག་ན་ཆོས་ཡིད་ལ་བྱེད་ཅིང་འདུག་པ་ན། ནམ་གྱི་ཆ་སྨད་ལ་ཡི་དྭགས་ཁ་ནས་མེ་འབར་བ་ཞེས་བྱ་བ། གཟུགས་བྱད་མི་སྡུག་ལ་ཤིན་ཏུ་རིང་ཅིང་རྐམ་པ། ཁ་ནས་མེ་འབར་
བ། མགྲིན་པ་མོ་ཁབ་ཙམ་དུ་ཕྲ་བ། སྐྲ་འཛིངས་པ། སེན་མོ་དང་མཆེ་བ་རིང་ལ་རྣོ་བ། ཤིན་ཏུ་འཇིགས་སུ་རུང་པ་ཞིག་འོངས་ནས་འདི་སྐད་ཅེས། ཁྱོད་ད་སྟེ་ཞག་བདུན་ན་ཚེའི་དུས་བྱས་ནས་ཡི་དྭགས་ཀྱི་ནང་དུ་སྐྱེ་བར་འགྱུར་རོ། །
1-574
དེ་ཐོས་པ་དང་ཤིན་ཏུ་འཇིགས་སྐྲག་ནས་འདི་སྐད་ཅེས། དེ་ལ་ཇི་ལྟར་བྱས་ན་དེ་ལས་ཡོངས་སུ་ཐར་པར་འགྱུར་དང་། དེས་སྨྲས་པ། སང་གི་ཉི་མ་ལ་ཡི་དྭགས་གང་གའི་ཀླུང་གིས་
བྱེ་བ་ཁྲག་ཁྲིག་བརྒྱ་སྟོང་སྙེད་ལ་གཏོར་མ་བྱིན་ཏེ། བྲམ་ཟེ་དང་དྲང་སྲོང་བརྒྱ་སྟོང་སྙེད་ལ་ཡུལ་དབུར་འགྱུར་ཚལ་གྱི་བྲེ་ཚད་མ་རེ་རེའི་ཞལ་ཟས་མཆོག་དམ་པ་ཕུལ་ཏེ། ཁོ་མོའི་
ཕྱིར་དཀོན་མཆོག་གསུམ་ལ་མཆོད་པ་བྱས་ན། ཚེ་རིང་ཞིང་ཡི་དྭགས་ཀྱི་སྡུག་བསྔལ་དང་བྲལ་ཏེ་མཐོ་རིས་ཀྱི་ལྷར་སྐྱེ་བར་འགྱུར་རོ་ཞེས་པ་ཐོས་པ་དང་། རིང་པར་བཅོམ་ལྡན་འདས་ཀྱི་དྲུང་
དུ་སོང་སྟེ། ཞབས་ལ་ཕྱག་འཚལ་ནས་ལུས་འདར་བཞིན་དུ་སྡུག་བསྔལ་གྱིས་གདུངས་པའི་དཔུང་གཉེན་མཛད་དུ་གསོལ་ཞེས་ཇི་ལྟར་གྱུར་པ་གསོལ་པ་དང་། བཀའ་སྩལ་པ། ཁྱོད་འཇིགས་པར་མ་བྱེད་ཅིག ང་
ལ་གཟུངས་སྔགས་གཟི་བརྗིད་ཚད་མེད་པའི་དབང་དུ་གྱུར་པའི་འོད་ཟེར་རྣམ་པར་རྒྱལ་བའི་ཤུགས་ཞེས་བྱ་བ་ཡོད་དེ། གཟུངས་འདི་བརྗོད་ན། ཡི་དྭགས་གངྒའི་ཀླུང་གི་བྱེ་བ་ཁྲག་ཁྲིག་བརྒྱ་སྟོང་སྙེད་
དང་། བྲམ་ཟེ་དང་དྲང་སྲོང་ལ་སོགས་པ་རྣམས་ལ་རེ་རེས་ཡུལ་དབུས་འགྱུར་ཚལ་གྱི་ཤེས་རབ་ཚད་མས་བཅལ་བའི་བྲེ་བའི་བདུན་སྙེད་ཐོབ་པར་འགྱུར་རོ། །ཁྱོད་ཀྱིས་ཀྱང་ཟུང་ཤིག་དང་བསོད་ནམས་དང་ཚེའི་ཚད་ཀྱང་འཕེལ་བར་འགྱུར་རོ་ཞེས་གསུངས་སོ། །
1-575
གསུམ་པ་ནི་ཐབས་དང་ཤེས་རབ་ཀྱིས་ཟིན་པར་བྱས་པས་ཚོགས་རྒྱ་ཆེན་པོ་རྫོགས་པ་དང་། བཞི་པ་ནི་དེ་ལྟར་ཚོགས་བསགས་པས་བླ་ན་མེད་པའི་བྱང་ཆུབ་མྱུར་དུ་འཐོབ་སྟེ། དེའི་ཕྱིར་མྱུར་
དུ་སངས་རྒྱས་འཐོབ་པའོ། །བཞི་ཚན་གཉིས་པ་ནི་བསོད་ནམས་རྒྱ་ཆེན་པོ་འཐོབ་པ་དང་། བར་ཆད་ཐམས་ཅད་སེལ་བ་དང་། མི་མ་ཡིན་འདུས་ཏེ་ཕན་འདོགས་པ་དང་། ལས་ཐམས་ཅད་འགྲུབ་པའི་ཕན་
ཡོན་ནོ། །དང་པོ་ནི་དཀོན་མཆོག་གི་མཆོད་རྫས་ལ་གཟུངས་སྔགས་འདི་ཉི་ཤུ་རྩ་གཅིག་བཟླས་ཏེ་མཆོད་པར་ཕུལ་ན་ཕྱོགས་བཅུའི་འཇིག་རྟེན་གྱི་ཁམས་ཀྱི་དཀོན་མཆོག་གསུམ་ལ་མཆོད་པར་འགྱུར་རོ་ཞེས་
གསུངས་པས་བསོད་ནམས་རྒྱ་ཆེན་པོ་འཐོབ་པ་དང་། གཉིས་པ་ནི་ཆེད་དུ་བརྗོད་པའི་ཚོམས་ལས། བསོད་ནམས་བསགས་པ་རྣམས་ལ་ནི། །གཞན་ལས་བྱུང་པའི་གནོད་པ་དང་། །ལྷ་དང་བདུད་ཀྱི་རིགས་རྣམས་ཀྱིས། །
བར་ཆད་བྱ་བར་མི་ནུས་སོ། །ཞེས་གསུང་པས་བར་ཆད་སེལ་བ་དང་། གསུམ་པ་ནི་སྒོམ་ཆེན་གཏོར་མ་ལ་བརྩོན་པ་ཅིག་གི་རྒྱས་ཆད་པའི་ཚེ། མི་མ་ཡིན་མང་པོ་འདུས་ནས་འོ་ཅག་
གི་སྒོམ་ཆེན་འདིའི་རྒྱགས་ཆད་ནས་འདུག་པས་ཐམས་ཅད་ཀྱིས་སྐྱོལ་གཅིག་ཅེས་ཟེར་བ་མཐོང་ཞིང་ཐོས་པ་བྱུང་བ་དང་། བླ་མ་བལ་པོ་ཐང་པ་གཏོར་མ་ལ་བརྩོན་པས་རྒྱ་གར་ནས་ཚུར་འབྱོན་པའི་ཚེ་མི་མ་ཡིན་མང་པོ་མི་དགའ་ནས་སྡུག་བསྔལ་བྱེད་པ་ལ། 
1-576
ཁོང་གིས་གཏོར་མ་བྱིན་པས་དེ་དག་ན་རེ་མ་ཧཱ་བོ་དྷི་ས་ཏྭ་ཁྱེད་ལ་ལམ་དུ་བར་ཆད་མི་འབྱུང་གིས་གཏོར་མ་སྣང་བ་ཐུགས་ལ་བཏགས་ཞེས་ཟེར་ཏེ་དེ་ལྟར་ཕན་འདོགས་པར་
བྱེད་པས་མི་མ་ཡིན་འདུ་ཤིང་ཕན་འདོགས་པ་དང་། བཞི་པ་ནི་བྱ་བ་གང་བྱེད་པའི་སྔོན་རོལ་དུ་གཏོར་མ་བཏང་བས་ལས་ཐམས་ཅད་འགྲུབ་པའི་ཕན་ཡོན་ནོ། །བྱིན་བརླབས་བྱེད་ཚུལ་ནི། སྐྱབས་
འགྲོ་སེམས་བསྐྱེད་སྔོན་དུ་བཏང་ནས། རང་ཉིད་ཐུབ་པ་ཆེན་པོ་སྐུ་མདོག་གསེར་བཙོ་མ་ལྟ་བུ། ཞལ་གཅིག་ཕྱག་གཉིས་ཀྱི་གཡས་པ་ས་གནོན། གཡོན་མཉམ་གཞག་དུ་གསུངས་ཀྱང་། ཇོ་བོའི་ཞལ་ནས། གཡས་
མཆོག་སྦྱིན་དུ་བྱ་ཞེས་གསུང་སྐད། དེ་ནས་དེ་བཞིན་གཤེགས་པ་བཞིའི་མཚན་བརྗོད་དེ། གསུང་ལས་མདོ་ལས་སྔགས་ཀྱི་གཏིང་ལ་བརྗོད་པར་གསུངས་ཀྱང་། ཇོ་བོའི་ཕྱག་ལེན་ལ་དང་པོར་བརྗོད་པ་འདི་མཛད་
ཅེས་གསུང་སྐད་དོ། ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ་ཞེས་པས་ཡི་དྭགས་ཐམས་ཅད་ཀྱི་སྐྱེ་བོ་མང་པོའི་སེར་སྣ་བྱས་པའི་མི་དགེ་བའི་ལས་བཅོམ་ཞིང་བསོད་ནམས་ཡོངས་སུ་
རྫོགས་པར་འགྱུར་བ་དང་། དེ་བཞིན་གཤེགས་པ་གཟུགས་དམ་པ་ལ་ཕྱག་འཚལ་ལོ་ཞེས་པས་ཡི་དྭགས་མང་པོ་བྱད་གཟུགས་མི་སྡུག་པ་བཅོམ་ཞིང་གཟུགས་དང་མཚན་ཕུན་སུམ་ཚོགས་པར་འགྱུར་བ་དང་། དེ་བཞིན་གཤེགས་པ་སྐུ་འབྱམ་ཀླས་ལ་ཕྱག་འཚལ་ལོ་ཞེས་པས་ཡི་དྭགས་མང་པོའི་ལྐོག་མ་ཡངས་ཤིང་སྦྱིན་པ་ཇི་ལྟར་འདོད་པ་བཞིན་ཟ་བ་དང་ཆོག་ཅིང་འདྲངས་པ་དང་། 
1-577
དེ་བཞིན་གཤེགས་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ་ཞེས་པས་ཡི་དྭགས་མང་པོ་འཇིགས་པ་ཐམས་ཅད་དང་བྲལ་ནས་དེ་ནས་ཐར་པར་འགྱུར་བར་གསུངས་ལ། ཡི་དྭགས་ལ་ཕན་ཡོན་
ཇི་ལྟར་འབྱུང་བ་དེ་ལྟར་འགྲོན་གཞན་དག་ལའང་ཕན་ཡོན་འབྱུང་བས་དེ་དག་གི་མཚན་བརྗོད་པར་མཛད་དོ། །དེ་བཞིན་གཤེགས་པ་དེ་དག་རིན་ཆེན་མང་ནི་སྟོན་པ་བཅོམ་ལྡན་འདས་ཀྱི་མཚན་ཀྱི་
རྣམ་གྲངས་དང་། གཞན་གསུམ་ནི་རིམ་པ་ལྟར། སྤྱན་རས་གཟིགས་དང་། འཇམ་དཔལ་དང་། ཕྱག་ན་རྡོ་རྗེ་སངས་རྒྱས་པའི་མཚན་གྱི་རྣམ་གྲངས་ཡིན་ཅེས་གསུངས་སྐད་དོ། །དེ་ནས་ཨོཾ་ཨཱཿཧཱུྃ་ཞེས་པ་ནི་སྐུ་
གསུང་ཐུགས་ཀྱི་སྙིང་པོས་ཏེ། གཏོར་མ་ཕལ་ཆེ་བ་དེ་བརྗོད་ནས་བྱིན་བརླགས་མཛད་པ་མང་མོད་ཀྱི། གཟུངས་འདིའི་རྟོག་པ་ལས་དེ་བརྗོད་པར་མ་གསུང་པས་གཟུངས་ཉིད་ལན་བདུན་ཉི་ཤུ་རྩ་གཅིག་
བརྗོད་པ་ནི་སྔོན་གྱི་དམ་པ་རྣམས་ཀྱི་ཕྱག་ལེན་ཡིན་ནོ། །གཟུངས་ནི་ན་མཿསརྦ་ཏ་ཐ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ་ཞེས་པའོ། །འདིའི་མཚན་ནི་ཡི་
དྭགས་ཁ་འབར་མའི་དོན་དུ་གསུངས་པས་ན་དེའི་སྔགས་ཞེས་སམ། མཚན་དངོས་བསྡུས་ན་རྒྱལ་ཆེན་ཤུགས་ལྡན་འོད་ཀྱི་སྔགས་ཞེས་པའོ། །དེ་ནས་མཆོད་སྦྱིན་གཏོར་མ་རྒྱན་དམ་པ་དང་ལྡན་པ་འདི་ཆོས་སྐྱོང་པའི་སྲུང་མ་རྣམས་ལ་འབུལ་ལོ། །
1-578
སངས་རྒྱལ་ཀྱི་བསྟན་པ་དར་བ་ལ་སོགས་པ་དང་རང་གི་བསམས་པའི་དོན་ཐམས་ཅད་འགྲུབ་པར་བྱིན་གྱིས་བརླབ་ཏུ་གསོལ་ཞེས་པ་དང་། ཆ་གཉིས་པ་ནི་འགྲོ་བ་རིས་དྲུག་གིས་བསྡུས་པའི་སེམས་
ཅན་ཐམས་ཅད་ལ་འབུལ་ལོ། །རང་རང་གི་འདོད་པ་དོན་ཐམས་ཅད་འགྲུབ་པར་གྱུར་ཅིག་བརྗོད་ནས། སེ་གོལ་ལན་གསུམ་གཏོག་སྟེ། རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས་གསུངས་པ། བདག་
གི་བསོད་ནམས་སྟོབས་དང་ནི། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །སེམས་ཅན་ཀུན་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་
པར། །འཇིག་རྟེན་ཁམས་ནི་མ་ལུས་པ། །ཐོགས་པ་མེད་པར་འབྱུང་འགྱུར་ཤོག །ཅེས་པ་བརྗོད་པར་མཛད་དོ། །དེ་ནས་བར་གྱི་ཆ་ལ་སྤྱོད་པ་ནི་རང་ཉིད་ཟ་བའི་སྔོན་རོལ་དུ་ཁམས་ཆ་གཅིག་
ཙམ་བཅད་ནས་ལོགས་ཤིག་ཏུ་བཞག་སྟེ། མདོ་རྩ་བ་ལས། ཁམ་ཆང་གཅིག་ཟ་བ་པོས་རྣམ་པར་མ་བཅད་པར་གཞག་པར་བྱའོ་ཞེས་སོ། །དེ་ནས་རང་ཉིད་ཟས་ལ་སྤྱོད་པ་ན་བསམ་པ་ནི།
ཟས་ལ་ཆགས་པ་དང་། རོ་ལ་བརྐམ་པ་དང་། ཞེན་པའི་སྒོ་ནས་མ་ཡིན་གྱི། སྨན་དང་འདྲ་བར་ཚངས་པར་སྤྱོད་པའི་རྟེན་ལུས་གསོ་བའི་དོན་དུ་སྟེ། དཀོན་མཆོག་སྤྲིན་ལས། དེ་ཟ་བ་ན་འདོད་ཆགས་མེད་པར་ཟ་སྟེ། 
1-579
ཆགས་པ་མ་ཡིན། བརྐམ་པར་མ་ཡིན། ཞེན་པར་མ་ཡིན་གྱི་གཞན་དུ་ན་ཇི་ཙམ་དུ་ལུས་གནས་པར་འགྱུར་བ་ང་འཚོ་བར་བྱ་བའི་ཕྱིར་ཟ་སྟེ་ཞེས་དང་། ལང་ཀར་གཤེགས་པ་ལས་ཀྱང་།
ཟས་ལ་སྨན་དང་འདྲ་བ་དང་། །བུ་ཡི་ཤ་དང་མཚུངས་པར་ཡང་། །རན་པ་དང་ནི་མི་འཕྲོད་པར། །རྣལ་འབྱོར་ཅན་གྱི་ཟས་ལ་སྤྱོད། །ཞེས་དང་། བཤེས་སྤྲིང་ལས་ཀྱང་། ཁ་ཟས་སྨན་དང་འདྲ་བ་
རིག་པ་ཡིས། །འདོད་ཆགས་ཞེ་སྡང་མེད་པར་བསྟེན་བགྱི་སྟེ། །རྒྱགས་ཕྱིར་མ་ལགས་སྙོམས་པའི་ཕྱིར་མ་ལགས། །མཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་གང་གསུངས་པ་ལྟ་བུའོ། །མདོར་ན་འོ་སྐོལ་
བོད་འདི་ཐེག་པ་ཆེན་པོའི་རིགས་ཅན་ཡིན་པས། དམ་པའི་ཆོས་འདུལ་བ་ལ་རབ་ཏུ་བྱུང་པ་རྣམས་ཀྱི་ཐེག་པ་ཆེན་པོའི་སྒོར་ཞུགས་པ་ཤས་ཆེ་བས། འདི་ལྟར། སེམས་ཅན་ཐམས་ཅད་ཀྱི་དོན་
དུ་རྫོགས་པའི་སངས་རྒྱས་ཐོབ་པར་བྱ། དེའི་ཆེད་དུ་ཟས་འདི་ཟོས་ལ་ལུས་གནས་པར་བྱས་ནས། ཚངས་པར་སྤྱོད་པ་མ་ཉམས་པར་མགོ་བཏོན་ཏེ་དགེ་བའི་བྱ་བ་ལ་འབད་པར་བྱ་སྙམ་དུ་
བསམས་ནས་ཞེན་པ་དང་ཆགས་པ་མེད་པར་ལོངས་སྤྱད་དོ། །སྦྱོར་བས་ལོངས་སྤྱོད་པའི་ཚུལ་ནི། སོ་སོར་ཐར་པའི་སྡོམ་ལས། ཟས་ལ་ལེགས་པར་བྱ་བ་དྲུག །གཙུག་གཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ། །
1-580
ལག་པ་ལྡག་ལ་སོགས་པ་ལྔ། །ཞེས་པའོ། །དེ་ཡང་མདོ་རྩ་བ་ལས་རིམ་པ་ལྟར་དང་པོ་དྲུག་ནི་ལེགས་པར་ཟས་བཟའ་བར་བསླབ་པར་བྱའོ་ཞེས་ཏེ། དེ་ནི་མི་མཛེས་པའི་སྐྱོན་མེད་པར་
བྱ་སྟེ་བཟའ་བར་བྱ་ཞེས་པའི་དོན་ཏོ། །གླེང་གཞི་ནི། དྲུག་སྡེ་དག་ཁའི་རྣམ་འགྱུར་དག་གིས་ཟས་ཟ་བར་བྱེད་ནས། བྲམ་ཟེ་དང་ཁྱིམ་བདག་དད་པ་ཅན་རྣམས་སྨོད་པར་བྱེད་དེ། འཕགས་པ་
དག་བྱིས་པ་ཁྱེའུ་དག་དང་གཟུགས་འཚོང་མ་དག་འདི་ལྟར་འཚལ་བས་འདི་ནི་ཚུལ་དང་མཐུན་པ་མ་ལགས་ཀྱི་འདི་ལྟར་མ་གསོལ་ཅིག དེ་དག་གི་སྨྲས་པ། ཤེས་ལྡན་དག་འདི་ལ་དགོས་པ་
ཡོད་དོ། །འཕགས་པ་དག་དགོས་པ་གང་ལགས། ཀྱེ་དང་པོར་ཁྱེད་ཅག་ཉིད་མི་ཤེས་པ་དང་བྲལ་བ་དང་། བསླབས་པར་གྱུར་པའོ། །དེ་དག་རྒྱ་ཆེར་སྨོད་པ་ལ་ཞུགས་པ་ཐོས་ནས། སྐབས་དེ་དགེ་
སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། དགོངས་པ་ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་རྩལ་པ། དེ་ལྟ་བས་ན་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་
ལྟར་གདོན་པར་བྱ་སྟེ། ལེགས་པར་ཟས་བཟའ་བར་བསླབ་པར་བྱའོ། །ཞེས་སོ། །ལེགས་པར་ཟས་ཟ་བའི་ཚུལ་ཇི་ལྟར་ཞེ་ན། དེ་ནི་མདོ་འོག་མ་རྣམས་ཀྱིས་སྟོན་ཏོ། །དེ་ཡང་ཁམ་ཧ་ཅང་ཆུང་བ་མ་ཡིན་པར་རོ་ཞེས་ཏེ། 
1-581
ཁམ་ནི་རང་གི་ཁའི་ཚ་དང་མཐུན་པར་དེར་གཞུག་ཅིང་མིད་པར་བྱའོ། །དེ་ནི་ཆུང་བ་མ་ཡིན་པར་བྱ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ཁམ་ཧ་ཅང་ཆུང་ངུར་བྱེད་ནས་
ཞེས་པ་ནས། འཕགས་པ་དང་བྱིས་པ་ཁྱེའུ་དག་དང་རིགས་ཀྱི་མནའ་མ་དག་དང་གཟུགས་འཚོང་མ་དག་འདི་ལྟར་འཚལ་བས་ཞེས་པ་ནས། ཁམ་ཧ་ཅང་ཆུང་བ་མ་ཡིན་པར་ཟས་བཟའ་བར་བསླབ་
པར་བྱའོ་ཞེས་སོ། །ཁམ་ཧ་ཅང་ཆེན་པོ་མ་ཡིན་པར་རོ་ཞེས་པ་ནི། གོང་གི་ཚད་དེ་ལས་ལྷག་པར་མ་ཡིན་པར་ཞེས་པ་སྟེ། དྲུག་སྡེ་དག་ཁྱིམ་གཞན་དུ་དེ་ལྟར་བྱེད་ནས། འཕགས་
པ་དག་མུ་ལྟོ་བ་དག་འདི་ལྟར་འཚལ་བས་ཞེས་པ་ནས། ཁམ་ཧ་ཅང་ཆེན་པོ་མ་ཡིན་པར་ཟས་བཟའ་བར་བསླབ་པར་བྱའོ་ཞེས་སོ། །ཁམ་རན་པར་རོ་ཞེས་པ་ནི། ཁའི་ཆ་དང་མཐུན་
པར་འཇིག་རྟེན་དག་གི་མི་བཅས་པའོ། ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་རན་པར་མ་ཡིན་པར་ཟ་ནས། འཕགས་པ་དང་བྱིས་པ་ཁྱེའུ་དག་དང་མུ་ལྟོ་བ་དག་འདི་ལྟར་
འཚལ་བས་ཞེས་པ་ནས། ཁམ་རན་པར་ཟས་བཟའ་བར་བསླབ་པར་བྱའོ། །ཁམ་མ་གཟས་པར་ཁ་མི་གདང་ངོ་ཞེས་པ་ནི་ཁམ་ཁའི་སྒོར་མ་སླེབ་པར་སྔོན་རོལ་ནས་ཁ་དབྱེ་བར་མི་བྱ་ཞེས་པ་སྟེ། 
1-582
མཉན་ཡོད་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ལ་སྤྱན་དྲངས་པ་དང་། དྲུག་སྡེ་དག་གི་འོག་ན་དགེ་སློང་རྒན་ཞུགས་ཤིག་འདུག་པ་དེ་ཁ་གདངས་
ཏེ་རྒན་པའི་མཐའ་ལོགས་སོ་ལྟ་བར་བྱེད་པ་དང་། ཉེ་དགས་དེའི་ཁར་བོང་པ་བཅུག་སྟེ། ཀྱེ་འདི་ཟོ་ཤིག་ཅེས་སྨྲས་པ་ཐོས་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཀའ་
སྩལ་པ། དེ་ལྟ་བས་ན་ཞེས་པ་ནས། ཁམ་མ་གཟས་པར་ཁ་མི་གདང་བར་བསླབ་པར་བྱའོ་ཞེས་སོ། ཁ་ཁམ་གྱིས་བཀང་སྟེ་མི་སྨྲ་བར་བྱའོ་ཞེས་པ་ནི་ཁམ་གྱིས་བཀང་བ་དེས་ཚིག་
མི་སྨྲ་ཞེས་པ་སྟེ། དྲུག་སྡེ་དག་ཁ་ཁམ་གིས་བཀང་སྟེ་སྨྲ་བར་བྱེད་པ་ན་སྐད་ཉམས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་ཞེས་པ་ནས་ཁ་ཁམ་གྱིས་བཀང་
སྟེ་མི་སྨྲ་བར་བསླབ་པར་བྱའོ་ཞེས་སོ། །ཙུག་ཙུག་མི་བྱའོ། །བལྕག་བལྕག་མི་བྱའོ། །ཧུ་ཧུ་མི་བྱའོ། །ཞེས་པ་ནི་རིམ་པ་ལྟར་སྐྱུར་བ་དང་། མངར་བ་དང་། གྲང་བ་དང་། གྲོ་བའི་བརྡ་སྟེ།
དེ་ལྟར་བྱེད་ཅིང་ཟ་བར་མི་བྱ་ཞེས་པ་སྟེ། མཉན་ཡོད་ན་ཁྱིམ་བདག་གཅིག་གིས་སངས་རྒྱས་ལ་སོགས་པ་དགེ་སློང་གྱི་དགེ་འདུན་གདུགས་ཚོད་ལ་སྤྱན་དྲངས་ནས། དེས་ཚོད་མ་ཤིན་ཏུ་མངར་བ་དག་སྟ་གོན་བྱས་ཏེ་དྲངས་པ་དང་། 
1-583
དྲུག་སྡེ་དག་གིས་ཁས་སྒྲ་ཕྱུང་སྟེ། དགའ་བོ་ཉེར་དགའ་ཚོད་མ་དག་སྟེ་པོར་སྐྱུར་རོ། །ཁྱིམ་བདག་དེས་ཐོས་ནས་དེ་སྐྱེངས་ཏེ་ཅང་མི་སྨྲ་བར་འདུག་པའི་སྐབས་དེ་དགེ་སློང་རྣམས་ཀྱིས་བཅོམ་
ལྡན་འདས་ལ་ཞེས་པ་ནས། ཙུག་ཙུག་མི་བྱ་བར་ཟས་བཟའ་བར་བསླབ་པར་བྱའོ། །ཡང་མཉན་ཡོད་ན་ཁྱིམ་བདག་གཅིག་གིས་ཚོད་མ་ཤིན་དུ་སྐྱུར་བ་དག་ལ། ཚོད་མ་དེ་པོར་མངར་རོ་ཞེས་
ཏེ། བལྕག་བལྕག་མི་བྱ་བར་ཟས་བཟའ་བར་བསླབ་པར་བྱའོ། །ཡང་མཉན་ཡོད་ན་ཁྱིམ་བདག་གཅིག་གིས་སྣོད་བཅད་མེད་པས་དེས་འབྲས་ཆེན་བཙོས་ཏེ་སྒྲོམ་དུ་བླུགས་པ་དང་། དེ་ཚ་ནས་དྲུག་སྡེ་དག་
གིས། འབྲས་ཆན་འདི་ཏེ་པོར་གྲང་གིས་ཁའི་དབུགས་ཀྱིས་བསྲོས་ཏེ་བཟའོ་ཞེས་ཏེ་ཧུ་ཧུ་མི་བྱ་བར་ཟས་བཟའ་བར་བསླབ་པར་བྱའོ། །ཡང་མཉན་ཡོད་ན་ཁྱིམ་བདག་གཅིག་གིས་འབྲས་ཆེན་བཙོས་ཏེ་རེ་
ལྟེར་བལྟལ་བ་དང་དེ་གྲང་པར་གྱུར་ནས་དྲུག་སྡེ་དག་གིས་འབྲས་ཆེན་འདི་ཏེ་པོར་ཚ་བས་ཁའི་དབུགས་ཀྱིས་གྲངས་ཏེ་བཟའ་འོ་ཞེས་ཏེ། ཕུ་ཕུ་མི་བྱ་བར་ཟས་བཟའ་བར་བསླབ་པར་བྱའོ་
ཞེས་པས་རྣམས་ལའང་གོ་བཞིན་སྦྱར་རོ། །ལྕེ་ཕྱུང་སྟེ་ཟས་མི་བཟའོ་ཞེས་པ་ནི་ལྕེ་མྱུག་མྱུག་བྱེད་ཅིང་བཟའ་བར་མི་བྱ་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལྕེ་ཕྱུང་སྟེ་ལྟ་ཞིང་མཆུ་གཉིས་ལ་ལྡག་པར་བྱེད་ནས། 
1-584
དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་དག་ཅིའི་ཕྱིར་ལྕེ་ཕྱུང་སྟེ་ལྟ། དེ་དག་གིས་སྨྲས་པ། ཚེ་དང་ལྡན་པ་དག་མ་བཅས་པར་མིད་ན་མི་རུང་བས་དེ་ལྟའོ་ཞེས་
པ་ལ། དེ་དག་སྨོད་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་ཞེས་ནས། ལྕེ་ཕྱུང་སྟེ་ཟས་མི་བཟའ་བར་བསླབ་པར་བྱའོ་ཞེས་སོ། །འབྲུ་ནས་ཐ་དད་དུ་མི་བྱའོ་ཞེས་
པ་ནི་ཟན་གང་ལ་འབྲུ་ཡོད་པ་རེ་རེ་ནས་བཏུ་ཞིང་ཟ་བར་མི་བྱ་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་འབྲས་ཅན་འབྲུ་རེ་རེ་ནས་ཐུ་ཞིང་ཟ་བ་
ན་བྲམ་ཟེ་དང་ཁྱིམ་བདག་དད་པ་ཅན་དག་སྨོད་པར་བྱེད་དེ། འཕགས་པ་དག་བྱིས་པ་ཁྱེའུ་དག་དང་དྭ་དག་དང་བརྒྱན་པོ་དང་ནལ་གྱི་བུ་དག་འདི་ལྟར་འཚལ་བས་འདི་ནི་ཚུལ་དང་
མཐུན་པ་མ་ལགས་ཀྱིས་འདི་ལྟར་མ་གསོལ་ཅིག དེ་དག་གིས་སྨྲས་པ། ཤེས་ལྡན་དག་འདི་ལ་དགོས་པ་ཡོད་དོ། །འཕགས་པ་དག་དགོས་པ་གང་ལགས། ཁྱེད་ཅག་ཉིད་མི་ཤེས་པ་དང་བྲལ་བ་
དང་བསླབས་པར་གྱུར་པའོ། །དེ་དག་སྨོད་པ་ལ་ཞུགས་པ་ཐོས་ནས། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། དགོངས་པ་ཁྱིམ་པ་དག་ཟེར་བ་བདེན་ནོ་སྙམ་ནས་བཀའ་སྩལ་པ། 
1-585
དེ་ལྟ་བས་ན་ཞེས་པ་ནས་འབྲུ་ནས་ཐ་དད་དུ་མི་བྱ་བར་ཟས་བཟའ་བར་བསླབ་པར་བྱའོ། །འཕྱས་མི་གདས་སོ་ཞེས་པ་ན་ཟས་ལ་འཕྱ་སྨོད་མི་བྱ་ཞེས་པ་སྟེ། དྲུག་སྡེ་དག་
ཁྱིམ་གཞན་དུ་ཟན་ཟ་བ་ན་དགའ་བོ་ཉེ་དགའ་བོ་ཚོད་མ་འདི་དག་ཧ་ཅང་ཁའོ་ཧ་ཅང་སྐྱུར་རོ་ཞེས་ཟེར་བ་ནི་སྐབས་དེ། དགེ་སློང་དག་གིས་ཞེས་པ་ནས་འཕྱས་མི་གདགས་པར་
ཟས་བཟའ་བར་བསླབ་པར་བྱའོ། །ཁུར་བ་མི་སྤོའོ་ཞེས་པ་ནི་གཡས་གཡོན་སྤོ་བར་མི་བྱ་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁུར་བ་ནས་ཁུར་བར་སྤོ་ཞིང་ཟ་
བར་བྱེད་ནས། འཕགས་པ་དག་བྱིས་པ་ཁྱེའུ་མུ་ལྟོ་བ་དག་འདི་ལྟར་འཚལ་བས་ཞེས་པ་ནས་ཁུར་བ་མི་སྤོ་བར་བཟས་བཟའ་བར་བསླབ་པར་བྱའོ། །རྐན་མི་གཏོག་ཞེས་པ་ནི་ལྕེས་རྐན་གཏོག་
ཅིང་མི་བཟའ་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་རྐན་གཏོག་པར་བྱེད་ནས། འཕགས་པ་དག་བྱིས་པ་ཁྱེའུ་དག་དང་མུ་ལྟོ་བ་དག་འདི་ལྟར་འཚལ་བས་ཞེས་པ་ནས།
རྐན་མི་གཏོག་པར་ཟས་བཟའ་བར་བསླབ་པར་བྱའོ། །ཁམས་འཕྲོར་མི་གཅད་དོ། །ཞེས་པ་ནི་སོས་བཅད་ཅིང་བཟའ་བར་མི་བྱ་ཞེས་ཏེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ཁམ་བླང་ནས་ཕྱེད་ཁར་འཇུག་ཅིང་ཕྱེད་ལྷུང་བཟེད་དུ་ལྷུང་བར་བྱེད་ནས། 
1-586
འཕགས་པ་དག་བྱེས་པ་ཁྱེའུ་དག་དང་གཟུགས་འཚོང་མ་དག་འདི་ལྟར་འཚལ་བས་ཞེས་པ་ནས། ཁ་འཕྲོར་མི་གཅད་པར་ཟས་བཟའ་བར་བསླབ་པར་བྱའོ་ཞེས་སོ། ལག་པ་མི་ལྡག་གོ་ཞེས་པ་ནི་
ཟས་ལག་པ་ལ་ཆགས་པ་མི་བལྡག་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལག་པ་ལྡག་པར་བྱེད་ནས། དགེ་སློང་རྣམས་ཀྱི་ཚེ་དང་ལྡན་པ་དག་ཅིའི་ཕྱིར་མི་མཛེས་
པ་འདི་ལྟ་བུ་བྱེད། དེ་དག་གིས་སྨྲས་པ། སྙིང་པོ་གང་ཡིན་པ་དེ་འདི་ལ་ཆགས་སོ། །དེ་དག་སྨོད་པར་བྱེད་པའི་སྐབས་དེ། དགེ་སློང་རྣམས་ཀྱིས་ཞེས་པ་ནས། ལག་པ་མི་ལྡག་པར་
ཟས་བཟའ་བར་བསླབ་པར་བྱའོ། །ལྷུང་བཟེད་མི་བྱོག་གོ་ཞེས་པ་ནི་སོར་མོས་མི་བྱོག་གོ་ཞེས་པ་སྟེ། དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལྷུང་བཟེད་འབྱོག་པར་བྱེད་ནས། དགེ་སློང་
རྣམས་ཀྱིས་ཚེ་དང་ལྡན་པ་དག་ཅིའི་ཕྱིར་མི་མཛེས་པ་འདི་ལྟ་བུ་བྱེད། དེ་དག་གིས་སྨྲས་པ། ཚེ་དང་ལྡན་པ་དག་སྙིང་པོ་གང་ཡིན་པ་དེ་འདི་ལ་ཆགས་སོ། །དེ་དག་སྨོད་པར་
བྱེད་པའི་སྐབས་དེ་དགེ་སློང་རྣམས་ཀྱིས་ཞེས་པ་ནས་ལྷུང་བཟེད་མི་བྱོག་པར་ཟས་བཟའ་བར་བསླབ་པར་བྱའོ། །ལག་པ་མི་སྤྲུག་གོ་ཞེས་པ་ནི་ལག་པ་ལ་ཟས་ཆགས་པ་སྤྲུག་པར་མི་བྱའོ་ཞེས་པ་སྟེ། 
1-587
དྲུག་སྡེ་དག་ཁྱིམ་གཞན་དུ་ཟན་ཟ་བ་ན་ལག་པ་སྤྲུག་པར་བྱེད་པས་དགེ་སློང་རྣམས་ལ་ལག་པའི་ཆུས་ཕོག་ནས། དེ་དག་སྨོད་པར་བྱེད་པའི་སྐབས་དེ། དགེ་སློང་རྣམས་ཀྱིས་ཞེས་པ་ནས།
ལག་པ་མི་སྤྲུག་པར་ཟས་བཟའ་བར་བསླབ་པར་བྱའོ། ། ལྷུང་བཟེད་མི་སྐྱམ་མོ་ཞེས་པ་ནི་དེའི་ནང་དུ་ཟས་ལ་སོགས་པ་བླུགས་ཏེ་མི་སྐྱམ་ཞེས་པ་སྟེ། དྲུག་སྡེ་དག་ཁྱིམ་གཞན་ཟན་ཟ་
བ་ན་དེ་དག་གི་འོག་ན་དགེ་སློང་རྣམ་སྦྱར་དམར་སེར་ཅན་ཞིག་འདུག་ནས་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་བཀྲེན་པ་འདིའི་སྙིང་ལམ་ན་ཡུ་བུ་ཅག་གི་སྔོན་ལན་འགའ་
ཡང་སྣམ་སྦྱར་འདི་ལྟ་བུ་གྱོན་མ་མྱོང་སྙམ་གྱིས་འདི་མི་དགའ་བར་བྱའོ་ཞེས་དེ་དག་གིས་ལྷུང་བཟེད་བསྐྱམས་པ་དང་། དགེ་སློང་དེའི་རྣམ་སྦྱར་ལྷུང་བཟེད་ཀྱི་ཆུས་མ་རུངས་པར་གྱུར་ནས། དེ་
སྨོད་པ་ལ་ཞུགས་པའི་སྐབས་དེ། དགེ་སློང་རྣམས་ཀྱིས་ཞེས་པ་ནས་ལྷུང་བཟེད་མི་སྐྱམ་པར་ཟས་བཟའ་བར་བསླབ་པར་བྱའོ། །མཆོད་རྟེན་འདྲ་བར་བྱས་ཏེ་མི་གཞོམ་ཞེས་པ་ནི་ཟན་ལ་དེ་ལྟར་
བྱས་ཏེ་མི་གཞོམ་ཞེས་པ་སྟེ། མཉན་ཡོད་ན་ཁྱིམ་བདག་གཅིག་འདུག་པ་དེ་གཅེར་བུ་པ་ལ་དད་པ་ཞིག་སྟེ། དེ་དུས་གཞན་ཞིག་ན་བཅོམ་ལྡན་འདས་ལ་དད་པར་གྱུར་ནས། དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཏེ། 
1-588
དེར་ཕྱེ་དག་བྲིམས་པ་དང་། དྲུག་སྡེ་དག་གིས་དེ་དག་སྦྲུས་ནས་མཆོད་རྟེན་འདྲ་བར་བྱས་ནས། དགའ་བོ་ཉེ་དགའ་མཆོད་རྟེན་འདི་ནི་ངན་འགྲོ་རྫོགས་པར་བྱེད་པ་རྫོགས་བྱེད་ཀྱི་མཆོད་རྟེན་ཡིན་
ནོ་ཞེས་ཟེར་རོ། །ཡང་བཅོམ་སྟེ་ཟ་ཞིང་སྨྲས་པ། དགའ་བོ་ཉེ་དགའ་ངན་འགྲོ་རྫོགས་པར་བྱེད་པ་རྫོགས་བྱེད་ཀྱི་མཆོད་རྟེན་རྡིབ་པོ་ཞེས་བྱ་བ་དང་། ཁྱིམ་བདག་དེས་ཐོས་ནས། འཕགས་པ་དག་
བདག་ནི་སྡིག་པ་ཅན་གྱི་ལྟ་བའི་རྣམ་པ་དེ་དང་བྲལ་བ་ལགས་ན། ཁྱེད་ཅག་ད་དུང་ཡང་ཞེ་སྡང་དང་མ་བྲལ་ལོ་ཞེས་སྨྲས་པ་དང་། དེ་དག་ཅང་མི་སྨྲ་བར་འཁོད་པའི་སྐབས་
དེ། དགེ་སློང་རྣམས་ཀྱིས་ཞེས་པ་ནས་མཆོད་རྟེན་འདྲ་བ་བཅོམ་སྟེ་ཟས་མི་བཟའ་བར་བསླབ་པར་བྱའོ་ཞེས་སོ། །ཡང་ཟས་སྐོམ་དག་ལ་སྤྱོད་པ་ན་སྒྲ་དང་བཅས་པ་མི་བྱ་སྟེ། བྱང་ཆུབ་
སེམས་དཔའི་དབང་དུ་བྱས་ཏེ། སྤྱོད་འཇུག་ལས། བསླབ་པ་ཀུན་ལས་བཏུས་པ་ལས། ཁ་བཀང་པ་དང་སྒྲ་བཅས་དང་། །ཁ་གདངས་ནས་ནི་བཟའ་མི་བྱ། །ཞེས་དང་། ཉན་ཐོས་ཀྱི་དབང་དུ་བྱས་ནས་འདུལ་
བ་ལས་ཀྱང་། ཁྱིམ་བདག་གཅིག་གིས་དགུན་གྱི་དུས་ལ་བབ་པའི་ཚེ། དགེ་འདུན་ལ་ཐུག་པ་དང་། ཁུར་བ་དང་འབྲས་ཁུར་དང་། ལ་ཕུག་དག་བྲིམས་པ་དང་། དགེ་སློང་ཁ་གཅིག་ནི་ཐུག་པ་འཐུང་བ་ན་ཧུབ་ཧུབ་ཅེས་སྒྲ་བྱེད་དོ། །
1-589
ཁ་ཅིག་འབྲས་ཁུར་ཟ་བ་ཁྲུམ་ཁྲུམ་ཞེས་དང་། ཁ་ཅིག་ལ་ཕུག་ཟ་བ་ན་སོལ་སོལ་ཞེས་དང་། བུམ་པར་ཆུ་འཐུང་བ་ན་སྒྲ་སླུག་སླུག་ཞེས་ཟེར་བ་ན། རོལ་མོ་མཁན་ལས་རབ་ཏུ་
བྱུང་བ་ཞིག་སྔོན་བྱས་པ་རྗེས་སུ་དྲན་ཏེ། རྣམ་པར་རྟོག་པའི་དབང་གིས་ལངས་ནས་སྒྲ་དེ་དག་དང་མཐུན་པར་གར་བྱས་ཏེ། བཙུན་པ་སོལ་སོལ། བཙུན་པ་ཁྲུམ་ཁྲུམ། བཙུན་པ་ཆོམ་ཆོམ། བཙུན་
པ་སླུག་སླུག་ཅེས་ཟེར་རོ། །དེའི་ཚེ་དགེ་སློང་དྲན་པ་ཉེ་བར་མ་བཞག་པ་དག་དགོད་པར་གྱུར་ཅིང་། ཉེ་བར་བཞག་པ་དག་སྤྱོད་ལམ་མ་འཁྲུགས་པར་གནས་སོ། །ཞལ་ཏ་བྱེད་པ་ཁ་ཅིག་
ནི་དགོད་པ་དང་། ཁ་ཅིག་ནི་འཆའ་བར་གྱུར་ཅིང་། ཁྱིམ་བདག་ཀྱང་མ་དད་པར་གྱུར་ཏོ། །དེ་ནས་བསོད་སྙོམས་བླང་ནས་འགྲོ་བའི་དགེ་སློང་དག་ཀྱང་མ་དད་པར་གྱུར་ནས་བསོད་སྙོམས་ཕྱོགས་གཅིག་
ཏུ་བཞག་སྟེ། བཅོམ་ལྡན་འདས་ཀྱི་དྲུང་དུ་སོང་ནས་ཞབས་ལ་ཕྱག་འཚལ་ཏེ་ཕྱོགས་གཅིག་དུ་འདུག་གོ །ཆོས་ཉིད་ཀྱིས་བསོད་སྙོམས་ལེན་པའི་དགེ་སློང་དག་ལ་ཡིད་རབ་ཏུ་དགའ་བའི་གཏམ་མཛད་པ་
ཡིན་པས། དགེ་སློང་དག་དགེ་འདུན་རྣམས་ཟས་བསོད་པས་ཚིམ་པར་གྱུར་ཏམ། གསོལ་པ། དགེ་འདུན་རྣམས་དེ་ལྟར་གྱུར་མོད་ཀྱི་ཁྱིམ་བདག་རྣམས་མ་དད་པར་གྱུར་ཏོ། །ཅི་བྱས། དེ་དག་གིས་ཇི་ལྟར་གྱུར་པ་གསོལ་པ་དང་། 
1-590
དེ་ནས་བཅོམ་ལྡན་འདས་ཟས་ཀྱི་བྱ་བ་མཛད་ནས་གཙུག་ལག་ཁང་གི་ཕྱི་རོལ་དུ་ཞབས་བཀྲུས་ཏེ། གཙུག་ལག་ཁང་གི་ནང་དུ་ཡང་དག་འཇོག་ལ་ཞུགས་ནས། ཕྱི་དྲོ་དེ་ལས་བཞེངས་ཏེ། དགེ་
འདུན་གྱི་གུང་ལ་གདན་བཤམས་པ་ལ་བཞུགས་ནས་བཀའ་སྩལ་པ། དགེ་སློང་དག་ཁྱེད་རྣམས་ཀྱིས་ཅི་ལ་བསམས་ན་འདི་ལྟ་བུ་བྱས། དེ་དག་གིས་གསོལ་པ། ཅུང་ཟད་འཕྱ་བའི་བསམ་པ་དང་། ཅུང་
ཟད་དགོད་པའི་བསམ་པར་གྱུར་ལགས་སོ། །དགེ་སློང་དག་འཕྱ་བར་བསམས་པ་ལ་ནི་ལྟུང་བ་མེད་ལ། དགོད་པའི་བསམ་པས་བྱས་པ་ལ་ནི་འགལ་ཚབས་ཅན་དུ་འགྱུར་རོ། །དགེ་སློང་དག་ཉེས་དམིགས་
གང་ཡིན་པ་ནི་སྒྲ་དང་བཅས་ཏེ་ཟོས་པ་ལ། དེ་ལྟ་བས་ན་སྒྲ་དང་བཅས་ཏེ་ཟས་བཟའ་བར་མི་བྱའོ། །ཟོས་ན་འགལ་ཚབས་ཅན་དུ་འགྱུར་རོ་ཞེས་སོ། །ཡང་བྲམ་ཟེ་དང་ཁྱིམ་བདག་
དད་པ་ཅན་དག་གིས། རྒྱལ་མོ་ག་གོན་དང་། འབྲས་ཁུར་དང་། མར་ཁུར་ལ་སོགས་པ་ཕུལ་བ་དང་། དེ་དག་ཐེ་ཚོམ་སྐྱེས་ནས་མ་བླངས་སོ། །དེ་དག་གི་སྨྲས་པ་འཕགས་པ། སངས་རྒྱས་འཇིག་
རྟེན་དུ་མ་བྱོན་པའི་ཚེ། བདག་ཅག་གི་སྦྱིན་གནས་མུ་སྟེགས་ཅན་ལགས་ཀྱང་། ད་ལྟར་འཇིག་རྟེན་དུ་བྱོན་པས། ཁྱེད་རྣམས་སྦྱིན་གནས་ལགས་ན། ཁྱེད་ཀྱིས་མ་བླངས་པས་བདག་ཅག་འཇིག་རྟེན་ཕ་རོལ་གྱི་ལམ་རྒྱགས་དང་བྲལ་བར་འགྱུར་ལ། 
1-591
བཅོམ་ལྡན་འདས་ཀྱིས་ཀྱང་དུས་སུ་སྦྱིན་པའི་མདོ་ལས། གང་ལོ་ཏོག་གསར་པ་དང་འབྲས་བུ་གསར་པ་གང་ཡིན་པ་དེ་དག་དུས་སུ་དང་པོར་ཚུལ་ཁྲིམས་དང་ལྡན་པ་ལ་བྱིན་ལ། དེ་ནས་
ཕྱིས་བདག་གིར་ཡོངས་སུ་སྤྱོད་ཅིག་ཅེས་གསུངས་ན། འདི་ནི་དུས་སུ་སྦྱིན་པ་ཡིན་པས། རྗེས་སུ་ཐུགས་བརྩེ་བར་དགོངས་ཏེ་བཞེས་ཤིག་ཅེས་སྨྲས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་
ལྟ་བས་ན་རྗེས་སུ་གནང་སྟེ་བྱིན་པ་ལོང་ལ། འབྲས་ཁུར་ནི་འབྲས་ཅན་དང་། ཕྱེད་དང་ལྷན་ཅིག་གྱིས་ལ་བཟའ་བར་བྱའོ། །ལ་ཕུག་དང་། རྒྱལ་མོ་ག་གོན་དང་། མར་ཁུར་དག་ནི་དུམ་བུར་
བྱས་ཏེ་བཟའ་བར་བྱའོ་ཞེས་གསུངས་སོ། །དེའི་ཕྱིར་བསྟན་པའི་སྒོར་ཞུགས་པ་དག་གིས་མ་དད་པར་འགྱུར་བ་རྣམས་སྤངས་ཏེ་བག་དང་ལྡན་པས་ལོངས་སྤྱོད་པར་བྱའོ། །མང་ཉུང་ནི་ཧ་ཅང་མང་དུ་
ཟོས་ན་ལུས་ལྕི་ཞིང་གཉིད་དང་རྨུགས་པ་འཕེལ་བར་འགྱུར་ལ། ཧ་ཅང་ཉུང་དུ་ཟོས་ན་ལུས་ཀྱི་སྟོབས་ཞན་པས་དགེ་བའི་སྦྱོར་བ་ལ་བརྩོན་འགྲུས་བྱེད་མི་ནུས་པར་འགྱུར་བས་རན་པ་ཙམ་
དུ་བཟའ་བར་བྱའོ། །དེའི་ཚད་ནི་སྨན་སྤྱོད་ཡན་ལག་བརྒྱད་པ་ལས། ལྟོ་བའི་ཆ་གཉིས་ཟས་ཀྱིས་ཏེ། །ཆ་གཅིག་སྐོམ་གྱིས་དགང་པར་བྱ། །རླུང་ལ་སོགས་པའི་གནས་དག་ཏུ། །ཆ་བཞི་པ་ནི་ལྷག་པར་གཞག །
1-592
ཅེས་པའོ། །གཞན་ཡང་གང་གི་ཚེ་ཡོན་བསྔོ་བ་བྱེད་པ་ལྟ་བུ་ཆོས་འཆད་པའི་ཚེའང་ཟས་ལ་ལོངས་སྤྱོད་པར་མི་བྱའོ། །དེ་ཡང་འདི་ལྟར་བྲམ་ཟེ་པད་མའི་སྙིང་པོ་བཅོམ་ལྡན་འདས་ཀྱི་དྲུང་
དུ་སོང་སྟེ་དགེ་སློང་གི་དགེ་འདུན་དང་བཅས་པ་ལ་བཟའ་བ་དང་བཅའ་བ་དང་རང་གིས་ལག་དར་སྟེ་མཉེས་པར་བྱས་སོ། །དེའི་ཚེ་བྲམ་ཟེ་པད་མའི་སྙིང་པོའི་ཡོན་བསྔོ་བ་མཛད་པ་
ན། རྒན་ཞུགས་ཞིག་ཏིལ་གྱི་མར་ཞུ་ཟ་བ་མཐོང་ནས། ཅི་ལགས་ཉན་ཐོས་ཐམས་ཅད་ཤེས་ལྡན་གོའུ་ཏ་མའི་ཐུགས་པར་བགྱིད་ལགས་སམ། ཁ་ཅིག་ནི་མཉེས་པར་བྱེད་དོ། །ཁ་ཅིག་ནི་མཉེས་པར་
མི་བྱེད་དོ། །ཀྱེ་གོའུ་ཏ་མ་ཁ་ཅིག་ནི་ཆོས་ཚོལ། ཁ་ཅིག་ཏིལ་གྱི་མར་ཁུ་འཚལ་བ་དག་གདའ་ལགས་སོ་ཞེས་གསོལ་ཏོ། ། དེ་ནས་བྲམ་ཟེ་པད་མའི་སྙིང་པོ་སྟན་ལས་ལངས་ཏེ་སོང་
བ་དང་། དགོངས་པ། བྲམ་ཟེ་པད་མའི་སྙིང་པོ་འཕྱ་བ་ནི་ཡོན་བསྔོ་བ་བྱེད་པ་ན། དགེ་སློང་དག་གིས་ཟས་ཟོས་པ་ལས་གྱུར་ཏོ་སྙམ་ནས། བཀའ་སྩལ་པ། དགེ་སློང་རྣམས་ཀྱི་ཡོན་བསྔོ་
པ་བྱེད་པ་ན་ཟས་བཟའ་བར་མི་བྱའོ། །ཟོས་ན་འགལ་ཚབས་ཅན་དུ་འགྱུར་རོ་ཞེས་སོ། །དེ་ནས་དུས་གཞན་ཞིག་གི་ཚེ། གསར་བུ་ཞིག་དུས་ཚོས་ལས་འདས་པར་གྱུར་པ་ན། དགེ་སློང་རྣམས་ཀྱིས་གསོལ་པ་དང་། 
1-593
བཀའ་སྩལ་པ། དེའི་དོན་མ་གོ་ཞིང་སྒྲ་ཡང་མ་ཐོས་ན་ཉེས་པ་མེད་ལ། ཡང་སྒྲ་ཐོས་དོན་མ་གོ་ན་ཉེས་མེད་དོ། །སྒྲ་ཡང་ཐོས་དོན་ཡང་གོ་བར་ཟོས་ན་འགལ་ཚབས་ཅན་དུ་
འགྱུར་རོ། །ཞེས་སོ། །ཡང་གཙུག་ལག་ཁང་གཞན་ཞིག་ཏུ་དགེ་སློང་མང་པོ་འདུས་པར་གྱུར་ཏེ་གྲལ་ཚར་གཉིས་སུ་བཅས་པ་ན། གསར་བུ་དག་རྒན་པོ་དག་ལ་ཉེ་བས་དེ་དག་ཟ་བ་དང་
སྒྲ་ཡང་ཐོས་དོན་ཡང་གོ་བར་གྱུར་ཏེ་བཟར་མི་རུང་ངོ་སྙམ་ནས་བསྙུང་བར་འདུག་པའི་སྐབས་དེ། དགེ་སློང་དག་གིས་གསོལ་པ་དང་། བཀའ་སྩལ་པ། ཚིགས་སུ་བཅད་པ་གཉིས་སམ་གསུམ་བརྗོད་ཀྱི་
བར་དུ་བསྡད་བཟའ་བར་བྱ་སྟེ། དེ་ལ་འགྱོད་པར་མི་བྱའོ་ཞེས་སོ། །དེའི་ཕྱིར་དེ་ལྟ་བུའི་རྐྱེན་དག་བྱུང་བ་ན་དེ་ལྟར་བྱ་བའི་དམིགས་བསལ་དག་ཀྱང་ཐུབ་པའི་དབང་པོ་ཐུགས་རྗེ་ཅན་
གྱིས་མཛད་དོ། །ལྷག་མའི་ཆ་ནི་རང་གི་ཟོས་པའི་རྗེས་སུ་མགོན་མེད་པ་སྤྲང་པོ་དག་ལ་སྦྱིན་པར་བྱ་སྟེ། བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་དགེ་འདུན་དང་བཅས་པ་ལ་
གདུགས་ཚོད་དྲངས་པ་ན། དགེ་སློང་རྣམས་ཀྱི་ཐོག་མར་སྤྲང་པོ་རྣམས་ལ་ཁ་ཟས་ཅུང་བྱིན་པ་དང་། བྲམ་ཟེ་དང་ཁྱིམ་བདག་འཕྱ་བར་བྱེད་པའི་སྐབས་དེ་དགེ་སློང་རྣམས་ཀྱིས་གསོལ་པ་དང་། བཀའ་སྩལ་པ། 
1-594
རང་གིས་ལོངས་སྤྱོད་ནས་ལྷུང་བཟེད་ཀྱི་ལྷག་མ་སྦྱིན་པར་བྱའོ་ཞེས་སོ། །དུད་འགྲོ་ལ་སོགས་པ་དག་ལ་སྦྱིན་པའི་དོན་དུ་ཟན་ཆང་གཅིག་བཞག་པར་བྱ་སྟེ། འདུལ་བ་ཚིག་ལེའུར་བྱས་པ་ལས།
སྡོམ་བརྩོན་ཟོས་ནས་ལྷག་མ་ཡི། །ཆང་བུ་ཡང་ནི་ཅི་བདེར་གཞག །བྱ་རོག་སོགས་ལ་དམིགས་པ་ཡི། །ཀུན་སློང་ཁྱད་པར་མི་བྱའོ། །ཞེས་དང་། མདོ་རྩ་བ་ལས་ཀྱང་། དུད་འགྲོ་ལ་ཡང་སྦྱིན་བྱའོ། །
ཞེས་སོ། །གླེང་གཞི་ནི། དགེ་སློང་ཞིག་ཟན་ཟ་བ་ན། ཁྱི་ཞིག་བདག་ལ་གདོན་མི་ཟ་བར་སྦྱིན་པར་འགྱུར་རོ་སྙམ་ནས། དེ་བཞིན་སྡོད་པ་ལ་དགེ་སློང་དེས་དེ་ལ་མ་བྱིན་པ་དང་།
དེ་ཡི་ཆད་དེ་དུས་ལས་འདས་སོ། །སྐབས་དེ་དགེ་སློང་རྣམས་ཀྱིས་གསོལ་པ་དང་། བཀའ་སྩལ་པ། དུད་འགྲོའི་ཕྱིར་ཟས་ཀྱི་ཆང་བུ་གཞག་པར་བྱའོ་ཞེས་སོ། །དེ་ནས་དགེ་སློང་དགོན་པ་པ་ཞིག་
གིས། ཝ་རྣམས་ལ་ཟས་ཀྱི་ཆང་བུ་བྱིན་ཏེ་བྱ་རོག་བསྐྲད་པ་དང་། དེ་དག་ཁྲོས་ནས་བྱ་རོག་གི་སྐད་དུ་རྐུན་པོའི་སྡེ་དཔོན་ལ་དགེ་སློང་འདི་ལ་གསེར་མང་དུ་ཡོད་དོ་ཞེས་སྨྲས་
པ་དང་། དེ་བྱ་རོག་གི་སྐད་ལ་མཁས་པ་ཞིག་ཡིན་པས། དེས་དགེ་སློང་དེ་ལ་བརྡེག་པར་བརྩམས་པ་དང་། ཀྱེ་སྐྱེས་བུ་ཅི་སྟེ་བརྡེག དེ་སྨྲས་པ། ཁྱོད་ལ་གསེར་ཡོད་པ་བྱིན་ཅིག ཀྱེ་སྐྱེས་བུ་ང་ལ་གསེར་གྱི་འབྱོར་པ་ག་ལ་ཡོད་དམིགས་མེད་པར་མ་བརྡེག་ཤིག་ཅེས་སྨྲས་ཀྱང་། 
1-595
གལ་ཏེ་མི་གཏེར་ན་ཁྱོད་ངས་བསད་དོ་ཞེས་ཟེར་བ་ན། ཀྱེ་སྐྱེས་བུ་ཁྱོད་ནི་གཅིག་གིས་བསླུས་ནས་ཁྱོད་ལ་དེ་སྐད་དུ་ཟེར་བ་སྨྲོས་ཤིག དེ་སྨྲས་པ། བྱ་རོག་དག་ཟེར་རོ། །ཀྱེ་
སྐྱེས་བུ་བྱ་རོག་དག་ནི་ང་ལ་ཁྲོས་པ་ཡིན་ནོ་ཞེས་པ་ཇི་ལྟར་གྱུར་པ་བསྙད་པ་དང་། འཕགས་པ་གལ་ཏེ་ཁྱོད་ཀྱི་བདག་ལ་དེ་སྐད་དུ་དྲང་པོར་མ་སྨྲས་པར་གྱུར་ན། བདག་
གིས་ཁྱོད་གསད་པར་གྱུར་ཏེ་ཞེས་པའི་སྐབས་དེ་དགེ་སློང་རྣམས་ཀྱིས་གསོལ་པ་དང་། བཀའ་སྩལ་པ། དགེ་སློང་དག་ཉེས་དམིགས་འདི་དག་བསྔོས་ཏེ་བཞག་པ་ལས་གྱུར་གྱིས། དེ་ལྟ་བས་ན་སེམས་ཅན་
ཐམས་ཅད་ཀྱི་ཕྱིར་སྤྱི་ལ་ཅི་བདེ་བའི་ཟས་ཀྱི་ཆང་བུ་གཞག་པར་བྱའོ་ཞེས་སོ། །གཞན་ཡང་དམ་པ་རྣམས་ཀྱི་ཕྱག་ལེན་ནི། སྤྱོད་པ་བསྡུས་པའི་སྒྲོན་མ་ལས། རང་གིས་ཟོས་ཤིང་འཐུངས་པ་
ཡི། །ལྷག་མ་འབྱུང་པོ་ཀུན་ལ་སྦྱིན། །ཞེས་གསུངས་པ་ལྟར། ཟན་གྱི་ཆང་བུ་གཅིག་བྱས་ཏེ། ཚོད་མ་ལ་བསྒྲེས་ནས་ལྷག་མ་ལ་དབང་པའི་འབྱུང་པོ་རྣམས་ལ་སྟེར་བར་མཛད་དོ། །དེའི་ཚིག་ནི།
ཨོཾ་ཨུ་ཚིཥ་ཋ་པཎྚི་ཨ་ཤི་བྷྱཿསྭཱ་ཧཱ་ཞེས་པའོ། །དེ་བཞིན་དུ་ཟས་ཀྱི་ལྷག་རོལ་ལ་སྤྱོད་པ་དག་ལའང་ཅི་འབྱོར་པའི་ལྷག་མ་གཞག་པར་བྱའོ། །དེ་ལྟར་ཟས་ཀྱི་བྱ་བ་གྲུབ་པའི་རྗེས་སུ་བྱ་བ་ནི། 
1-596
ཀཱ་རི་ཀཱ་ལས། ཟོས་ཤིང་དེ་བཞིན་འཐུངས་པ་དང་། །རུང་པའི་ཆུ་ཡིས་དེ་འོག་ཏུ། །སྦྱིན་པ་ཡང་དག་སྤེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། ཞེས་གང་གསུང་པ་ལྟར་རུང་བའི་ཆུ་
ཡིས་ཁ་བཤལ་བ་ལ་སོགས་པ་བྱ་སྟེ། འདུལ་བ་ཚིག་ལེའུར་བྱས་པ་ལས། ཟོས་ནས་ཁའི་དྲི་མ་ནི། །ས་དང་ལྕི་བ་སོགས་ཀྱི་སྦྱང་། །ཆུ་སྐྱོར་གསུམ་མམ་ལྷག་པས་ཀྱང་། །བཀྲུ་བཤལ་ཡོངས་སུ་
དག་པར་བྱ། །ཞེས་སོ། །དེའི་རྗེས་སུ་སྦྱིན་པའི་ཚིགས་བཅད་གཉིས་བརྗོད་པར་བྱ་མཛད་དེ། ཡོན་སྦྱོང་བ་དང་། བསྔོ་བའོ། །དང་པོ་ནི་དད་པ་ཅན་གྱི་རྫས་ལ་ལོངས་སྤྱོད་ནས་རང་ལ་སྡིག་དུ་
མི་འགྱུར་བར་བྱ་བའི་ཕྱིར་མདོ་ཤེས་རབ་སྙིང་པོ་འདོན་པ་སྟེ། སྔོན་རྒྱལ་པོ་ཁྲི་སྲོང་སྡེ་བཙན་གྱི་དུས་སུ། རྒྱ་གར་གྱི་མཁན་པོ་ཞི་བ་འཚོ་ལ་སོགས་པ་པཎྚི་ཏ་མང་དུ་སྤྱན་
དྲངས། འབའ་རད་ན་ལ་སོགས་པ་སད་མི་བདུན་ལེགས་པར་སད་དེ་འབངས་ཅེས་ཕྲུག་སུམ་བརྒྱའམ། གླིང་གཞི་ཁ་ཅིག་ལས། སུམ་བརྒྱ་དྲུག་ཅུ་ཞེས་སྟེ། དེ་རྣམས་རབ་ཏུ་བྱུང་ནས་བླའི་མཆོད་གནས་སུ་
མཛད་པའི་ཚེ། གསོལ་འཚལ་གྲུབ་པའི་རྗེས་ལ། ཡུམ་སྟོང་ཕྲག་བརྒྱ་པའམ་སོར་རེ་ཙམ་གསུང་སྒྲོགས་མཛད་པ་ན། པཎྚི་ཏ་དྲི་མེད་བཤེས་གཉེན་ཞེས་པའི་གསུང་གིས། འདི་ལྟར་བྱས་ན་ཆོས་དང་གང་ཟག་གཉིས་ཀ་འོ་རྒྱལ་བར་འདུག་པས། 
1-597
འདི་གསུང་སྒྲོགས་གསུང་ནས་ཡུམ་གྱི་དོན་བསྡུས་པ་མདོ་ཤེས་རབ་སྙིང་པོ་བསྒྱུར་རོ། །དེའི་ཚེ་དགེ་འདུན་རྣམས་ཀྱིས་འདི་ལ་འགྲེལ་པ་གཅིག་ཀྱང་མཛད་པར་ཞུས་པས་ཤེར་སྙིང་གི་རྒྱ་ཆེར་འགྲེལ་པ་
མཛད་དོ། །གསུང་ལས་ཀྱང་དུས་དེ་ནས་བཟུང་སྟེ་དེང་སང་གི་བར་དུ་བོད་ཀྱི་རབ་ཏུ་བྱུང་བ་རྣམས་གསོལ་འཚལ་གྱི་རྗེས་ལ་མདོ་ཤེས་རབ་སྙིང་པོ་འདོན་པ་འདི་ཁོང་གི་བཀའ་ཡིན་ཅེས་
གསུང་སྐད། དེས་ན་འདི་ངེས་པར་གདོན་པར་བྱའོ། །རྣམ་པ་གཅིག་ཏུ་ན་སྦྱིན་བདག་གིས་ལོག་པའི་སྨོན་ལམ་བཏབ་པ་འགྲུབ་པར་མི་འགྱུར་བའི་ཕྱིར་དུ་སྟེ་འདི་ལྟར། བྲམ་ཟེ་ཨོ་ཏ་ལའི་བུས་
བསམ་པ། དགེ་སྦྱོང་གོའུ་ཏ་མ་དགེ་འདུན་དང་བཅས་པ་ལ་གདུགས་ཚོད་གསོལ་ནས་སྨོན་ལམ་བཏབ་ན། ཅི་བསམས་པ་དང་། ཅི་གསོལ་བ་འགྲུབ་པར་འགྱུར་རོ་ཞེས་ཐོས་ཏེ། བཅོམ་ལྡན་འདས་དགེ་སློང་
གི་དགེ་འདུན་དང་བཅས་པ་གདན་དྲངས་ནས་ཟས་ཀྱི་བྱ་བ་གྲུབ་པ་དང་། སྟན་ཆེས་དམའ་བ་ཞིག་བླངས་ཏེ་བཅོམ་ལྡན་འདས་ཀྱི་སྤྱན་སྔར་འདུག་སྟེ་སྨོན་ལམ་ལོག་པར་གདབ་པར་བརྩམས་པ། བདག་
གིས་ཤཱཀྱའི་སྲས་ཀྱི་དགེ་སྦྱོང་ཇི་སྙེད་གཅིག་བཤོས་གསོལ་བ་འདི་ཐམས་ཅད་བདག་གི་བླང་དུ་གྱུར་ཅིག་སྙམ་པ་དང་། ཨོ་ཏ་ལའི་བུའི་བསམ་པ་ཐུགས་ཀྱི་མཁྱེན་ནས། བྲམ་ཟེ་ཁྱོད་ཀྱི་མི་རུང་པའི་སེམས་བསྐྱེད་པ་དེ་ནི་འགྲུབ་པར་མི་འགྱུར་ཏེ། 
1-598
དགེ་འདུན་འདི་དག་ཐམས་ཅད་ནི་ཡང་སྲིད་ཟད་པ་ཡིན་གྱི་སེམས་གཞན་བསྐྱེད་ཅིག་ཅེས་བཀའ་སྩལ་ནས་ཡོན་བསྔོ་བ་མཛད་དེ་གཤེགས་སོ། ། དེ་ནས་གཙུག་ལག་ཁང་དུ་དགེ་སློང་རྣམས་ལ་བཀའ་སྩལ་
པ། དགེ་སློང་དག་བྲམ་ཟེ་ཨོ་ཏ་ལའི་བུས་སྨོན་ལམ་ལོག་པས་བསླང་པའི་སྡིག་པ་ཅན་གྱི་སེམས་བསྐྱེད་ཀྱིས། ཁྱེད་ཅག་གིས་ཟན་ཟོས་ནས་གཙུག་ལག་ཁང་གི་ཚིགས་སུ་བཅད་པ་བརྗོད་ཅིག་དང་
ལོག་པའི་སྨོན་ལམ་འགྲུབ་པར་མི་འགྱུར་རོ་ཞེས་སོ། །ཡང་འགའ་ཞིག་ནི་དེའི་སྟེང་དུ་བསོད་སྙོམས་ཡོངས་སུ་སྦྱོང་བའི་གཟུངས་ཞེས་འདོན་པར་མཛད་དེ། དེ་ནི་འདི་ལྟར། ན་མཿས་མན་ཏ་པྲ་བྷ་
རཱ་ཛ་ཡཿ ཏ་ཐཱ་ག་ཏ་ཡཿ ཨ་ར་ཧ་ཏེ་སཾ་མྱཀ་སཾ་བུད་དྷཱ་ཡཿ ན་མོ་མཉྫུ་ཤྲཱི་ཡེ་ཀུ་མ་ར་བྷཱུ་ཏཱ་ཡཿ བོ་དྷི་ས་ཏྭཱ་ཡཿ མ་ཧཱ་ས་ཏྭཱ་ཡཿ མ་
ཧཱ་ཀཱ་རུ་ཎི་ཀཱ་ཡཿ ཏད་ཡ་ཐཱཿ ཨོཾ་ནི་རཱ་ལམ་བེཿ ནི་རཱ་བྷཱ་སེཿ ཛ་ཡེ་ཛ་ཡ་ལབ་དྷེཿ མ་ཧཱ་མ་ཏེཿ དཀྵེ་དཀྵེ་ཎཱཾ་པ་རི་ཤོ་དྷ་ཡ་སྭཱ་ཧཱ་ཞེས་པ་
སྟེ། གང་གཟུངས་འདི་ལན་གཅིག་བརྗོད་པ་དེ་རི་རབ་ཙམ་གྱི་བསོད་སྙོམས་ཀྱང་ཡོངས་སུ་སྦྱོང་བར་འགྱུར་རོ་ཞེས་གསུངས་པས་དེ་ལྟར་བྱེད་པའང་སྣང་ངོ་། །གཉིས་པ་ཡོན་བསྔོ་བ་ནི་ཡོན་བཤད་པ་དོན་གཅིག་སྟེ། 
1-599
རྒྱ་ཆེར་འགྲེལ་པ་ལས། ཡོན་བཤད་པ་ཞེས་བྱ་བ་ནི་དགེ་བའི་རྩ་བ་བསྔོ་ཤིང་སྨོན་ལམ་འདེབས་པའོ་ཞེས་སོ། །དེ་ནི་དམ་པ་རྣམས་ཀྱི་ཕྱག་ལེན་ལ་འདི་ལྟར་མཛད་པར་སྣང་སྟེ། བཟའ་
བ་བྱིན་པའི་བསོད་ནམས་ཀྱིས། །ཁ་དོག་གཟི་བརྗིད་སྟོབས་ལྡན་ཞིང་། རོ་བརྒྱ་པ་ཡི་ཟས་རྣམས་དང་། །བསམ་གཏན་ཟས་ཀྱིས་འཚོ་བར་ཤོག །བཏུང་བ་བྱིན་པའི་བསོད་ནམས་ཀྱི། །ཉོན་མོངས་སྲིད་པ་ཞི་འགྱུར་
ཞིང་། །བཞིན་འཛུམ་ཡོན་ཏན་ལྡན་པ་དང་། །སྐོམ་ནད་མེད་པར་སྐྱེས་བར་ཤོག །སྨན་རྣམས་ཕུལ་བའི་བསོད་ནམས་ཀྱི། །ནད་མེད་པར་ནི་སྐྱེ་འགྱུར་ཞིང་། །སྐྱེ་རྒ་ན་འཆི་མེད་པ་ཡི། །མྱ་ངན་འདས་པ་
ཐོབ་པར་ཤོག །ཅེས་པའོ། །ཟས་ཀྱི་རྗེས་སུ་སྨན་བྱིན་པའི་བསྔོ་བ་འདི་ཇི་ལྟར་འབྲེལ་སྙམ་ན། གསུང་ལས། འདི་འབྱུང་བ་འཁྲུགས་པའི་ནད་སེལ་བའི་སྨན་གྱི་བསྔོ་བ་ཡིན་ཀྱང་ཁ་ཟས་འདིའང་བྲུ་
བའི་ནད་སེལ་བས་དེ་ལྟར་འབྲེལ་ལོ་ཞེས་གསུང་གསུང་ངོ་། །དེའི་རྗེས་སུ་སྒྱུ་མ་མཁན་བཟང་པོ་ལུང་བསྟན་པའི་མདོ་ལས། །དེས་བཅོམ་ལྡན་འདས་སྤྲུལ་པའི་ཞལ་ཟས་དྲངས་པ་གསོལ་ནས། འཁོར་གསུམ་ཡོངས་
དག་གི་བསྔོ་བ་མཛད་པ་དེ་འདོན་པར་མཛད་དེ། གང་གིས་སྦྱིན་དང་གང་ལ་སྦྱིན། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ནི། །སྦྱིན་བདག་དེ་ལ་ཡོངས་རྫོགས་ཤོག །ཅེས་སོ། །
1-600
མདོ་དེ་ཉིད་དུ་བཟང་པོ་ལ་ནི་ཡོངས་རྫོགས་ཤོག་ཅེས་འབྱུང་ཀྱང་འདོན་པ་བསྒྱུར་ནས་དེ་ལྟར་མཛད་པར་སྣང་ངོ་། །ཡང་དེའི་ཚེ་ཆུའི་སྦྱིན་པའི་བསྔོ་བ་ཡང་གདོན་སྟེ། མདོ་རྩ་བ་ལས། ཡོན་
འཆད་པ་ན་དགའ་བོ་དང་ཉེ་དགའ་བོ། དག་གིས་མིང་སྨོས་པར་བྱའོ་ཞེས་སོ། །གལ་ཏེ་མ་སྨོས་ན་ཉེས་པ་འབྱུང་སྟེ། རྣམ་པར་འབྱེད་པ་ལས། ཡོན་འཆད་པའི་ཚེ་ན་ཀླུ་རྒྱལ་པོ་དགའ་
བོ་ཉེ་དགའ་གཉིས་ཀྱི་མིང་ཡང་སྨོས་པར་བྱའོ། །སྨོས་པར་མི་བྱེད་ན་འགལ་ཚབས་ཅན་དུ་འགྱུར་ཞེས་སོ། །བསྔོ་བ་བྱེད་ཚུལ་ནི་ཁྲུས་བྱེད་པའི་སྐབས་སུ་བཤད་ཟིན་ཏོ། །གཞན་ཡང་གསུང་ལས། ཐེག་
པ་ཆེན་པོའི་སྒོར་ཞུགས་ཤིང་སེམས་བསྐྱེད་པ་དག་གིས། ཡབ་སྲས་མཇལ་བ་ནས་གསུངས་པའི་ཆོས་ཐམས་ཅད་བདེ་བས་ནོན་པའི་ཏིང་ངེ་འཛིན་གྱི་སྨོན་ལམ་ཡང་གདབ་བོ་གསུང་། དེ་གང་ཡིན་ན། གང་
གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག གང་གིས་བདག་ལ་སྐོམ་བླུག་པ་དེ་དག་དང་། གང་གིས་བདག་ལ་རིམ་གྲོས་བྱས་པ་དང་བསྟི་སྟངས་
བྱས་པ་དང་མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག གང་ཡང་བདག་ལ་གཤེ་བ་དང་མི་བདེ་བར་བྱེད་པ་དང་རྡེག་པ་དང་མཚོན་གྱིས་འདེབས་པ་དང་། 
1-601
རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱ་བར་གྱུར་ཅིག་ཅེས་པའོ། །དེ་ནས་ཇི་ལྟར་བྱ་བ་ནི། གསུང་ལས་པུ་ཏོ་སྐོར་པའི་བཀའ་རྒྱུད་རྣམས་ཐུགས་དམ་གྱི་གཙོ་བོ་བསམ་སྒོམ་ལ་མཛད་པས། གདིང་སྐར་སྐུ་གཤེགས་ཀྱི་དུས་ན་སྔ་
སྐད་དགེ་འདུན་ཐམས་ཅད་ཐུགས་དམ་ལ་བཞུགས་པས་སྲང་ཀ་རྣམས་ན་བྱ་རྗེས་བཀྲ་བཀྲ་བ། ཕྱིར་འོངས་ཀུན་གྱི་བལྟས་པས་བཞུགས་པ་རང་མེད་པ་འདྲ་བ་ཡོད་སྐད། མཁན་པོ་དཔལ་ལྡན་གྲོའི་དུས་
ན་ཡང་བསམ་སྒོམ་ལ་གཙོ་བོར་མཛད་པས་སྔ་སྐད་འཆད་ཉན་བྱེད་པ་མེད་ལ། སློབ་དཔོན་པ་ཞལ་རྣམ་པའི་དུས་ན་སྔ་སྐད་ཀྱང་བཤད་ཉན་བྱེད་པ་བྱུང་སྟེ། མདོར་ན་འོ་སྐོལ་བསམ་སྒོམ་
པ་རྣམས་ཀྱི་བསམ་སྒོམ་བྱེད། འཆད་ཉན་པ་རྣམས་ཀྱིས་འཆད་ཉན་བྱེད་དེ། གཅིག་གིས་གཅིག་ལ་མི་གནོད་པར་ཐམས་ཅད་ཀྱིས་ཐུགས་དམ་ལ་འབད་པ་བྱེད་དགོས་པ་ལགས་ཞེས་གསུང་གསུང་། དེ་ནས་ཚ་
བའི་དུས་མ་གཏོགས་པ་གསོལ་ཟས་གང་འདྲེན་ཀྱང་ཆབ་བཏང་ནས་འདྲེན་ལ། ཁྱད་པར་དུ་དྲོའི་དུས་ལ་བབ་པ་ནམ་གཞན་རྣམས་ཡང་སྔར་བཞིན་བྱ་ཞིང་ཆབ་ངེས་པར་བཏང་ནས་འདྲེན་པ་ཕྱག་ལེན་ཡིན་ནོ། །
1-602
དེ་ནས་ཟས་ཀྱི་བྱ་བ་གྲུབ་པ་དང་། ཆབ་བླང་པ་དང་མ་བླངས་པ་གང་ཡིན་ཡང་རུང་སྟེ། དེའི་ཚེ་ཟས་ཀྱི་འཁྲི་བ་གཅོད་པ་བྱ་བ་བྱེད་དེ། དེ་ནས་སང་ཐུག་ལ་དུས་རུང་
གི་ཟས་མི་བཟའ་སྙམ་དུ་ཞེ་བཅད་བྱེད་པའོ། །དེ་མ་བྱས་ན་ཕྱི་དྲོའི་ཁ་ཟས་ལ་རྟེན་པའི་ཉེས་པ་འབྱུང་ལ། དེ་ཕན་ཆད་ཉི་མ་མ་ཡོལ་ཞིང་སྦྱོར་བས་མ་སྤངས་ཀྱང་། བསམ་པས་
སྤངས་པའི་ཕྱིར། དུས་རུང་གི་ཟས་ཟོས་ན་སྤངས་པ་ཟ་བའི་ཉེས་པ་འབྱུང་ཞེས་དང་། ཡང་བསམ་པས་སྤངས་ཀྱི་སྟེང་དུ་སྦྱོར་བས་ཀྱང་སྤངས་པ་ཟོས་ཟོན་ཏོ། །ཆོག་གོ་ཞེས་པ་ལ་སོགས་པ་
བྱས་ཏེ་དུས་རུང་གི་ཟས་ཟོས་ན་སྤངས་པ་ཟ་བའི་ལྟུང་པ་དངོས་གཞི་འབྱུང་ངོ་ཞེས་གསུང་སྐད་དོ། །འོན་ཀྱང་དེ་དག་ལ་རེ་ཤིག་ཅེས་པའི་སྒྲ་སྦྱར་བ་ནི་སྤངས་པའི་ཁོངས་སུ་མི་
གཏོགས་སོ། །དེའི་ཕྱིར་འདུལ་བ་ཀུན་ལས་བཏུས་པ་ལས། གཞན་ཡང་ཚིག་ལྷག་མ་མེད་པ་ལྔ་པོ་ཐོང་ཤིག གཞན་ལ་བྱིན་ཅིག སོང་ཤིག ཟོས་ཟིན་ཏོ། །ཆོག་གོ་ཞེས་བྱ་བ་དག་གིས་ནི་སྤངས་
པར་བརྗོད་པར་བྱ་ལ། ཚིག་ལྷག་མ་དང་བཅས་པ་ལྔ་པོ་རེ་རེ་ཤིག་ཐོང་ཤིག རེ་ཤིག་གཞན་ལ་བྱིན་ཅིག་རེ་ཤིག་སོང་ཤིག རེ་ཤིག་ཟོས་ཟིན་ཏོ། །རེ་ཤིག་ཆོག་གོ་ཞེས་བྱ་བའི་དག་གིས་ནི་མ་སྤངས་པར་བརྗོད་པར་བྱའོ་ཞེས་སོ། །
1-603
ཡང་བསམ་སྦྱོར་གྱིས་སྤངས་པ་དག་གིས་ཉི་མ་མ་ཡོལ་བར་བཟའ་བ་དང་བཅའ་བ་རྙེད་ན་ལྷག་པོར་བྱེད་དུ་བཅུག་སྟེ་བཟའ་བར་བྱའོ། ། དེ་ལ་ལྷག་པོར་ཞེས་པ་ནི་ལྷག་མར་བྱས་ཤིང་
པོར་བ་སྟེ། དེ་ནི་འདི་ལྟར་དགེ་སློང་ཟས་ཟོས་ཟིན་ཏེ་སྤངས་པ་ཞིག་གིས་བཟའ་བ་དང་བཅའ་བ་འགའ་ཞིག་རྙེད་དེ་ཟ་བར་འདོད་ན་བྱིན་ལེན་བྱས་ཏེ་བླངས་ལ། དེ་ནས་སང་ཐུག་
དུས་རུང་གི་ཟས་མི་བཟའ་སྙམ་དུ་བརྟག་པ་བྱས་པའམ། མ་བྱས་པ་གང་ཡིན་ཡང་རུང་སྟེ། བཟའ་བར་བྱ་བའི་བྱིན་ལེན་སྟོབས་པ་འཐོབ་པའི་ཕྱོགས་ན་འགྲེང་པ་ལ་སོང་ཤིག་ཅེས་པ་ལ་
སོགས་པས་མ་སྤངས་པ་སྤྱོད་ལམ་ལས་མ་ཉམས་པ་ཞིག་གི་དྲུང་དུ་ཙོག་པུར་འདུག་ནས་གསོལ་བ་གདབ་སྟེ། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་འཚལ་མ་
འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱིས་པ་ལས། བཅའ་བ་དང་བཟའ་བ་རྙེད་ཅིང་འཚལ་བར་འཚལ་ན་ལྷག་པོར་བགྱིས་ཏེ་བདག་ལ་རྩལ་དུ་གསོལ་ཞེས་པ་དང་། དགེ་སློང་
མ་སྤངས་ལ་སྤྱོད་ལམ་ལས་མ་ཉམས་པ་དེས་ཁམ་གཉིས་སམ་གསུམ་ཟོས་ནས་ཁྱོད་ཀྱིས་གྱུར་གྱིས་བཞུད་ཅིག་ཅེས་པའམ། པཎྚི་ཏ་ཁ་ཅིག་ནི། ཅི་བདེར་གསོལ་ཅིག་ཅེས་པའི་ཚིག་གིས་སྦྱིན་པར་བྱའོ་ཞེས་ཟེར་ལ། 
1-604
ཆོས་ཀྱི་བཤེས་གཉེན་ནི་འདིར་དོན་གཙོ་ཆེ་བ་ཡིན་གྱི་ཚིག་ནི་དེ་གཉིས་སམ་གཞན་གྱིས་ཡང་རུང་ངོ་ཞེས་འཆད་དོ། །མི་བཟའ་བར་བརྟག་པ་བྱས་པ་དེས་ནི་ལོངས་མི་སྤྱད་ཀྱི་ཁྱོད་ཀྱི་
གྱུར་གྱིས་བཞུད་ཅིག་ཅེས་པ་ལ་སོགས་པའི་ཚིག་གིས་བྱ་བར་གསུངས་སོ། །དེ་ནས་དྲོད་ཐོན་པ་དང་ཕྱི་དྲོའི་ཆ་ལ་ཡང་ཡིད་དལ་དུ་མ་རུངས་པར་འཆད་ཉན་བསྒོམ་སྒྲུབ་ལ་སོགས་པས་དོན་
ཡོད་པར་བྱའོ། །སྤྱོད་ལམ་ཐམས་ཅད་ཀྱང་ཞི་ཞིང་དུལ་བར་བྱེད་པ་ནི་རབ་ཏུ་བྱུང་བའི་ཚུལ་ཡིན་ནོ། །གཞན་ཡང་ཀཱ་རི་ཀ་ལས། རྒན་ལ་སྦྲིད་བྱུང་ཕྱག་བྱ་སྟེ། །གཞོན་ལ་ནད་མེད་གྱུར་
ཅེས་བྱ། །ཁྱིམ་པ་སྦྲིད་པ་བྱུང་པ་ལ། །ཡུར་རིང་པོས་ཞེས་བརྗོད་པར་བྱ་ཞེས་གང་གསུངས་པའང་ལག་ལེན་ལ་གདབ་པར་བྱ་སྟེ། གླེང་གཞི་ནི། བཅོམ་ལྡན་འདས་ཀྱི་དྲུང་ན་སྲུ་སྐྱེ་དགུའི་བདག་
མོ་འཁོར་དགེ་སློང་མ་ལྔ་རྩ་བརྒྱ་དང་བཅས་པ་བཞུགས་པའི་ཚེ། བཅོམ་ལྡན་འདས་ལ་སྦྲིད་པ་བྱུང་ནས་འདི་སྐད་ཅེས། བདག་གི་བཅོམ་ལྡན་འདས་ཡུན་རིང་དུ་འཚོ་ཞིང་། ཐུབ་པ་ཆེན་པོ་བསྐལ་
པར་བཞུགས་པར་གྱུར་ཅིག་ཅེས་སྐྱེ་དགུའི་བདག་མོས་གསོལ་པ་དང་། དགེ་སློང་མ་ལྔ་བརྒྱ་པོ་དེ་དག་གིས་ཀྱང་བཅོམ་ལྡན་འདས་ཡུན་རིང་དུ་ཞེས་པ་ལ་སོགས་པ་སྔ་མ་ལྟར་གསོལ་ཏོ། །དེའི་སྒྲ་ས་བླ་བའི་གནོད་སྦྱིན་དག་དང་། 
1-605
དེའི་སྒྲ་རྒྱལ་ཆེན་རིས་བཞི་ནས་རིམ་པ་བཞིན་ཚངས་པའི་འཇིག་རྟེན་གྱི་བར་དུ་སྐད་ཅིག་ཡུད་ཙམ་དེ་ཉིད་ལ་ཐོས་པར་གྱུར་ནས་སྔ་མ་ལྟར་སྒྲ་སྒྲོགས་པར་བྱེད་དོ། །དེའི་ཚེ་བཀའ་སྩལ་
པ་གོའུ་ཏ་མའི་ཁྱོད་ཀྱིས་སེམས་ཅན་མང་པོའི་བར་ཆད་བྱས་ཏེ། དེ་བཞིན་གཤེགས་པ་ལ་ནི་དེ་ལྟར་ཕྱག་མི་བྱ་ཞིང་དེ་ལྟར་ཕྱག་བྱེད་པ་ནི་ལེགས་པར་ཕྱག་བྱེད་པ་མ་ཡིན་ནོ། །
བཙུན་པ་དེ་བཞིན་གཤེགས་པ་ལ་ཕྱག་ཇི་ལྟར་བགྱིས་ན་ལེགས་པར་ཕྱག་བགྱིས་པར་འགྱུར། གོའུ་ཏ་མའི་དེ་བཞིན་གཤེགས་པ་ལ་འདི་ལྟར་ཕྱག་བྱས་ཏེ། བདག་གི་བཅོམ་ལྡན་འདས་ཉན་ཐོས་ཀྱི་དགེ་
འདུན་དང་བཅས་ཏེ་མཐུན། ཀུན་ཏུ་དགའ། མི་རྩོད་རྩེ་གཅིག འདུན་པ་ཅིག་ཅིང་ཆུ་དང་འོ་མ་ཅིག་ཏུ་འདྲེས་པ་ལྟ་བུ་གྱུར་ལ། སྟོན་པའི་བསྟན་པ་གསལ་བར་མཐོང་བར་གྱུར་ཅིག་ཅེས་དེ་
ལྟར་ཕྱག་བྱས་ན་ལེགས་པར་ཕྱག་བྱས་པར་འགྱུར་རོ། །དེ་ནས་སྐྱེ་དགུའི་བདག་མོས་བསམ་པ། བཅོམ་ལྡན་འདས་དགེ་འདུན་མཐུན་པའི་བསྔགས་པ་བརྗོད་པར་མཛད་པས། བཅོམ་ལྡན་འདས་བཞུགས་ཤིང་། དགེ་འདུན་མཐུན་
པའི་ཚེ་བདག་ཡོངས་སུ་མྱ་ངན་ལས་འདའ་འོ་སྙམ་ནས། བཅོམ་ལྡན་འདས་ལ་ཐལ་མོ་སྦྱར་ཏེ་གསོལ་པ། བཙུན་པ་བདག་བསམ་བཞིན་དུ་ཡོངས་སུ་མྱ་ངན་ལས་འདའ་བར་འཚལ་ལོ། །དེ་ལ་བཅོམ་ལྡན་འདས་ཅང་མི་གསུང་པ་དང་ལན་གཉིས་ལན་གསུམ་དུ་གསོལ་ཀྱང་ཅང་མི་གསུང་ནས། 
1-606
ལན་བཞི་པ་གསོལ་པ་དང་། གོའུ་ཏ་མའི་མྱ་ངན་ལས་འདས་བའི་ཕྱིར་སྨྲའམ། བཅོམ་ལྡན་འདས་མྱ་ངན་ལས་འདའ་བའི་སླད་དུའོ། །གོའུ་ཏ་མའི་མྱ་ངན་ལས་འདའ་བའི་ཕྱིར་སྨྲའམ། བདེ་བར་གཤེགས་པ་
མྱ་ངན་ལས་འདའ་བའི་སླད་དུའོ། །གོའུ་ཏ་མའི་འདུས་བྱས་ཐམས་ཅད་ནི་དེ་ལྟའི་ཆོས་ཅན་ཡིན་ན་སྨྲ་ཅི་དགོས། དགེ་སློང་མ་དག་གི་དེ་སྐད་གསོལ་བ་ལ་ཡང་དེ་བཞིན་དུ་བཀའ་སྩལ་
ལོ། །དེ་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་སོང་ངོ་། །དེ་ནས་དགའ་བོ་དང་། སྒྲ་གཅན་ཟིན་དང་། མ་འགགས་པ་དང་། ཀུན་དགའ་བོའི་དྲུང་དུ་སོང་སྟེ་ཕྱག་འཚལ་ནས་དགེ་སློང་གནས་
བརྟན་གནས་བརྟན་དག་ལའང་ཕྱག་བཙལ་ཏེ་དབྱར་ཁང་དུ་སོང་ནས། གང་ཐོས་ན་སེམས་ཅན་མང་པོས་ཁྱད་པར་ཆེན་པོ་ཐོབ་པ་དེ་ལྟ་བུའི་ཆོས་བསྟན་ཏེ་ངོ་མཚར་རྨད་དུ་བྱུང་བའི་རྫུ་འཕྲུལ་
དག་བསྟན་ནས་དགེ་སློང་མ་རྣམས་དང་ལྷན་ཅིག་མྱ་ངན་ལས་འདས་སོ། །དེའི་ཚེ་ས་གཡོས་པ་དང་། སྐར་མདའ་ལྟུང་བ་དང་། ཕྱོགས་དམར་པོར་གྱུར་པ་དང་། བར་སྣང་ལ་ལྷའི་རོལ་མོའི་སྒྲ་དག་
ཀྱང་བྱུང་ནས། རི་རབ་ཀྱི་བང་རིམ་ལ་སོགས་པ་ཕྱོགས་ཐ་དད་ན་གནས་པའི་དགེ་སློང་དག་གིས་ཐོས་ཏེ། འདི་ཅིའི་ལྟས་ཡིན་སྙམ་དུ་བསམས་པ་དང་། སྐྱེ་དགུའི་བདག་མོས་འཁོར་ལྔ་བརྒྱ་དང་བཅས་པ་མྱ་ངན་ལས་འདས་པར་མཐོང་ནས། 
1-607
སངས་རྒྱས་ཀྱི་སྲུ་མྱ་ངན་ལས་འདས་ན་དེའི་ལུས་ལ་མཆོད་པའི་ཕྱིར་འདོང་ངོ་སྙམ་སྟེ། ཤིང་དྲི་ཞིམ་པོ་དག་ཁྱེར་དོང་ངོ་། །བཅོམ་ལྡན་འདས་དགེ་འདུན་དང་བཅས་པའང་དེར་གཤེགས། རྒྱལ་པོ་གསལ་
རྒྱལ་གྱི་རིན་པོ་ཆེ་དང་གོས་སྣ་ཚོགས་ཀྱི་བརྒྱན་པའི་ཁྱོགས་ལྔ་བརྒྱ་དང་། དྲི་དང་བདུག་སྤོས་ལ་སོགས་པ་མཆོད་པ་སྣ་ཚོགས་པ་ཕུལ་ལོ། །དེ་ཚེ་དགའ་བོ་ལ་སོགས་པ་བཞིས་ཁྱོགས་ནས་
བཏེག་ཅིང་བཅོམ་ལྡན་འདས་ཀྱིས་ཀྱང་ཕྱག་གཡས་པས་བཟུང་ངོ་། །དགེ་སློང་རྣམས་ཀྱིས་དགེ་སློང་མ་རྣམས་ཀྱི་ཁྱོགས་བཏེག་ནས་དབེན་པར་ཁྱེར་ཏེ། དེ་དག་གི་བླ་གོས་ཕུད་ནས་དགེ་སློང་དག་སྐྱེ་དགུའི་
བདག་མོ་ཆེན་མོ་ལ་སོགས་པ་དགེ་སློང་མ་ལྔ་བརྒྱ་པོ་འདི་དག་ནི་ལོ་བརྒྱ་ཉི་ཤུ་ལོན་ཡང་ལུས་ལ་གཉེར་མ་དང་སྐྲ་དཀར་མེད་ཅིང་ལོ་བཅུ་དྲུག་ལོན་པ་ལྟ་བུ་ལ་ལྟོས་
ཞེས་བཀའ་སྩལ་ནས། དྲི་སྣ་ཚོགས་ཀྱི་ཤིང་གི་ཕུང་པོ་སྤུངས་ཏེ་བསྲེགས་སོ། །དེ་ནས་མི་རྟག་པ་དང་ལྡན་པའི་ཆོས་གསུངས་ནས་གཙུག་ལག་ཁང་དུ་གཤེགས་ཏེ་དགེ་སློང་རྣམས་ལ་བཀའ་སྩལ་པ།
སྦྲིད་པ་བྱུང་བ་ལ་སོས་ཞེས་ཟེར་བ་ལ་ཉེས་དམིགས་འདི་ལྟ་བུ་དང་གཞན་དག་ཀྱང་ཡོད་པས། དེ་ལྟ་བས་ན་དགེ་སློང་གི་སྦྲིད་པ་བྱུང་བ་སོས་ཞེས་བརྗོད་པར་མི་བྱའོ། །བརྗོད་ན་འགལ་ཚབས་ཅན་དུ་འགྱུར་རོ་ཞེས་སོ། །
1-608
དེའི་ཕྱིར་དེ་ལྟར་མི་བྱ་བར་བསྟན་ཏེ་འདི་ནི་སྤྱིར་བཏང་ཡིན་ནོ། །དམིགས་བསལ་ནི། མཉན་ཡོད་ན་ཁྱིམ་བདག་གཅིག་འདུག་པ་བུ་དང་བུ་མོ་མེད་ཅིང་། རྒས་ཤིང་ནོར་ཟད་ནས་ཆུང་མ་ལ་
སྨྲས་པ། བཟང་མོ་ཁོ་བོ་ནི་རྒས་ཤིང་བཀྲེན་ལ་བུ་དང་བུ་མོ་མེད་པས་རྒྱལ་བྱེད་ཀྱི་ཚལ་དུ་རབ་ཏུ་འབྱུང་དུ་འགྲོའོ་ཞེས་སྨྲས་ཏེ་རབ་ཏུ་བྱུང་ངོ་། །དེ་ནས་དུས་གཞན་ཞིག་ན་
དེའི་ཆུང་མ་དེ་ལྟ་བའི་ཕྱིར་འོངས་པ་དང་། དེ་སྦྲིད་པ་བྱུང་བ་ན་དགེ་སློང་དག་གིས་ཀྱང་སོས་ཞེས་མ་བྱས་སོ། ། དེའི་ཚེ་སྔོན་གྱི་ཆུང་མས་ལག་པ་གཡོན་པས་ས་བླངས་ཏེ། ས་
མཚམས་སྤྱད་པ་བྱས་ནས་ཡུན་རིང་དུ་འཚོ་བར་གྱུར་ཅིག་ཅེས་སྨྲས་ཏེ། དེས་དེའི་ལག་པ་ནས་བཟུང་སྟེ། རྗེའི་སྲས་ཁྱེད་དགྲ་བོ་རྣམས་ཀྱི་ནང་དུ་རབ་ཏུ་བྱུང་ནས་ཅི་ཞིག་བྱ། རྒྱལ་བྱེད་
ཀྱི་ཚལ་འདི་གནོད་སྦྱིན་གོས་སྔོན་པོ་གྱོན་པ་ལྔ་བརྒྱས་མི་སྟོང་སྟེ། བདག་འབའ་ཞིག་གིས་ཁྱོད་ལ་སོས་ཞེས་བགྱིས་པ་དེས་ན་དེ་རྣམས་ཀྱིས་ཁྱོད་ཀྱི་མདང་མ་ཁྱེར་ཏེ་འདིར་བཞུགས་པས་འཚལ་
གྱིས་ཁྱིམ་ཉིད་དུ་བཞུད་ཀྱིས་གཤེགས་ཞེས་དེས་དེའི་ལག་པ་ནས་བཟུང་སྟེ་སོང་པ་དང་། དགེ་སློང་རྣམས་ཀྱི་རྒན་ཞུགས་མ་འགྲོ་བར་འདུག་ཤིག་ཅེས་སྨྲས་ཀྱང་དེ་འགྲོ་བར་བྱེད་ནས་ལག་པ་ཡ་གཅིག་ནས་བཟུང་བ་དང་། 
1-609
དེ་ནའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱི་གསོལ་པ་དང་། བཀའ་སྩལ་པ། ཁྱོད་ཀྱི་ལག་པ་གང་ན་ཞེས་དྲི་བར་བྱ་སྟེ། ཁྱོད་ཀྱི་བཟུང་པའོ་ཞེས་ཟེར་ན། དེ་འགྲོ་བར་འདོད་པས་
བཏང་བར་བྱའོ། །སྔོན་གྱི་ཆུང་མས་བཟུང་བའོ་ཞེས་ཟེར་ན། དེ་འགྲོ་བར་མི་འདོད་པས་བཏང་བར་མི་བྱའོ། །འོན་ཀྱང་རྒན་ཞུགས་ནི་འཚོ་བར་འདོད་པའི་བསམ་པ་ཅན་ཡིན་པས་སྦྲིད་པ་བྱུང་བ་
ལ་སོས་ཞེས་བརྗོད་པར་བྱའོ་ཞེས་སོ། །ཡང་མཉན་ཡོད་ན་ཁྱིམ་བདག་དད་པ་ཅན་ཞིག་འདུག་པ་དེ། བྲམ་ཟེ་མ་དད་པ་ཞིག་དང་ལྷན་ཅིག་རྒྱལ་བྱེད་ཀྱི་ཚལ་དུ་སོང་བ་དང་། ཁྱིམ་བདག་
དེ་སྦྲིད་པ་བྱུང་བ་ན། དགེ་སློང་གང་གིས་ཀྱང་སོས་ཞེས་མ་བྱས་པར་བྲམ་ཟེ་དེ་ཉིད་ཀྱིས་དེ་སྐད་བྱེད་ནས་སྨྲས་པ། གྲོགས་པོ་ཁྱོད་ནི་དགྲ་བོ་རྣམས་ལ་དད་དེ། །རྒྱལ་བྱེད་ཀྱི་
ཚལ་འདི་གནོད་སྦྱིན་གོས་སྔོན་པོ་གྱོན་པ་ལྔ་བརྒྱས་མི་སྟོང་སྟེ། ཁྱོད་ལ་ཁོ་བོ་འབའ་ཞིག་གིས་སོས་ཞེས་བྱས་པ་དེས་ན་དེ་དག་གིས་ཁྱོད་ཀྱིས་མདངས་མ་ཕྲོགས་ཀྱིས་ཚུར་ཤོག་འདོང་ཞེས་
ཟེར་བའི་སྐབས་དེ། དགེ་སློང་དག་གིས་གསོལ་པ་དང་། བཀའ་སྩལ་པ། དགེ་སློང་དག་ཁྱིམ་པ་རྣམས་ནི་འཚོ་བའི་བསམ་པ་ཅན་ཡིན་པས། དེ་ལྟ་བས་ན་ཁྱིམ་པ་སྦྲིད་པ་བྱུང་བ་ལ་སོས་ཞེས་བརྗོད་པར་བྱའོ། །
1-610
གཞན་ཡང་རྒན་པ་སྦྲིད་པ་བྱུང་བ་ལ་ནི་ལངས་ནས་ཕྱག་བྱ་ཞིང་། གཞོན་པ་སྦྲིད་པ་བྱུང་བ་ལ་ནི་རྒན་པས་ནད་མེད་ཅིང་ཅེས་བརྗོད་པར་བྱའོ་ཞེས་སོ། །དེའི་ཕྱིར་ལག་ལེན་ལ་རང་
བས་བསླབ་པ་རྒན་པ་ཞིག་ལ་སྦྲིད་པ་བྱུང་བ་ན་སྦགས་པ་ལ་སོགས་པའི་རྐྱེན་དང་མི་ལྡན་པ་ན་ལངས་ནས་ཕྱག་བྱ་ཞིང་། གཞོན་པ་ལ་ནི་ཨ་རོཀྵ་ཞེས་པའམ། ནད་མེད་པར་གྱུར་
ཅིག་ཅེས་པ་དང་། རྒན་ཞུགས་དང་ཁྱིམ་པ་དག་ལ་ཡུན་རིང་དུ་འཚོ་བར་གྱུར་ཅིག་ཅེས་བརྗོད་པར་བྱའོ། །དེ་སྐད་དུ་འདུལ་བ་ཚིག་ལེའུ་བྱས་པ་ལས། དགེ་སློང་ངམ་ནི་ཁྱིམ་པ་ཡང་། །རྒན་
པོ་སྦྲིད་པ་བྱུང་བ་ལ། །ཚེ་རིང་གྱུར་ཅིག་ཅེས་བརྗོད་དེ། །དེ་དག་ཚེ་རིང་འདོད་ཕྱིར་རོ། །གསར་བུ་ལ་ནི་རྒན་པོ་ཡིས། །ཨ་རོཀྵ་ཞེས་བརྗོད་བྱ་སྟེ། །གསར་བུ་ཡིས་ཀྱང་རྒན་པོ་ལ། །
ལུས་ཀྱིས་ཕྱག་ནི་བྱ་བ་ཡིན། །ཞེས་སོ། །གལ་ཏེ་སྦགས་པ་ལ་སོགས་པའི་ཚེ་ལུས་ཀྱིས་ཕྱག་བྱས་པས་ཉེས་དམིགས་གཞན་བྱུང་དུ་དོགས་པ་དག་གིས་ལུས་ཀྱི་འདུད་པ་བྱས་ཤིང་ཕྱག་འཚལ་ལོ་
ཞེས་ཚིག་ཏུ་བརྗོད་པར་བྱས་ཏེ། སུམ་བརྒྱ་པ་ལས། རྒན་ལ་སྦྲིད་བྱུང་ཚིག་གིས་ཕྱག་བྱས་ཏེ། །ཞེས་སོ། །རང་ལ་བྱུང་ནའང་འདུད་པ་བྱས་ཏེ་སངས་རྒྱས་ལ་ཕྱག་འཚལ་ལོ་ཞེས་པ་ལ་སོགས་པ་བརྗོད་དོ། །
1-611
ཡང་སོ་ཤིང་འདོར་བ་དང་། བཤང་བ་དང་གཅི་བ་ལ་སོགས་པ་འདོར་ནའང་སེ་གོལ་ལ་སོགས་པའི་སྒྲ་ཕྱུང་ནས་དོར་བར་བྱས་ཏེ། དགེ་སློང་དག་གིས་སོ་ཤིང་ཟོས་ནས་སྒྲ་མ་ཕྱུང་བར་
བོར་བ་དང་གཙུག་ལག་ཁང་ན་གནས་པ་དག་གི་མགོར་ཕོག་སྟེ། དེ་དག་འཕྱ་ནས་བཀའ་སྩལ་པ། དེ་བཞིན་མི་དོར་གྱི་སྒྲ་དབྱུང་བར་བྱའོ་ཞེས་དང་། ཡང་དགེ་སློང་དག་སོ་ཤིང་འདོར་བ་
ན་སྒྲ་འབྱིན་གྱི་གཞན་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་དག་དེ་བཞིན་བོར་བ་དང་། ཉེས་དམིགས་དེ་ཉིད་དུ་གྱུར་ནས། བཀའ་སྩལ་པ། གང་ཅུང་ཟད་
བཤང་བ་དང་གཅི་བ་ལ་སོགས་པ་ཐམས་ཅད་ལ་སྒྲ་བྱུང་ཞིང་དོར་བར་བྱའོ་ཞེས་སོ། །དེ་ལྟར་འདོར་བ་དེ་དག་ཀྱང་དོར་དུ་རུང་པའི་སར་དོར་བ་བྱའི། དཀོན་མཆོག་དང་བླ་མའི་སྤྱན་
སྔ་དང་། དགེ་འདུན་གྱི་འདུ་ཁང་དང་། ཀ་བ་དང་། རྩིག་ངོས་དག་མ་རུང་བར་བྱས་པས་ཀྱང་། དེ་འདྲ་བའི་ཉི་ཚེ་བའི་སེམས་ཅན་དམྱལ་བར་སྐྱེས་པའི་གཏམ་དགེ་འདུན་སྲུངས་ཀྱི་རྟོགས་པ་བརྗོད་
པ་ལས་གསུངས་སོ། །དེ་ནས་མཚན་མོའི་ཆ་ལ་བབ་པ་དང་། དགེ་འདུན་ཆོས་སྤྱོད་ལ་སྡུད་པའི་སྒྲ་གནྜིའི་སྒྲ་འབྱུང་སྟེ། དེའི་ཚེ་དགེ་སློང་གཉིས་གསུམ་ཙམ་འཚོགས་པ་དང་དེའི་བགྲེས་པ་ཞིག་གིས་སྐྱབས་འགྲོའི་དབུ་བཙུགས་ནས་ཐམས་ཅད་ཀྱིས་སྐྱབས་འགྲོ་བྱ་སྟེ། 
1-612
དེ་ཡང་གསུང་ལས། འོ་སྐོལ་ཇོ་བོའི་བཀའ་རྒྱུད་རྣམས་དགེ་སྦྱོར་ཐམས་ཅད་མངོན་མཚན་ཆུང་ཞིང་དོན་གྱིས་གཅོད་ཆེ་བ་ལ་མཉེས་པས་དེ་ལྟར་མཛད་ཀྱང་། སྐྱབས་འགྲོ་བྱེད་པ་ན་དད་པའི་ཧུར་ཀ་
བསྐྱེད་ནས་གཞན་གྱི་དད་པ་འཁུལ་ནུས་པའི་སྐྱབས་འགྲོ་དིར་བ་དེ་བྱིན་རླབས་ཤིན་ཏུ་ཆེ་བས་དེ་ལྟར་མཛད་པར་གདའ་ཞེས་གསུང་གསུང་ངོ་། །དེ་ནས་ཚོགས་དཔོན་དགེ་བའི་བཤེས་གཉེན་དེ་བྱོན་པའི་
ཚེ་ཕྱག་དང་ཞེ་ས་གོང་དུ་བཤད་པ་ལྟར་བྱ་ཞིང་། བསྙུན་འདྲིའི་སྐབས་སུ་གདུགས་ལ་ཞེ་ས་སྦྱར་རོ། །དེ་ནས་ཡང་དགེ་བའི་བཤེས་གཉེན་དེས་ཐོག་དྲངས་ནས་གཏོར་མ་གཤོམ་གྱི་བར་ལ་ཐམས་
ཅད་ཀྱིས་སྐྱབས་འགྲོ་བྱ་ཞིང་། དེ་བར་ལ་ཚེ་དང་ལྡན་པ་གཞོན་གཅིག་གི་རྒྱུན་གཏོར་ཤོམ་པར་སྣང་ངོ་། །དེ་ལ་རྒྱུན་གཏོར་ནི་ནུབ་རེ་ཞིང་རྒྱུན་དུ་གཏོང་བའི་གཏོར་མ་སྟེ། དེ་ཡང་དགེ་
བའི་བཤེས་གཉེན་ཤ་ར་བའི་ཞལ་ནས་མགྲོན་དཔོན་གཡོག་གཉིས་ལ་སྣོད་གཅིག་ཏུ་ཟན་གཉིས་བཅུག་ནས་འདྲེན་པ་ལྟར། མགྲོན་ཆོས་སྐྱོང་དང་། འགྲོ་དྲུག་ལ་སྣོད་གཅིག་ཏུ་ཕུལ་ཡང་ཆོག་ལ། དེ་གཉིས་ལ་
སྣོད་གཉིས་སུ་ཕུལ་ཡང་ཆོག་ཅེས་གསུང་ནས་ཕྱག་ལེན་ལ་སྣོད་གཅིག་ཏུ་མཛད་སྐད་དོ། །སྣྲ་ཐང་པ་རྣམས་ཀྱི་ཕྱག་ལེན་ནི་རྒྱུན་གཏོར་ལྔ་མཛད་དེ། ཆོས་ལུང་སྐུ་གཤེགས་ཀྱི་གདན་ས་འདིའི་ས་གཞི་བྱིན་གྱིས་བརླབས་ཤིང་དགེ་འདུན་གྱི་སྡེ་བཙུགས་ནས་མཛད་པའི་ཕྱག་ལེན་གྱི་སྲོལ་ཡིན་པར་སྣང་ངོ་། །
1-613
ཁོང་དེ་ལྟར་མཛད་པ་ནི། མཁན་པོ་དཔལ་ལྡན་གྲོའི་ཞལ་ནས། དགེ་བའི་བཤེས་གཉེན་ཤར་བ་པ་དེ་དུས་མཆོད་ཀྱི་ཚེ་གཏོར་མ་ལྔ་ལྔ་མཛད་པས། དེ་རྒྱུན་གཏོར་དུ་མཛད་པར་འདུག་ཅེས་གསུང་
སྐད་དོ། །དེ་ལ་གཏོར་མའི་སྣོད་ནི་གསུང་ལས་ལྕགས་དང་མཁར་བ་ལས་གཞན་ཟངས་དང་ར་གན་དང་རྫ་དང་ཕོར་བུ་ལ་སོགས་པའི་སྣོད་གས་ཆག་མེད་པ། ཕུལ་གང་ཙམ་ཤོང་བ་ཡན་ཆད་
དགོས་ཀྱི་དེ་བས་ཆུང་ན་བྱིན་རླབས་ཚད་ལྡན་མི་འབྱུང་ཞེས་གསུང་གསུང་ངོ་། །དེ་ལྟར་དེ་གྲལ་དུ་བསྒྲིགས་ཏེ་དེའི་ནང་དུ་གཏོར་ཟན་ཆེ་ན་ཕྱེད་དང་པོར། དེའི་ཕྱིར་གཉིས་པ་ལ་སོགས་པར་
རིམ་པ་བཞིན་ཕྱེད་ཕྱེད་བསྒོས་ལ་གཞུག་ཅིང་། དེ་དག་ཀྱང་དང་པོ་གསུམ་ལ་དུམ་བུ་གསུམ་གསུམ་དང་། འོག་མ་གཉིས་ལ་དུམ་བུ་གཉིས་གཉིས་སུ་བྱས་ནས་ཤོམ་པ་ནི་སྔོན་ནས་མཛད་པའི་སྲོལ་
ཡིན་ནོ། །གསུང་ལས་ཀྱང་། ཇི་ལྟར་ཆུང་ཡང་འབྲུ་བདུན་ཡན་ཆད་ཙམ་ངེས་པར་དགོས་ཏེ་དེ་བས་ཆུང་ན་བྱིན་བརླབས་མི་འཆགས་ཞེས་གསུང་གསུང་ངོ་། ། དེ་ལྟར་བཤམས་ནས་ཕྱག་གསུམ་བྱས་ཤིང་འགྲེང་ཏེ་
འདུག་པ་དང་བཅས་པས། དགེ་འདུན་དབུ་མཛད་གཏོར་མའི་བྱིན་བརླབས་མཛད་པ་ཞུ་ཞུས། དེ་དག་གི་མགྲོན་ནི། ཆོས་ལུང་སྐུ་གཤེགས་ཀྱི་ཕྱག་ལེན་ལ། རིམ་པ་ལྟར་ཆོས་སྐྱོང་དང་། གཞི་བདག་དང་། འགྲོ་དྲུག་དང་། 
1-614
གནོད་བྱེད་དང་། ཡི་དྭགས་ལ་གཏེར་བར་མཛད་དོ། །མཁན་པོ་དཔལ་ལྡན་གྲོའི་གསུང་གིས་ཁོང་ནི་དེ་དགེ་བའི་བཤེས་གཉེན་ཤར་བ་བས་དུས་མཆོད་ལ་མཛད་པའི་ལུགས་དེ་ཕྱག་ལེན་ལ་བཏབ་པ་ཡིན།
འདིར་གཞི་བདག་ལ་དུས་རྒྱུན་དུ་བྱིན་ན། འདྲེ་ལ་ལྷ་བཞིན་མཆོད་ན་རྟག་ཏུ་ཕྱི་བཞིན་འབྲང་ཞེས་པ་ལྟར་བར་ཆད་བྱེད་པའི་རྒྱུར་འགྲོ་བས་དེ་ལྟར་མི་བྱ་བར་དུ་སྐབས་སུ་བྱིན་པས་
ཆོག་གསུང་ནས། དང་པོ་བླ་མ་དཀོན་མཆོག གཉིས་པ་ཆོས་སྐྱོང་ལ་དབུལ་ཞེས་གསུང་སྐད། གཞན་གསུང་སྔ་མ་ལྟར་མཛད་དོ། །དེང་སང་ནི་ཡི་དྭགས་ཀྱི་གཏིང་ལ་གནོད་བྱེད་ལ་གཏེར་དེ། འདིའི་ཕྱག་
ལེན་ནི་བྱང་ཆུབ་ཆེན་པོ་པ་ནས་བྱུང་ངོ་། །གསུང་ལས་ཀྱང་སྤྱི་བྱེ་བྲག་གི་ཁྱད་པར་གྱིས་ཀྱང་འདི་བདེ་ཞིང་ཕྱག་བཞེས་གཏིང་མ་ཡིན་པས་ཀྱང་འདི་བཞིན་དུ་མཛད་དགོས་པ་ལགས་ཞེས་གསུང་
གསུང་ངོ་། །བྱིན་བརླབས་བྱེད་ཚུལ་ནི། སྐྱབས་འགྲོ་སེམས་བསྐྱེད་སྔོན་དུ་བཏང་ནས་ཁ་འབར་མའི་སྔགས་ཉི་ཤུ་རྩ་གཅིག་གིས་བྱིན་གྱིས་བརླབས་ཏེ། བླ་མ་དང་དཀོན་མཆོག་གི་སྤྱན་སྔར་མཆོད་པའི་རྫས་བསམ་
གྱི་མི་ཁྱབ་པ་འབྱུང་བར་བསམས་ལ། མཆོད་སྦྱིན་གྱི་གཏོར་མ་རྒྱན་དམ་པ་དང་ལྡན་པ་འདི་བླ་མ་དང་དཀོན་མཆོག་གསུམ་ལ་དབུལ་ལོ། །སངས་རྒྱས་ཀྱི་བསྟན་པ་དར་ཞིང་རྒྱས་དང་། སེམས་ཅན་ཐམས་ཅད་དགེ་ཞིང་སྐྱིད་པར་བྱིན་གྱིས་བརླབ་ཏུ་གསོལ། 
1-615
བདག་ཅག་འཁོར་དང་བཅས་པའི་ནད་གདོན་བར་ཆད་ཐམས་ཅད་ཞི་བ་དང་། བསམ་པའི་དོན་ཐམས་ཅད་ཆོས་བཞིན་དུ་འགྲུབ་བར་བྱིན་གྱིས་བརླབ་ཏུ་གསོལ་ཞེས་པ་ལ་སོགས་པ་འདོད་པའི་དོན་གསོལ་བ་
གདབ་བོ། །གཉིས་པ་ནི། སྔ་མ་ལྟར་བྱིན་གྱིས་བརླབས་ཏེ་ཆོས་སྐྱོང་བའི་སྲུང་མ་རྣམས་ལ་ཕུལ་ནས་འཕྲིན་ལས་གཞོལ་ལོ། །གསུམ་པ་ནི། སྐྱབས་འགྲོ་སེམས་བསྐྱེད་དང་། དེ་བཞིན་གཤེགས་པ་བཞིའི་མཚན་བརྗོད་
ནས་སྔགས་བདུན་གྱིས་བྱིན་གྱིས་བརླབས་ཏེ། འགྲོ་དྲུག་གི་སེམས་ཅན་ཐམས་ཅད་ལ་རང་རང་གང་འདོད་པའི་མཁོ་བའི་རྫས་བསམ་གྱི་མི་ཁྱབ་པ་འབྱུང་བར་བསམས་ལ། མཆོད་སྦྱིན་གྱི་གཏོར་མ་རྒྱན་དམ་
པ་དང་ལྡན་པ་འདི་འགྲོ་དྲུག་གི་བསྡུས་པའི་སེམས་ཅན་ཐམས་ཅད་ལ་དབུལ་བར་བགྱིའོ། །དེ་རྣམས་ཀྱི་ལུས་ངག་ཡིད་གསུམ་ཚིམ་ཞིང་རྒྱས་པ་དང་། ལས་ངན་སྡིག་སྒྲིབ་ཐམས་ཅད་བྱང་ཞིང་དག་པར་
གྱུར་ཅིག་ཅེས་བདེན་པའི་སྟོབས་བརྗོད་དོ། །བཞི་པ་དང་ལྔ་པ་ནི། སྔ་མ་ལྟར་བྱིན་གྱིས་བརླབས་ཏེ། རང་རང་ལ་མཁོ་བའི་རྫས་བསམ་གྱིས་མི་ཁྱབ་པ་འབྱུང་བར་བསམས་ལ། སྔ་མ་ལྟར་བྱས་
ཏེ་ཡི་དྭགས་གངྒཱའི་རླུང་གི་བྱེ་མ་སྙེད་དང་མཉམ་པ་རྣམས་ལ་སྦྱིན་ནོ། །དེ་རྣམས་ཀྱི་བཀྲེས་སྐོམ་གྱི་སྡུག་བསྔལ་ཐམས་ཅད་དང་བྲལ་བར་གྱུར་ཅིག་ཅེས་དང་། ཚེ་ཐོག་མ་མེད་པ་ནས་ལན་ཆགས་ཤིང་གླགས་ལྟ་བའི་འབྱུང་པོ་གནོན་བྱེད་རྣམས་ལ་སྦྱིན་ནོ། །
1-616
གནོད་སེམས་གདུག་སེམས་རྣམས་ཞི་བ་དང་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱིས་ལ་རང་རང་གི་གནས་སུ་སོང་ཤིག་ཅེས་དང་། དེ་གཉིས་ལའང་བདེན་པའི་སྟོབས་བརྗོད་མཛད་ཅིང་སེ་གོལ་
གཏོགས་ཏེ་སྦྱིན་པར་མཛད་ལ། སྔ་མ་གཉིས་ལ་སེ་གོལ་དང་། བདེན་པའི་སྟོབས་བརྗོད་བྱས་ཀྱང་རུང་ལ། མ་བྱས་ཀྱང་འགལ་བ་མེད་དོ་ཞེས་གསུང་སྐད་དོ། །དེའི་རྗེས་སུ་གཏོར་མདོ་ཚར་གསུམ་འདོན་
པ་ནི་ཆོས་ལུང་སྐུ་གཤེགས་ཀྱི་ཕྱག་ལེན་ཡིན་ནོ། །གཞི་བདག་རྣམས་ལ་གཏེར་བར་བྱེད་ན་རྒྱུ་འགྲུལ་པ་བྱེད་པའི་ཚེ་གང་དུ་གནས་གཡར་བའི་གཞི་བདག་དེ་ལ་སླེབ་པའི་དུས་སུ་ཟུར་དུ་
གཏོར་མ་གཅིག་བཤམས་ནས་གོང་ལྟར་བྱིན་གྱིས་བརླབས་ནས་གཞི་བདག་གང་ཡིན་པ་དང་དེ་ལ་ཕུལ་ནས། བདག་གནས་འདིར་ཇི་སྲིད་སྡོད་ཀྱི་བར་ལ། མཐུན་པའི་རྐྱེན་རྣམས་སྒྲུབས། འགལ་བའི་རྐྱེན་རྣམས་སྤོངས་
ལ་གནས་པའི་ཆེད་དང་གཉེར་ཀ་བཟང་པོ་གྱིས་ཤིག་ཅེས་པའི་སྒོ་ནས་ཆེད་གཉེར་གཞོལ་གྱི། ཞག་གམ་ཟླ་བ་འདི་ཙམ་སྡོད་ཀྱི་བར་ལ་ཞེས་པའི་དུས་ཚིགས་མི་བྱ་ཞེས་དམ་པ་རྣམས་གསུང་
སྐད། དེའི་རྒྱུ་མཚན་ནི། དགེ་བའི་བཤེས་གཉེན་ཕོ་བྲང་སྡིངས་པ་དེས། ཕོ་བྲང་སྡིངས་བརྩིགས་ནས་བཞུགས་པའི་དུས་སུ། ལོ་བཅུ་གཉིས་བཞུགས་པར་ཐུགས་ཀྱིས་དགོངས་ཏེ་འདི་ཙམ་སྡོད་ཀྱི་བར་ལ་ཞེས་པའི་དུས་ཚིགས་མཛད་པས། 
1-617
དེའི་བར་ལ་བར་ཆད་མེད་པར་ཐུགས་དམ་འཕེལ་བར་བྱུང་བ་ལ། དེ་རྗེས་ལོ་གཉིས་བཞུགས་པས་དེའི་བར་ལ་ན་ཚ་ལ་སོགས་པས་ཐུགས་མི་བསོད་པ་ཐུགས་དམ་མི་འཕེལ་བར་བྱུང་བ་ན།
དབུ་རུ་བྱང་ཕྱོགས་ཀྱི་དགེ་བའི་བཤེས་གཉེན་པ་དག་དུས་ཚིགས་བྲིས་པ་ཁ་ནས་ལན་ཞེས་གསུང་སྐད་དོ། །ཡང་གནས་དེ་ནས་འགྲོ་བའི་ཚེ་ཡང་གཏོར་མ་གཅིག་བྱས་ཏེ། ངེད་སྡོད་ཀྱི་བར་ལ་
གནས་པོ་བཟང་པོ་བྱས་པ་རྗེས་སུ་ཡི་རང་། ད་དུང་ཡང་ང་གཞན་དུ་འགྲོ་བས་ཕྱི་བཞིན་མ་འབྲང་པར་གཞིའི་གཉེར་ཀ་གྱིས་ཤིག་ཅེས་ཤད་སྦྱང་བྱའོ། །དེ་ལྟར་གནས་པོ་ཞུ་བའི་བསམས་པས་
གཏོར་མ་བྱིན་པས་ཁོས་ཀྱང་གནས་པོའི་གོ་ཆ་གྱོན་ནས་གནོད་མི་སྐྱེལ་གྱི་སྟེང་དུ་ཕན་འདོགས་སྐད་དེ། སྔོན་དགེ་བའི་བཤེས་གཉེན་རྩང་པ་གླང་པུ་དགོན་པར་བཞུགས་པའི་དུས་སུ། མཁན་པོ་དཔལ་
ལྡན་གྲོས་བྱོན་ཏེ་ཁོང་པའི་བཞུགས་ས་དེའི་ལོག་ན་གང་བུ་བཙུན་བྱ་བ་དེར་བཞུགས་པས་ནུབ་ཅིག་གི་རྣལ་ལམ་དུ། དེའི་གཞི་བདག་རྣམས་ཀྱིས་ཟས་ཀྱིས་སྟ་གོན་བྱས་ཏེ་ཟ་བའི་ཚེ་འོ་
ཅག་གི་མགྲོན་པོའི་སྐལ་བ་ཡང་ཐོང་ཟེར་བ་གསན་པ་དང་། གཞན་ཡང་གཞི་བདག་གི་སྒོམ་ཆེན་དགེ་སྦྱོར་བའི་གྲགས་ཉན་བསྒྲགས་ནས་མཐུན་རྐྱེན་སྒྲུབས་པའི་གཏམ་རྒྱུད་ཀྱང་ཡོད་ཅེས་གསུང་སྐད་དོ། །ཡང་དུས་བཟང་བཞི་ལ་སྟེར་ཏེ། 
1-618
དེའི་ཚེ་གཏོར་མ་བདུན་བཤམས་ནས། དགེ་འདུན་དབུ་མཛད་གཏོར་མའི་བྱིན་བརླབས་མཛད་པར་ཞུ། དུས་བཟང་ཀྱི་གཏོར་མ་གཉིས་ཏེ་བདུན་བཤམས་གདའ་ཞེས་པའི་ཞུ་འབུལ་བྱེད་པར་སྣང་ངོ་། །བྱིན་བརླབས་ནི་གཞན་
སྔར་དང་འདྲ་བ་ལས། གསུམ་པ་གཞི་བདག་ལ། བདུན་པ་ལྷག་མ་ལ་དབང་བའི་འབྱུང་པོ་རྣམས་ལ་བྱིན་ནས་མདོ་འདོན་པ་སྔར་བཞིན་ནོ། །དེའི་རྗེས་སུ་བདུན་ཚིགས་ཞུས་པ་ཡོད་ན། ཐམས་ཅད་
ཀྱིས་མི་འཁྲུགས་པའི་སྒོམ་བཟླས་བྱས་ནས་མིང་བྱང་རྣམས་ལ་བྱེ་མས་བྲབ་པ་བྱེད་དེ། བསྒོམ་བཟླས་བྱེད་ཚུལ་གཞན་དུ་ཤེས་པར་བྱའོ། །དེ་ནས་ཡུམ་གྱི་སྒྲུབ་པ་བྱས་ཏེ། འདི་ལ་གསུམ་ཡིད་ཆེས་
པའི་ཡན་ལག་ཏུ་བླ་མ་བརྒྱུད་པའི་རིམ་པ། བརྒྱུད་པ་དེ་ལྡན་གྱི་སྒྲུབ་པ་ཉམས་སུ་བླངས་པའི་ཕན་ཡོན། ཕན་ཡོན་ཅན་གྱི་སྒྲུབ་པ་ཉམས་སུ་ལེན་པའི་ཚུལ་ལོ། །དང་པོ་ནི་ཇོ་བོའི་
དབོན་པོ་པཎྜི་ཏ་དཱ་ན་ཤྲཱི་བྱ་བ་ལས་བརྒྱུད་དེ་ཁོང་གི་ཇོ་བོ་བོད་ན་བཞུགས་པའི་རྩིས་བྱས་ནས་མཇལ་དུ་བྱོན་པས། ཇོ་བོ་བདེ་བར་གཤེགས་ཏེ་མ་མཇལ་ཀྱང་སྐུ་ཚེའི་སྨད་ལ་
གཡོར་ཕྱོགས་སུ་བཞུགས་ནས་སྐུ་ཡང་དེར་འདས་སོ། །དེས་བྱང་ཆུབ་སེམས་དཔའ་ཟླ་བ་རྒྱལ་མཚན་ལ་གནང་སྟེ། གསུང་ལས་འདིར་སྟོད་མངའ་རིས་སུ་སྐུ་འཁྲུངས་པའི་བྱང་ཆུབ་སེམས་དཔའ་ཟླ་བ་རྒྱལ་མཚན་ཅེས་པ་ཐམས་ཅད་ལ་ཡོངས་སུ་གྲགས་པ་དེ་མ་ཡིན་ཅེས་གསུང་སྐད་དོ། །
1-619
དེས་དབང་བཀའ་གདམས་པ་ལ། དེས་སྐྱེར་སྒང་པ་སྒྱུ་འཕྲུལ་ཡེ་ཤེས་སེང་གེ་ལ། དེའི་དྲུང་དུ་མཁན་པོ་བྱང་ཆུབ་ཆེན་པོ་པས་བྱོན་ཏེ། འདི་ཉིད་ཡི་གེ་དྲུག་པའི་འཁྲིད་ལ་སོགས་པ་མན་
ངག་རྣམས་གསན་ནས་འདིར་བྱོན་ཏེ། སྣར་ཐང་གི་གདན་ས་མ་མཛད་པའི་གོང་དུ་དཔོན་སློབ་ཉུང་ཤས་རེ་འདུས་ནས་ཟུར་དུ་ཡང་ཡུམ་གྱི་སྒྲུབ་པ་མཛད་ལ། འདིའི་གདན་ས་ལ་བཞུགས་ནས་ཚོགས་
སུ་ཡང་བཙུགས་ཏེ་དེང་སང་གི་བར་དུ་ནུབ་རེ་བཞིན་དགེ་འདུན་རྣམས་ཀྱི་མ་ཆད་པར་མཛད་པའི་ཕྱག་ལེན་གྱི་སྲོལ་ཁ་ཉམས་པ་མེད་དོ། །དེས་མཁན་ཆེན་མཆིམས་ཐམས་ཅད་མཁྱེན་པ་ལ་གནང་
སྟེ། སྒྲུབ་པ་བྱེད་ཐབས་ཀྱི་ཡི་གེ་ཡང་ཉམས་སུ་བླང་བདེ་བའི་ཕྱིར་ཐམས་ཅད་མཁྱེན་པ་དེ་ཉིད་ཀྱི་མཛད་དོ། །དེས་མཁན་འདུལ་བ་འཛིན་པ་ཆེན་པོ་ལ་གནང་ཞིང་། དེའི་གསུང་དྲི་མ་མེད་
པ་ལན་མང་དུ་བདག་གི་རྣ་བའི་ནང་དུ་ལྷུང་བས་ངལ་བ་འབྲས་བུ་མེད་པར་མ་གྱུར་ལ། བདག་ལ་བུ་གཅིག་པ་ལྟར་དགོངས་པའི་བླ་མ་གཞན་དག་ལས་ཀྱང་ཐོས་ཏེ། དེའི་ཕྱིར་རྙེད་
པའི་མཆོག་ལེགས་པར་རྙེད་པ་ཡིན་ནོ། །གཉིས་པ་ལ་གསུམ་སྒྲིབ་པ་འཛད་པ་དང་། ཚོགས་རྫོགས་པ་དང་། བར་ཆད་སེལ་བའི་ཕན་ཡོན་ནོ། །དང་པོ་ནི། ཇི་སྐད་དུ། དྲང་པོར་འདུག་ལ་ཡང་དག་ལྟོས། །
1-620
འདི་ནི་འགྱོད་ཚངས་མཆོག་ཡིན་ནོ། །ཞེས་གསུང་སྟེ། དྲང་པོར་འདུག་པ་ནི་མ་བཅོས་པ་གནས་ལུགས་ཀྱི་དོན་ཡིན་ལ། ཡང་དག་ལྟོས་ནི་དེའི་དོན་བསྒོམས་ཤིག་ཅེས་པ་སྟེ། དེ་ལྟ་ན་འདི་ནི་
འགྱོད་པ་སྟེ་སྒྲིབ་པ་དང་། ཚངས་པ་སྟེ་དག་པའི་མཆོག་ཡིན་ནོ་ཞེས་སོ། །གཉིས་པ་ནི། སྒྲུབ་པ་བྱེད་པའི་སྦྱོར་བ་དང་འཇུག་ནི་བསོད་ནམས་ཀྱི་ཚོགས་དང་། དངོས་གཞི་ཡེ་ཤེས་ཀྱི་ཚོགས་རྫོགས་
ཏེ། དེ་ལྟར་ན་ཚོགས་གཉིས་རྫོགས་པར་འགྱུར་རོ། །གསུམ་པ་ནི། དོན་དམ་པར་ན་ཤེས་རབ་ཀྱི་ཕ་རོལ་ཏུ་ཕྱིན་པ་བསྲུང་བྱ་སྲུང་བྱེད་དང་བྲལ་བར་བཤད་དེ། སྔོན་ལྷའི་དབང་པོ་བརྒྱ་བྱིན་
གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྲུང་བར་དམ་བཅས་པས། འཕགས་པ་རབ་འབྱོར་གྱིས། ཀོའུ་ཤི་ཀ་ཞེས་བོས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྲུང་བ་དང་སྐྱོབ་པ་
དང་སྦ་བར་འདོད་པ་ནི། ནམ་མཁའ་ལ་སྲུང་བ་དང་སྐྱོབ་པ་དང་སྦ་བར་འདོད་པས་ཟད་དོ་ཞེས་གསུངས་ལ། ཐ་སྙད་ཀུན་རྫོབ་ཏུ་ནི་བླ་ན་མེད་པའི་རིགས་སྔགས་ཡིན་པས་སྲུང་བ་
གཞན་ལ་རག་མ་ལས་པར་སྲུང་བའི་མཆོག་ཏུ་འགྱུར་བའི་ཕན་ཡོན་ཡོད་དོ། །དེ་ནི་འདི་ལྟར། སྔོན་དབུས་སུ་རྒྱ་སྐྱེ་བོ་བསེ་ཐོགས་བྱ་བ་མི་ངན་བྱག་ཆོས་བྱེད་པ་གཅིག་ཤི་བ་འདྲེན་སྐྱེས་ཞེས་གསུང་སྐད། 
1-621
གཞན་ལས་རྒྱལ་སྐྱེ་བྱ་བའི་བོན་པོ་གཅིག་འདྲེར་སྐྱེས་ཞེས་ཀྱང་འཆད་དོ། །དེ་གནོད་པ་ཆེ་ཞིང་ཁྱད་པར་དུ་བུ་མོ་གཅིག་ལ་ཆགས་ནས་དེ་དང་ཁ་ལག་འདྲེས་ཚད་ལ་གནོད་པ་བྱུང་ནས།
དེའི་ཕ་མིང་གི་མ་བཟོད་པར་ཁམས་པའི་ཚོང་པ་གཅིག་ལ་བྱིན་ནས། མོ་རང་གི་ནོར་སྐལ་ཡང་བརྫངས་ཏོ། །ཆོ་ག་མཁན་པོས་དེའི་ཤུལ་འགྲོ་བའི་ཆོ་ག་བྱས་ཏེ་བཏང་བས་ལོ་གསུམ་ཙམ་
གྱི་བར་ལ་གནོད་པ་མ་བྱུང་། དེའི་བར་ལ་ཁམས་པའི་རྗེས་སུ་འབྲངས་ཏེ་དེའི་ཡུལ་དུ་གནོད་པ་བྱུང་བས། དེས་ཀྱང་རིམ་གྲོ་འབུམ་སུམ་མི་ཆད་བྱས་པས་གནོད་པས་མ་ཚུགས་པར། ཡང་དབུས་
སུ་གནོད་དུ་བྱུང་སྟེ། ལ་ལ་ལ་བབས་ནས་ཁ་སྨྲར་བྱུང་བ་ན། ཁྱོད་སུ་ཡིན་དྲིས་པས་སྔར་གྱི་དེ་ཡིན་ཟེར། ན་ནིང་ནས་གར་ཕྱིན་བྱས་པས། ཁམས་སུ་ཕྱིན། དེར་མི་སྡོད་པ་ཅི་
ཡིན་དྲིས་པས། ཡོད་དོ་མེད་དོ་ཟེར་བ་གཅིག་གིས་སྣ་བ་སོ་མ་བསོད་ནས་ཡོངས་ཟེར་ཏེ། ཡུམ་གྱི་གཟི་བརྗིད་མ་བཟོད་པ་ཡིན་ཞེས་དམ་པ་རྣམས་གསུང་ཞེས་སོ། །གསུང་ལས་ཀྱང་དེ་ཐམས་
ཅད་པས་ཀྱང་མཆོག་ཏུ་གྱུར་པ་མཐོང་ལམ་ཡོངས་སུ་སྐྱེ་བའི་ཕན་ཡོན་ཡོད་དོ། །མཐོང་ལམ་བྱ་བ་གནས་ལུགས་ཀྱི་དོན་གསར་དུ་མངོན་དུ་མཐོང་བ་ཡིན་ལ། དེའི་རྒྱུ་གནས་ལུགས་ཀྱི་དོན་བསྒོམ་པ་ཡིན་ཞིང་བསྒྲུབ་པ་འདི་ཡང་གནས་ལུགས་ཀྱི་དོན་བསྒོམ་པ་ཡིན་པས་རྒྱུ་འབྲས་རྗེས་སུ་འབྲེལ་ཏེ། 
1-622
མདོ་འདི་ཡང་མཐོང་ལམ་སྟོན་པའི་མདོ་ཡིན་པར་ཕར་ཕྱིན་རྙིང་མ་བ་རྣམས་འཆད་ལ། གསར་མ་དག་ལམ་ལྔ་ཀའི་མདོར་འཆད་ཅེས་གསུང་གསུང་ངོ་། །གསུམ་པ་ལ་གསུམ་ལས་སྦྱོར་བ་ནི་སྟན་བདེ་
བདེ་བ་ལ་འདུག་ལུས་དཀྱིལ་མོ་དཀྲུང་བཅས་ཏེ། དཀོན་མཆོག་གསུམ་ལ་བསམ་པ་ལྟོས་པ་དང་བཅས་པས་ཞེ་ཐག་པ་ནས་སྐྱབས་སུ་འགྲོ་བ་ལན་གསུམ་བྱའོ། །དེ་ནས་ནམ་མཁའི་མཐའ་དང་མཉམ་པའི་
སེམས་ཅན་ཐམས་ཅད་ཀྱིས་བདག་གི་མ་ཡང་ཡང་བྱ་ཞིང་། ནམ་བྱས་རས་ཀྱིས་ཕན་སྣ་ཚོགས་ནས་བཏགས། གནོད་པ་སྣ་ཚོགས་ལས་བསྐྱབས་པའི་དྲིན་ཅན་ཤ་སྟག་ཡིན་པས། མ་རྒན་སེམས་ཅན་འདི་རྣམས་
བདེ་བ་དང་ལྡན་ན་ཅི་མ་རུང་བདེ་བ་དང་ལྡན་པར་གྱུར་ཅིག་སྙམ་པའི་བྱམས་པ་དང་མ་རྒན་སེམས་ཅན་འདི་རྣམས་སྡུག་བསྔལ་དངོས་དང་དེའི་རྒྱུ་ལ་གནས་ཀྱིན་འདུག་པས་སྙིང་རེ་རྗེ།
སྡུག་བསྔལ་དང་བྲལ་ན་ཅི་མ་རུངས། སྡུག་བསྔལ་དང་བྲལ་བར་གྱུར་ཅིག་སྙམ་པའི་སྙིང་རྗེ་དང་། མ་རྒན་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཐོབ་པར་བྱ་སྙམ་པ་སྨོན་པ་
བྱང་ཆུབ་ཀྱི་སེམས་དང་། སངས་རྒྱས་ཐོབ་པར་བྱ་བའི་དོན་དུ་སྒྲིབ་པ་སྦྱོང་བ་དང་ཚོགས་སོག་པའི་ཐབས་མཆོག་ཡུམ་གྱི་སྒྲུབ་པ་བྱ་སྙམ་པ་འཇུག་པ་བྱང་ཆུབ་ཀྱི་སེམས་དང་། ཚོགས་སོག་པ་དང་སྒྲིབ་པ་སྦྱོང་བའི་ཐབས་མཆོག་ཏུ་གྱུར་པ་ཡུམ་གྱི་སྒྲུབ་པ་འདི་ཡིན་སྙམ་པ་ལས་མཆོག་ཏུ་འཛིན་པའི་སེམས་བསྐྱེད་བྱ་བའི་ཐ་སྙད་མཛད་དེ་ལྟར་སེམས་སྐྱེད་གསུམ་རྩེག་དེ་ངེས་པར་བསྒོམ་དགོས་ཞེས་གསུང་ཞིང་། 
1-623
ཕྱག་ལེན་ལའང་དེ་ལྟར་མཛད་པར་སྣང་ངོ་། །དངོས་གཞི་ནི་རང་གི་སྙིང་ཁར་ཟླ་བའི་དཀྱིལ་འཁོར་ཅིག་བསྒོམས་ཏེ། གསུང་ལས་ཀྱང་། འདི་ཕ་རོལ་ཏུ་ཕྱིན་པའི་ལུགས་ཡིན་པས་ས་བོན་ལས་མི་བསྐྱེད་
པར་ལས་ཀྱི་སེམས་པ་ཡིན་གསུང་གསུང་། །དེའི་སྟེང་དུ་འདི་སྐད་ཞེས་པ་ནས་བསྟོད་པའི་བར་གྱི་ཡིག་འབྲུ་རྣམས་དཀར་རམ་མེ་ཡོད་པར་བསམ། དེ་ལས་འོད་འཕྲོས་ཏེ་རང་བཞིན་གྱི་གནས་ནས། བཅོམ་
ལྡན་འདས་གཙོ་འཁོར་གསུམ་འོད་ཟེར་གྱི་སྣ་ལ་སྤྱན་དྲངས་ཏེ། མདུན་གྱི་ནམ་མཁའི་གནས་སུ་རིན་པོ་ཆེ་སེང་གེའི་ཁྲི་པདྨ་དང་ཟླ་བའི་གདན་གྱི་སྟེང་ན། བཅོམ་ལྡན་འདས་ཤཱཀྱ་ཐུབ་པ་སྐུ་
མདོག་སེར་གཙོ་མ་ལྟ་བུ་ཞལ་གཅིག་ཕྱག་གཉིས་པ། གཡས་ས་གནོན། གཡོན་མཉམ་གཞག ཞབས་རྡོ་རྗེ་དཀྱིལ་དཀྲུང་གིས་བཞུགས་པ། ནམ་བཟའ་ཆོས་གོས་ངུར་དམར་གསོལ་བ། སྤྲུལ་པའི་སྐུའི་ཆ་ལུགས་སུ་བཞུགས་
པར་བསྒོམ། གཡས་སུ་ཤཱ་རིའི་བུ། གཡོན་དུ་མོའུ་དགལ་གྱི་བུ་དེ་གཉིས་དགྲ་བཅོམ་པའི་ཆ་ལུགས་ཏེ། རབ་ཏུ་བྱུང་པ་དབུ་ལྡུམ་ཞབས་རྗེན་གྱི་རྣམ་པའོ། །དེ་ལྟར་གཙོ་འཁོར་གསུམ་གྱིས་ཐེག་ཆེན་
གྱི་ལམ་འབྲས་བུ་དང་བཅས་པ་མཚོན་ཏེ། གསུང་ལས་གཡས་ཀྱི་ཤ་རིའི་བུ་འཇམ་དཔལ་དང་དོན་གཅིག་པས་ཤེས་རབ་མཚོན། གཡོན་གྱི་མོའུ་དགལ་གྱི་བུ་སྤྱན་རས་གཟིགས་དང་དོན་གཅིག་པས་སྙིང་རྗེ་མཚོན་པས་དེ་གཉིས་ཀྱིས་ཐེག་ཆེན་གྱི་ལམ་ཤེས་རབ་དང་སྙིང་རྗེ་ཟུང་དུ་འབྲེལ་པ་དེ་མཚོན་ལ། 
1-624
དབུས་ཀྱི་བཅོམ་ལྡན་འདས་ཀྱིས་ནི་ཤེས་རབ་དང་ཐབས་ཁྱད་པར་ཅན་དེ་ཉིད་ཉམས་སུ་བླངས་པའི་འབྲས་བུ་སངས་རྒྱས་མཚོན་ཞེས་གསུང་གསུང་ངོ་། ། དེ་ནས་དེ་དག་ལ་ཕྱག་འཚལ་བ་དང་མཆོད་པ་
འབུལ་བ་ལ་སོགས་པ་མངོན་དུ་བཏང་སྟེ། རང་གི་སྙིང་ཁའི་ཟླ་བའི་དཀྱིལ་འཁོར་གྱིས་སྟེང་གི་ཡིག་འབྲུ་རྣམས་ལས་འོད་ཟེར་འཕྲོས་ནས། གཙོ་བོའི་ཐུགས་ཁར་ཕོག་པས་ཐུགས་དམ་བསྐུལ་ལོ། །དེ་ནི་
སེམས་ཅན་དཔག་ཏུ་མེད་པའི་དོན་མཛད་པར་ཐུགས་དམ་བཅས་པ་གང་ཡིན་པའོ། །དེ་བསྐུལ་བས་འོད་ཟེར་སྤྲོས་ནས་དོན་མཛད་པར་མོས་པར་བྱེད་དེ། གསུང་ལས་བཅོམ་ལྡན་འདས་ཀྱི་སྨིན་མཚམས་ནས་འོད་
ཟེར་ཐེངས་བཞི་སྤྲོ་ཞེས་གསུང་གསུང་། དེ་ཡང་འདི་ལྟར་དང་པོ་འཕྲོས་པས་རང་ལ་ཕོག་སྟེ་རང་གི་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་སྦྱངས། ལུས་ཤ་ཁྲག་གི་ཕུང་པོ་ཐམས་ཅད་བསྲེགས་
ནས་འོད་ཀྱི་རང་བཞིན་དུ་གྱུར། འོད་ཟེར་ཡང་མེ་ལོང་ལ་ཧས་བཏབ་པ་ཡལ་བ་ལྟར་གྱུར་པའི་ལྷག་མ་ཅུང་ཟད་ལུས་པ་དེ་བཅོམ་ལྡན་འདས་ཀྱི་སྨིན་མཚམས་ནས་བྱུང་བའི་འོད་ཟེར་ཕྲ་
མོ་དེ་ལྷན་དུ་བཅོམ་ལྡན་འདས་ཀྱི་སྨིན་མཚམས་སུ་ཐིམ་ནས་བདག་སྟོང་པ་ཉིད་དུ་གྱུར་པར་བསམ། ཡང་གཉིས་པ་སེམས་ཅན་ཐམས་ཅད་ལ་ཕོག་སྟེ་སྔར་བཞིན་དུ། གསུམ་པ་སྣོད་ཀྱི་འཇིག་རྟེན་ལ་ཕོག་ནས་སྔར་གྱུར་པར་བསྒོམ་སྟེ། 
1-625
དེ་དག་ནི་སྲིད་པ་འཁོར་བ་སྟོང་པ་ཉིད་བསྒོམ་པའོ། །བཞི་པ་འཁོར་གཉིས་ལ་ཕོག་སྟེ་འོད་ཀྱི་རང་བཞིན་དུ་གྱུར་པས་སྔ་མ་ལྟར་བཅོམ་ལྡན་འདས་ཀྱི་སྨིན་མཚམས་སུ་ཐིམ་ཞིང་། བཅོམ་ལྡན་
འདས་ཀྱང་འོད་ཀྱི་རྣམ་པར་ཡལ་ནས་སྟོང་པར་བསྒོམས་ཏེ་ཞི་བ་མྱ་ངན་ལས་འདས་པ་ཡང་སྟོང་པ་ཉིད་དུ་བསྒོམ། དེ་ལྟར་ན་སྲིད་པ་འཁོར་བ་དང་ཞི་བ་མྱ་ངན་ལས་འདས་པ་
ཡང་སྟོང་པ་ཉིད་དུ་མཉམ་པས་སྲིད་པ་དང་ཞི་བ་མཉམ་པ་ཉིད་དུ་ཤེས་པར་བྱས་ནས་འཁོར་འདས་ཀྱི་ཆོས་ཐམས་ཅད་ཅིར་ཡང་མ་གྲུབ་པ་སྤྲོས་པའི་མཐའ་དང་བྲལ་བའི་སྟོང་པ་ཉིད་
དུ་བློ་ཐག་བཅད་ཅིང་། ཡུལ་ཅིར་ཡང་མ་གྲུབ་པ་ལ། བློས་ཅིར་ཡང་མི་འཛིན། ཅིར་ཡང་མི་རྟོག་པའི་ངང་དུ་ཤེས་པ་ཅུང་ཟད་གཅིག་གློད་ནས་གཞག་གོ །དེའི་ངང་ནས་ཤེས་རབ་ཀྱི་ཕ་
རོལ་ཏུ་ཕྱིན་པའི་སྒྲ་གྲག་སྟོང་། དོན་སྐྱེ་མེད་དུ་ཤེས་པར་བྱས་ནས་མདོ་ཤེས་རབ་སྙིང་པོ་མི་ཚིག་གིས་བར་མ་ཆད་པར་ཚར་བདུན་གདོན་ནོ། །དེའི་རྗེས་ལ་བདུད་ལྡོག་བྱེད་དེ། གསུང་ལས་
ཀྱང་། ཡུམ་གྱི་སྒྲུབ་པའི་སྒོམ་དང་། བདུད་ལྡོག་གི་དམིགས་པ་གཉིས་མཐུན་པས་ཞེས་གསུང་གསུང་ངོ་། །དེ་ནི་འདི་ལྟར། སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །
1-626
ཡུམ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །བདག་གི་བདེན་པའི་ཚིག་འགྲུབ་པར་གྱུར་ཅིག ཇི་ལྟར་སྔོན་ལྷའི་དབང་པོ་བརྒྱ་བྱིན་གྱི་ཤེས་རབ་ཀྱི་ཕ་རོལ་ཏུ་ཕྱིན་
པའི་དོན་ཟབ་མོ་ཡིད་ལ་བསམས་ཤིང་ཁ་འདོན་དུ་བཏོན་པས་བདུད་སྡིག་ཅན་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་ལོག་པ་དེ་བཞིན་དུ། བདག་གིས་ཀྱང་ཤེས་རབ་ཀྱི་ཕ་རོལ་ཏུ་
ཕྱིན་པའི་དོན་ཡིད་ལ་བསམ་ཤིང་ཁ་དོན་དུ་བཏོན་པས་བདུད་སྡིག་ཅན་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་ལོག་པར་གྱུར་ཅིག མེད་པར་གྱུར་ཅིག ཞི་བར་གྱུར་ཅིག་ཅེས་ལན་གསུམ་
བརྗོད་དོ། །མཇུག་ནི་སྟོང་པའི་ངང་དེ་ནས་ལངས་ཏེ། སྣང་པ་ཐམས་ཅད་རྨི་ལམ་སྒྱུ་མ་ལྟ་བུར་ཤེས་པའི་ངང་ནས་བསྔོ་བ་བྱ་སྟེ། བསོད་ནམས་འདི་ཡི་ཐམས་ཅད་གཟིགས་པ་ཡི། །གོ་འཕང་
འཐོབ་ཅིང་རྐྱེན་གྱི་དགྲ་བརྟུལ་ཏེ། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་བསྔོ་བ་རྒྱས་གདབ་བོ། །དེ་ལྟར་སྦྱོར་དངོས་མཇུག་གསུམ་ཚང་བའི་ཡུམ་
གྱི་སྒྲུབ་འདི་ཉིན་ཞག་རེ་ལ་ཐེངས་རེ་མ་ཆག་པར་བྱས་ནའང་ཡུམ་གྱི་སྒྲུབ་པའི་སྒོར་ཞུགས་པའི་རྣལ་འབྱོར་པ་བྱ་བ་ཡིན་ཏེ་ཕན་ཡོན་ཇི་སྐད་བཤད་པ་བཞིན་འབྱུང་ལ། དེ་བས་ཀྱང་མང་དུ་བྱས་ན་གོང་གི་ཕན་ཡོན་རྣམས་འབྱུང་པ་ལྟ་སྨོས་ཀྱང་ཅི་དགོས་ཏེ་གནས་སྐབས་དང་མཐར་ཐུག་གི་ཕུན་སུམ་ཚོགས་པ་ཐམས་ཅད་འབྱུང་བ་ཡིན་ནོ་ཞེས་སྣར་ཐང་པའི་བླ་མ་དམ་པ་རྣམས་གསུང་ངོ་། །
1-627
དེ་ལྟར་ཡུམ་གྱི་སྒྲུབ་པའི་རྗེས་སུ་ཚིགས་སུ་བཅད་པ་གདོན་པར་བྱ་སྟེ། དེ་ལ་སྤྱིར་ཚིགས་སུ་བཅད་པ་གདོན་པའི་གནང་མང་དུ་འདུལ་བ་ལས་གསུངས་ཀྱང་། འདིར་འཆད་པ་པོ་རྣམས་ཀྱིས་སྔོན་
དུ་མཛད་པ་ནི་བཅུ་གཅིག་སྟེ། བསླངས་དང་འཐུངས་དང་ཁྲུས་བྱེད། །ངལ་སོ་མཚན་མོ་གནས་པ་དང་། །རྟེན་ལ་ཕྱག་བྱེད་གྲིབ་མ་འགོམ། །མུ་སྟེགས་གནས་དང་ལམ་ཞུགས་དང་། །ཤི་བའི་རོ་དབྱུང་ཆད་པས་
གཅད། །ཅེས་པའོ། །དེ་དག་ཀྱང་རིམ་པ་ལྟར་དང་པོ་ན་འགའ་ཞིག་ལ་བླང་ནས་བྱིན་པའམ། མ་བསླང་པར་བྱིན་ཡང་རུང་སྟེ། འདི་སྐད་དུ། སྦྱིན་པ་ཆེན་པོར་གྱུར་པ་འདི་ཡིས་ནི། །འགྲོ་བའི་
ནང་དུ་རང་བྱུང་སངས་རྒྱས་ཏེ། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་དགུ་སྲིད་པའི་མཚོ་ལས་འདོན་པར་ཤོག །ཅེས་བརྗོད་དོ། །འདི་ནི་བདག་ཅག་གི་སྟོན་པ་བཅོམ་ལྡན་འདས་ལ། རྒྱལ་
པོ་གསལ་རྒྱལ་གྱིས། བཙུན་པ་བཅོམ་ལྡན་འདས་ཀྱིས་བྱང་ཆུབ་ཏུ་ཐོག་མར་ཐུགས་གང་དུ་བསྐྱེད་ལགས་ཞེས་གསོལ་པ་དང་། རྒྱལ་པོ་ཆེན་པོ་སྔོན་རྒྱལ་པོ་འོད་ལྡན་ཞེས་བྱ་བ་བྱུང་སྟེ། དེའི་ཡུལ་
དུ་གླང་པོ་རིན་པོ་ཆེ་ཞེས་བྱ་བ་བྱུང་སྟེ། འདུལ་བ་ལ་མཁས་པ་བོས་ནས། འདི་ཁྱོད་ཀྱི་མྱུར་དུ་ལེགས་པར་འདུལ་བར་བྱོས་ལ་ང་ལ་ཕུལ་ཞིག་ཅེས་བསྒོ་བ་དང་། དེས་ཀྱང་དེ་བཞིན་དུ་མཉན་ཏེ་རྒྱལ་པོ་འོད་ལྡན་ལ་ཕུལ་ལོ། །
1-628
དེ་ནས་འདུལ་མཁན་དང་ལྷན་དུ་རྒྱལ་པོ་འོད་ལྡན་གླང་པོ་ཆེ་ལ་ཞོན་ནས་རི་དྭགས་འཆོར་དུ་སོང་བ་དང་། ནགས་ཀྱི་བ་གླང་མོའི་དྲི་ཚོར་ནས་དེའི་རྗེས་སུ་བརྒྱུགས་ཏེ་རླུང་ལྟར་མགྱོགས་
པའི་གླང་པོ་ཆེས་ཁྱེར་བ་དང་། རྒྱལ་པོས་འདི་སྐད་དུ། གླང་ཆེན་དབང་པོར་ཚར་གཅད་པར། །བཟང་པོ་རབ་ཏུ་འབད་པར་གྱིས། །གླང་ཆེན་གཉེའུ་རེངས་ཁྱེར་བ་ཡིས། །ཁོ་བོ་ཅི་འགྱུར་གཏོལ་མེད་ཁྱེར། །
ཅེས་སྨྲས་པ་དང་། གླང་པོ་ཆེ་འདུལ་བ་སྨྲས་པ། ལྷ། དྲང་སྲོང་དམ་པས་སྨྲས་པའི་གསང་སྔགས་བཟླས་བགྱི་ཞིང་། འདི་ལ་ལྕགས་ཀྱུས་ཚར་བཅད་འབད་པ་ཡང་བགྱི་ན། འཆི་བར་ངེས་པ་རྣམས་ཀྱི་
ཚེ་ཡིས་སྨན་བཞིན་དུ། གླང་པོ་འདི་ནི་བདག་སྟོབས་ཟིལ་གྱིས་མནན་ནས་མཆི་ཞེས་སྨྲས་ཏེ་བཟློག་པའི་ཐབས་ལ་འབད་ཀྱང་བཟློག་མ་ནུས་པར། ལྷ་ཤིང་གྱི་ཡལ་ག་ལ་འཇུ་བར་གསོལ་ཞེས་ཏེ།
དེ་གཉིས་ཀ་ཡལ་ག་ལ་འཇུས་ནས་གནས་སོ། །དེ་ནས་རྒྱལ་པོས་གླང་པོ་མ་དུལ་བར་ང་ལ་ཕུལ་ལོ་ཞེས་པ་དང་། ལྷ་བདག་གི་དུལ་བར་བགྱིས་ཏེ་བལ་གླང་མོའི་དྲི་ཚོར་བས་ཉན་
དུ་མ་གཏུབ་ལགས་སོ། །དེ་ལྟ་ལགས་པས་སྔར་གྱིས་དཔྱད་དྲན་ནས་རིང་པོ་མི་ཐོགས་པར་མཆི་བར་འགྱུར་རོ། །དེ་ནས་མྱོས་པ་དང་བྲལ་བར་གྱུར་ཅིང་ཞག་བདུན་ལོན་ནས་དཔྱད་རྗེསསུ་དྲན་ཏེ་རང་གི་གནས་སུ་འོངས་པ་རྒྱལ་པོ་སྨྲས་པ་དང་། 
1-629
རྒྱལ་པོས་སྨྲས་པ། འདི་དུལ་བ་ཡིན་ན་བདག་ཅག་གཡེངས་པ་ལ་རྒྱུ་ཅི་ཞིག་ཡོད། ལྷ་བདག་ནི་ལུས་འདུལ་བ་ལགས་ཀྱི་སེམས་འདུལ་བ་ནི་མ་ལགས་སོ། །རྒྱལ་པོས་སྨྲས་པ། སེམས་འདུལ་བ་
འགའ་ཡོད་པར་ཁྱེད་ཀྱིས་མཐོང་ཞིང་ཐོས་སམ། ལྷ་ལུས་འདུལ་བ་དང་སེམས་འདུལ་བ་སངས་རྒྱས་བཅོམ་ལྡན་འདས་རྣམས་མཆིས་སོ། ། དེ་ནས་རྒྱལ་པོ་འོད་ལྡན་གྱིས་སངས་རྒྱས་བཅོམ་ལྡན་འདས་རྣམས་ཀྱི་བརྩོན་
འགྲུས་དང་སྟོབས་ལ་སོགས་པ་ཐོས་ཏེ། སྦྱིན་པ་དག་སྦྱིན། བསོད་ནམས་དག་བྱས་ནས་བྱང་ཆུབ་ཏུ་སྨོན་ལམ་བཏབ་སྟེ། སྦྱིན་པ་རྒྱ་ཆེན་གྱུར་པ་འདི་ཡིས་སུ། འགྲོ་བ་རང་བྱུང་སངས་རྒྱས་གྱུར་
ནས་ནི། །སྔོན་གྱི་རྒྱལ་དབང་རྣམས་ཀྱིས་མ་བསྒྲལ་བ། །སྐྱེ་བོའི་ཚོགས་དག་བདག་གིས་བསྒྲལ་བར་བྱ། །ཞེས་ཏེ། ང་ཉིད་དེའི་ཚེ་རྒྱལ་པོ་འོད་ལྡན་དུ་གྱུར་པ་ནས་ཐོག་མར་སེམས་བསྐྱེད་དོ་ཞེས་
གསུངས་ཏེ། དེ་ཉིད་འདིར་སྨོན་ལམ་མཛད་པར་སྣང་ངོ་། །འཐུངས་དང་ཞེས་པས་ནི་བཟའ་བཏུང་བྱས་པའི་རྗེས་ལ་སྔར་གོང་དུ་བསྟན་པ་ལྟར་སྨོན་ལམ་བརྗོད་པར་བསྟན་ལ་ཁྲུས་བྱེད་ཞེས་པ་ནི་དེའི་
རྗེས་ཐོགས་སུ་ཆུའི་སྦྱིན་པའི་ཚིགས་སུ་བཅད་པ་གདོན་པར་བསྟན་ཏེ། སུམ་བརྒྱ་པ་ལས་ཀྱང་། ཁྲོན་པ་ལ་སོགས་རྣམས་ནས་ཆུ་བླངས་ནས། །ཁྲོན་པ་ལ་སོགས་བྱེད་པའི་ཆུ་ལྷ་ལ། །སྦྱིན་པའི་རབས་མཐུན་ཚིགས་བཅད་གདོན་པར་བྱ། །
1-630
འཐུང་དང་ཁྲུས་བྱེད་པ་ནའང་དེ་བཞིན་བརྗོད། །ཅེས་སོ། །ངལ་སོ་ཞེས་པ་ནི་ཡིད་མཐུན་པའི་གནས་སུ་ངལ་བསོས་པའམ། དེ་ལྟ་མ་བྱས་རུང་སྟེ་བདག་པོ་རེ་ངེས་པར་ཡོད་པས་དེ་དག་གི་
དོན་དུ། རྒྱལ་པོ་སྦྱིན་བདག་ཉིད་དང་ནི། །གཞན་ཡང་གྲོང་ཁྱེར་གནས་པ་དང་། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་དང་ལྡན་པར་ཤོག །ཅེས་སོ། །བྱང་ཆུབ་གཞུང་ལམ་ལས། རྒྱལ་པོ་སྦྱིན་
བདག་ཉིད་དང་ནི། །གང་ཡང་སེམས་ཅན་ཚོགས་གཞན་རྣམས། །ཚེ་དང་ནོར་མེད་ཕུན་སུམ་ཚོགས། །རྟག་ཏུ་བདེ་དང་ལྡན་གྱུར་ཅིག །ཅེས་གསུངས་སོ། །མཚན་མོ་གནས་པ་ནི་མཚན་མོ་སྡོད་པའི་སར་ཚིགས་སུ་
བཅད་པ་གདོན་པ་སྟེ། དེ་ཡང་བཀར་གཏོགས་པའི་ཚིག་གང་བཏོན་ཡང་དགོས་པ་འགྲུབ་མོད་ཀྱི། འོན་ཀྱང་འོ་སྐོལ་བོད་ཀྱི་རབ་ཏུ་བྱུང་བ་རྣམས་ལ་པཎྚི་ཏ་བི་མ་ལ་མི་ཏྲའི་བཀའ་དྲིན་
གྱི་ཤེས་རབ་སྙིང་པོ་བློ་ལ་ཡོད་པ་ཤ་སྟག་ཏུ་ཡོད་པས་དེ་འདོན་པར་མཛད་པ་ཕྱག་ལེན་དུ་སྣང་ངོ་། །འདིའི་དུས་ནི་ཡུམ་གྱི་སྒྲུབ་པ་ཚར་བའི་རྗེས་ཐོགས་སུ་བྱས་ཏེ། དེ་ཡང་
གླེང་གཞི་ལས། སྔོན་དགེ་སློང་དག་ཚེས་གྲངས་བགྲང་པར་མི་བྱེད་པ་ན། དགེ་སློང་དག་གི་གན་དུ་བྲམ་ཟེ་དང་ཁྱིམ་བདག་དག་འོངས་ཏེ། འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། 
1-631
མི་ཤེས་སོ་ཞེས་སྨྲས་པ་དང་། དེ་དག་ན་རེ་མུ་སྟེགས་ཅན་གྱིས་ཀྱང་ཚེས་གྲངས་དང་ཉི་མ་དང་སྐར་མ་དང་ཡུད་ཙམ་ཡང་ཤེས་ན། ཁྱེད་ཅག་རབ་ཏུ་བྱུང་ནས་ཚེས་གྲངས་ཙམ་ཡང་
མི་ཤེས་སམ་ཞེས་པས་ལན་མེད་པར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཀའ་སྩལ་པ། ཚེ་གྲངས་བགྲང་པར་ངས་རྗེས་སུ་གནང་ངོ་ཞེས་གསུངས་པས།
དགེ་སློང་ཐམས་ཅད་དེ་ལྟར་བགྲང་བ་ལ་ཞུགས་པ་ན། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཀའ་སྩལ་པ། ཐམས་ཅད་ཀྱི་མ་བགྲང་པར་དགེ་འདུན་གྱི་གནས་
བརྟན་དང་གཙུག་ལག་ཁང་སྐྱོང་གཉིས་ཀྱི་བགྲང་ཤིག དེ་གཉིས་ཀྱི་ཀྱང་མ་དྲན་ནས་ཉེས་དམིགས་སུ་གྱུར་ནས་གསོལ་པ་དང་། འཇིམ་པའི་རིལ་བུ་བཅོ་ལྔ་བྱོས་ལ་སྲད་བུ་ལ་བརྒྱུད་དེ་ཉིན་རེ་
ཞིང་དྲང་པར་གྱིས་ཤིག དེ་ལྟར་བྱས་པས་སྲད་བུ་འཕྱོངས་པར་གྱུར་པ་དང་། འོད་མའི་བྱང་བུ་བཅོ་ལྔ་བྱོས་ལ་སྔ་མ་ལྟར་བྱོས་ཤིག་ཅེས་གསུངས་པ་དང་། དགེ་སློང་ཐམས་ཅད་ཀྱིས་དེ་ལྟར་
བྱས་པས་ལེགས་པར་མ་དྲན་པ་ན་དགེ་འདུན་གྱི་གནས་བརྟན་གྱིས་དྲང་པར་གྱིས་ཤིག དེ་ཡང་དེའི་ཚེ་བྲམ་ཟེ་དང་ཁྱིམ་བདག་དག་འོངས་ནས་དེ་རིང་ཚེས་གྲངས་དུ་ཞེས་དྲིས་པས། དགེ་སློང་དག་གིས་དགེ་འདུན་གྱི་གནས་བརྟན་དང་ཁང་སྐྱོང་གིས་ཤེས་སོ་ཞེས་དེར་གཏད་པ་དང་། 
1-632
འཕགས་པ་ཅི་དེ་དག་ཁྱེད་ཀྱི་ཚེས་གྲངས་ཀྱི་མཛོད་ཡིན་ནམ། ཅི་ཁྱེད་ལ་དྲིས་ན་ཅིའི་ཕྱིར་གཞན་ལ་གཏོད། ཁྱེད་ཅག་གི་སྨྲས་ཤིག དེ་དག་ལན་མེད་པར་གྱུར་པ་ན། དེ་དག་འཕྱ་ཞིང་
གཙུག་ལག་ཁང་ནས་དོང་བ་དང་། དེ་ལྟར་གྱུར་པ་དགེ་སློང་དག་གིས་གསོལ་པ་དང་། བཀའ་སྩལ་པ། བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་དགེ་འདུན་གྱི་ནང་
དུ་ཚེས་གྲངས་བརྗོད་པར་ཤིག ཡང་དགེ་སློང་དག་ཚེས་གྲངས་བརྗོད་ཀྱིས་ཟླ་བ་ཕྱེད་པོ་འཛིན་པར་མི་བྱེད་པ་ན། བྲམ་ཟེ་དང་ཁྱིམ་བདག་དག་ན་རེ། ཁྱེད་ཀྱིས་ཟླ་བ་ཕྱེད་པོ་བཟུང་པ་
ཡང་མི་ཤེས་ཏེ། དེ་མ་བཟུང་ན། ཡར་གྱི་ཟླ་བ་དང་། མར་གྱི་ཟླ་བ་ཕྱེད་པོ་ཇི་ལྟར་ཤེས་པར་འགྱུར་ཞེས་པ་དང་། དེ་ལྟར་གྱུར་པ་གསོལ་པ་དང་། བཀའ་སྩལ་པ། ཟླ་བ་ཕྱེད་
པོ་ཟུང་ལ་ཚེས་གྲངས་རྗོད་པར་གྱིས་ཤིག་ཅེས་སོ། །རྗོད་པར་བྱེད་པའི་གང་ཟག་ནི། གཙུག་ལག་ཁང་སྐྱོང་པའི་དགེ་བསྐོས་པའམ། དེ་མེད་ན་དགེ་སློང་ངམ། དགེ་ཚུལ་ཞིག་གིས་བྱས་ཏེ། དེས་དགེ་
འདུན་གྱི་གནས་བརྟན་ལས་ཚེས་གྲངས་བརྟག་ནས་དེ་བརྗོད་པ་དང་། ཚིགས་སུ་བཅད་པ་གདོན་པར་སྐུལ་བ་ལྷན་དུའོ། །དེ་སྐད་དུའང་མདོ་རྩ་བ་ལས། དགེ་འདུན་གྱི་གནས་བརྟན་གྱིས་སྨྱུག་མའི་ཐུར་མ་སྐུད་པ་ལ་བརྒྱུད་པ་སྤོ་བས་ཉི་མ་བགྲང་བར་བྱའོ། །
1-633
དགེ་བསྐོས་ཀྱིས་དེ་ལས་བརྟག་སྟེ་དགེ་འདུན་ལ་བརྗོད་པར་བྱའོ། བྱེ་བྲག་ཏུ་བྱས་པའིའོ། །ངོ་བོའི་དབྱེ་བས་སོ། །གཙུག་ལག་ཁང་གི་བདག་པོ་དང་ལྷའི་ཕྱིར་ཚིགས་སུ་བཅད་པ་གདོན་པར་དགེ་སློང་
རྣམས་ལ་སྐུལ་བའི་ཚིག་བྱའོ། །མདོ་ལའོ་ཞེས་སོ། །འདི་ལག་ལེན་ནི། དེས་དགེ་འདུན་ལ་ཕྱག་གསུམ་བྱས་ནས་འགྲེང་སྟེ་འདུག་པ་དང་བཅས་པས། ཨུ་ཧཱུྃཿ དགེ་འདུན་བཙུན་པ་རྣམས་དགོངས་སུ་གསོལ། དེང་
ནི་ཡར་གྱི་ངོའི་ཚེས་ཅིག་ལགས་ཏེ་གཙུག་ལག་ཁང་གི་བདག་པོ་དང་། གཙུག་ལག་ཁང་གི་ལྷ་རྣམས་ཀྱི་སླད་དུ་ཚིགས་སུ་བཅད་པ་རེ་རེ་བསྒྲག་ཏུ་གསོལ་ཞེས་པའོ། །འདི་ཨུ་ཧཱུྃ་ཞེས་པ་
ནི་དགེ་འདུན་ལ་གུས་ཚིག་ཡིན་ལ། དགོངས་སུ་གསོལ་གྱི་བར་ནི་དགེ་འདུན་རྣམས་གཏོད་ཅིག་ཅེས་པའི་དོན་ཏེ། གཞི་འགྲེལ་ལས། དགོངས་སུ་གསོལ་ཞེས་པ་ནི་ཐུགས་གཏོད་གཅིག་ཅེས་པའི་དོན་ཏོ་ཞེས་
སོ། །དེ་ལྟར་མཛད་པ་ནི་བླ་མ་རྣམས་ཀྱི་ཕྱག་ལེན་ནོ། །དེང་ནི་ཞེས་པ་མན་ཆད་ནི་མདོ་རྩ་བ་ན་བཞུགས་སོ། །འོན་ཀྱང་དེར་ཀླག་ཏུ་གསོལ་ཞེས་པ་འགྱུར་དེ་ལ་ཡོད་མོད་ཀྱི།
དེ་བས་ཀྱང་བསྒྲག་དུ་གསོལ་ཞེས་པ་ཚིག་མཛེས་པས་དེ་ལྟར་མཛད་པར་སྣང་ངོ་། །དོན་ལ་གསུང་དུ་གསོལ་ཞེས་བརྗོད་ཀྱང་ཁྱད་མེད་ལ། གསུང་བསྒྲག་དུ་གསོལ་ཞེས་པ་ལའང་སྐྱོན་མེད་དོ། །དེ་ནས་ཡུམ་གྱི་སྙིང་པོའི་དོན་ཏེ། 
1-634
འདི་སྐད་དུ་ཞེས་པ་ནས་ཤཱ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ་ཞེས་པ་དང་། ཤཱ་རིའི་བུ་ཞེས་པ་ན། སངས་རྒྱས་སོ་ཞེས་པའི་བར་དང་། དེ་ལྟ་བས་ན་ཞེས་པ་ནས་
མངོན་བར་བསྟོད་པའི་བར་ཏེ་དེ་ལྟར་དུམ་བུ་གསུམ་དུ་བྱས་ནས་འདོན་པའང་ཡོད་ཡོད་ཀྱི། འདི་པའི་ལུགས་ཀྱིས་དུམ་བུ་ཉི་ཤུ་རྩ་དུ་བྱེད་དེ། དེའི་ནུབ་རེ་བཞིན་འདོན་པས་ཤེས་སླའོ། །དེ་
ལྟར་ཚིག་ཐུང་དུ་བྱས་ནས་འདོན་པ་ནི་ཐམས་ཅད་མཉམ་པར་འོང་བའི་ཆེད་ལ་དགོངས་སོ། །
༄། །སྨོན་ལམ་གྱི་ཚིགས་སུ་བཅད་པ་གདོན།
དེའི་རྗེས་སུ་སྨོན་ལམ་གྱི་ཚིགས་སུ་བཅད་པ་གདོན་སྟེ། དེའི་དང་པོར། དཀོན་མཆོག་གསུམ་ལ་ཕྱག་འཚལ་
ལོ་ཞེས་པ་བཏོན་ནས། དགེ་བར་གྱུར་ཅིག་ཞེས་པ་འདོན་པའང་ཡོད་ལ། ཤར་བ་པ་ནི་དེ་མི་འདོན་པར་ཕྱག་འཚལ་ལོའི་རྗེས་ལ། རྡོ་རྗེ་གཅོད་པ་ནས་གསུངས་པའི། སྐར་མ་རབ་རིབ་མར་
མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་དེ་ལྟར་རྟོགས་པར་ཤོག །ཅེས་པ་ངེས་པར་འདོན་ཏོ། །དེའི་རྗེས་ལ་འགའ་ཚིགས་སུ་བཅད་པ་གཞན་འདོན་པའང་
ཡོད་ཡོད་ཀྱི། མཁན་པོ་དཔལ་ལྡན་གྲོའི་ཕྱག་ལེན་པ་འདི་རྣམས་ངེས་པར་འདོན་ཏེ་གོ་རིམས་ཀྱང་འདི་ལྟར་མཛད་པར་སྣང་ངོ་། །སྤྱོད་འཇུག་ལས། གཙུག་ལག་ཁང་རྣམས་གློག་པ་དང་། །ཁ་དོན་གྱི་རྒྱས་ལེགས་གནས་ཤོག །
1-635
རྟག་ཏུ་དགེ་འདུན་མཐུན་པ་དང་། །དགེ་འདུན་དོན་ཡང་འགྲུབ་པར་ཤོག །ཅེས་དང་། རིགས་པ་དྲུག་ཅུ་པ་ལས། དགེ་བ་འདི་ཡི་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་ཤེས་
ལས་བྱུང་པའི། །དམ་པ་གཉིས་ནི་ཐོབ་པར་ཤོག །ཅེས་པ་སྟེ། དམ་པ་གཉིས་ནི་གཟུགས་སྐུ་དམ་པ་དང་། ཆོས་སྐུ་དམ་པའོ། །ཡང་སྤྱོད་འཇུག་པས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་
ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། བཅས་ཏེ་ཡུན་རིང་གནས་གྱུར་ཅིག །ཅེས་དང་། དབུ་མ་སྙིང་པོ་ལས། སྒྲུབ་པའི་མེ་ཏོག་སྔགས་ལྡན་པ། །ཕྱོགས་རྣམས་ཀུན་ཏུ་དྲིས་ཁྱབ་པས། །རྫོགས་
པའི་སངས་རྒྱས་ཉི་མ་ལ། །ཉིན་རེ་བཞིན་དུ་བསྙེན་བཀུར་བྱེད། །ཅེས་གསུངས་པ་དང་། ཡང་སྤྱོད་འཇུག་ལས། བསླབ་པར་འདོད་པའི་དགེ་སློང་དག །དབེན་པ་དག་ཀྱང་ཐོབ་པར་ཤོག །གཡེང་བ་ཐམས་ཅད་སྤངས་
ནས་ནི། །སེམས་ནི་ལས་རུང་བསྒོམ་གྱུར་ཅིག །བདག་ནི་ཁ་ཟས་གྱི་ནས་ཀྱང་། །ཉམས་དང་ལྡན་ཞིང་འཚོ་བར་ཤོག །ཚེ་རབས་ཀུན་ཏུ་དབེན་གནས་པ། །ཕུན་སུམ་ལྡན་པ་ཐོབ་གྱུར་ཅིག །བདག་ཀྱང་འཇམ་
དབྱངས་བཀའ་དྲིན་གྱིས། །ས་རབ་དགའ་བ་ཐོབ་པར་དུ། །རྟག་ཏུ་ཚེ་རབས་དྲན་པ་དང་། །རབ་ཏུ་བྱུང་བ་ཐོབ་པར་ཤོག །གང་ཚེ་ལྟ་བར་འདོད་པ་དང་། །ཅུང་ཟད་འདྲི་བར་འདོད་ན་ཡང་། །མགོན་པོ་འཇམ་དབྱངས་དེ་ཉིད་ནི། །
1-636
གེགས་མེད་པར་ཡང་མཐོང་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོང་བཟུང་ཞིང་། །བདུད་ཀྱི་ལས་ཀྱང་སྤང་པར་ཤོག །བདག་གིས་བསོད་ནམས་འདི་
ཡིས་ནི། །སེམས་ཅན་ཐམས་ཅད་མ་ལུས་པའི། །སྡིག་པ་ཐམས་ཅད་སྤངས་ནས་ནི། །རྟག་ཏུ་དགེ་བ་བྱེད་པར་ཤོག །ཅེས་པ་རྣམས་དང་། བཤེས་པའི་སྤྲིང་ཡིག་ལས། མཐུན་པར་གྱུར་པའི་ཡུལ་ན་གནས་པ་
དང་། །སྐྱེས་བུ་དམ་པ་ལ་ནི་རྟེན་པ་དང་། །བདག་ཉིད་ལེགས་སྨོན་སྔོན་བྱས་བསོད་ནམས་ཀྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་གསུངས་པ་དེ། འཁོར་ལོ་ཆེན་པོ་བཞི་དང་ལྡན་པར་
ཤོག་ཅེས་པར་མཛད་དོ། །སྐྱེས་རབས་ལས། བསོད་ནམས་འདི་ཡི་ཐམས་ཅད་གཟིགས་པ་ཡི། །གོ་འཕང་ཐོབ་ཅིང་སྐྱོན་གྱི་དགྲ་བཏུལ་དེ། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་འགྲོ་
བ་འདོན་པར་ཤོག །ཅེས་པ་སྟེ། འདི་ནི་བདག་ཅག་གི་སྟོན་པ་བཅོམ་ལྡན་འདས་རྒྱལ་པོ་བྱམས་པའི་སྟོབས་སུ་སྐུ་འཁྲུངས་པ་ན། བཀྲེས་པས་ཉེན་པའི་གནོད་སྦྱིན་ལྔ་ལ། ཐུགས་བརྩེ་བའི་སླད་དུ་
རང་གི་སྐུ་ལུས་ལས་ཁྲག་གཟགས་ཏེ། དེ་དག་ཚིམ་པར་མཛད་པ་ན། དེ་དག་གི་སྨྲས་པ། འདི་ལྟ་བུ་མཛད་ནས་ཅི་ཞིག་དོན་དུ་གཉེར་བར་བཞེད་ཅེས་པ་ལ། གོང་གི་ཚིག་དེ་དག་སྦྱར་ཏེ། 
1-637
སྲིད་པའི་མཚོ་ལས་འགྲོ་བ་འདོན་པར་འདོད་ཅེས་གསུངས་པ་དེ་ཉིད་འདིར་སྨོན་ལམ་དུ་མཛད་དོ། །ཡང་སྟག་མོ་ལས་ལུས་སྦྱིན་པར་བཏང་བའི་སྐྱེ་རབས་ལས། མཐོང་ཞིང་ཐོས་སམ་རྗེས་སུ་དྲན་ཡང་
རུང་། རེག་གམ་གཏམ་དུ་བརྗོད་པར་གྱུར་ཀྱང་རུང་། །རྣམ་པ་ཀུན་ཏུ་འགྲོ་ལ་ཕན་པར་ནི། བདེ་དང་ལྡན་པ་རྟག་ཏུ་བྱེད་གྱུར་ཅིག །ཅེས་དང་། ཤིས་པར་བརྗོད་པའི་ཚིགས་སུ་བཅད་པ་ལས། རྒྱལ་
བ་དགྲ་རྒྱལ་བདེན་པའི་བྱིན་བརླབས་ཀྱིས། །བདེ་པ་འདི་གསུང་དེ་ལ་དགྲ་མེད་ཅིང་། །ལྷར་བཅས་ལྷ་མིན་གྱིས་རྟག་མཆོད་འོས་པའི། །བདེན་པ་དེས་ནི་ཤིན་ཏུ་བདེ་ལེགས་ཤོག །དམ་ཆོས་བདུད་རྩི་ཐམས་
ཅད་མཁྱེན་པ་ཡི། །ཞལ་ནས་གསུངས་པ་བདུད་རྩིའི་རོ་འདི་ཡིས། །ཉོན་མོངས་འབར་བའི་མེ་ཡིས་གདུངས་པ་ཡི། །འགྲོ་བའི་སྡུག་བསྔལ་མ་ལུས་ཞི་བྱེད་ཤོག །ཅེས་པ་རྣམས་འདོན་པར་མཛད་ལ། དེའི་རྗེས་
སུ་ཤིས་པ་བརྗོད་པའི་ཚིག་འདི། དགེ་བའི་བཤེས་གཉེན་ཆུ་མིག་པ་ཆེན་པོ་འདོན་པའི་ཕྱག་བཞེས་ཡིན་ཅེས་གསུང་སྟེ། སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་དང་བྲལ་ཏེ་བདེན་
པའི་མཆོག །དགེ་འདུན་འདུས་པའི་གཙོ་སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་ཡིན་པས། །དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། །བདག་ཅག་གིས་ཇི་ལྟར་བསྔོས་ཞིང་སྨོན་ལམ་དུ་བཏབ་པ་དེ་ཁོ་ན་བཞིན་དུ་འགྲུབ་པར་གྱུར་ཅིག་ཅེས་པའོ། །
1-638
དེའི་རྗེས་སུ་མཚན་མོ་གནས་པའི་ཚིགས་བཅད་གདོན་པའི་དངོས་གཞི་རྒྱུད་ཆགས་གསུམ་པ་གདོན་སྟེ། ལུང་ཉིད་ལས། རྒྱུད་ཆགས་གསུམ་པ་གདན་པར་བྱའོ་ཞེས་དང་། འདུལ་བ་ཚིག་ལེའུར་བྱས་པ་ལས་ཀྱང་། མཚན་
མོ་གནས་ཚེ་རྒྱུད་གསུམ་པའོ་ཞེས་སོ། །དེ་ནི་ཕྱག་འཚལ་བ་དང་། སྡིག་པ་བཤགས་པ་དང་། སྨོན་ལམ་གྱི་རྒྱུད་དོ། །དེ་གདོན་པའི་གནས་ནི། དབྱངས་ཀྱི་ང་རོས་བྱས་སྟེ། གླེང་གཞི་ནི། དགེ་སློང་
དག་ཆོས་འདོན་པ་ན་རྒྱ་ཤུག་གི་འབྲས་བུའི་ཚོགས་གཏོར་པ་བཞིན་དུ་འདོད་ལ། མུ་སྟེགས་ཅན་རྣམས་སྐད་ཀྱི་གཏང་རག་གིས་གཞུང་འདོན་ཏོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱི་ཀུན་ཏུ་
སྤྱོད་པ་ནང་པར་སྔར་ལངས་ཏེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོའོ། །དེས་མུ་སྟེགས་ཅན་རྣམས་ཀྱི་གཏང་རག་གིས་གཞུང་འདོན་པ་ཐོས་ནས། བསམ་པ། མུ་སྟེགས་ཅན་གྱི་ཆོས་འདུལ་བ་
ནི་ཉེས་པ་སྨྲས་པ་ཡིན་ཡང་གཏང་རག་གིས་གཞུང་འདོན་ལ། བདག་གི་འཕགས་པ་རྣམས་ཀྱི་གཞུང་འདོན་པ་ན། རྒྱ་ཤུགས་ཀྱི་འབྲས་བུའི་ཚོགས་གཏོར་པ་བཞིན་འདོན་པས། འདི་ཉིད་བདག་གི་བྱ་བ་
ཡིན་ནོ་སྙམ་ནས། བཅོམ་ལྡན་འདས་ཀྱི་དྲུང་དུ་གསོ་སྟེ་ཞབས་ལ་ཕྱག་བྱས་ནས། བཙུན་པ། མུ་སྟེགས་ཅན་གྱི་ཆོས་འདུལ་བ་ནི་ཉེས་པར་སྨྲས་པ་ལགས་ཀྱང་སྐད་ཀྱི་གཏང་རག་གིས་གཞུང་འདོན་པར་བགྱིད་ལ། 
1-639
འཕགས་པ་རྣམས་ཀྱི་གཞུང་འདོན་པ་ན་རྒྱ་ཤུག་གི་འབྲས་བུའི་ཚོགས་གཏོར་བ་བཞིན་འདོན་པས། དེ་ལ་བཅོམ་ལྡན་འདས་ཀྱི་འཕགས་པ་རྣམས་ཀྱང་སྐད་ཀྱིས་གཏང་རག་གིས་གཞུང་འདོན་པར་སྣང་ན་ལེགས་
སོ། །དེ་ལ་བཅོམ་ལྡན་འདས་ཀྱིས་ཅང་མི་གསུང་བར་གནང་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་སྐད་ཀྱི་གཏང་རག་གིས་ཆོས་འདོན་པར་སྣང་ངོ་། ། དེ་ལྟར་བཀའ་སྩལ་པ་དང་། དགེ་
སློང་སྐད་ཀྱི་གཏང་རག་གིས་ལུགས་འབོག་པར་བྱེད། འདོན་པར་བྱེད། ཁ་དོན་བྱེད། ཡོངས་སུ་འདྲི་བར་བྱེད་པ་ན། མགོན་མེད་ཟས་སྦྱིན་རྒྱལ་བྱེད་ཀྱི་ཚལ་དུ་སོང་བ་ན་ཐོས་ནས་སྨྲས་པ། འཕགས་
པ་དག ཅི་ཁྱེད་ཀྱིས་གཙུག་ལག་ཁང་འདིར་རོལ་མོ་མཁན་གྱི་བྲང་བཏབ་བམ་ཞེས་པའི་སྐབས་དེ་དགེ་སློང་རྣམས་ཀྱིས་གསོལ་པ་དང་། བཀའ་སྩལ་པ། དགེ་སློང་གི་སྐད་ཀྱི་གཏང་རག་གིས་ལུང་འབོག་
པར་མི་བྱ། འདོན་པར་མི་བྱ། ཁ་དོན་མི་བྱ། འདྲི་བར་མི་བྱའོ། །འདི་ལྟར་སྟོན་པའི་ཡོན་ཏན་བསྒྲག་པ་དང་། རྒྱུད་ཆགས་གསུམ་པ་གདོན་པ་དག་ནི་སྐད་ཀྱི་གཏང་རག་གི་གདོན་པར་བྱའོ། །
ཞེས་སོ། །དེ་དག་གི་མཇུག་དུ་བཀྲ་ཤིས་བྱེད་པ་ནི། ཕུན་སུམ་ཚོགས་པའི་ཡན་ལག་ཡིན་པས་དེ་ལྟར་མཛད་པ་བླ་མ་རྣམས་ཀྱི་ཕྱག་ལེན་ཡིན་ནོ། །འདིའི་སྐབས་སུ་གསུང་པ། འདི་དགེ་འདུན་ཐམས་ཅད་ཀྱི་ཐུགས་དམ་ཡིན་པས་གནས་ཁང་སྟབས་བདེ་ན་ཐམས་ཅད་བཞེངས་ནས་བྱེད་དགོས་ལ། 
1-640
སྟབས་མ་བདེ་ན་དབྱངས་མཁན་རྣམས་བཞེངས་ཤིང་། གཞན་བཞུགས་པ་རྣམས་ཡང་དབུ་ཞྭ་ཕུད་ནས་དབྱངས་མཁན་གྱི་ཚིག་ལ་ཐུགས་གཏད་ཅིང་། ཕྱག་འཚལ་ལོ་ཞེས་པ་ལ་སོགས་པའི་ཚིག་མཚམས་སུ་དབུ་དུད་པ་
རེ་བྱེད། དབྱངས་མཁན་གྱིས་ཀྱང་། དབྱངས་གླུ་ཚ་མ་དང་སྨྲེ་སྔགས་སུ་འགྲོ་བ་མི་བྱེད་པར་དབྱངས་ཆེན་གང་བཟང་བ་དང་སྙན་པ་བྱས་ཏེ། ཕྱག་འཚལ་དང་སྡིག་བཤགས་གཉིས་མ་བུ་གཅིག་དང་། སྨོན་
ལམ་དང་བཀྲ་ཤིས་གཉིས་མ་བུ་གཅིག་གིས་བྱས་ནའང་ལེགས་ཤིང་། དབྱངས་མཁན་ཆ་གཉིས་ཀྱིས་བྱེད་ན་སྔ་མའི་རྗེས་ཕྱི་མས་བཅད་དེ་འཇོག་ལེན་གྱི་མཚམས་སུ་བར་སྟོང་མེད་པར་བྱེད་པ་དང་། ཕྱག་
འཚལ་གྱི་ཚིག་ནི་དཀོན་མཆོག་སྤྱིའམ། སངས་རྒྱས་ཀྱི་སྤྱི་བསྟོད་ལྟ་བུའམ། སྟོན་པ་བཅོམ་ལྡན་འདས་ཀྱི་བསྟོད་པར་བྱས་པ་དེ་དག་གང་ཡང་རུང་བ་མེན་ཏེ། ཅི་ནས་ཀྱང་སྟོན་པ་འདིའི་བསྟན་པ་
སྐྱོང་པའི་ཆོས་སྤྱོད་ཡིན་པས་སྟོན་པས་བཅོམ་ལྡན་འདས་ལ་བསྟོད་པར་འགྱུར་བ་ངེས་པར་བྱེད་དགོས་ལ། དེ་དག་ཀྱང་མདོ་དང་བསྟན་བཅོས་ལ་སོགས་པ་ཡིད་ཆེས་པའི་གནས་སུ་རུང་བ་དག་གིས་
བྱ་ཞིང་། ཡང་ཚིག་གང་གིས་སངས་རྒྱས་གང་ལ་བསྟོད་པ་བྱས་པ་དེ་སངས་རྒྱས་གཞན་ལ་བསྟོད་པས་ཀྱང་དེའི་བསྟོད་པར་འགྱུར་བའང་ཡོད་དེ། དེ་བཞིན་གཤེགས་པ་དོན་གྲུབ་བློའི་སྤྱན་སྔར་རྒྱལ་པོ་བསོད་ནམས་འོད་ཟེར་གྱིས་བསྟོད། 
1-641
མཚན་མཆོག་ལྡན་པ་དྲི་མེད་ཟླ་བའི་ཞལ། གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱོད་ལ་ཕྱག་འཚལ་ལོ། །ཞེས་པ་ལྟ་བུ་
སྟེ། འདི་ལྟ་བུ་དག་གིས་སྟོན་པ་བཅོམ་ལྡན་འདས་ལ་བསྟོད་པ་བྱར་རུང་ངོ་ཞེས་གསུང་གསུང་ངོ་། །གལ་ཏེ་གདོན་པའི་ཚུལ་མི་ཤེས་ནའང་དབེན་པའི་ཕྱོགས་སུ་བསླབ་པར་བྱ་སྟེ། བཅོམ་ལྡན་འདས་
ཀྱིས་སྐད་ཀྱི་གཏང་རག་གིས་གདོན་པར་བྱའོ་ཞེས་བཀའ་སྩལ་པ་དང་། གཞོན་ནུ་ཞིག་སྐད་ཀྱི་གཏང་རག་མི་ཤེས་ནས། དེས་གཞུང་དག་འདོན་པ་ཉིད་ན་རྒྱ་ཤུག་གི་འབྲས་བུའི་ཚོགས་གཏོར་བ་བཞིན་
དུ་འདོན་པར་གྱུར་ནས། དགེ་སློང་དག་གིས་ཚེ་དང་ལྡན་པ་བཅོམ་ལྡན་འདས་ཀྱིས་སྐད་ཀྱི་གཏང་རག་གནང་གིས། སྐད་ཀྱི་གཏང་རག་གིས་ཐོན་གཅིག དེས་སྨྲས་པ། བདག་གིས་སྐད་ཀྱི་གཏང་རག་མི་
ཤེས་སོ་ཞེས་པའི་སྐབས་དེ། དགེ་སློང་དག་གིས་གསོལ་པ་དང་། སྐད་ཀྱི་གཏང་རག་བསླབ་པར་བྱའོ་ཞེས་སོ། །དེ་ནས་དེ་དག་སློབ་པར་བྱེད་པ་ན། ཁྱམས་དང་། གནས་ཁང་དང་། སྒོ་ཁང་དག་ན་
སྐད་ཀྱི་གཏང་རག་སློབ་པར་བྱེད་པ་ན། ཁྱིམ་བདག་མགོན་མེད་ཟས་སྦྱིན་དེར་འོངས་པས་ཐོས་ནས། འཕགས་པ་དག་གཙུག་ལག་ཁང་འདི་རོལ་མོ་མཁན་གྱི་བྲང་ནི་མ་ལགས་ན། ཁྱེད་ཀྱིས་ད་དུང་ཡང་རོལ་མོ་མཁན་དག་མ་བཏང་ངམ་ཞེས་པའི་སྐབས་དེ། 
1-642
དགེ་སློང་དག་གིས་གསོལ་པ་དང་། བཀའ་སྩལ་པ། དབེན་པའི་ཕྱོགས་སུ་སྐད་ཀྱི་གཏང་རག་དག་བསླབ་པར་བྱའོ་ཞེས་སོ། །དོན་དེ་ཉིད་སུམ་བརྒྱ་པ་ལས་ཀྱང་། ཆོས་སྒྲོགས་བྱེད་པའི་གླུ་ནི་ཉེས་པ་
མེད། །སྟོན་པའི་ཡོན་ཏན་སྒྲོགས་པའང་དེ་བཞིན་ནོ། །དམ་ཆོས་ཆེད་དུ་གླུ་ནི་མི་ཤེས་ན། །དབེན་པར་སོང་སྟེ་རབ་ཏུ་བསླབ་པར་བྱ། །ཞེས་གསུངས་པ་ལྟ་བུའོ། །རྟེན་ལ་ཕྱག་བྱེད་ཞེས་པ་ནི་
སྐུ་གསུང་ཐུགས་ཀྱི་རྟེན་ལ་ཕྱག་བྱེད་པ་ན་ཇི་ལྟར་འོས་པའི་བསྟོད་པ་རྣམས་འདོན་ཞིང་ཕྱག་བྱེད་པའོ། །གྲིབ་མ་འགོམ་ཞེས་པ་ནི། བླ་མ་ལ་སོགས་པའི་སྐུའི་གྲིབ་མ་ལ་ཇི་ལྟར་བྱ་
བ་སྟོན་ཏོ། །དེ་ཡང་རྒྱུད་སྡེ་དག་ལས་ནི་སློབ་དཔོན་གྱི་མལ་སྟན་ལ་སོགས་པ་ཉེ་བའི་ལོངས་སྤྱོད་ཐམས་ཅད་དང་སྐུའི་གྲིབ་མ་ལ་འགོམ་པ་ལ་ཉེས་དམིགས་ཆེར་གསུངས་ཏེ། རྡོ་རྗེ་མཁའ་
འགྲོའི་རྒྱུད་ལས། སློབ་དཔོན་གྱི་ནི་མལ་སྟན་དང་། །ལྷམ་དང་གདུགས་དང་ན་བཟའ་སོགས། །ཉེ་བའི་ལོངས་སྤྱོད་ཐམས་ཅད་དང་། །གྲིམ་མ་འགོམ་པར་མི་བྱ་ཞིང་། །ཅོ་འདྲིའི་བར་ནི་མི་བྱ་འོ། །གལ་ཏེ་
བྱས་ན་དུས་ཀུན་ཏུ། །དེ་ནི་ཀུན་ཏུ་གཟིར་འགྱུར་ཞིང་། །དོན་ཉམས་དཔལ་ལས་རིང་དུ་འགྱུར། །ཞེས་སོ། །དེའི་ཕྱིར་བླ་མ་དང་སྐུ་གསུང་ཐུགས་ཀྱི་རྟེན་རྣམས་དང་དགེ་འདུན་གྱིས་སྐུའི་གྲིབ་མ་ལ་འགོམ་པར་མི་བྱ་བར་བསྐོར་ནས་འགྲོ་དགོས་སོ། །
1-643
གསུང་ལས་ཀྱང་། དེ་ལྟར་མ་བྱས་ན་རང་གི་དེག་སྦྱོར་གྱིས་ནུས་པ་ཉམས་ནས་འགྲོ། ཚེ་ལ་ཡང་གནོད་པ་ཡིན་ཅེས་གསུང་གསུང་ངོ་། །དེས་ན་བསྐོར་ས་མེད་ན་གྲིབ་མའི་འོག་ནས་འཛུལ་བར་
བསམས་ལ་ཚིགས་བཅད་འདོན་ཅིང་འགྲོ་སྟེ། འདུལ་བ་ཚིགས་ལེའུར་བྱས་པ་ལས། མཆོད་རྟེན་སྐུ་གཟུགས་གྲིབ་མ་དང་། །མཎྜལ་ཡང་ནི་བགོམ་མི་བྱ། །དགོས་པའི་ཆེད་དུ་བདེ་གཤེགས་ཀྱི། །ཚིགས་བཅད་སྔོན་དུ་བྱས་
ཏེ་འགྲོ། །ཞེས་སོ། །དེའི་ཕྱིར་ངག་ཏུ་ཆེད་དུ་བརྗོད་པའི་ཚོམས་ལས་འབྱུང་བ། ཀྱེ་མ་འདུས་བྱས་རྣམས་མི་རྟག །སྐྱེ་ཞིང་འཇིག་པའི་ཆོས་ཅན་ཡིན། །སྐྱེས་ནས་འགག་པར་འགྱུར་བ་སྟེ། །དེ་བས་མྱུར་
དུ་ཞི་བ་བདེ། །ཞེས་པ་འདོན་པར་མཛད་དོ། །དེ་ལྟར་འཛུལ་བའི་ཚེ་དོན་ལའང་གྲིབ་མ་སྟེང་དུ་འབྱུང་བར་འགྱུར་རོ། །མུ་སྟེགས་གནས་དང་ཞེས་པ་ནི་ལམ་དུ་ཞུགས་ན་དེའི་ལྷ་རྟེན་དག་
གམ་ནང་ན་མི་མ་ཡིན་གནས་པའི་རྟེན་དག་མཐོང་ན། ཚིགས་སུ་བཅད་པ་གདོན་སྟེ། འདུལ་བ་ཚིགས་ལེའུར་བྱས་པ་ལས། སྡོམ་བརྩོན་ལམ་དུ་འགྲོ་བའི་ཚེ། །གང་དུ་ལྷ་ཡི་གཟུགས་དག་མཐོང་། །དེ་
བཞིན་གཤེགས་པའི་ཚིགས་བཅད་འདི། གུས་པས་སེ་གོལ་གཏོགས་ཏེ་བརྗོད། །ཅེས་གསུངས་པས། དེའི་ཚེ་སེ་གོལ་གཏོགས་ཏེ། ཀྱེ་མ་འདུས་བྱས་རྣམས་མི་རྟག་ཞེས་པ་ལ་སོགས་པའི་ཚིགས་སུ་བཅད་པ་གདོན་ཏོ། །
1-644
ལམ་དུ་ཞུགས་དང་ཞེས་པ་ནི་ལམ་དུ་ཞུགས་ནས་འགྲོ་བའི་ཚེ་ཇི་ལྟར་བྱ་བ་སྟོན་ཏེ། དེ་ཡང་ཤར་ཕྱོགས་སུ་འགྲོ་བའི་ཚེ་བཅོམ་ལྡན་འདས་རྡོ་རྗེ་སེམས་དཔའ་ལ་སྐྱབས་སུ་མཆིའོ་ཞེས་
དེའི་མཚན་ནས་བརྗོད་ཅིང་སྐྱབས་འགྲོ་བྱས་ཏེ་གསོལ་བ་བཏབ་ལ་འགྲོའོ། །དེ་བཞིན་དུ་ལྷོ་ཕྱོགས་ལ་སོགས་པ་ལའང་སྦྱར་རོ། ། དེ་ལྟར་བྱེད་པ་ནི་སྐྱབས་འགྲོའི་བསླབ་བྱ་ལ་བསླབས་པར་འགྱུར་བས་བསྟན་
པའི་སྒོར་ཞུགས་པ་དག་གིས་དེ་ལྟར་གདོན་བར་བྱ་སྟེ། སྔོན་དགེ་བའི་བཤེས་གཉེན་ཀ་མ་བ་ལ་མཐའ་བཞིའི་གསུང་གིས་ད་ལོ་ལྷོ་ན་ཧལ་གྱི་ནག་པོ་བདོག་པས་ལྷོར་མ་འབྱོན་གསུང་བ་
ན། དེ་ལ་མ་གསན་པར་ཁམ་པ་ལུང་དུ་བྱོན་པ་དང་། དེ་མ་ལེགས་བྱས་པའི་དེ་བས་མཐུ་ཆེ་བ་རིན་ཆེན་འབྱུང་ལྡན་ལ་སྐྱབས་འགྲོ་བྱེད་ཅིང་འོངས་ཞེས་གསུང་སྐད་དོ། །ཡང་ན་ཡུལ་
དང་ཕྱོགས་གང་དུ་འགྲོ་ཡང་དེ་བཞིན་གཤེགས་པ་འགའ་ཞིག་ལ་ཕྱག་འཚལ་ཏེ། དེ་ཉིད་ཡིད་ལ་བྱས་པས་འཇིགས་པ་འགའ་ཡང་འབྱུང་བར་མི་འགྱུར་བ་ཡོད་པས་དེ་དག་བཟུང་བར་བྱ་སྟེ། དེ་
ནི་འདི་ལྟར། བཅོམ་ལྡན་འདས་ཀྱི་དྲུང་དུ་ཤཱཀྱ་གཞོན་ནུ་བཞིན་རབ་གསལ་གྱིས། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བདག་ལ་མི་དང་མི་མ་ཡིན་འགའ་ཡང་འཚེ་བར་མི་འགྱུར་བ་དེ་ལྟར་བདག་ལ་སྲུང་དུ་གསོལ། 
1-645
སྲུང་བའི་ཆོ་ག་ཡང་མཛད་དུ་གསོལ་ཞེས་པ་ལ་ཆོ་ག་འདི་བཀའ་སྩལ་ཏོ། །གཞོན་ནུ་ཤར་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྒྱད་ཁྲི་འདས་པ་ན། འཇིག་རྟེན་གྱི་
ཁམས་ཉོན་མོངས་པ་ཐམས་ཅད་བསྐྱོད་པ་ཞེས་བྱ་བ་ན་ཡང་དག་པར་རྫོགས་པའི་སངས་རྒྱས་རྗེས་སྤྱོད་བྱ་བ་ད་ལྟར་བཞུགས་ཏེ། ཁྱད་བྱ་བ་འགའ་ཞིག་གི་ཕྱིར་ཤར་ཕྱོགས་སུ་འགྲོ་ན་དེ་
བཞིན་གཤེགས་པ་དེ་ལ་ཕྱག་འཚལ་ཏེ། དེ་མངོན་དུ་བྱེད་ཅིང་སོང་ན་འཇིགས་པ་མི་འབྱུང་ཞིང་། འདོད་པའི་བྱ་བ་དེ་འགྲུབ་པར་འགྱུར་རོ་ཞེས་སོ། །དེ་བཞིན་དུ་སྦྱར་ཏེ་ལྷོར་སངས་རྒྱས་ཀྱི་
ཞིང་དགུ་ཁྲི་འདས་པའི་འཇིག་རྟེན་གྱི་ཁམས་མུན་པ་མུ་ནག་གི་ཚོགས་བཅོམ་པ་ན། སངས་རྒྱས་སེམས་དང་པོ་བསྐྱེད་པ་ཡིད་ལ་མཛད་པ་རྣམ་གྲངས་བསྙེངས་པ་དང་བག་ཚ་བ་དང་བྲལ་བས་
མངོན་པར་འཕགས་པའི་རྒྱལ་པོ། ནུབ་ཏུ་ཞིང་གངྒའི་རླུང་གི་བྱེ་མ་སྙེད་འདས་པར་འཇིག་རྟེན་གྱི་ཁམས་ཡུལ་ཁེགས་པ་ན། སངས་རྒྱས་ཁོ་ན་དང་རྒྱགས་པ་རྣམ་པར་གནོན་པ། བྱང་དུ་ཞིང་བྱེ་
བ་སྟོང་ཕྲག་འདས་པའི་འཇིག་རྟེན་གྱི་ཁམས་སྤོབས་པ་ཅན་ན། སངས་རྒྱས་རིན་ཆེན་གཟུགས་བཀོད་འོད་གནོན། བྱང་ཤར་དུ་ཞིང་བརྒྱད་ཁྲི་འདས་པའི་འཇིག་རྟེན་གྱི་ཁམས་བདུད་ཀྱི་སྡེ་བཅོམ་པ་ན། སངས་རྒྱས་བདུད་དང་ཡིད་གཉིས་ཀུན་འཇོམས་གནོན། 
1-646
ཤར་ལྷོར་ཞིང་ཉི་ཁྲི་འདས་པའི་འཇིག་རྟེན་གྱི་ཁམས་རྟག་ཏུ་སྣང་བ་ན། སངས་རྒྱས་སེམས་དང་པོ་བསྐྱེད་པའི་ཕྱིར་མི་ལྡོག་པའི་འཁོར་ལོ་འབྱུང་བའི་དཔལ། ལྷོ་ནུབ་ཞིང་སུམ་ཁྲི་འདས་པའི་འཇིག་
རྟེན་གྱི་ཁམས་གསེར་གྱི་དྲ་བས་གཡོགས་པ་ན། སངས་རྒྱས་རིན་ཆེན་གདུག་སྣང་འཕགས། ནུབ་བྱང་ཞིང་གངྒཱའི་ཀླུངས་དྲུག་གི་བྱེ་མ་སྙེད་འདས་པའི་འཇིག་རྟེན་གྱི་ཁམས་ཡོངས་དག་རབ་གནས་མངོན་འཕགས་ན།
སངས་རྒྱས་བྱང་ཆུབ་སེམས་འདུལ་སྟེ། སྟེང་དུ་ཞིང་གངྒཱའི་ཀླུངས་དྲུག་བཅུའི་བྱེ་མ་སྙེད་འདས་པའི་འཇིག་རྟེན་གྱི་ཁམས་དམིགས་པ་མེད་པ་ཡིད་ལ་བྱེད་པ་ཅན་ན། སངས་རྒྱས་སྐྲག་མེད་མུན་བྲལ་ཏིང་
འཛིན་མངོན་འཕགས་རྒྱལ་པོ། འོག་ཕྱོགས་སུ་ཞིང་འདི་ནས་ཞིང་དགུ་ཁྲི་ཉིས་སྟོང་འདས་པའི་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱིས་བརྒྱན་པ་ན། སངས་རྒྱས་དང་པོ་སེམས་བསྐྱེད་ཐེ་ཚོམ་སྤྱོད་མཛད་
ཉོན་མོངས་བསྐྱོད་ཅེས་བྱ་བ་བཞུགས་སོ་ཞེས་སོ། །འདི་དག་ནི་གང་དང་གང་དུ་འགྲོ་བ་དེའི་ཚེ་དྲན་པར་སྟེ། དེ་བཞིན་གཤེགས་པའི་བཀའ་ཡང་དག་པ་ཚད་མར་གྱུར་པས་གསུངས་པའི་ཕྱིར་རོ་
གདོན་མི་ཟ་བར་བར་ཆད་འབྱུང་བའི་དོགས་པ་མེད་དོ། །ཤི་བའི་རོ་དབྱུང་བ་དང་། ཆད་པས་ཕོག་སྟེ་གནས་ནས་ཕྱུང་བ་དང་འཕྲད་པ་ནའང་གོང་གི་ཚིགས་སུ་བཅད་པ་དེ་ཉིད་འདོན་པར་མཛད་དོ། །
1-647
དེ་དག་གི་ཞར་ལ། གཙུག་ལག་ཁང་དག་དུ་སྔོ་བྱུག་བྱུགས་པ་དང་། ཕྱག་དར་བྱས་པ་གཞན་གྱིས་རྐང་པ་མ་བཞག་པ་དག་གི་སྟེང་དུ་རྐང་པ་འཇོག་པར་འདོད་ནའང་། རྒྱལ་བའི་བཀའི་ཚིགས་
སུ་བཅད་པ་ཁ་དོན་དུ་བྱ་སྟེ། གླེང་གཞི་ནི། ཁྱིམ་བདག་མགོན་མེད་ཟས་སྦྱིན་ཀུན་དུ་སྤྱོད་པ་ནི་ནང་པར་སྔར་ལངས་ནས་བཅོམ་ལྡན་འདས་ལ་ལྟ་བའི་ཕྱིར་ཉེ་བར་སོང་ནས་རྒྱལ་བྱེད་
ཀྱི་ཚལ་རང་གིས་ཕྱགས་སོ། །དེ་ནས་དུས་གཞན་ཞིག་ན་ཁྱིམ་བདག་མགོན་མེད་ཟས་སྦྱིན་བྲེལ་བས་མ་འོངས་པ་དང་། རྒྱལ་བྱེད་ཀྱི་ཚལ་མ་ཕྱགས་ལུས་ཏེ་ཕྱག་དར་གྱིས་གང་བ་དེ། བཅོམ་ལྡན་
འདས་འཆགས་པས་གཟིགས་སོ། །དེ་ནས་ཐུགས་ཀྱིས་དགོངས་པ། ལྷའི་དབང་པོ་བརྒྱ་བྱིན་གྱིས་རི་སྤོས་ཀྱིས་ངད་ལྡང་ལས་ཕྱགས་མ་ཁྱེར་ཏེ་འོངས་ཀྱང་བླ་ན་མཉམ་དུ་འཇིག་རྟེན་པའི་ཐུགས་བསྐྱེད་པ་དང་།
ཆོས་ཉིད་ཀྱི་དེ་ལྟར་ཐུགས་བསྐྱེད་པ་མཛད་པའི་ཚེ་སྲོག་ཆགས་གྲོག་སྦུར་རྣམས་ཀྱིས་ཀྱང་ཤེས་ལ། གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་མཛད་པ་ན། ཉོན་ཐོས་དང་རང་སངས་རྒྱས་
དག་གིས་ཀྱང་མི་ཤེས་སོ། །དེའི་ཚེ་འཇིག་རྟེན་པའི་ཐུགས་བསྐྱེད་པ་མཛད་པས་ལྷའི་དབང་པོ་བརྒྱ་བྱིན་གྱི་ཤེས་ཏེ། བཅོམ་ལྡན་འདས་རྒྱལ་བྱེད་ཀྱི་ཚལ་ཕྱགས་མ་བཞེད་པར་མཐོང་ངོ་། །དེ་ནས་དེས་ཤིང་བལ་ལྟར་རེག་ན་འཇམ་པའི་ཕྱགས་མ་ལྔ་བརྒྱ་བླངས་ཏེ་སྤྱན་སྔར་འདུག་གོ །
1-648
དེའི་ཚེ་བཅོམ་ལྡན་འདས་ཀྱིས་བསོད་ནམས་འདོད་པའི་སེམས་ཅན་རྣམས་ལ་བསོད་ནམས་ཀྱི་སྟེགས་ཉེ་བར་བསྟན་པའི་ཕྱིར་ཉིད་ཀྱིས་ཕྱགས་མ་བསྣམས་ཏེ། རྒྱལ་བྱེད་ཀྱི་ཚལ་འཆག་པར་ཞུགས་སོ། །དེ་མཐོང་ནས་
ཉན་ཐོས་ཆེན་པོ་ཤཱ་རིའི་བུ་དང་། མོའུ་དགལ་གྱི་བུ་ལ་སོགས་པ་ཡང་འཕྱག་པ་ལ་ཞུགས་ཏེ་རྒྱལ་བྱེད་ཀྱི་ཚལ་ཕྱགས་ནས་རིམ་གྲོའི་ཁང་པར་གཤེགས་ཏེ། དགེ་འདུན་གྱི་གུང་ལ་གདན་བཤམས་
པ་ལ་བཞུགས་ནས་བཀའ་སྩལ་པ། དགེ་སློང་དག་ཕྱག་དར་འཕྱག་པ་ལ་ཕན་ཡོན་ལྔ་ཡོད་དོ། །གང་ཞེ་ན། བདག་ཉིད་ཀྱི་སེམས་རབ་ཏུ་དང་བར་འགྱུར། གཞན་གྱི་སེམས་རབ་ཏུ་དང་བར་འགྱུར།
ལྷ་རྣམས་ཡིད་དགའ་བར་འགྱུར། མཛེས་པར་འགྱུར་བའི་དགེ་བའི་རྩ་བ་ལ་སོགས་པར་འགྱུར། ལུས་ཞིག་ནས་བདེ་འགྲོ་མཐོ་རིས་ཀྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སོ། །དེ་ནས་ཁྱིམ་
བདག་མགོན་མེད་ཟས་སྦྱིན་ཡང་ཕྱོགས་དེར་ཕྱིན་པ་དང་། དེས་བཅོམ་ལྡན་འདས་ཉན་ཐོས་ཆེན་པོ་རྣམས་དང་ཐབས་གཅིག་ཏུ་རྒྱལ་བྱེད་ཀྱི་ཚལ་ཇི་ལྟར་ཕྱགས་པ་ཐོས་ནས། གང་དུ་བཅོམ་ལྡན་འདས་ཉན་
ཐོས་རྣམས་དང་ལྷན་ཅིག་ཕྱག་དར་མཛད་པ་དེའི་སྟེང་དུ་བདག་ཇི་ལྟར་འགྲོ་སྙམ་སྟེ་སྙིང་ལ་ངོ་ཚ་ནས་དེ་ཉིད་དུ་འདུག་པ་དང་། སངས་རྒྱས་བཅོམ་ལྡན་འདས་ནི་མཁྱེན་བཞིན་རྨེད་པར་མཛད་པ་ཡིན་པས་བཀའ་སྩལ་པ། 
1-649
དགེ་སློང་དག་ཕ་མི་སུ་ཞིག གསོལ་པ། ཁྱིམ་བདག་མགོན་མེད་ཟས་སྦྱིན་ལགས་ཏེ། གང་དུ་བཅོམ་ལྡན་འདས་ཉན་ཐོས་ཆེན་པོ་དང་ཐབས་གཅིག་ཉིད་ཀྱིས་ཕྱག་དར་བྱས་པ་དེའི་སྟེང་དུ་སུག་པ་
དོར་དུ། བཅོམ་ལྡན་འདས་ལ་ངོ་ཚ་ནས་སྤྱན་སྔར་མཆི་བར་མི་འཚལ་ལོ། །དེ་ནས་དེ་ལ་བཀའ་སྩལ་པ། ཁྱིམ་བདག་སངས་རྒྱས་ཀྱི་བཀའ་ཁ་ཏོན་བྱ་ཞིང་འཇུག་པར་བྱས་ཏེ། སངས་རྒྱས་བཅོམ་
ལྡན་འདས་རྣམས་ནི་ཆོས་ལ་གུས་པ་ཡིན་ལ། ཆོས་ནི་དགྲ་བཅོམ་པ་རྣམས་ཀྱི་ཡང་བླ་མ་ཡིན་ནོ། ། དེ་ནས་ཚིགས་སུ་བཅད་པའི་དབྱངས་འདོན་ཅིང་བཅོམ་ལྡན་འདས་ཀྱི་སྤྱན་སྔར་སོང་ངོ་ཞེས་
སོ། །ཡང་གཙུག་ལག་ཁང་གི་ནང་དུ་འཇུག་པའི་ཚེ་གཙུག་ལག་ཁང་རྣམས་ཀློག་པ་དང་ཞེས་པའི་ཚིགས་སུ་བཅད་དམ། སྐར་མ་རབ་རིབ་མར་མེ་དང་། །ཞེས་པའི་ཚིག་ཀྱང་འདོན་པར་མཛད་དོ། །དེ་
ནས་གོང་དུ་བསྟན་པ་ལྟར་རྒྱུད་ཆགས་གསུམ་པ་འདོན་པའི་རྗེས་སུ། སང་སྦྱིན་བདག་གི་བསྙེན་བཀུར་སྟོབས་པ་ཡོད་ན་སྤྱན་འདྲེན་གྱི་ཚིགས་བརྗོད་པར་བྱ་སྟེ། མདོ་རྩ་བ་ལས། གཙུག་ལག་ཁང་གི་
བདག་པོས་སྤྱན་འདྲེན་པའི་ཚིག་ཀྱང་བརྗོད་པར་བྱའི་ཞེས་སོ། །བརྗོད་པའི་ཚུལ་ནི་དེ་ཉིད་ལས་ཡོན་བདག་མིང་འདི་ཞེས་བགྱི་བས་སང་དགེ་འདུན་བཤོས་ལ་སྤྱན་འདྲེན་ན། བཙུན་པ་རྣམས་ཀྱིས་དེ་ལ་དགེ་ལེགས་ཀྱི་ཡིད་དག་གིས་སོ་སོ་ནས་ཐུགས་བརྩེ་བར་མཛད་དུ་གསོལ་ཞེས་སོ། །
1-650
དེ་ཉིད་གོ་སླ་བའི་དོན་དུ་གསུངས་ལས་ཀྱང་། སང་དྲོའི་དུས་སུ་སྦྱིན་བདག་ཆེ་གེ་མོས་དགེ་འདུན་ལ་བསྙེན་བཀུར་བགྱིད་པར་གདའ་བས་དགེ་ལེགས་བསྒོམ་པར་ཞུ་ཞིང་། དུང་བྱུང་བ་དང་གྲལ་དུ་
འབྱོན་པར་ཞུ་ཞེས་མཛད་པར་སྣང་ངོ་། །དེ་ནས་ཆོས་སྤྱོད་ཡན་ལག་བདུན་པ་བྱས་ཏེ། དེ་ནི་བཟང་པོ་སྤྱོད་པའི་སྨོན་ལམ་ལས། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་
བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གི་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོ་འོ། །ཞེས་པ་དག་གིས་བསྟན་ཏོ། །དེ་དག་ནི་ཤིན་ཏུ་གལ་ཆེ་བས་གསུང་ལས་ཀྱང་།
མདོ་སྡེ་དང་རྒྱུད་སྡེ་དུ་མ་ལས་གསུངས་ཤིང་། མཁས་པས་མཛད་པའི་བསྟན་བཅོས་རྣམས་དང་། ཐ་ན་སྒྲུབ་ཐབས་ཆུང་ངུ་རེའི་དབུར་ཡང་བདུན་རྣམ་དག་བྱས་ཏེ་ཞེས་འབྱུང་བས་ཤིན་ཏུ་གལ་ཆེ་གསུང་
གསུང་ངོ་། །རྩངས་པ་ནི་བདུན་པོའི་སྟེངས་སུ་དང་པོར་དད་པ་བསྒོམ་པ་དང་། བར་སྐབས་སུ་སྐྱབས་འགྲོ་སེམས་བསྐྱེད་དེ་གཉིས་པོ་བསྣན་ནས་སོ་སོར་བྱས་ཏེ་བཅུ་རྣམ་དག་ཞེས་པའི་ཐ་སྙད་མཛད་
དོ། །འོན་ཀྱང་འདིར་ནི་དོན་ལྟར་འོང་ཀྱང་དེའི་ཐ་སྙད་མི་མཛད་པར་སྣང་ངོ་། འདིར་ཡན་ལག་བདུན་དུ་གྲངས་ངེས་པ་ནི་དགོས་པ་ལ་ལྟོས་ནས་མཛད་དེ། ཆུ་མིག་པ་ཆེན་པོའི་གསུང་གིས་འཁོར་བར་འཁྱམ་པའི་རྒྱུ་བཞིའི་གཉེན་པོར་ཞེས་དང་། 
1-651
གདིང་ཀར་སྐུ་གཤེགས་ནི། འཁོར་བ་ལས་ཐར་པའི་གེགས་བཞིའི་གཉེན་པོར་འདི་ཡིན་ཞེས་གསུང་སྐད་དེ། གསུང་ལས་དེ་གཉིས་དོན་ལ་ཁྱད་པར་མེད་པས། འདི་ལྟར་དུ་འོ་སྐོལ་སེམས་ཅན་རྣམས་འཁོར་བར་
འཁྱམས་པ་དེ། རྒྱུ་བཞིས་འཁྱམས་པ་ཡིན་ཏེ། བསོད་ནམས་མ་བསགས་པ་དང་། སྡིག་པ་བསགས་པ་དང་། གཞན་གྱི་དགེ་བ་ལ་བར་ཆད་བྱས་པ་དང་། དགེ་བ་ཅུང་ཟད་བྱས་ཀྱང་ཟད་པས་འཁྱམས་པ་
ཡིན་ལ། དེ་དག་གི་གཉེན་པོར་ཡན་ལག་བདུན་སྟེ། དང་པོའི་གཉེན་པོར་ཕྱག་འཚལ་དང་མཆོད་འབུལ། གཉིས་པའི་སྡིག་བཤགས། གསུམ་པའི་རྗེས་སུ་ཡི་རང་བ་དང་། བསྐུལ་བ་དང་། གསོལ་བ་གདབ་པ་གསུམ།
བཞི་པའི་བསྔོ་བའོ་ཞེས་གསུང་གསུང་ངོ་། །ཡང་ན་དང་པོའི་མཆོད་འབུལ། གཉིས་པའི་ཕྱག་འཚལ་དང་སྡིག་བཤགས་ཏེ། ཉེ་བར་འཁོར་གྱི་ཞུས་པའི་མདོ་ལས། ཕྱག་འཚལ་ན་སྡིག་པ་བཤགས་སོ་ཞེས་གསུང་པའི་
ཕྱིར་རོ་ཞེས་ཀྱང་གསུང་སྐད་དོ། །དེ་ནི་འདིའི་ཁུངས་སུ་ཇི་ལྟར་རུང་ཞེ་ན། ནས་ཞེས་པ་ཡང་རིམ་པ་སྟོན་པའི་ཚིག་མ་ཡིན་གྱི། ཕྱག་འཚལ་བའི་སྒོ་ནས་སྡིག་བཤགས་ཞེས་པའི་དོན་ཡིན་
པས་ཤིན་ཏུ་རུང་ངོ་། །ད་ནི་དེ་དག་ལ་འབད་དགོས་ཏེ་གསུང་ལས་ཀྱང་། འོ་སྐོར་སྔར་ཡང་རྒྱུ་བཞི་པོ་འདི་མ་བཟློག་པས་འཁྱམ་ལ། ད་དུང་ཡང་རྒྱུ་དེ་དག་མ་བཟློག་ན་འཁྱམས་དགོས་པས་དེ་དག་ཟློག་པའི་ཐབས་མཆོག་ཏུ་གྱུར་པ་ཡན་ལག་བདུན་པ་ཡིན་ཞིང་། 
1-652
མྱུར་དུ་མངོན་པར་རྫོགས་པར་འཚང་རྒྱ་བའི་རྒྱུ་ཡང་འདི་ཡིན་པས་འདི་ལ་དགེ་སྦྱོར་གྱི་གཙོ་བོར་བྱས་ལ་ལག་ལེན་ལ་གདབ་ཅེས་སོ། །འདི་གལ་ཆེ་བས་གང་ཟག་དམ་པ་ཐམས་ཅད་ཀྱང་
ཐུགས་དམ་མཛད་ཅིང་། ཁྱད་པར་དུ་ཇོ་བོ་ཉིད་ཕྱག་སེར་བ་ཁ་བཀྲ་བཀྲ་བ་བྱུང་གི་བར་དུ་བྱུག་རིས་ཀྱི་མཎྜལ་སོ་མ་ཡང་ཡང་ཕུལ་ཞིང་ཡན་ལག་བདུན་པ་དབུལ་བར་མཛད་ཅིང་། དགེ་
བའི་བཤེས་གཉེན་སྟོན་པ་ཡང་འདི་ལ་བྱ་བའི་གཙོར་མཛད་ལ། དེའི་སློབ་མ་ཁམ་པ་ལུང་པ་ཡང་གདན་ཁ་གཅིག་ནས་ཡན་ལག་བདུན་པ་ཚར་གཅིག་ཕུལ། དེ་ནས་གནད་ཅུང་ཟད་སྤོས་ནས་ཀྱང་
ཚར་གཅིག དེ་ལྟར་གདན་སྤོ་བའི་གྲངས་འཛིན་པའི་ཚུལ་དུ་ཉིན་རེ་ལ་ཡང་ཚར་མང་དུ་འབུལ་བར་མཛད་པ་དང་། དགེ་བའི་བཤེས་གཉེན་པུ་ཏོ་བས་མཁན་བུ་འཕྲང་གི་ལུང་གུ་གྲགས་རྡོར་ཞེས་
པ་མཚན་མོ་ཡང་ཡན་ལག་བདུན་པ་ཚར་བདུན་འབུལ་ཏེ། ཐ་མའི་མཆོད་འབུལ་གྱི་དྲིལ་བུའི་སྒྲ་ལ་ཐོ་རངས་སྔ་མོར་བྱ་བྲེལ་བྱེད་པ་དག་གི་ནམ་ཚོད་པས་ཏིག་ཏིག་པ་འབྱུང་སྟེ། དེ་
ལྟ་བུ་ལ་སོགས་སྔོན་གྱི་གང་ཟག་དམ་པ་དེ་རྣམས་ཐམས་ཅད་ཀྱང་འདི་ལ་ཐུགས་དམ་དུ་མཛད་དོ། །གསུང་ལས་ཀྱང་། ཆུ་མིག་པ་ཆེན་པོ་ལ་སོགས་པ་བླ་མ་ཐམས་ཅད་འདི་ལ་ཐུགས་དམ་གྱི་མཐིལ་དུ་མཛད་པས་ཁོང་རྣམས་ཀྱི་ཐུགས་དམ་བསྐྱངས་པར་ཡང་འགྲོ། 
1-653
རང་གི་སྒྲིབ་པ་སྦྱོང་བ་དང་ཚོགས་སོག་པའི་ཐབས་མཆོག་ཏུ་གྱུར་པའང་འདི་ཡིན་པས་གལ་པོ་ཆེར་བཟུང་ནས་ལག་ལེན་ལ་གདབ་དགོས་པ་ལགས་ཞེས་གསུང་གསུང་ངོ་། །དེས་ན་བདག་ལྟ་བུ་ཐོག་
མ་མེད་པའི་འཁོར་བ་ནས་རྒྱུད་དེ་འོངས་པ། ཕྱིན་ཅི་ལོག་ལ་ཡུན་རིང་དུ་གོམ་པའི་བློ་ཅན། ལན་གྲངས་དུ་མར་མི་རྟག་པའི་སྲིན་པོའི་ཁར་ཆུད་པ་དག་ཀྱང་། རྙེད་དཀའ་བའི་མི་ལུས་
རིན་པོ་ཆེ་ནི་ཐོབ། ངོ་མཚར་རྨད་དུ་བྱུང་བའི་ཐུབ་པའི་བསྟན་པ་དང་ནི་མཇལ། ཐེག་པ་ཆེན་པོའི་དགེ་བའི་བཤེས་གཉེན་གྱིས་ནི་བཟུང་། བླང་དོར་གྱི་དམིགས་ཤེས་པ་དང་ནི་ལྡན་བཞིན་དུ།
ཀྱེ་མ་སུ་ཞིག་དམ་པ་མ་ཡིན་པའི་བྱ་བ་ལ་ཞེན་པའམ། དལ་བར་འདུག་པ་ནི་བདག་གི་ཆ་མ་ཡིན་ནོ་སྙམ་སྟེ། ཅི་ནས་ཀྱང་ཡོན་ཏན་རིན་པོ་ཆེའི་བྱུང་གནས་དཀོན་མཆོག་མཆོད་
པའི་ལས་ལ་ཉིན་མཚན་མེད་པར་འབད་པར་བྱའོ་ཞེས་པ་ནི་ཞར་ལ་འོངས་པའོ།། །།
༄། །ཡན་ལག་བདུན་པོ་དག་ལ་འཇུག་པ།
ད་ནི་ཡན་ལག་བདུན་པོ་དག་ལ་འཇུག་པར་བྱས་ཏེ། དེའི་དང་པོར་སྐྱབས་སུ་འགྲོ་བ་དང་བྱམས་སྙིང་རྗེ་
བྱང་ཆུབ་ཀྱིས་སེམས་བསྒོམ་པ་སྔོན་དུ་བཏང་ནས། སྐུ་བལྟ་བའི་མཆོད་པ་བྱས་ཏེ། འདི་ལ་ལུགས་གཉིས། སློབ་དཔོན་འཕགས་པ་ཀླུ་སྒྲུབ་ཀྱི་ལུགས་དང་། བླ་མ་གསེར་གླིང་པའི་ལུགས་སོ། །དང་པོ་ནི་སྐུ་གསུང་ཐུགས་ཀྱི་རྟེན་རྣམས་ལ་མིག་བལྟས་ཏེ། 
1-654
འདི་ལྟར་སྣང་ཡང་དོན་ལ་ཅིར་ཡང་གྲུབ་པ་མེད་པ་སྤྲོས་པའི་མཐའ་དང་བྲལ་བའི་སྟོང་པ་ཉིད་ཡིན་སྙམ་དུ་ཤེས་པ་དོན་དམ་ཤེས་པ་དང་། དོན་ལ་ཅིར་ཡང་གྲུབ་པ་མེད་ཀྱང་ཐ་
སྙད་དུ་སངས་རྒྱས་དང་བྱང་ཆུབ་སེམས་དཔའ་དངོས་དང་ཁྱད་མེད་སྙམ་དུ་བསམས་ནས་དད་པ་དང་སིང་བ་སྒོམ་པར་མཛད་དོ། །གསུང་ལས་འདི་གཉིས་གང་བྱས་ཀྱང་གང་ཟག་དམ་པའི་བཞེད་པ་ཡིན་
པས་དགོས་པ་འགྲུབ་མོད་ཀྱི། འོན་ཀྱང་སློབ་དཔོན་ཀླུ་སྒྲུབ་ཀྱི་ལུགས་དེར་ཕྱི་མ་ཡང་འདུ་བས། འདི་ལྟར་རྟེན་གསུམ་རྣམས་ལ་མིག་གཅེར་བལྟས་ནས་སངས་རྒྱས་དང་བྱང་ཆུབ་སེམས་དཔའ་དངོས་དང་ཁྱད་
མེད་སྙམ་དུ་དད་པ་དང་སིང་བ་གཅིག་སྒོམ། དོན་ལ་ཅིར་ཡང་མ་གྲུབ་སྤྲོས་པའི་མཐའ་དང་བྲལ་བའི་སྟོང་པ་ཉིད་ཡིན་སྙམ་དུ་བསྒོམ་ཞེས་གསུང་གསུང་ངོ་། །དེ་ལྟར་དེ་བཞིན་གཤེགས་པའི་སྐུ་
གཟུགས་ལ་དད་པའི་ཡིད་ཀྱིས་བལྟས་པ་ཙམ་ལ་ཕན་ཡོན་དཔག་ཏུ་མེད་དེ། དད་པའི་སྟོབས་བསྐྱེད་པ་ལ་འཇུག་པའི་ཕྱག་རྒྱའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ཟག་ལ་
ལ་ཞིག་གིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་རྙེད་ཀྱི་སངས་རྒྱས་དག་ལ་ཉིན་རེ་བཞིན་དུ་ལྷའི་ཟས་རོ་བརྒྱ་དང་ལྡན་པ་དང་ལྷའི་གོས་རྣམས་བྱིན་པ་བས་གཞན་གང་ཞིག་གིས་སངས་རྒྱས་རི་མོར་བྲིས་པའམ་གེགས་སུ་བྱས་པ་མཐོང་བའམ་འདི་ནི་དེ་བས་ཆེས་བསོད་ནམས་གྲངས་མང་དུ་བསྐྱེད་ན། 
1-655
ཐལ་མོ་སྦྱར་བའམ། མེ་ཏོག་གམ། བདུག་པའམ། སྤོས་སམ། མར་མེ་འབུལ་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པ་བསྐྱེད་དོ་ཞེས་སོ། །
༈ ཕྱག་འཚལ་བ་བཤད་པ།
དེ་ནས་ཕྱག་འཚལ་བ་ནི། ཐལ་
མོ་མ་སྦྱར་བར་འཚལ་ན། ཆུ་མིག་པ་ཆེན་པོའི་གསུང་གིས་ཡུལ་མཐའ་འཁོབ་ཏུ་སྐྱེ་བར་མདོ་སྡེ་ཆོས་ཀྱི་རྒྱ་མོ་ནས་བཤད་གསུངས་པ་ལ། དཔལ་ལྡན་གྲོའི་ཞལ་ནས་དེ་མཐོང་སྟེ་ལས་རྣམས་
འབྱེད་བྱ་བའི་མདོ་ཆུང་དེ་ན་གསལ་པོར་བཞུགས་ཞེས་གསུང་སྐད་དོ། །ཐལ་མོ་སྦྱར་བའི་གནས་ནི། རབ་སྤྱི་བོ། །འབྲིང་སྨིན་མཚམས། ཐ་མ་སྙིང་ཁ་ཞེས་གསུང་ཀྱང་། སྨིན་མཚམས་ལས་མི་དམའ་བར། པད་
མ་ཁ་འབུས་བྱེ་འདྲ་ཡིས། །ལག་གཉིས་སྤྱི་བོར་ཐལ་སྦྱར་ཏེ། །ཞེས་གསུང་པ་ལྟར་བྱས་ནས་ཡན་ལག་སྨད་ལྔ་ས་ལ་གཏུགས་པའི་ཕྱག་བྱ་སྟེ། ཆུ་མིག་པ་ཆེན་པོའི་གསུང་གིས་མགོ་བོ་ས་
ལ་མ་རེག་པའི་ཕྱག་བྱས་ན་དམྱལ་བ་མགོ་འཕྱངས་སུ་སྐྱེ་བར་མདོ་སྡེ་ཆོས་ཀྱི་རྒྱ་མོ་ནས་བཤད་གསུང་ཀྱང་དཔལ་ལྡན་གྲོའི་ཞལ་ནས་མདོ་སྡེ་མ་མཐོང་། ལས་རྣམས་འབྱེད་ནས་གསལ་པོར་བཤད་
ཅེས་གསུང་སྐད་དོ། །གསུང་ལས་ཀྱང་། ཕྱག་གི་ཉེས་དམིགས་དང་ཕན་ཡོན་དྲན་པར་བྱས་ལ་འཚལ་རེས་ཀྱི་ཉེས་པ་མ་གོས་པར་འཚལ་བ་གལ་ཆེ་གསུང་གསུང་ངོ་། །དེས་ན་ཇོ་བོ་བོད་དུ་བྱོན་པའི་ཚེ་དགུང་ལོ་དྲུག་ཅུ་ཐོ་ཐོ་ཡིན་སྐད་དེ་ཁོང་ཕྱག་མཛད་པ་ན། 
1-656
ཞབས་ཀྱི་ལོང་བུ་གཉིས་གཞིབས་སྐུ་དྲང་པོར་བསྲངས་ཕྱག་གཉིས་སྤྱི་བོར་ཐལ་མོ་སྦྱར་ཏེ། དེའི་ཚེ་སྐུ་ཤེད་ཆུང་བས་གྱིད་པ་འདར་སྦྲིད་བ་འབྱུང་ཀྱང་ཡན་ལག་སྨད་ལྔ་ས་ལ་གཏུགས་པའི་ཕྱག་
མཛད་སྐད་དོ། །གསུང་ལས་དེ་ལྟ་བུ་ཕྱག་དེ། ཇོ་བོ་ལ་དགོས་ཏེ་གཞན་ལ་མི་དགོས་བྱ་བ་མིན་ཏེ། ཕྱག་བཙལ་བས་སྒྲིབ་པ་འཛད་ཅིང་བསོད་ནམས་འདོད་པ་ཐམས་ཅད་ཀྱིས་དེ་བཞིན་བྱ་
དགོས་པ་ཡིན་ཞེས་གསུང་གསུང་ངོ་། །མདོར་ན་ལུས་གུས་པས་ཡན་ལག་སྨད་ལྔ་ས་ལ་གཏུགས་ནས། ངག་གུས་པས་ཡོན་ཏན་བརྗོད་ཅིང་། ཡིད་གུས་པས་ཡོན་ཏན་སེམས་ཤིང་ཕྱག་བྱ་སྟེ། དེ་ཡང་བླ་
མ་ནི། ལུང་དུ་མ་ལས། སངས་རྒྱས་ཐམས་ཅད་འདུས་པའི་བདག་ཉིད་ཡིན་པ་དང་། རྡོ་རྗེ་འཛིན་པའི་ངོ་བོ་ཡིན་པ་དང་། དཀོན་མཆོག་གསུམ་ཆར་གྱི་རྩ་བ་ཡིན་པར་གསུངས་པའི་ཕྱིར། དེའི་དོན་
བསྡུས་ནས་དང་པོའི་བླ་མའི་ཕྱག་མཛད་པས་སྣང་ངོ་། །དེ་ནི། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་
ལོ། །ཞེས་པའོ། །གཏིང་ཀར་ནི་བཀའ་གདམས་ཀྱི་ཕྱག་ལེན་བཟང་བར་གྲགས་པས་རྡོ་རྗེ་འཛིན་པའི་ངོ་བོ་ཞེས་པ་འདི་ཙམ་ལ་དམ་དོག་མཛད་ནས་སྐྱེས་རབས་ཀྱི་དབུའི་བདག་ཅག་གི་བླ་མར་མཛད་པ་དཀོན་མཆོག་གསུམ་བླ་མར་མཛད་པ་ཞེས་པ་ལ་སོགས་པ་དང་། 
1-657
སྟག་མོ་མོ་ལ་ལུས་སྦྱིན་པར་བཏང་པའི་སྐྱབས་ཀྱི། ཡོང་ཡེ་སྐལ་པ་ཆེན་པོ་སེམས་ཅན་ཐམས་ཅད་ཀྱི་སྐྱབས་སུ་གྱུར་པ་ཞེས་པ་ལ་སོགས་པའི་ཚིག་གི་རྒྱན་གྱིས་བྱེད་པ་ཡོད་མོད་ཀྱི།
འདིར་མཛད་པའི་བསྐྱུས་ལ་མེད་པས་མ་སྤྲོས་སོ། །དེ་ནས་དཔལ་ལྡན་གྲོའི་བཅོམ་ལྡན་འདས་དེ་བཞིན་གཤེགས་པ་དམ་ཚིག་གསུམ་བཀོད་པའི་རྒྱལ་པོ་འཁོར་དང་བཅས་པ་ལ་ཕྱག་འཚལ་ལོ་ཞེས་པ་མཛད་
ཀྱང་། མཆིས་ཐམས་ཅད་མཁྱེན་པ་ནི། ཞང་སྟོན་པས་མཛད་པའི་དམ་ཚིག་གསུམ་བཀོད་ལྷ་ལྔའི་བསྟོད་པའི་ནང་གི འགྲོ་བའི་གཉེན་གཅིག་མ་ལུས་རྐང་གཉིས་གཙོ། དུས་གསུམ་བདེ་གཤེགས་ཀུན་གྱི་ངོ་བོ་ཉིད། །
གསེར་གྱི་མདོག་ཅན་ལྷ་ཡི་ལྷར་གྱུར་པ། །དམ་ཚིག་གསུང་བཀོད་རྒྱལ་ལ་ཕྱག་འཚལ་ལོ། །ཞེས་པ་འདིས་མཛད་པར་སྣང་ངོ་། །དེ་ནས་རིམ་པ་ལྟར། དགེ་སློང་མ་དཔའ་མོས་བསྟོད་པ་ལས། སྤྱན་རས་
གཟིགས་དབང་འཇིག་རྟེན་གསུམ་གྱི་མགོན། །གཞན་ལ་ཕན་ཕྱིར་བརྩོན་པའི་གོ་ཆ་རྣམས། །ཐུགས་རྗེའི་རང་བཞིན་དྲི་མེད་དཀྱིལ་འཁོར་ཞལ། །འགྲོ་བའི་སྡུག་བསྔལ་སེལ་ལ་ཕྱག་འཚལ་ལོ། །ཞེས་དང་། ངག་གི་དབང་ཕྱུག་
ལ་བུ་མོ་བརྒྱད་ཀྱིས་བསྟོད་པ་ལས། གཞོན་ནུ་སྐུ་ལུས་འཆང་བ་པོ། །ཡེ་ཤེས་སྒྲོན་མས་རབ་བརྒྱན་ཞིང་། །འཇིག་རྟེན་གཏི་མུག་མུན་སེལ་བ། །འཇམ་པའི་དབྱངས་ལ་ཕྱག་འཚལ་ལོ། །ཞེས་དང་། ཇོ་བོས་མཛད་པའི་རྟ་འགྲིན་གྱི་སྒྲུབ་ཐབས་ལས། 
1-658
ཡེ་ཤེས་ཧ་ཡ་གྷྲི་བ་རྟ་མཆོག་དཔལ། །ཆགས་མེད་སྐུ་ནི་ནུབ་ཁའི་དམར་ཐག་འདྲ། །དམར་བའི་དབུ་ལ་རལ་པ་གྱེན་དུ་བརྫེས། །པད་མ་རིག་སྔགས་རྒྱལ་ལ་ཕྱག་འཚལ་ལོ། །ཞེས་དང་། སློབ་དཔོན་
འཕགས་པ་ཀླུ་སྒྲུབ་ཀྱིས་མཛད་པའི་བསྟོད་པ་ལས། ལྷ་དང་ལྷ་མིན་ཅོད་པན་གྱི། །ཞབས་གཉིས་པད་མོ་ལ་གཏུགས་ཤིང་། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །འདི་དག་
ནི་དེ་རྣམས་ཀྱི་ཐུགས་དམ་དུ་མཛད་པ་སྣང་བས་དེ་ལྟར་ཕྱག་མཛད་པར་སྣང་ངོ་། ། དེ་ནས་དཀོན་མཆོག་གསུམ་ནི་གཞན་དུ་མེད་པའི་ཡོན་ཏན་རིན་པོ་ཆེའི་བང་མཛོད་དུ་གྱུར་པ་མཐའ་དག་
བསྡུས་པའི་ཕྱིར་དེ་ལ་ཕྱག་མཛད་དེ། སུ་སིད་དྷེ་ཀ་རའི་རྒྱུད་ལས། མགོན་པོ་ཐུགས་རྗེས་ཆེ་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོ་གཞི། །དེ་བཞིན་གཤེགས་ལ་
ཕྱག་འཚལ་ལོ། །དག་པས་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་པུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་
དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ཞེས་སོ། །དེ་ནས་དེ་བཞིན་གཤེགས་པ་བདུན་པོ་འདི་དག་རེ་རེའི་མཚན་བཟུང་བ་ཙམ་ལ་ཕན་ཡོན་དཔག་ཏུ་མེད་པ་ཡོད་པས་ཕྱག་མཛད་དོ། །
1-659
དེ་ནི་འདི་ལྟར་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་འདས་པའི་འཇིག་རྟེན་གྱི་ཁམས་གཞན་གྱིས་མི་ཐུབ་པ་ན་བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་གྲགས་དཔལ་གྱིས་རྒྱལ་པོ་ལ་ཕྱག་འཚལ་ལོ། །དེ་བཞིན་དུ་ཞིང་གངྒཱའི་ཀླུང་བདུན་གྱི་བྱེ་མ་སྙེད་འདས་པ་ན་འཇིག་
རྟེན་གྱི་ཁམས་རིན་པོ་ཆེ་དང་ལྡན་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་བ་དང་ཟླ་བ་དང་པད་མས་རབ་ཏུ་
བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །ཞིང་གངྒཱའི་ཀླུང་ལྔའི་བྱེ་མ་སྙེད་འདས་པའི་འཇིག་རྟེན་གྱི་ཁམས་སྤོས་ཀྱི་ཡོང་གང་རིན་ཆེ་བསགས་པ་ན་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་རིན་ཆེན་སྣང་བ་བརྟུལ་ཞུགས་གྲུབ་པ་ལ་ཕྱག་འཚལ་ལོ། །ཞིང་གངྒཱའི་ཀླུང་བདུན་གྱི་བྱེ་མ་སྙེད་འདས་པའི་འཇིག་རྟེན་
གྱི་ཁམས་མྱ་ངན་མེད་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །ཞིང་གངྒཱའི་ཀླུང་དགུའི་བྱེ་མ་སྙེད་འདས་པའི་འཇིག་རྟེན་གྱི་ཁམས་རིན་པོ་ཆེའི་རྒྱ་མཚོར་ལེགས་པར་གནས་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པ་ལ་ཕྱག་འཚལ་ལོ། །
1-660
ཞིང་གངྒཱའི་ཀླུང་བཅུའི་བྱེ་མ་སྙེད་འདས་པའི་འཇིག་རྟེན་གྱི་ཁམས་བཻ་ཌཱུཪྻ་སྣང་བ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུཪྻ་
འོད་ཀྱི་རྒྱལ་པོ་ལ་ཕྱག་འཚལ་ལོ་ཞེས་པའོ། །སྟོན་པ་བཅོམ་ལྡན་འདས་ཀྱི་མཚན་བཟུང་བ་ལ་ཕན་ཡོན་དཔག་ཏུ་མེད་དེ། དྲིན་ལན་བསབ་པ་ལས། དགེ་སློང་དག་འཇིགས་ཤིང་ཉམ་ང་བའི་གནས་
སུ་ང་ཡིད་ལ་དྲན་པར་གྱིས་ཤིག་ཅེས་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །དེའི་རྗེས་སུ་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་སེང་གེ་རྣམ་པར་རོལ་པའི་རྒྱལ་པོ་ལ་ཕྱག་འཚལ་ལོ་ཞེས་པ་ནི། འདིའི་མཚན་ཐོས་པའི་ཕན་ཡོན་ནི། སྒྱུ་
མ་ལྟ་བུའི་ཏིང་ངེ་འཛིན་གྱི་མདོ་ལས། དེས་བུད་མེད་ཀྱི་རང་བཞིན་ལས་འགྱུར་རོ། །བསྐལ་པ་བྱེ་བ་ཕྲག་བཞི་ཅུར་འཁོར་བ་བསྙིལ་བར་འགྱུར། བླ་ན་མེད་པའི་བྱང་ཆུབ་ལས་ཕྱིར་མི་ལྡོག་
པར་འགྱུར། སངས་རྒྱས་མཐོང་བ་དང་། ཆོས་ཉན་པ་དང་། དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར། ཚེ་བརྗེས་ནས་རབ་ཏུ་བྱུང་བ་ཐོབ་པར་འགྱུར་ཞེས་པ་ལ་སོགས་པ་གསུངས་སོ། །
1-661
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་ཏུ་མེད་པ་ཡབ་སྲས་ཀྱི་རྒྱལ་པོ་ལ་ཕྱག་འཚལ་ལོ་ཞེས་པ་ནི། ཚེ་དཔག་མེད་དང་འོད་དཔག་
མེད་ནི་མཚན་གྱི་རྣམ་གྲངས་ཡིན་ལ། ཡབ་སྲས་ཀྱི་རྒྱལ་པོ་ཞེས་པ་ནི་བླ་མ་རྣམས་ཀྱི་མཚན་གྱི་རྒྱན་དུ་མཛད་པ་ཡིན་ཅེས་གསུང་ངོ་། །འདིའི་མཚན་ཐོས་པ་ལ་ཡང་ཕན་ཡོན་དཔག་ཏུ་
མེད་དེ། འོད་དཔག་མེད་ཀྱི་ཞིང་གི་བཀོད་པ་ལས། ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་དེ་སྙེད་ཀྱིས་སངས་རྒྱས་འོད་དཔག་མེད་ཀྱི་མཚན་བརྗོད་ཅིང་སྔགས་
པ་གསུང་ངོ་། །ཅིའི་ཕྱིར་ཞེ་ན། འདིའི་མཚན་ཐོས་ལ། ཐོས་ནས་ཀྱང་། ཐ་ན་སེམས་བསྐྱེད་པ་གཅིག་ཙམ་ཞིག་བསམ་པ་ཐག་པ་ནས་དང་བ་དང་ལྡན་པས་བསྐྱེད་པ་དེ་དག་བླ་ན་མེད་པའི་
བྱང་ཆུབ་ལས་ཕྱིར་མི་ལྡོག་པའི་ཕྱིར་རོ་ཞེས་པ་ལ་སོགས་པ་གསུངས་པའི་ཕྱིར་རོ། །དེའི་ཕྱིར་བཅོམ་ལྡན་འདས་ཉིད་ཀྱིས་བཀའ་སྩལ་པ། ཀུན་དགའ་བོ་ལོངས་ལ་ནུབ་ཕྱོགས་སུ་ཕྱོགས་ཏེ་མེ་ཏོག་
ཐོར་ལ་ཐལ་མོ་སྦྱར་ཏེ། གང་ན་བཅོམ་ལྡན་འདས་འོད་དཔག་མེད་བཞུགས་པ་དེར་ཕྱག་འཚོལ་ཅིག་ཅེས་གསུངས་པ་ཡིན་ནོ། །དེའི་རྗེས་སུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཀུན་ནས་འཕགས་པའི་དཔལ་བརྩེགས་རྒྱལ་པོ་ལ་ཕྱག་འཚལ་ལོ། །
1-662
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཤིན་ཏུ་གནས་པ་ནོར་བུ་བརྩེགས་པའི་རྒྱལ་པོ་ལ་ཕྱག་འཚལ་ལོ་ཞེས་བྱ་སྟེ། དེ་གཉིས་ཀྱི་མཚན་
ཐོས་ན་ཡང་། དེ་བུད་མེད་ཀྱི་རང་བཞིན་ལས་འགྱུར་རོ། །བསྐལ་པ་བྱེ་བ་ཕྲག་བཞི་བཅུར་འཁོར་བ་བསྙིལ་བར་འགྱུར་བ་ལ་སོགས་གོང་བཞིན་དུ་སྒྱུ་མ་ལྟ་བུའི་ཏིང་ངེ་འཛིན་གྱི་མདོ་ལས་
གསུངས་པས་ཕན་ཡོན་དཔག་ཏུ་མེད་པར་སྦྱོར་རོ། །
༈ དེ་དག་ལ་ཕྱག་འཚལ་བའི་གོ་རིམས་བཤད་པ།
དེ་དག་ལ་ཕྱག་འཚལ་བའི་གོ་རིམས་ཀྱང་དེ་ལྟར་བྱ་སྟེ། མདོ་དེ་ཉིད་ལས། བྱང་ཆུབ་སེམས་དཔའ་པད་མའི་དཔལ་གྱི་སྙིང་པོ་ལ་ཆོས་ཐམས་
ཅད་སྟོང་པར་རྟོགས་པ་དེ་ཉིད་སྒྱུ་མ་ལྟ་བུའི་ཏིང་ངེ་འཛིན་ཐོབ་སྟེ། དེ་ཐོབ་མ་ཐག་ཏུ་ཇི་ལྟར་སེམས་ཅན་རྣམས་དགེ་བའི་རྩ་བ་ཡོངས་སུ་རྫོགས་པར་འགྱུར་བ་དེ་ལྟར་ལུས་མངོན་
པར་སྤྲུལ་ནས། སེམས་ཅན་རྣམས་མོས་པ་ཇི་ལྟར་བ་བཞིན་དུ་ཆོས་སྟོན་པ་དང་། མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་པ་བཀའ་སྩལ་པ་དང་། དེས་གསོལ་པ། ཏིང་ངེ་འཛིན་
དེ་ཐོབ་པ་འཁོར་འདིར་མཆིའམ། བཀའ་སྩལ་པ། སྐྱེས་བུ་དམ་པ་དྲུག་ཅུ་ཡོད་དེ། བྱམས་པ་དང་འཇམ་དཔལ་ལ་སོགས་པ་འདི་དག་གོ །ཡང་དེས་གསོལ་པ། འཇིག་རྟེན་གྱི་ཁམས་གཞན་ན་ཏིང་ངེ་འཛིན་འདི་འཐོབ་པའི་སྐྱེས་བུ་དམ་པ་དག་མཆིས་སམ། 
1-663
བཀའ་སྩལ་པ། ཞིང་འདི་ནས་ནུབ་ཕྱོགས་སུ་ཞིང་བྱེ་བ་བརྒྱ་སྟོང་འདས་པ་ན་འཇིག་རྟེན་གྱི་ཁམས་བདེ་བ་ཅན་ཡོད་དེ། དེ་ན་དེ་བཞིན་གཤེགས་པ་འོད་དཔག་མེད་ཅེས་བྱ་བ་དང་ད་
ལྟར་བཞུགས་ཏེ་ཆོས་སྟོན་ལ་དེའི་དྲུང་ན་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། མཆུ་ཆེན་ཐོབ་ཅེས་བྱ་བ་དང་གཉིས་ཀྱིས་ཏིང་ངེ་འཛིན་འདི་ཐོབ་པ་ཡིན་ཏེ། སྐྱེས་བུ་
དམ་པ་དེ་གཉིས་ལ་བྱང་ཆུབ་སེམས་དཔའ་གང་དག་ཆོས་ཀྱི་འདྲི་བའི་ལན་ཉན་པ་དག་གིས་ཀྱང་ཏིང་ངེ་འཛིན་འདི་ཐོབ་བོ། །དེས་གསོལ་པ། དེ་གཉིས་འདིར་མཆི་བར་འགྱུར་བ་དང་། བདེ་བ་
ཅན་གྱི་འཇིག་རྟེན་གྱི་ཁམས་དེ་དང་། བཅོམ་ལྡན་འདས་འོད་དཔག་ཏུ་མེད་པ་ཡང་འདི་ནས་མཐོང་བར་འགྱུར་བའི་རྫུ་འཕྲུལ་མཛད་དུ་གསོལ་ཞེས་པ་དང་། བཅོམ་ལྡན་འདས་ཀྱི་མཛོད་སྤུ་ནས་འོད་བཀྱེ་
ནས་འཇིག་རྟེན་གྱི་ཁམས་ཐམས་ཅད་འོད་ཀྱི་སྣང་བར་བྱས་ཏེ། བདེ་བ་ཅན་དང་། མི་མཇེད་ཀྱི་འཇིག་རྟེན་ན་ཇི་ལྟར་འདུག་པ་དེ་ལྟར་ཕན་ཚུན་སྣང་བར་མཛད་དོ། །དེ་ལྟར་སྣང་བས་ཕན་
ཚུན་མཐོང་སྟེ་ངོ་མཚར་དུ་གྱུར་ཏེ་དེ་བཞིན་གཤེགས་པའི་མཚན་ནས་བརྗོད་དེ་ཕྱག་འཚལ་བར་བྱེད་དོ། །སྐྱེས་བུ་དམ་པ་དེ་གཉིས་ཀྱང་བྱང་སེམས་བྱེ་བ་ཕྲག་བརྒྱད་ཁྲི་བཞི་སྟོང་དང་ལྷན་ཅིག་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་འདིར་འོངས་སོ།
1-664
དེ་ནས་པད་མའི་དཔལ་གྱི་སྙིང་པོ་ངོ་མཚར་རྨད་དུ་བྱུང་པའི་ཆོ་འཕྲུལ་དུ་མ་མཐོང་ནས། བཅོམ་ལྡན་འདས་སྐྱེས་བུ་དམ་པ་འདི་གཉིས་ཀྱིས་སེམས་སྐྱེད་ནས་ཇི་སྲིད་གཅིག་ལོན། མཚན་ནི་ཅི་
ཞིག་བགྱི་ཞེས་གསོལ་པ་དང་། བཀའ་སྩལ་པ། སྔོན་བྱུང་བ་འདས་པའི་དུས་སུ་བསྐལ་པ་གྲངས་མེད་པའི་ཡང་ཆེས་གྲངས་མེད་ཅིང་བསམ་གྱི་མི་ཁྱབ་པའི་གོང་རོལ་དུ་བདེ་བ་ཅན་འདི་ཉིད་འཇིག་
རྟེན་གྱི་ཁམས་ཡོན་ཏན་རིན་ཆེན་བསགས་པ་དཔག་ཏུ་མེད་པ་བདེ་བ་ཀུན་ཏུ་སྟོན་པ་ཞེས་བྱ་བར་གྱུར་ཏེ། དེའི་ཞིང་གི་བཀོད་པ་ནི་བསམ་གྱི་མི་ཁྱབ་ཏེ། མི་ལ་ལ་ཞིག་གི་
སྐྲའི་རྩེ་མོར་བརྒྱར་བཤགས་པའི་རྩེ་མོས་རྒྱ་མཚོ་ནས་ཆུ་ཐིགས་གཅིག་བླངས་པ་ལྟ་བུ་བདེ་བ་ཅན་དང་། རྒྱ་མཚོ་ལྟ་བུ་ནི་འཇིག་རྟེན་གྱི་ཁམས་འདི་ཡིན་ཅེས་གསུངས་སོ། །དེར་བཅོམ་ལྡན་འདས་
གསེར་འོད་སེང་གེ་རྣམ་པར་རོལ་པའི་རྒྱལ་པོ་ཞེས་བྱ་བ་བྱུང་ངོ་། །དེའི་ཚེ་འཁོར་ལོ་སྒྱུར་བའི་རྒྱལ་པོ་དཔལ་གྱི་གཟི་བརྗིད་བྱ་བ་བུ་བྱེ་བ་ཕྲག་བརྒྱ་ཡོད་པ་ཞིག སྐྱེས་མོས་ཚལ་
ན་བསམ་གཏན་ལ་གནས་ཤིང་འདུག་པའི་བླ་གཡས་གཡོན་ནས་ཙནྡན་སྦྲུལ་གྱི་སྙིང་པོའི་པད་མ་བཀྲ་བ་བལྟ་ན་སྡུག་པ་གཉིས་བྱུང་བ་ལས་ཁྱེའུ་རིན་ཆེན་མཆོག་དང་། རིན་ཆེན་སེམས་ཞེས་པ་གཉིས་བརྫུས་ཏེ་བྱུང་ནས་དེང་ལྷན་ཅིག་བཅོམ་ལྡན་འདས་ཀྱི་དྲུང་དུ་སོང་ནས་སེམས་བསྐྱེད་དོ་ཞེས་དང་། 
1-665
དེ་ལྟར་གསུམ་པོ་ནི་དེ་ལྟར་འོད་དཔག་མེད་དང་། སྤྱན་རས་གཟིགས་དང་། མཐུ་ཆེན་ཐོབ་ཅེས་བྱའོ་ཞེས་དང་། ཡང་སྐྱེས་བུ་དམ་པ་དེ་གཉིས་སངས་རྒྱས་པའི་མཚན་ཇི་སྐད་ཅེས་བགྱི་ཞེས་གསོལ་པ་
དང་། བཀའ་སྩལ་པ། དེ་བཞིན་གཤེགས་པ་འོད་དཔག་མེད་ཀྱི་ཚེ་དཔག་ཏུ་མེད་ཀྱང་། མཐར་ཡོངས་སུ་མྱ་ངན་འདའ་བར་འགྱུར་ལ། དེའི་འོག་ཏུ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱ་རྩ་
བཞིའི་བར་དུ་དམ་པའི་ཆོས་གནས་ནས་ཇི་ལྟར་བཞུགས་པ་བཞིན་སེམས་ཅན་གྱི་དོན་བྱེད་དོ། །དེའི་དམ་པའི་ཆོས་ནུབ་མ་ཐག་པའི་མཚན་མོའི་སྐྱ་རེངས་འཆར་བའི་ཚེ། སྤྱན་རས་གཟིགས་དབང་ཕྱུག་སངས་
རྒྱས་ནས། འོད་ཟེར་ཀུན་ནས་འཕགས་པའི་དཔལ་བརྩེགས་རྒྱལ་པོ་ཞེས་བྱ་བ་འགྱུར་རོ། །ཞིང་ནི་བདེ་བ་ཅན་འདི་ཉིད་གསེར་འོད་སེང་གེ་རྣམ་པར་རོལ་པའི་ཞིང་གི་བཀོད་པ་ཆ་ཙམ་ཡང་མི་
ཕོད་པའི་རིན་ཆེན་ཀུན་ནས་བསགས་པ་ཞེས་པའོ། །སྐུ་ཚེ་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་ཅུ་རྩ་དྲུག དམ་པའི་ཆོས་བསྐལ་པ་བྱེ་བ་ཕྲག་དྲུག་ཅུ་རྩ་གསུམ་དུ་གནས་
སོ། །མཐུ་ཆེན་ཐོབ་ནི་དེ་ཇི་སྲིད་བཞུགས་ཀྱི་བར་དུ། མཆོད་པ་བྱེད་ལ། འདས་ནས་ཀྱང་དམ་པའི་ཆོས་འཛིན་པར་བྱེད་དོ། །དེའི་དམ་པའི་ཆོས་ནུབ་པ་དང་། ཡོན་ཏན་ཤིན་ཏུ་གནས་པ་ནོར་བུ་བཙེགས་པའི་རྒྱལ་པོ་ཞེས་པར་སངས་རྒྱས་ནས། 
1-666
ཞིང་གི་བཀོད་པ་དང་། སྐུ་ཚེ་དང་། དམ་པའི་ཆོས་གནས་པའི་དུས་ཀྱང་སྔ་མ་ཇི་ལྟ་བ་བཞིན་དུ་གསུངས་སོ། །དེ་ལྟར་སངས་རྒྱས་པའི་རིམ་པ་དང་བསྟུན་ནས་ཕྱག་མཛད་པ་འཐད་པར་མངོན་
ནོ། །སྙིང་རྗེ་པད་མ་དཀར་པོ་ལས་ཀྱང་། བསྐལ་པ་གྲངས་མེད་པ་གངྒཱའི་ཀླུང་ཅིག་གི་བྱེ་མ་སྙེད་འདས་པ་ན། འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཀྱི་མདུན་ན་འདོན་བྲམ་ཟེ་
རྒྱ་མཚོའི་རྡུལ་ཞེས་པའི་སྲས་དེ་བཞིན་གཤེགས་པ་རིན་ཆེན་སྙིང་པོས། རྒྱལ་པོ་རྩིབས་ཀྱི་མུ་ཁྱུད་བདེ་བ་ཅན་དུ་སངས་རྒྱས་པ་ཚེ་དཔག་ཏུ་མེད་པ་དང་། རྒྱལ་པོ་ལ་བུ་སྟོང་ཡོད་པའི་
བུ་ཐུ་བོ་མིག་མི་འཛུམ་སྤྱན་རས་གཟིགས་ཏེ་འོད་ཟེར་ཀུན་ནས་འཕགས་པའི་དཔལ་བརྩེགས་རྒྱལ་པོ་དང་། བུ་གཉིས་པ་མུ་ཁྱུད་ནི་མཐུ་ཆེན་ཐོབ་ཏེ་ཡོན་ཏན་ཤིན་ཏུ་གནས་པར་ནོར་བུ་རྩེགས་
པའི་རྒྱལ་པོར་ལུང་བསྟན་པ་བཞུགས་སོ། །དེའི་རྗེས་སུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་དབང་ཕྱུག་རྒྱལ་པོ་ལ་ཕྱག་འཚལ་ལོ་ཞེས་བརྗོད་དོ། །
འདི་ནི་མེ་ཏོག་གི་ཚོགས་ཀྱི་མདོ་ལས། ཞིང་འདི་ནས་སངས་རྒྱས་ཀྱི་ཞིང་བཅྭོ་བརྒྱད་འདས་པའི་འཇིག་རྟེན་གྱི་ཁམས་སྦྲང་རྩི་ཅན་ན་བཞུགས་པར་གསུངས་སོ། ། འདིའི་མཚན་བརྗོད་པའི་ཕན་ཡོན་ནི། འདི་ཉིད་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། 
1-667
ཀླུ་དཔག་ཏུ་མེད་པ་ཉམ་ང་བ་དུ་མ་ལས་ཐར་པར་མཛད་ཅིང་། དགེ་བའི་རྩ་བ་འདིས་བདག་སངས་རྒྱས་ནས་གནས་པའམ། མྱ་ངན་ལས་འདས་ཀྱང་རུང་སྟེ། འཇིག་རྟེན་གང་དུ་ཀླུ་དག་གིས་
ལྕེ་འབེབས་པའམ། འཇིགས་པའམ་ནད་དམ། གནོད་པ་གཏོང་བ་དེར། བདག་གི་མིང་བརྗོད་ན་གནོད་པ་དེ་དག་ཐམས་ཅད་མེད་པར་གྱུར་ཅིག་ཅེས་སྨོན་ལམ་མཛད་པས་འདིའི་མཚན་དྲན་པར་ཙམ་གྱིས་ཀླུའི་གནོད་
པ་ཐམས་ཅད་ལས་ཐར་པ་དང་། བསོད་ནམས་དཔག་ཏུ་མེད་པ་དང་ལྡན་པར་གསུངས་སོ། །འདིའི་རྗེས་སུ་ཁ་ཅིག་ཕྱོགས་བཅུའི་སངས་རྒྱས་ལ་ཕྱག་བྱེད་པ་དང་། དཔལ་ལྡན་གྲོའི་ཕྱག་ལེན་ལ། མདོ་སྡེ་
རྒྱན་ལས་གསུངས་པ་ཡི། སེམས་ཅན་རྣམས་ལ་བརྩེ་བ་ཅན། །ཞེས་པ་ལ་སོགས་པའི་ཕྱག་མང་དུ་མཛད་མོད་ཀྱི། མཆིམས་ཐམས་ཅད་མཁྱེན་པ་ནི་དེ་བཞིན་གཤེགས་པ་བཅུ་གསུམ་པོ་དེ་ཙམ་ལ་ཕྱག་
འཚལ་བར་སྣང་བས་བདག་གིས་ཀྱང་དེ་དག་ལས་གཞན་འདིར་མ་བཀོད་དོ། །དེ་ནས་ཚིགས་སུ་བཅད་པ་བཞི་པའི་བསྟོད་པ་ལས། སྐུ་གྱུར་པ་ནི་ཐམས་ཅད་ལ། །མཚན་མཆོག་སུམ་ཅུ་གཉིས་མངའ་བ། །
རྫོགས་པའི་སངས་རྒྱས་གྲགས་ལྡན་པ། །རྒྱལ་བ་ཀུན་ལ་ཕྱག་འཚལ་ལོ། །རྫོགས་པའི་སངས་རྒྱས་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱང་ངན་འདས་པ་དང་། །
1-668
བདེ་གཤེགས་གང་དུ་བཞུགས་པ་དང་། །འཆག་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་བདག་ཕྱག་འཚལ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་འཚམས་རྣམས་
སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་ཀུན་ལ་བདག་ཕྱག་འཚལ། །ཞེས་དང་། དེ་ནས་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་མཆོད་རྟེན་བརྒྱད་པའི་བསྟོད་པ་ལས། འགྲོ་བའི་བླ་མ་
གཅིག་པུ་ལུམ་བིར་བལྟམ། །སེར་སྐྱའི་གྲོང་ཁྱེར་གཞི་རུ་གནས་པར་མཛད། །ཡོན་ཏན་རིན་ཆེན་བྱེ་བས་བརྒྱན་པ་ཡི། །བདེ་གཤེགས་མཆོད་རྟེན་རྣམས་ལ་ཕྱག་འཚལ་ལོ། །མང་ག་དྷ་ཡི་བྱང་ཆུབ་ཤིང་དྲུང་
དུ། །ཆུ་བོ་ནེ་རན་ཛ་ན་ཞེས་བྱ་བའི། །འགྲམ་བཞུགས་མཆོད་རྟེན་ཡོན་ཏན་རྒྱ་ཆེ་བ། །བྱང་ཆུབ་རྟེན་དུ་གྱུར་ལ་ཕྱག་འཚལ་ལོ། །ཀ་ཤི་ཀ་ཡི་ཝ་ར་ན་སི་རུ། །ཆོས་ཀྱི་འཁོར་
ལོ་རྣམ་གྲོལ་རྨད་བྱུང་ལ། །ཉོན་མོངས་སྒྲིབ་པ་རྣམ་པར་སྤྱོད་མཛད་པའི། །ཡེ་ཤེས་མཆོད་རྟེན་བཞི་ལ་ཕྱག་འཚལ་ལོ། །མཉན་དུ་ཡོད་པར་གཞན་སྟོབས་ཚར་བཅད་ནས། །ཛེ་ཏའི་ཚལ་དུ་ཆོ་འཕྲུལ་ཆེན་
པོ་བསྟན། །ས་གསུམ་དགོངས་པ་མཆོག་ཏུ་བསྒྲུབ་མཛད་པ། །མུ་སྟེགས་ཕམ་མཛད་མཆོད་རྟེན་ཕྱག་འཚལ་ལོ། །གྲོང་ཁྱེར་དམ་པ་མཆོག་ནི་གསལ་ལྡན་དུ། །ལྷ་རྣམས་གནས་གཤེགས་བླ་མེད་དམ་པར་བབས། །ཞབས་ལ་ཚང་དབང་ཅོད་པཎ་གྱིས་མཆོད་པ། །
1-669
སུམ་བཅུའི་ལྷས་མཆོད་མཆོད་རྟེན་ཕྱག་འཚལ་ལོ། །དགེ་འདུན་དབེན་དུ་སྔར་གྱུར་ལས། །སྟོན་པའི་ཉན་ཐོས་རབ་མཐུན་པ། །རྒྱལ་པོའི་ཁབ་ཀྱི་འོད་མའི་ཚལ། །བྱམས་དངོས་མཆོད་རྟེན་ཕྱག་འཚལ་ལོ། །སྐུ་ཚེའི་འདུད་
བྱེད་བཏང་བ་ལས། །སླར་ཡང་སྐུ་ཚེ་བྱིན་བརླབས་པ། །རྣམ་གྲོལ་ཡངས་པ་ཅན་གྱི་ནི། །བྱིན་བརླབས་མཆོད་རྟེན་ཕྱག་འཚལ་ལོ། །ཀུ་ཤའི་གྲོང་དུ་འགྲོ་བ་རྣམས། །དགེ་བ་ལ་ནི་སྦྱོར་མཛད་ཅིང་། །འདྲེན་
མེད་གྱད་གནས་ཟུང་གི་ཚལ། །མཆོད་རྟེན་མྱ་ངན་འདས་ཕྱག་འཚལ། །ཤཱཀ་ཐུབ་མཆོད་རྟེན་བརྒྱད་པོ་དང་། །ཕྱོགས་བཅུ་གཞན་དང་གཞན་དག་ན། །བཞུགས་པའི་ཆོས་སྐུ་ཀུན་ལ་འདུད། །ཞི་ལ་རྟག་ཏུ་སྤྱིས་ཕྱག་
འཚལ། །ཞེས་པའོ། །དེའི་རྗེས་སུ། ཡེ་ཤེས་བླ་མ་འོད་ཀྱི་ཏོག །དེ་བཞིན་སྨོན་ལམ་བློ་གྲོས་དང་། །དབང་པོ་ཞི་དང་འཇམ་དབྱངས་ལ། །བདག་ནི་གུས་པས་ཕྱག་འཚལ་ལོ། །ཞེས་བྱ་བ་སྟེ། །འདི་དག་
ནི་འཇམ་དཔལ་གྱི་སངས་རྒྱས་ཀྱི་ཞིང་གི་བཀོད་པ་ལས། བཅོམ་ལྡན་འདས་ཀྱི་འཇམ་དཔལ་ལ་རང་གི་སངས་རྒྱས་ཀྱི་ཞིང་གི་བཀོད་པའི་སྨོན་ལམ་སྟོན་ཅིག་ཅེས་པ་དང་། རང་ཉིད་ཀྱི་སྨོན་ལམ་
བཏབ་པའི་ཞིང་གི་བཀོད་པ་བསྟན་པ་ན་བྱང་ཆུབ་སེམས་དཔའ་སེང་གེའི་རྩལ་གྱི་མངོན་པར་བསྒྲགས་པའི་སྒྲས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པ་སངས་རྒྱས་པའི་མཚན་དང་འཇིག་རྟེན་གྱི་ཁམས་ཀྱི་མིང་དང་། 
1-670
དེས་ཕྱོགས་ཀུན་ཏུ་འབྱུང་བར་འགྱུར་ཞེས་གསོལ་པ་དང་། བཀའ་སྩལ་པ། མཚན་ནི་དེ་བཞིན་གཤེགས་པ་ཀུན་ཏུ་གཟིགས་པ། ཁམས་ཀྱི་མིང་ནི་སྨོན་ལམ་ཇི་ལྟ་བ་བཞིན་དུ་ཡོངས་སུ་རྫོགས་ཞིང་དག་
ལ་རྡུལ་མེད་པ་བསགས་པ། འདི་ནི་ལྷོ་ཕྱོགས་སུ་འབྱུང་སྟེ་མི་མཇེད་ཀྱང་དེའི་ནང་དུ་འདུས་པར་འགྱུར་རོ་ཞེས་སོ། །ཡང་གསོལ་པ། ཞིང་གི་བཀོད་པ་དེ་ལྟ་བུ་སངས་རྒྱས་གཞན་ལ་མངའ་
བར་གྱུར་ཏམ་མངའ་བར་མི་འགྱུར་ཞེས་གསོལ་པ་དང་། ཡོད་དེ། ཞིང་འདི་ནས་ཤར་ཕྱོགས་ལོགས་སུ་ཞིང་གངྒཱའི་ཀླུང་བྱེ་བ་ཕྲག་བརྒྱའི་བྱེ་མ་སྙེད་འདས་པའི་འཇིག་རྟེན་གྱི་ཁམས་སྨོན་ལམ་ལ་རབ་
ཏུ་གནས་པ་མངོན་པར་འཕགས་པ་ཞེས་བྱ་བ་ན། སངས་རྒྱས་ཀུན་ནས་འོད་ཟེར་ཡོན་ཏན་རྟག་ཏུ་མངའ་བ་རྒྱ་མཚོའི་རྒྱལ་པོ་ཞེས་བྱ་བ་སྐུ་ཚེ་དཔག་ཏུ་མེད་པས་ད་ལྟར་བཞུགས་ཤིང་
ཆོས་སྟོན་པ་དང་། ཡང་། བྱང་ཆུབ་སེམས་དཔའ་བསམ་གྱིས་མི་ཁྱབ་པའི་གོ་བསྒོས་པ། འཇམ་དཔལ་གཞོན་ནུར་གྱུར་པའི་སྤྱོད་པ་འདི་ཉིད་ལ་གནས་པ་བཞི་ཡོད་དེ། དེ་དག་གི་སངས་རྒྱས་ཀྱི་ཞིང་
གི་ཡོན་ཏན་གྱི་ཞིང་གི་བཀོད་པ་ཡང་འདི་འདྲ་བར་འགྱུར་རོ་ཞེས་སོ། །གསོལ་པ། བྱང་ཆུབ་སེམས་དཔའ་དེ་དག་གང་ན་གནས་པ་དང་། དེ་དག་གི་མིང་ཡང་བསྟན་དུ་གསོལ། བཀའ་སྩལ་པ། 
1-671
གཅིག་ནི་འོད་ཀྱི་ཏོག་ཅེས་བྱ་སྟེ་ཤར་ཕྱོགས་ན་དེ་བཞིན་གཤེགས་པ་མྱ་ངན་མེད་པའི་དཔལ་ཀྱི་སངས་རྒྱས་ཀྱི་ཞིང་ན། གཉིས་པ་ནི་ཡེ་ཤེས་བླ་མ་སྟེ། ལྷོ་ཕྱོགས་ན་དེ་བཞིན་གཤེགས་
པ་ཡེ་ཤེས་རྒྱལ་པོའི་ཞིང་ན། གསུམ་པ་ནི་ཞི་བའི་དབང་པོ་སྟེ་ནུབ་ཕྱོགས་ན་དེ་བཞིན་གཤེགས་པ་ཤེས་རབ་བརྩེགས་པའི་ཞིང་ན། བཞི་པ་ནི་སྨོན་ལམ་བློ་གྲོས་ཞེས་བྱ་བ་སྟེ་བྱང་
ཕྱོགས་ན་ནི་དེ་བཞིན་གཤེགས་པ་ཐུན་མོང་པའི་ཞིང་ན་འདུག་གོ །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་ནས་ད་ལྟར་བཞུགས་པའི་སངས་རྒྱས་ཀྱི་ཞིང་དེ་སྣང་ཞིང་། བྱང་ཆུབ་
སེམས་དཔའ་དེ་དག་དེར་འོངས་པ་སྣང་བར་མཛད་དོ་ཞེས་གསུངས་སོ། །དེ་ལྟར་ན་དེ་དག་ནི་བསམ་གྱིས་མི་ཁྱབ་པའི་བྱང་ཆུབ་སེམས་དཔའ་ཆེན་པོ་དག་སྟེ། དེ་དག་གི་མཚན་བཟུང་བ་ལ་
ཕན་ཡོན་དཔག་ཏུ་མེད་པ་ཡོད་པས་དེ་ལྟར་ཕྱག་མཛད་པར་སྣང་ངོ་། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ལེགས་པར་སེམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་
ཆེན་པོ་རབ་ཏུ་ཞི་བར་གནས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་མེད་ལ་ཕྱག་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་ལ་ཕྱག་འཚལ་ལོ་ཞེས་བྱ་སྟེ། 
1-672
འདི་དག་ནི། ཁྱེའུ་བཞིའི་ཏིང་ངེ་འཛིན་གྱི་མདོ་ལས། བཅོམ་ལྡན་འདས་ཀྱི་ཤིང་ས་ལ་ཟུང་གི་བར་དུ་གཟིམས་ཁྲི་བཤམས་པའི་གཟིམས་མལ་ཐ་མ་ལ་བཞུགས་པའི་ཚེ། སྐད་ཅིག་དེ་ཉིད་ལ། ཤར་
ཕྱོགས་སུ་ཞིང་བྱེ་བ་འབུམ་ཕྲག་བཅུ་འདས་པ་ན། སངས་རྒྱས་སེང་གེ་སྒྲའི་དབང་ཕྱུག་ཅེས་བྱ་བའི་འཇིག་རྟེན་གྱི་ཁམས་རིན་ཆེན་དབྱངས་ཅན་ནས། བྱང་ཆུབ་སེམས་དཔའི་དོན་ལེགས་པར་སེམས་པ་ཞེས་
བྱ་བ་ཤི་འཕོས་ནས་རྒྱལ་པོའི་ཁབ་དུ་མ་སྐྱེས་དགྲའི་ཁང་པར་བརྫུས་ཏེ་སྐྱེས་པ་དང་། ལྷོ་ཕྱོགས་སུ་ཞིང་བྱེ་བ་འབུམ་ཕྲག་ལྔ་འདས་པ་ན་སངས་རྒྱས་བལྟ་མཛེས་རིན་ཆེན་ཞེས་བྱ་བའི་
འཇིག་རྟེན་གྱི་ཁམས་རིན་ཆེན་བཀོད་པ་ནས་བྱང་ཆུབ་སེམས་དཔའ་རབ་ཏུ་ཞི་བར་འཇུག་ཅེས་བྱ་བ་ཤི་འཕོས་ནས་མཉན་ཡོད་དུ་ཚོང་དཔོན་སེང་གེ་ལྟ་བུའི་ཁྱིམ་དུ་སྐྱེས་པ་དང་། ནུབ་ཕྱོགས་
སུ་ཞིང་བྱེ་བ་འབུམ་ཕྲག་བརྒྱ་འདས་པ་ན་སངས་རྒྱས་དགའ་བའི་དབང་ཕྱུག་ཅེས་བྱའི་འཇིག་རྟེན་གྱི་ཁམས་དགའ་སྤུ་ཞེས་བྱ་བ་ནས་བྱང་ཆུབ་སེམས་དཔའ་དམིགས་མེད་ཅེས་བྱ་བ་ཤི་འཕོས་ནས་
ཝ་ར་ན་སི་རུ་གྲོང་ཁྱེར་དུ་ཚོང་དཔོན་མེ་ཏོག་བཟང་པོའི་ཁྱིམ་དུ་སྐྱེས་པ་དང་། བྱང་ཕྱོགས་སུ་ཞིང་བྱེ་བ་འབུམ་ཕྲག་དྲུག་ཅུ་རྩ་བཞི་འདས་པ་ན་སངས་རྒྱས་བྱང་ཆུབ་ཡན་ལག་གནས་ཞེས་བྱ་བ་འཇིག་རྟེན་གྱི་ཁམས་མེ་ཏོག་ཅན་ནས་བྱང་ཆུབ་སེམས་དཔའ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཐོབ་པ་ཞེས་པ་ཤི་འཕོས་ནས་ཡངས་པ་ཅན་གྱི་གྲོང་ཁྱེར་དུ་དམན་མོ་སེང་གེའི་ཁྱིམ་དུ་སྐྱེས་མ་ཐག་ཏུ། 
1-673
ཐུབ་པའི་རྫོགས་པའི་སངས་རྒྱས་གང་ན་བཞུགས་ཞེས་དྲིས་པ་སྐད་ཅིག་དེ་ཉིད་ལ་འཁོར་དུ་མ་དང་ལྷན་ཅིག་བཅོམ་ལྡན་འདས་ཀྱི་དྲུང་དུ་དོང་ངོ་། །དེའི་ཚེ་དེ་དག་གི་བསྔགས་པ་རྒྱ་ཆེར་
གསུངས་ཤིང་དེ་དག་དང་ལྷན་ཅིག་སེམས་ཅན་གྱི་དོན་ཐ་མ་མཛད་པ་ཡིན་ནོ། །དེའི་ཕྱིར་མདོ་དེ་ཉིད་ལས། ཀུན་དགའ་བོ་སེམས་ཅན་རྣམས་ཀྱི་དོན་བྱ་བ་གང་ཡིན་པ་དང་། དེ་བཞིན་གཤེགས་
པའི་སྲས་ཀྱི་ཐུ་བོ་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་དོན་བྱས་པ་གང་ཡིན་པ་དེ་དག་ནི་ང་དང་འདི་དག་གི་རྫོགས་པར་བྱས་ཟིན་ཏོ་ཞེས་སོ། །དེས་ན་སེམས་དཔའ་ཆེན་
པོ་དེ་དག་གི་མཚན་ཐོས་པ་ལ་ཕན་ཡོན་དཔག་ཏུ་མེད་ན། མཚན་ནས་བརྗོད་དེ་ཕྱག་འཚལ་བ་ལ་ལྟོས་ཀྱང་ཅི་ཞིག་དགོས། དེའི་དེ་ལྟར་ཕྱག་མཛད་པར་སྣང་ངོ་། །དེའི་རྗེས་སུ་ཕྱག་བྱ་
བའི་ཡུལ་ཐམས་ཅད་བསྡུས་ནས་ཕྱག་མཛད་པ་འདི་ནི། ཆུ་མིག་པ་ཆེན་པོའི་ཕྱག་ལེན་ཡིན་ཏེ། དེ་ནི་འདི་ལྟར། ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ལ་ཕྱག་འཚལ་ལོ་ཞེས་པའོ། །དེ་ནས་སངས་རྒྱས་རྗེས་སུ་དྲན་པ་ཚར་གཅིག་གདོན་ཏེ། འདི་ནི་བསྟོད་པའི་མཆོད་པ་ཡིན་པས་མཆོད་པ་འབུལ་བའི་ཡན་ལག་དུ་སྡུད་པར་མཛད་དོ། །ཕན་ཡོན་ནི་མི་དང་མི་མ་ཡིན་པས་གླགས་མི་རྙེད་པ་དང་། 
1-674
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རློབ་པ་དང་། སྡིག་པ་དཔག་ཏུ་མེད་པ་འཛད་པ་དང་། ཏིང་ངེ་འཛིན་དཔག་ཏུ་མེད་པ་རྒྱུད་ལ་སྐྱེས་བ་དང་། ཡི་དམ་གྱི་ལྷའི་
ཞལ་མྱུར་དུ་མཐོང་བའི་ཕན་ཡོན་ཡོད་ཅེས་དམ་པ་རྣམས་གསུང་ངོ་། །དེས་ན། དུས་ཀྱི་མཆོད་པ་ལ་སོགས་ལ་མིང་པོ་འདུ་བའི་ཚེ་བོད་བསྲུང་པའི་དོན་དུ་ངེས་པར་གདོན་པར་བྱ་སྟེ། སྔོན་
ཡང་བསམ་ཡས་སུ་མཆོད་པ་ཆེན་པོ་བྱེད་པའི་ཚེ། ཇོ་བོའི་ཞལ་ནས་མི་རྣམས་སེམས་ཅ་ལེ་ཅོ་ལེ་སོང་ནས་འདུག་སྲུང་བ་བྱ་གསུང་ནས་སངས་རྒྱས་རྗེས་དྲན་རྒྱ་སྐད་དུ་སྟོན་སྐད་དོ། །
གཞན་ཡང་། སངས་རྒྱས་རྗེས་སུ་དྲན་པར་བྱས་པས་འཕྲལ་དུ་འཇིགས་པ་ལ་སྐྱབས་པའི་གཏམ་ཡོད་དེ། འདི་ལྟར་ཉན་ཐོས་སེན་དྷའི་དགེ་སློང་གཅིག་གིས་སེན་དྷུའི་ཡུལ་ནས། མ་ག་ཏའི་ཡུལ་ཨོ་ཏན་
ཏ་པུ་རིར་འགྲོ་བའི་ལམ་དུ། མཱ་ལ་བ་ཞེས་པའི་བུ་མོས་སྨྲས་པ། དེ་ཡིན་ན་ལེགས་ཀྱིས་བདག་ལ་ཁྱོད་ཀྱི་སྔགས་དེ་སློབས་ཤིག་དང་། དེས་ངེས་པར་འཚོའ་བས་བདག་ཀྱང་སྔགས་དེ་ཟློས་
པར་བྱེད་དོ། །དེ་ནས་དེས་བསླབས་ཏེ་དེ་ཡང་བློ་ལ་བཟུང་ནས་སྔ་མ་ལྟར་ཟློས་པར་བྱེད་དོ། །ཡང་བུ་མོ་སྨྲས་པ། བདག་གི་ཕ་མ་ཡང་མེད། གང་དུ་འགྲོ་བ་དང་ཇི་ལྟར་འགྲོ་བ་དང་། 
1-675
ཇི་ལྟར་བྱེད་པ་ཡང་མི་ཤེས་ན། བདག་ཉིད་ཀྱི་བདག་ཉིད་ཁྱོད་ལ་སྦྱིན་གྱིས། འདི་ནས་བཟུང་ནས་ཁྱོད་བདག་གི་བདག་པོ་ཡིན་པས་བདག་ཁྱེར་ལ་ཁྱེད་ཀྱི་ཡུལ་དུ་འགྲོ་བར་བྱའོ། །དེས་སྨྲས་
པ། དེ་བཞིན་བྱས་ཏེ་ནོར་འགའ་ཞིག་ཁྱེར་ཏེ་འགྲོའོ། །བུ་མོས་སྨྲས་པ། ཕའི་མཛོད་ན་རིན་ཐང་མེད་པའི་རིན་པོ་ཆེ་དག་བསྡམས་ནས་ཁྱེར་དེ་འགྲོ་བར་བྱའོ་ཞེས་སྨྲས་ནས་སངས་རྒྱས་རྗེས་སུ་
དྲན་པ་བྱེད་ཅིང་དེ་ལྟར་དོང་ངོ་། །དེ་ནས་མཱ་ལ་བའི་ཡུལ་དུ་སླེབ་ནས་རིན་པོ་ཆེ་གཅིག་བརྩོང་སྟེ་བ་ལང་ས་བཞི་ལ་སོགས་པ་ཉོས་ནས་བདེ་བར་གནས་པར་གྱུར་ཏོ། །དེ་ནས་
དུས་གཞན་ཞིག་ནས་ལམ་དེ་ཉིད་ནས་ཉན་ཐོས་སེན་དྷ་པའི་དགེ་སློང་གཞན་ཞིག་བྱུང་བ་དེ་དགོངས་མོའི་ཆ་ལ་སླེབ་ནས་གཞན་ཞིག་ལ་གནས་གཡར་བ་དང་། དེས་ཁྱིམ་བདག་ལ་སྐད་བཏང་བ་
དང་། ཁྱིམ་བདག་དེར་འོངས་ཏེ་དགེ་སློང་གི་ཞབས་ལ་ཕྱག་བྱས་ནས་རང་གི་གནས་སུ་སྤྱན་དྲངས་པ་དང་། དེའི་ཆུང་མས་ཀྱང་དེ་ལྟར་ཕྱག་བྱས་ནས། དེ་གཉིས་ཀྱིས་ཉེ་བར་མཁོ་བ་རྣམ་པ་
སྣོགས་པས་བསྙེན་བཀུར་བྱས་སོ། །དེ་ནས་དགེ་སློང་གིས་དྲིས་པ། ཁྱིམ་བདག་ང་ལ་འདི་ལྟ་བུའི་དད་པ་བྱེད་པ་དང་། འདི་ཙམ་གྱི་བསྙེན་བཀུར་བྱེད་པའི་རྒྱུ་ཅི་ཞིག ཁྱིམ་བདག་གི་སྨྲས་པ། 
1-676
བདག་གི་ལུས་དང་ལོངས་སྤྱོད་ཐམས་ཅད་དགེ་སློང་གི་དྲིན་ཡིན་པས་ཞེས་སོ། །དེ་དགེ་སློང་གིས་དེ་ཇི་ལྟར་དུ་ཡིན་ཞེས་དྲིས་པ་དང་། ཁྱིམ་བདག་གིས་དང་པོ་དགེ་སློང་ཅིག་མཇལ་བ་ནས་
ད་ལྟའི་བར་དུ་ཞིབ་ཏུ་སྨྲས་སོ། །དེ་ནས་ནམ་ལངས་པ་དང་དགེ་སློང་ལ་ལམ་རྒྱགས་ལ་སོགས་པ་བསྐུར་ནས་མ་ག་དྷར་གཤེགས་ཏེ་ངོ་མཚར་བར་གྱུར་པའི་གཏམ་དེ་མ་ག་དྷ་པ་
ཐམས་ཅད་ལ་བསྒྲགས་སོ། །དེ་ཉིད་པཎྜི་ཏ་བི་ན་ཡ་ཤྲི་མི་ཏྲ་བྱ་བས་གསན་ནས་ཡི་གེ་བཀོད་པ་ལོ་ཙ་བ་གྲུབ་པ་དཔལ་བཟང་པོས་བསྒྱུར་བ་ལས་འབྱུང་བ་ཡིན་ནོ། །དེའི་ཕྱིར་
ཕན་ཡོན་ཅན་གྱི་སངས་རྒྱས་རྗེས་དྲན་གདོན་པའི་ཚུལ་ནི་མན་ངག་དག་ལས་གཞན་དུ་གསུང་མོད་ཀྱི་ཡི་གེ་མང་བས་འཇིགས་པའི་ཕྱིར་འདིར་མ་བྲིས་སོ། །འདིའི་སྐབས་སུ་གདོན་པ་ནི་ཡོན་ཏན་
སེམས་ཤིང་གོ་ལེ་གདོན་པར་བྱས་ཏེ། སྔོན་དགེ་བའི་བཤེས་གཉེན་ཆུ་བསྒོམ་པ་ཞེས་པ་འདི་ལྟར་སངས་རྒྱས་བཅོམ་ལྡན་འདས་ཏེ་ཞེས་གསུངས་ཏེ་དེའི་ངང་ལ་ཡོན་ཏན་བསྒོམ་ཞིང་བཞུགས། ཉེ་གཡོག་ཀུན་
གྱི་བསམ་པ་ལ་རྣལ་དུ་སོང་བ་ཡིན་ནམ་སྙམ་པ་དང་། དེ་ནི་དེ་བཞིན་གཤེགས་པ་ཞེས་གསུང་ཞིང་ཚིག་རེ་རེ་ནས་ཡོན་ཏན་བསྒོམ་པར་མཛད་དོ། །གསུང་ལས། འོ་བཀོལ་གི་དེ་ལྟར་གྲུབ་པ་བཀའ་བས་ཚིག་གིས་རྗེས་སུ་ཡོན་ཏན་འདི་ཡང་ཁྱེད་ལ་མངའ་འདི་ཡང་མངའ་སྙམ་དུ་དད་གུས་བསྒོམ་ཞིང་གདོན་ཞེས་གསུང་གསུང་ངོ་།
1-677
དེ་གང་ཡིན་ན། འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་
མཁྱེན་པ། སྐྱེས་བུ་འདུལ་བས་ཁ་ལོར་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ་
དགེ་བའི་རྩ་བ་རྣམས་ཆུད་མི་ཟ་བ། བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱི་སྤྲས་པ། མཚན་རྣམས་ཀྱི་མེ་ཏོག་བརྒྱས་པ། སྤྱོད་ཡུལ་རན་པར་མཐུན་
པ། མཐོང་ན་མི་མཐུན་པ་མེད་པ། དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱི་མི་ནོན་པ། སྟོབས་རྣམས་ལ་རྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་
ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་པ་བསམ་གྱི་མི་ཁྱབ་
པ། གསུང་རྣམ་པར་དག་པ། དབྱངས་སྙན་པ། སྐུ་བྱད་ལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། 
1-678
ཕུང་པོ་དག་ལས་རྣམ་པར་གྲོལ་བ་ཁམས་རྣམས་དང་མི་ལྡན་པ། སྐྱེད་མཆེད་རྣམས་བསྡམས་པ། འདུད་པ་རྣམས་ཤིན་ཏུ་དཔྱད་པ། ཡོངས་སུ་གདུང་བ་དག་ལས་ཤིན་ཏུ་རྣམ་པར་གྲོལ་བ། སྲེད་པ་
ལས་ཡོངས་སུ་རྣམ་པར་གྲོལ་བ། ཆུ་བོ་ལས་རྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་
པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་
ཡང་དག་པའི་ཡོན་ཏན་ནོ། །ཞེས་སོ།། །།
༈ མཆོད་པ་འབུལ་བ་བཤད་པ།
དེ་ནས་མཆོད་པ་དབུལ་ཏེ། རྫས་རིམ་པར་བཤམས་པ་དང་། བདག་པོས་ཡོངས་སུ་མ་བཟུང་བ་དང་། བློས་སྤྲུལ་པའི་མཆོད་པ་དང་། མཆོད་པ་སྤྲིན་གྱི་གཟུངས་ཀྱིས་
མཆོད་པ་དང་། ལུས་དབུལ་བའི་མཆོད་པའོ། །དང་པོ་འདིའི་སྐབས་སུ། རྟེན་འགྲེམས་པ་དང་། མཆོད་པ་བཤོམ་པའི་ཚུལ་གསུང་བར་མཛད་དེ། དེ་ནི་འདི་ལྟར། ཡིད་མཐུན་པའི་གནས་སུ་ཕྱག་དར་དང་། གནམ་རྒྱན་
དང་ས་རྒྱན་དགྲམས་པ་ལ་སོགས་པ་བྱས་ནས་རྟེན་འགྲེམས་པ་ནི། དབུས་སུ་བླ་མའི་སྐུའམ། ཐུབ་པ་ཆེན་པོའི་སྐུ་དང་། དེ་ནས་སངས་རྒྱས་ཀྱི་སྐུ་གཟུགས་གཞན་རྣམས་ཀྱང་དབུས་ཀྱི་ཆ་ལ་བཞུགས་སོ། །
1-679
དེ་ཡང་རྒྱལ་བ་རིགས་ལྔ་ནི། འགྲེམས་ལུགས་མི་འདྲ་བ་ཡོད་ཀྱང་། ཇོ་བོའི་བཀའ་རྒྱུད་འཛིན་པ་རྣམས། དབུས་སུ་རྣམ་པར་སྣང་མཛད། དེའི་གཡས་སུ་རྡོ་རྗེ་སེམས་པ་དང་། དེའི་གཡས་སུ་རིན་ཆེན་
འབྱུང་ལྡན། རྣམ་སྣང་གི་གཡོན་དུ་སྣང་བ་མཐའ་ཡས། དེའི་གཡོན་དུ་དོན་ཡོད་གྲུབ་པའོ། །དེ་དག་གི་གཡས་ཕྱོགས་སུ་བྱང་ཆུབ་སེམས་དཔའི་སྐུ་རྣམས་དང་དེའི་མཐར་ཁྲོ་བོའི་སྐུ། གཡོན་ཕྱོགས་སུ་སེམས་
མི་སྐུ་རྣམས་དང་དེའི་མཐར་ཁྲོ་བོའི་སྐུ་སྟེ། དེ་དག་ཀྱང་ཐུགས་ཁ་མཉམ་ཞིང་། དབུས་མས་རིམ་པ་ལྟར་ཅུང་ཟད་ནོན་པར་བྱའོ། །མཆོད་པ་བཤམ་པ་ནི། པུ་ཏོ་བའི་ཞལ་ནས་གསུང་འཁྱལ་གྱི་
ཚུལ་དུ་ང་བོན་པོ་ཡིན་པས་བོན་པོའི་ཆོས་རྒྱབ་གཅིག་བྱས་ཏེ། བོན་པོ་ཀུན་ལ་གསས་གཞི་གདིང་བ། གསས་བཀྲ་བཤམ་པ། གསས་མཆོད་དབུལ་བ་བྱ་བ་ཡོད། དེ་བཞིན་དུ་མཆོད་གཞི་གདིང་བ།
མཆོད་པ་བཤམ་པ། མཆོད་པ་དབུལ་བ་བྱ་བ་གསུམ་ཡིན་ཅེས་གསུང་སྐད་པས། འདིར་ཡང་མཆོད་གཞི་གདིང་བ་ནི་མཎྜལ་བཤམ་པའོ། ། དེ་ལ་སྤྱིར་མཎྜལ་ལ་ལྷ་རྣམས་དང་། མཆོད་རྣམས་ཀྱི་མཎྜལ་གཉིས་སོ། །
དེ་གཉིས་ལ་བརྟན་པ་དང་། མི་བརྟན་པ་གཉིས་སོ། །བརྟན་པ་ནི་དྲེ་འདི་དག་གི་སྟེང་དུ་ཤོག་འདག་དང་མཚོན་རྩིས་བྱུགས་ཤིང་སྲ་རྩི་བསྣན་པ་ཡིན་ལ། མི་བརྟན་པ་ནི་བྱུག་པ་བྱས་ཤིང་རེ་ག་བྲིས་པ་སྟེ། 
1-680
དེ་ནི་འདི་ལྟར་ངོ་སྙོམས་པ་ཇི་ལྟར་འོས་པའི་ཕྱོགས་སུ། བྱུག་པ་བྱེད་པའི་ཚེ་ཨོཾ་བཛྲ་བྷུ་མི་ཨཱ་ཧཱུྃ་ཞེས་པས་རྡོ་རྗེའི་ས་གཞི། རེ་གས་བསྐོར་པའི་ཚེ་ཨོཾ་བཛྲ་རེ་གེ་ཨཱ་
ཧཱུྃ་ཞེས་པས་རྡོ་རྗེའི་རྩིག་པར་བསམ་མོ། །དེ་ཡང་གསུང་ལས། སྔོན་རེ་ག་སྐོར་ཅིག་ལས་མེད་པ་ལ། ཇོ་བོ་ལ་དགེ་བཤེས་སྟོན་པས་ཞུས་ནས་རེ་ག་གཉིས་སྐོར་བྱས་ན་ལེགས་པར་གདའ་
སྟེ་བགྱི་རུང་ལགས་སམ་ཞུས་པས་རུང་གསུང་ནས་དེ་ཕྱིན་ཆད་ཉིས་སྐོར་བྱས་པར་འདུག་ཅེས་གསུང་གསུང་ངོ་། །དེ་ན་གཉིས་སྐོར་བྱེད་པ་ནི་རེ་ག་ནང་མ་དང་པོར་བྲིས་ནས། རྩེ་སེར་བཞི་
ཙམ་གྱི་ཕྱི་རོལ་ཏུ་ཕྱི་མ་བྲིའོ། །དེ་ནས་ལག་པ་གཡོན་པ་མཎྜལ་དང་མ་བྲལ་བར་གཡས་པས་དེའི་སྟེང་དུ་མེ་ཏོག་གཅིག་བཞག ཡང་ན་རེ་ག་ཚོམ་པ་གཅིག་འཇོག་སྟེ། དེ་ལྟ་མ་
བྱས་པར་ལག་པ་བྲལ་ན་ཞིང་ཁམས་སྟོང་པར་སྐྱེ་བའི་ཉེས་པ་འབྱུང་ཅེས་གསུང་སྐད་དོ། །སྔགས་པ་དག་ནི་བགེགས་འཇུག་པ་སྲུང་བའི་ཆེད་ཡིན་ཞེས་ཀྱང་ཟེར་རོ། །དེ་ནས་མེ་ཏོག་ཚོམ་བུ་
དགུ་མ་བྱས་ཏེ། དབུས་དང་ཤར་ནས་བརྩམས་ཏེ་ཆོས་བསྐོར་དུ་ཕྱོགས་བཞི་དང་མཚམས་བཞི་སྟེ་བརྒྱད་པོ་རེ་ག་ནང་མའི་ནས་ཙམ་གྱི་ནང་དུ་དགོད་པར་བྱ་ཞིང་། སླར་ཡང་དབུས་མའི་སྟེང་དུ་བསྣན་པར་བྱའོ། །
1-681
ཤར་ནི། རྣལ་འབྱོར་ཁ་ནི་གང་བལྟས་ཤར། །ཞེས་པས་རང་གི་མདུན་རོལ་ལོ། །དེ་ལྟ་བཤམ་པའི་མཎྜལ་དེ་རིན་པོ་ཆེའི་གཞལ་ཡས་ཁང་དུ་བསམ་པའི་ནང་དུ། མེ་ཏོག་རྣམས་པད་མའི་སྡོང་པོ་
ཆེན་པོ་ཡལ་ག་ལོ་འདབ་དང་མེ་ཏོག་དང་འབྲས་བུ་ཕུན་སུམ་ཚོགས་པ་དང་ལྡན་པར་བསམ་ནས། དབུས་སུ་བླ་མ་དང་ཡིད་དམ་དབྱེར་མེད་དང་། བསྟན་པ་འདིའི་བདག་པོ་སྟོན་པ་བཅོམ་ལྡན་
འདས་འཁོར་དང་བཅས་པ་དང་། གཞན་རྣམས་ལ་ཕྱོགས་བཞི་མཚམས་བཞིའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། སྟེང་དང་འོག་གི་རྣམས་རིམ་པ་བཞིན་ཤར་དང་ནུབ་ཀྱི་ལ་ལྟབས་ཏེ་བཞུགས་པར་བསམ་
མོ། །གསུང་ལས། དེ་ལྟ་བུའི་མཎྜལ་ནི་ལན་གཅིག་བཞེངས་ན་གཙུག་ལག་ཁང་སོ་མ་གཅིག་བཞེངས་པ་དང་བསོད་ནམས་མཉམ་ལ། སྡུད་པའི་མ་གཤེགས་པར་བསྡུས་ན་གཙུག་ལག་ཁང་གཅིག་བཤིག་པ་དང་སྡིག་
མཉམ་སྡུད་པའི་ཚེ་ཨོཾ་བཟླ་མུ་ཞེས་པས་གཤེགས་སུ་གསོལ་ཏེ་མེ་ཏོག་རྣམས་མཐའ་ནས་དབུས་སུ་བསྡུས་ལ་བླང་པར་བྱའོ་ཞེས་གསུང་གསུང་ངོ་། །ཕྱག་གི་ཡུལ་རྟེན་ཡུམ་མི་བཞུགས་ནའང་དེ་ལྟར་བྱས་
པས་ཆོད་དོ་ཅེས་གསུང་སྐད་དོ། །དེ་ལྟ་བུ་ནི་ལྷ་རྣམས་ཀྱི་མཎྜལ་ཡིན་པས་དེའི་སྟེང་དུ་མཆོད་པ་བཤམ་དུ་མི་རུང་ངོ་། །འོག་ན་གང་དུ་ཤོམ་ཅེ་ན་དེའི་མདུན་རོལ་དུ་མཆོད་པ་རྣམས་ཀྱི་མཎྜལ་བརྟན་པ་དང་མི་བརྟན་པ་ཇི་ལྟར་འོས་པ་བྱས་ཏེ་དེའི་སྟེང་དུའོ། །
1-682
དེས་ན། གསུང་ལས། མཆོད་ཁང་དག་དུ་མཎྜལ་རིམ་པ་གཉིས་ཡོང་བའི་རྒྱུ་མཚན་ཡང་འདི་ཡིན་ནོ་ཞེས་གསུང་གསུང་ངོ་། །དེ་ལྟར་མཆོད་བཞི་གཏིང་བ་མཎྜལ་བཤམས་པའི་སྟེང་དུ། མཉྫི་དང་བཅས་པའི་གཏིང་
གཙང་མ་ཡོན་ཆབ་ཀྱིས་བཀང་བ་དང་། མེ་ཏོག་དང་། བདུག་སྤོས་དང་། མར་མེ་དང་། དྲི་མཆོག་དང་། ཞལ་ཟས་ལ་སོགས་པ་ཅི་འགྱུར་སྟ་གོན་བྱས་ཏེ། རྒྱལ་ཆེན་ཤུགས་འོད་ཀྱི་སྔགས་ཉི་ཤུ་རྩ་
གཅིག་གིས་བྱིན་གྱིས་བརླབས་ཏེ་མཆོད་པའི་སྤྲིན་བསམ་གྱི་མི་ཁྱབ་པར་མོས་པར་བྱའོ། །མཆོད་པ་དབུལ་བའི་ཚུལ་ནི། ཆུ་མིག་པ་ཆེན་པོའི་གསུང་གིས་ཨོཾ་ཨཱཿཧཱུྃ་ལན་གསུམ་བརྗོད་དེ་ཕུལ་བས་ཐམས་ཅད་
ཐུགས་མཉེས་པར་བསམ་ཞེས་གསུང་སྐད། གདིང་ཀར་སྐུ་གཤེགས་ཀྱི་གསུང་གིས། །རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་མཆོག་གི་ཡོན་ཆབ་འདི། །བླ་མ་དཀོན་མཆོག་གསུམ་ལ་དབུལ། །འགྲོ་བའི་དོན་དུ་བཞེས་
སུ་གསོལ། །ཞེས་པ་མེ་ཏོག་ལ་སོགས་པ་ཐམས་ཅད་ལ་སྦྱར་དེ་དབུལ་ཞེས་གསུང་སྐད་དེ། དེ་དག་ཡང་རུང་བས་དབུལ་ལོ། །བདག་པོས་ཡོངས་སུ་མ་བཟུང་བའི་མཆོད་པ་དབུལ་བ་ནི། མིའི་འགྲོ་
བ་པས་བདག་ཏུ་མ་བཟུང་པ་འཇིག་རྟེན་དག་ན་ཆུ་དང་ཐང་ལས་སྐྱེས་པའི་མེ་ཏོག་དང་འབྲས་བུ་ལ་སོགས་པ་དང་། ཙནྡན་དང་ག་བུར་གུར་གུམ་ལ་སོགས་པའི་སྨན་གྱི་རྣམ་པ་ཤིན་ཏུ་དྲི་ཞིམ་པ་རྣམས་དང་། 
1-683
རིན་པོ་ཆེའི་རི་དཔག་བསམ་གྱི་ལྗོན་པ་མ་སྨོས་མ་བཏབ་པའི་ལོ་ཐོག ཆུ་ཡན་ལག་བརྒྱད་དང་ལྡན་པ་བསིལ་བ་སྦྲང་རྩི་ལྟ་བུས་གང་བར་གྱུར་པ་ལ་སོགས་པ་མཆོད་པའི་བྱེ་བྲག་
ཇི་སྙེད་ཡོད་པ། རྣམ་རང་བསམ་པ་རྣམ་པར་དག་པའི་བློས་བླངས་ཏེ་དབུལ་བའི་བསམ་པས། སྤྱོད་འཇུག་ལས་གང་གསུངས་པ་ལྟར། རིན་ཆེན་སེམས་དེ་བཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་
དང་དམ་པའི་ཆོས། །དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ཏན་རྒྱ་མཚོ་རྣམས་ལ་ལེགས་པར་མཆོད། །མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །
འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་
རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་ག་དུད་པ་དང་། །ལྷ་སོགས་འཇིག་རྟེན་ན་ཡང་དྲི་དང་ནི། །སྤོས་དང་དཔག་བསམ་ཤིང་དང་རིན་ཆེན་ཤིང་། །མཚོ་དང་རྫིང་བུ་པད་མས་བརྒྱན་པ་
དང་། །ངང་པ་ཤིན་དུ་སྐད་སྙན་ཡིད་འོང་ལྡན། །མ་སྨོས་འཁྲུངས་པའི་ལོ་ཐོག་རྣམ་པ་དང་། །གཞན་ཡང་མཆོད་པར་འོས་པའི་བརྒྱན་རྣམས་ནི། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །ཡོངས་སུ་བཟུང་བ་མེད་པ་དེ་དག་ཀུན། །
1-684
བློ་ཡིས་བླངས་ནས་ཐུབ་པ་སྐྱེས་ཀྱིས་མཆོག །སྲས་དང་བཅས་པ་རྣམས་ལ་ལེགས་འབུལ་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེ་དགོངས་བདག་གི་འདི་དག་བཞེས། །བདག་ནི་བསོད་ནམས་
མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་གྱིས་འདི། །བདག་གི་དོན་སླད་ཉིད་ཀྱི་མཐུས་བཞེས་ཤིག །ཞེས་སོ། ། བློས་སྤྲུལ་པའི་མཆོད་པ་དབུལ་
བ་ནི། དངོས་པོ་ཡོང་རྒྱུ་མེད་ཀྱང་བསམ་པ་རྣམ་པར་དག་པའི་བློས་སྤྲུལ་ནས་དབུལ་ཏེ། འདི་ལྟར་རིན་པོ་ཆེའི་གཞལ་ཡས་ཁང་ཡངས་ཤིང་རྒྱ་ཆེ་བ་སྟོང་གསུམ་གྱི་ཚད་ཙམ་ཕྱི་ནས་བལྟས་
ན་ནང་གསལ་ནང་ནས་བལྟས་ནི་ཕྱི་གསལ་བ་ཕུན་སུམ་ཚོགས་པའི་བཞུགས་གནས། བླ་མ་དང་སངས་རྒྱས་བྱང་ཆུབ་སེམས་དཔའ་རྣམས་ལ་བཞུགས་གནས་སུ་དབུལ་ཞིང་། དེའི་ནང་དུ་ཇི་ལྟར་འོས་པའི་བཞུགས་
ཁྲི་རིན་པོ་ཆེ་སྣ་ཚོགས་ལས་གྲུབ་པ་ཕུལ་བར་ལ་བཞུགས་པར་བསམ་ནས། དེ་དག་རང་ཉིད་ཀྱིས་མཚོན་དང་བྱུག་པ་མེ་ཏོག་དང་བདུག་སྤོས་མར་མེ་དང་ཞལ་ཟས་རོལ་མོ་དང་སིལ་སྙན་
གདུགས་དང་བ་དན་ལ་སོགས་པ་མཆོད་པའི་བྱེ་བྲག་བསམ་གྱི་མི་ཁྱབ་པས་མཆོད་པར་བསམས་ལ། བཟང་པོ་སྤྱོད་པའི་སྨོན་ལམ་ལས་བྱུང་པའི་ཚིག་འདི་འབུལ་ཏེ། མེ་ཏོག་དམ་པ་ཕྲེང་བ་དམ་པ་དང་། །
1-685
སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མི་ཕུར་མ་
རི་རབ་མཉམ་པ་དང་། །བཀོད་པའི་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་
མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །ཞེས་པའོ། །མཆོད་པ་སྤྲིན་གྱི་གཟུངས་ཀྱིས་མཆོད་པ་དབུལ་བ་ནི། བླ་མ་དང་སངས་རྒྱས་དང་བྱང་ཆུབ་
སེམས་དཔའི་ཕོ་བྲང་དུ་མཆོད་པའི་སྤྲིན་དཔག་ཏུ་མེད་པ་འབྱུང་བར་བསམས་ཏེ། ངག་ཏུ། ན་མོ་རད་ན་ཏྲ་ཡཱ་ཡཿ ན་མོ་བྷ་ག་བ་དེཿ བཛྲ་ས་ར་པྲ་མ་དྷ་ནི། ཏ་ཐཱ་
ག་ཏཱ་ཡཿ ཨ་ར་ཧ་ཏེཿ སཾ་མྱག་སཾ་བུད་དྷཱ་ཡཿ ཏད་ཡ་ཐཱཿ ཨོཾ་བཛྲེ་བཛྲེཿ མ་ཧཱ་བཛྲེཿ མ་ཧཱ་ཏེ་ཛོ་བཛྲེཿ མ་ཧཱ་བིདྱ་བཛྲེཿ མ་ཧཱ་བོ་དྷི་ཙི་ཏ་བཛྲེཿ མ་བྷ་
བོ་དྷི་མཎ་དྲོ་པ་སམ་ཀྲ་མ་ན་བཛྲེཿ སརྦ་ཀརྨ་ཨ་བ་ར་ན་བི་ཤོ་དྷ་ནི་བཛྲེ་སྭཱ་ཧཱ་ཞེས་ལན་གཅིག་གམ་གསུམ་གྱི་བར་དུ་བརྗོད་དོ། །ཕན་ཡོན་ནི་མདོ་ལས་གཟུངས་འདི་ལན་གཅིག་དྲན་པ་ཙམ་གྱི་མོད་ལ་ཕྱོགས་བཅུ་ན་བཞུགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་མཆོད་པ་དང་། 
1-686
ཞབས་ལ་ཕྱག་བྱས་པར་འགྱུར་བ་ལ་སོགས་པ་གསུངས་སོ། །ལུས་དབུལ་བའི་མཆོད་པ་ནི། རང་གི་ཉེར་ལེན་གྱི་ཕུང་པོ་ལྔ་པོ་ནི་བླ་མ་དང་སངས་རྒྱས་བྱང་ཆུབ་སེམས་དཔའ་དཔག་ཏུ་མེད་
པ་ལ་བཀའ་བཞིན་སྒྲུབ་པའི་འབངས་སུ་འབུལ་བར་བསམས་ཏེ། ཚིག་ནི་སྤྱོད་འཇུག་ནས་འབྱུང་བ། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་ཏུ་དབུལ་བར་བགྱི། །སེམས་དཔའ་མཆོག་
རྣམས་བདག་གི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱི་ཡོངས་སུ་བཟུང་བས་ན། །སྲིད་ན་མི་འཇིགས་སེམས་ཅན་ཕན་པར་བགྱིད། །སྔོན་གྱི་སྡིག་ལས་ཡང་དག་འདའ་
བགྱིད་ཅིང་། །སྡིག་པ་གཞན་ཡང་སླན་ཆད་མི་བགྱིད་དོ། །ཞེས་སོ། །དེ་ན་སྡིག་པ་བཤགས་པའི་གོང་རོལ་འདིར་སྐྱབས་སུ་འགྲོ་བ་དང་། སེམས་བསྐྱེད་པ་དང་སྟེ། གསུང་ལས། འོ་སྐོལ་སེམས་བསྐྱེད་པ་བྱས་
པ་རྣམས་ཀྱིས་དེའི་བསླབ་བྱ་ཡང་དང་ཡང་དུ་སེམས་བསྐྱེད་པ་ལ་བསླབ་ཅེས་པ་སྒྲུབ་པར་འགྲོ་བ་དང་། ཡང་སེམས་བསྐྱེད་པ་ལ་སྲོལ་གཉིས་ཡོད་པའི་སློབ་དཔོན་འཕགས་པ་ཐོགས་མེད་རྗེས་འབྲང་དང་
བཅས་པ་རྒྱུད་ཡོངས་སུ་དང་བ་ལ་བྱང་ཆུབ་ཀྱི་སེམས་བསྐྱེད་པར་བཞེད་པ་སྦྱོར་བ་ཕྱག་དང་མཆོད་པ་ཙམ་ཕུལ་ན་སྐྱབས་འགྲོ་ཁྱད་པར་ཅན་དང་སེམས་བསྐྱེད་ཀྱི་ཆོ་ག་བྱེད་པས་དེའི་ལུགས་ཀྱི་སེམས་བསྐྱེད་པ་བྱས་པར་ཡང་འགྲོ 
1-687
གཙོ་བོའི་དགོས་པ་སྡིག་པ་སྦྱོང་བ་ལ་གཉེན་པོ་སྟོབས་བཞི་ཚང་དགོས་ལ། འདི་གཉིས་རྟེན་གྱི་སྟོབས་ཡིན་པས་བར་སྐབས་འདིར་སྐྱབས་འགྲོ་སེམས་བསྐྱེད་བྱེད་པ་ཤིན་ཏུ་འབྲེལ་ཞེས་གསུང་གསུང་ངོ་། །དེ་
ཡང་ལོངས་སྤྱོད་ན་སྐྱབས་འགྲོ་ཁྱད་པར་ཅན་དང་། སེམས་བསྐྱེད་ཀྱི་བློ་སྦྱོང་དང་ཆོ་ག་རྒྱས་པ་སྐབས་དང་སྦྱར་ནས་བྱ་ཞིང་། ལོང་མེད་ན་ཇོ་བོ་མཛད་པའི་བསྡུས་པ་འདིས་བྱ་སྟེ། སྐྱབས་འགྲོ་
ཁྱད་པར་ཅན་གྱི་བློ་སྦྱོང་དྲན་པར་བྱས་ལ། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །ཞེས་པ་ལན་གསུམ་དང་། སེམས་བསྐྱེད་ཀྱི་བློ་སྦྱོང་དྲན་པར་
བྱས་ལ། བདག་གིས་སྦྱིན་སོགས་བགྱིས་པ་འདི་དག་གིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པ་ལན་གསུམ་མོ། །དགེ་བའི་བཤེས་གཉེན་བསྙུག་རུམ་པའི་གསུང་གིས་སྔར་སེམས་བསྐྱེད་བྱས་པ་ཀུན་
གྱིས་འགྲུབ་པར་གྱིས་ཤིག་ཞེས་དམ་བཅའ་བའི་ཚུལ་དུ་བྱ། མ་བྱས་པ་ཀུན་གྱིས་ཤོག་ཅེས་སྨོན་ལམ་གྱི་ཚུལ་དུ་བྱ་ཞེས་གསུང་སྐད་དོ།། །།
༈ སྡིག་པ་བཤགས་པ་དང་། རྗེས་སུ་ཡི་རང་བ་བཤད་པ།
སྡིག་པ་བཤགས་པ་ནི། འཁོར་བ་ཐོག་མ་མེད་པ་
ནས་ཐ་མ་ད་ལྟ་ལ་ཐུག་གི་བར་དུ་བསགས་པའི་སྡིག་པ་མི་དགེ་བ་དེ་ཐམས་ཅད། སྣང་ཡང་བདེན་པས་སྟོང་པ་རྨི་ལམ་སྒྱུ་མ་ལྟ་བུའི་ཚུལ་དུ་རང་གི་ལྕེའི་སྟེང་ན་ནག་ཕུང་ངེ་ཡོད་པར་བསམས་ལ། 
1-688
ཤ་དུག་ཅན་ཟོས་པའི་མི་ལྟར་སྔར་བྱས་པའི་སྡིག་པ་ལ་འགྱོད་ཅིང་། ད་ཕྱིན་ཆད་སྲོག་ལ་ཐུག་ཀྱང་མི་བྱེད་པའི་བློས་བཤགས་པའི་ཚིག་བརྗོད་པ་ན་བྱེ་མའི་རགས་ལ་ཕུ་ཆུས་ཕོག་པ་
ལྟར་ཧར་ར་ར་སོང་པ་ལྟར། ཉི་མས་མུན་པ་སེལ་བ་ལྟར་སང་སང་སང་སོང་བར་བསམས་ཏེ། བཟང་པོ་སྤྱོད་པ་ལས་འབྱུང་བ། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་
དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཞེས་སོ།། །། རྗེས་སུ་ཡི་རང་བ་ནི། ཡིད་དགའ་བ་བསྒོམ་པ་སྟེ། དེ་བསྒོམ་
པའི་ཡུལ་ནི་ཡུམ་རྒྱས་པ་ལས། བར་གསུམ་གྱིས་བསྡུས་པའི་དགེ་བ་བསྒོམ་པར་བཤད་དེ། སེམས་བསྐྱེད་ནས་སངས་མ་རྒྱས་ཀྱི་བར་དང་། སངས་རྒྱས་ནས་མྱ་ངན་ལས་མ་འདས་ཀྱི་བར་དང་། འདས་ནས་
དམ་ཆོས་མ་ནུས་ཀྱི་བར་གྱི་དགེ་བའོ། །དོན་དེ་ཉིད་སྡུད་པ་ལས་ཀྱང་། དང་པོ་བྱང་ཆུབ་མཆོག་ཏུ་སེམས་བསྐྱེད་བསྐྱེད་པ་ནས་རྣམ་པར་འདྲེན་པ་རྣམས་ཀྱི་དམ་ཆོས་ཟད་ཀྱི་དུས། དེ་བར་
ཞེས་གསུངས་ཏེ། དེ་གཉིས་ཀས་འཕགས་པ་དང་སྐྱེ་བོའི་དགེ་བ་ལ་ཡིད་རང་བ་བསྟན་ཏོ། །མདོར་ན་དུས་གསུམ་གྱི་འཕགས་པ་དང་། སྐྱེ་བོའི་དགེ་བ་ཐམས་ཅད་ཡུལ་དུ་བྱས་ནས། དབུལ་པོའི་བུས་གཏེར་རྙེད་པ་ན་ཕ་ལ་དག་པའི་རླབས་ཆེན་པོ་འབྱུང་བ་ལྟར། 
1-689
དེ་དག་ལ་གནས་སྐབས་དང་མཐར་ཐུག་གི་དོན་ཁྱད་པར་ཅན་འདི་ལྟར་སྒྲུབ་པ་ཨ་རེ། དགའ་གོ་བཙད་སྙམ་དུ་ཡིད་དགའ་བ་བྱས་ཏེ། འདི་སྐད་དུ། ཕྱོགས་བཅུའི་རྒྱལ་བ་རྣམས་དང་སངས་རྒྱས་
སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡིད་རང་། །ཞེས་སོ། །ཕན་ཡོན་ནི། སྡུད་པ་ལས། སྟོང་གསུམ་རི་རབ་
སྲང་ལ་གཞལ་བས་ཚད་གཟུང་རུང་། རྗེས་སུ་ཡིད་རང་དགེ་བ་དེ་ནི་དེ་ལྟ་མིན་ཞེས་པས་བསོད་ནམས་ཚད་མེད་པར་བཤད་དོ།། །།
༈ ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་བཏབ་པ།
དེ་ནས་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་
ལས་མི་འདའ་བར་གསོལ་བ་གདབ་པ་བྱེད་དེ། དེ་གཉིས་ནི་ཐུན་མོང་གི་བློ་སྣ་ནི། མ་ལག་རྡུམ་མའི་བུ་ཆུས་ཁྱེར་ན་ཡང་རང་ལག་པ་རྡུམ་པོར་སོང་ནས་གདོན་པའི་ནུས་པ་མེད་
ཀྱང་། བཟོད་གླགས་མེད་པས་འདོན་པའི་ནུས་པ་ཡོད་པ་དག་ལ་ར་མདའ་གྱིས་ཤིག་ཅེས་སྨྲས་ཏེ་ཆུ་ལ་སྒྲོལ་བ་ལྟར། འཁོར་བ་ན་སྒྲོལ་མ་རྒན་སེམས་ཅན་རྣམས་འཁོར་བ་དང་ངན་སོང་གི་
སྡུག་བསྔལ་དག་ལས་ཐར་པར་བྱེད་པའི་ཐབས་རང་ལ་མེད་ཀྱང་། དེ་ཉིད་བློས་མི་བཟོད་པར། ནུས་པ་དང་ལྡན་པ་ཕྱོགས་བཅུའི་སངས་རྒྱས་རྣམས་ལ་འཁོར་བ་མ་སྟོང་གི་བར་དུ་བཞུགས་ནས་ཆོས་ཀྱི་འཁོར་ལོ་བསྐོར་ཏེ་སེམས་ཅན་གྱི་དོན་མཛད་དུ་གསོལ་སྙམ་དུ་བསམས་པ་ཞེ་ཐག་པ་ནས་བྱ་ཞིང་། 
1-690
དེ་གཉིས་སོ་སོའི་བློ་སྣ་ནི་ཆོས་ཀྱི་འཁོར་ལོ་བསྐོར་བར་སྐུལ་བ་ན། འདི་ལྟར་དུ། སྔོན་འོ་སྐོལ་གི་སྟོན་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་མི་
བསྐོར་བར་སྐུལ་བའི་ས་ལ་བཞུགས་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབ་གནས་
པར་བྱའོ་སྙམ། །ཞེས་གསུང་པ་ན་ལྷ་ཚངས་པ་གཙུག་ཕུད་ཅན་འཁོར་དང་བཅས་པ་དེར་དོང་སྟེ། གསེར་གྱི་འཁོར་ལོ་རྩིབས་སྟོང་དང་ལྡན་པ་ཡོན་དུ་ཕུལ་ནས་ཆོས་ཀྱི་འཁོར་ལོ་བསྐོར་བར་གསོལ་
བ་གཏབ་པ་ལྟར། ད་ལྟར་ཕྱོགས་བཅུའི་འཇིག་རྟེན་དག་ན་སངས་རྒྱས་བཅོམ་ལྡན་འདས་གང་དག་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་མི་བསྐོར་བར་སྐུལ་བའི་ས་བཞུགས་པ་དུ་མ་
ཡོད་པས། དེ་དག་གི་སྤྱན་སྔར་ངག་གི་ལུས་གྲངས་མེད་པར་སྤྲུལ་ཏེ་གསེར་གྱི་འཁོར་ལོ་རྩིབས་སྟོང་དང་ལྡན་པ་ཡོན་དུ་ཕུལ་ནས། འཁོར་བ་ན་གནས་པའི་སེམས་ཅན་སྡུག་བསྔལ་བ་དཔག་ཏུ་
མེད་པ་བསྒྲལ་བའི་སླད་དུ་ཆོས་ཀྱི་འཁོར་ལོ་བསྐོར་བར་མཛད་དུ་གསོལ་སྙམ་དུ་བསམས་ཏེ། གང་རྣམས་ཕྱོགས་བཅུ་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །
1-691
འཁོར་ལོ་བླ་ན་མེད་པ་བསྐོར་བ་སྐུལ། །ཞེས་སོ།། །། མྱ་ངན་ལས་མི་འདའ་བར་གསོལ་བ་བཏབ་པ་ནི། སྔོན་འོ་སྐོལ་ཀྱི་སྟོན་པ་དགུང་ལོ་སུམ་ཅུ་སོ་དྲུག་པ་ལས་མངོན་པར་རྫོགས་པར་
སངས་རྒྱས་ནས། དགུང་ལོ་བརྒྱད་ཅུའི་བཞུགས་ཏེ་གདུལ་བྱ་དཔག་ཏུ་མེད་པ་མཐོ་རིས་དང་བྱང་གྲོལ་ལ་བཀོད་ནས། སླར་ཡང་མྱ་ངན་ལས་འདའ་བའི་ཚུལ་སྟོན་པར་བཞེད་པས་གྲོང་ཁྱེར་རྩ་མཆོག་གི་
ཤིང་ས་ལ་ཟུག་གི་བར་དུ་གཟིམས་མལ་གྱི་ཐ་མ་ལ་བཞུགས་པ་ལྟར་ཀྱི་བར་དུ། ད་ལྟར་ཡང་ཕྱོགས་བཅུའི་འཇིག་རྟེན་གྱི་དག་ན་སངས་རྒྱས་བཅོམ་ལྡན་འདས་གང་དག་སེམས་ཅན་དཔག་ཏུ་
མེད་པའི་དོན་གྱི་སླད་དུ་བསྐལ་པ་གྲངས་མེད་པར་བཞུགས་ནས་སེམས་ཅན་གྱི་དོན་མཛད་དུ་གསོལ་སྙམ་དུ་བསམ་ཏེ། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་
བའི་ཕྱིར། །བསྐལ་པ་ཞིང་ནི་རྡུལ་རྙེད་བཞུགས་པར་ཡང་། །བདག་གི་ཐལ་མོ་རབ་སྦྱར་གསོལ་བར་བགྱི། །ཞེས་སོ།། །།
༈ བསྔོ་བ་བཤད་པ།
བསྔོ་བ་ནི། དགེ་བ་རྣམས་རྫོགས་པའི་སངས་རྒྱས་སུ་རྒྱུར་བར་བྱེད་པའི་བྱེད་པ་མཆོག་
དང་ལྡན་པ་ཞིག་སྟེ། མགོན་པོ་བྱམས་པའི་ཞལ་སྔ་ནས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །ཞེས་སོ། །འདི་ཤིན་ཏུ་གལ་ཆེ་སྟེ། མ་བསྔོས་ན་དགེ་བ་བྱས་ཀྱང་འཛད་པའི་རྒྱུ་ཁོང་ཁྲོ་དང་ལོག་ལྟ་དང་འགྱོད་པ་སྐྱེས་པ་དང་ལོག་པར་བསྔོས་པས་འཛད་པ་ལ་སོགས་པ་མང་དུ་གསུངས་ལ། 
1-692
སངས་རྒྱས་སུ་བསྔོས་ན་དེ་དག་གིས་མི་འཛད་ཅིང་བསོད་ནམས་ཚད་མེད་པ་འཐོབ་སྟེ། མདོ་ལས། ཆུའི་ཐིགས་པ་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་
ཆུབ་ཡོངས་བསྔོ་དགེ་བ་ཡང་། །བྱང་ཆུབ་མི་ཐོབ་པར་དུ་དེ་མི་འཛད། །ཅེས་དང་། བཞི་བརྒྱ་པའི་འགྲེལ་པར། སེམས་ཅན་རྣམས་མཐའ་ཡས་ཕྱིར་དང་། །སངས་རྒྱས་མཁྱེན་པ་ཚད་མེད་དང་། །དེར་ནི་ཡོངས་སུ་
བསྔོས་པའི་ཕྱིར། །བསོད་ནམས་དེ་ནི་ཚད་མེད་དོ། །ཞེས་སོ། །དེ་ལྟར་མི་ཟད་ཅིང་འཕེལ་བ་དང་བྱང་ཆུབ་ཀྱི་རྒྱུར་བསྒྱུར་བ་ན་ཅི་ནས་ཀྱང་བསྔོ་བས་གདབ་བོ། །དེ་ཡང་སྤེལ་ནས་དངོས་ན་
བསོད་ནམས་འགྱུར་ཆེ་བས། དགེ་བའི་བཤེས་གཉེན་ཤར་བ་པ་ནི་ཚོགས་སུ་བསྔོ་བ་མཛད་པ་ཐམས་ཅད་ལ་དེ་ལྟར་མཛད་སྐད་དོ། །འོ་སྐོལ་གྱི་འདིར་ནི། ཐོག་མར་ས་གཞི་བྱིན་གྱིས་རློབ་པར་
མཛད་པ་ཆོས་ལུང་སྐུ་གཤེགས་ཀྱི་ནཻར་གྱི་ཡོན་བདག་ཚོང་བསྒོམ་ཞེས་པས་དགེ་འདུན་བསྙེན་བཀུར་བྱས་པའི་ཚེ་སྤེལ་ནས་བསྔོ་བ་མཛད་ཅེས་གསུང་སྐད་ལ། དེའི་རྗེས་སུ་བྱོན་པའི་དམ་པ་རྣམས་ཀྱིས་
ཀྱང་དེ་ལྟར་ལན་རེ་ལན་གཉིས་མཛད་པར་གསལ་གྱི་དུས་རྒྱུན་དུ་མི་མཛད་པར་སྣང་ངོ་། །འོན་ཀྱང་། སྲོད་ཀྱི་ཡན་ལག་བདུན་པའི་ཐད་དུ་དེ་ལྟར་མཛད་པར་སྣང་བས། འདི་ལྟར། འདས་པའི་དུས་སུ་བྱས་པའི་དགེ་བ་རྣམས་ལ་གོ་བཅད་སྙམ་དུ་རོ་མྱང་། 
1-693
མ་འོངས་པ་ན་བྱེད་པར་འགྱུར་བ་རྣམས་ལ་འདུན་པར་དྲག་པོས་བྲོད་པར་བྱ། ད་ལྟར་བྱེད་བཞིན་པ་རྣམས་ལ་ཨ་རེ་ལེགས་དོན་ཁྱད་པར་ཅན་གྲུབ་སྙམ་དུ་དགའ་བ་སྒོམ། དེ་ལྟར་བྱས་
པས་ཀྱང་འཕེལ་ནས་འགྲོ་ཞེས་གསུང་ངོ་། །ཡང་དེ་ཐམས་ཅད་བློས་གཅིག་ཏུ་བསྡོམ་ནས་ངག་ཏུ་དགེ་བ་ཅི་བྱས་པ་ཐམས་ཅད་བླ་མ་དགེ་བའི་བཤེས་གཉེན་མཁན་པོ་དང་སློབ་དཔོན་ཆོས་ཀྱི་ཕན་
གདགས་པ་རྣམས་ལ་དབུལ་བར་བགྱིའོ། །དེ་ལྟར་ཕུལ་བས་བླ་མ་བདེ་བར་གཤེགས་པ་རྣམས་ཀྱི་ཐུགས་དགོངས་ཁྱད་པར་ཅན་གོང་ནས་གོང་དུ་ཡོངས་སུ་རྫོགས་པར་གྱུར་ཅིག བླ་མ་ཞལ་བཞུགས་པ་རྣམས་
སྐུ་ཁམས་བཟང་ཞིང་སྐུ་ཚེ་དང་འཕྲིན་ལས་ཀྱི་བར་དུ་གཅོད་པ་ཐམས་ཅད་ཞི་བར་གྱུར་ཅིག་ཅེས་བརྗོད་ཅིང་ཡིད་ལའང་དེ་ལྟར་བསམ་མོ། །ཡང་དེ་ལྟར་བྱས་པའི་དགེ་བ་ཐམས་ཅད་བསྡོམས་ནས།
དགེ་བའི་རྩ་བ་འདི་ཐམས་ཅད་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་དབུལ་བར་བགྱིའོ། །དེ་ལྟར་ཕུལ་བས་དེ་དག་གི་ཕོ་བྲང་
དུ་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་འབྱུང་བར་གྱུར་ཅིག་ཅེས་བརྗོད་ལ་དེ་ལྟར་བསམ་མོ། །ཡང་དེ་ལྟར་བསྒྲུབས་པའི་དགེ་བ་ཐམས་ཅད་བསྡོམས་ནས། དགེ་བའི་རྩ་བ་འདི་ཐམས་ཅད་འཇིག་རྟེན་ན་ཆོས་སྒྲུབ་པ་པོ་རྣམས་ལ་དབུལ་བར་བགྱིའོ། །
1-694
དེ་ལྟར་ཕུལ་བས་དེ་དག་གིས་ཆོས་སྒྲུབ་པའི་བར་ཆད་ཐམས་ཅད་ཞི་ཞིང་། མཐུན་རྐྱེན་ཐམས་ཅད་ཚང་ནས་སྒྲུབ་པ་མཐར་ཕྱིན་པར་གྱུར་ཅིག་ཅེས་བརྗོད་ཅིང་དེ་ལྟར་བསམ་མོ། །དེ་དག་གིས་ནི་
དགེ་བ་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་གྱུར་པས་དེ་དག་ལ་དཔེར་བརྗོད་དང་བཅས་ཏེ་གསུང་ལས་འབྱོན་པར་སྣང་ངོ་། །མདུན་གྱི་ནམ་མཁའི་གནས་སུ་སངས་རྒྱས་དང་བྱང་ཆུབ་སེམས་
དཔའ་དཔག་ཏུ་མེད་པ་བཞུགས་པའི་མོས་པ་དང་། ད་ལྟ་བྱེད་བཞིན་པའི་དགེ་བའི་གཙོ་བྱས་དུས་གསུམ་གྱི་དགེ་བ་བློ་ལ་བསྡོགས་ནས་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་རྫོགས་
པའི་སངས་རྒྱས་ཐོབ་པར་གྱུར་ཅིག་སྙམ་པའི་འདུན་པ་དང་། དེ་ཐམས་ཅད་རྨི་ལམ་སྒྱུ་མ་ལྟ་བུར་ཤེས་པའི་ངང་ནས་བསྔོ་སྟེ། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡིད་རང་
བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོ་འོ། །ཞེས་སོ། །དེ་ནས་གནས་སྐབས་ཀྱི་སྨོན་ལམ་གདབ་སྟེ། འཇིག་རྟེན་གྱི་གཏམ་ལ་ཞག་
གསུམ་གྱི་རྒྱགས་ཡོད་ན་ལོ་གསུམ་གྱི་གྲོས་འབྱུང་ཞེས་པ་ལྟ་བུའོ། །དེ་ནི་འདི་ལྟར། སངས་རྒྱས་མ་ཐོབ་ཀྱི་བར་དུ་ཡང་སྐྱེ་བ་ཐམས་ཅད་དུ་ལྷ་དང་མིའི་ལུས་ཕུན་སུམ་ཚོགས་པ་ཐོབ་པར་གྱུར་ཅིག 
1-695
དེ་ཐོབ་ནས་ཀྱང་ཐེག་པ་ཆེན་པོའི་ཆོས་སྒྲུབ་ཅིང་ཉམས་སུ་ལེན་པར་གྱུར་ཅིག དེ་སྒྲུབ་པ་ལ་དགེ་བའི་བཤེས་གཉེན་ལ་སོགས་པ་མཐུན་རྐྱེན་ཐམས་ཅད་ཚང་བར་གྱུར་ཅིག སྡིག་པའི་གྲོགས་པོ་
ལ་སོགས་པ་འགལ་རྐྱེན་ཐམས་ཅད་སྤང་བར་གྱུར་ཅིག ཕྱི་ནང་གི་བར་ཆད་མེད་པར་སྒྲུབ་པ་མཐར་ཕྱིན་པར་གྱུར་ཅིག ཚེ་རབས་ནས་ཚེ་རབས་ཐམས་ཅད་དུ་དམ་པའི་ཆོས་འཛིན་པར་གྱུར་ཅིག
བྱང་ཆུབ་ཀྱི་སེམས་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག ཕ་རོལ་ཏུ་ཕྱིན་པ་དྲུག་གི་སྤྱོད་པ་ཉམས་སུ་ལེན་པར་གྱུར་ཅིག་ཅེས་བརྗོད་པར་མཛད་པ་དམ་པ་རྣམས་ཀྱི་ཕྱག་ལེན་
དུ་མཛད་དོ།། །།
༄། །ཕུང་པོ་གསུམ་པའི་ལྟུང་བཤགས་གདོན་པ།
དེ་ནས་ཕུང་པོ་གསུམ་པའི་ལྟུང་བཤགས་གདོན་པར་བྱ་སྟེ། ཉེ་བར་འཁོར་གྱི་ཞུས་པའི་མདོ་ལས། སེམས་བསྐྱེད་པ་བྱས་པ་རྣམས་ཀྱི་དེའི་བསླབ་བྱ་དང་འགལ་བའི་ཉེས་པ་སངས་རྒྱས་
སུམ་ཅུ་རྩ་ལྔའི་མདུན་དུ་བཤགས་པར་གསུངས་པའི་ཕྱོར་རོ། །དེའི་ཕྱིར་དམ་པ་རྣམས་ཀྱི་ཕྱག་ལེན་ལ་བར་སྐབས་འདིར་ལྟུང་བཤགས་ཚར་གཅིག་ཙམ་ངེས་པར་འདོན་པར་མཛད་དོ། །དེ་ཡང་སློབ་དཔོན་འཕགས་
པ་ཀླུ་སྒྲུབ་ཀྱིས་དེ་ཉིད་ཀྱི་འགྲེལ་པ་མཛད་པ་ལས་ཕྱོགས་ཐ་དད་ནས་བཞུགས་པར་གསུང་ལ། སློབ་དཔོན་ཀྲིཀྴ་པས་མཛད་པའི་ཕུང་པོ་གསུམ་པའི་སྒྲུབ་ཐབས་ལས། དེ་ནས་བྱང་ཤར་ཕྱོགས་གནས་པ། །
1-696
རྒྱལ་བ་སུམ་ཅུ་རྩ་ལྔ་རྣམས། །རྒྱལ་སྲས་ལྷག་པའི་ལྷ་ཀུན་དང་། །རང་བཞིན་དབྱེར་མེད་བསམ་བྱས་ཏེ། །ཞེས་གང་གསུངས་པའམ། དམ་པ་རྣམས་ནི་འདི་དག་བྱང་ཤར་གྱི་ཕྱོགས་ན་བཞུགས་པས་དེའི་ངོས་
སུ་དེར་ཁ་བལྟས་ལ་གདོན་པར་བྱའོ་ཞེས་གསུང་སྐད་ལ། གསུང་ལས་ཀྱང་། གནས་ཁང་སྟབས་བདེ་ན་དེ་ལྟར་བྱ་ཞིང་སྟབས་མ་བདེ་ན་དེ་ལྟར་བསམས་ཏེ་བཏོན་པས་ཆོག་ཅེས་གསུངས་བས་དེ་བཞིན་
བྱས་ནས། རང་གི་མདུན་ན་དེ་དག་མངོན་སུམ་དུ་བཞུགས་པར་བསམས་པའི་སྤྱན་སྔར་སྟོབས་བཞི་ཚང་བར་བྱ་སྟེ་གདོན་པར་བྱའོ། །དེ་ཡང་འདི་ལྟར་རྟེན་གྱི་སྟོབས་ནི། བདག་མིང་འདི་ཞེས་བགྱི་བ་
སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ་ཞེས་པས་སྐྱབས་སུ་མཆིའོ། །དེའི་རྗེས་སུ་བྱང་ཆུབ་ཀྱི་སེམས་དྲན་པར་བྱེད་པའོ། །སུན་འབྱིན་པའི་སྟོབས་ནི་སེམས་བསྐྱེད་
ཀྱི་བསླབ་བྱ་དང་འགལ་བའི་སྡིག་པས་གཙོ་བྱས་པས་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་བྱས་པའི་སྡིག་པ་རྣམས་དྲན་པརབྱས་ནས། རྨི་ལམ་སྒྱུ་མ་ལྟ་
བུའི་ཚུལ་དུ་རང་གི་ལྕེ་སྟེང་ན་ཡོད་པར་བསམས་ཤིང་། ཤ་དུག་ཅན་ཟོས་པའི་མི་ལྟར་སྡིག་པ་ལ་འགྱོད་པ་དྲག་པོས་ཕྱག་འཚལ་ལོ་ཞེས་པ་ལ་སོགས་པའི་ཚིག་བརྗོད་པ་ན་བྱེ་མའི་རགས་ཕུ་ཆུས་དྲག་པོ་ཕོག་པ་ལྟར་སོང་བར་བསམས་ཏེ་གདོན་ནོ། །
1-697
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །རྡོ་རྗེ་སྙིང་པོ་རབ་ཏུ་འཇོམས་པ་ལ་ཕྱག་འཚལ་ལོ། །རིན་ཆེན་འོད་འཕྲོ་ལ་ཕྱག་འཚལ་
ལོ། །ཀླུ་དབང་གིས་རྒྱལ་པོ་ལ་ཕྱག་འཚལ་ལོ། །དཔའ་བོ་སྡེ་ལ་ཕྱག་འཚལ་ལོ། །དཔལ་དགྱེས་ལ་ཕྱག་འཚལ་ལོ། །རིན་ཆེན་མེ་ལ་ཕྱག་འཚལ་ལོ། །རིན་ཆེན་ཟླ་འོད་ལ་ཕྱག་འཚལ་ལོ། །མཐོང་བ་
དོན་ཡོད་ལ་ཕྱག་འཚལ་ལོ། །རིན་ཆེན་ཟླ་བ་ལ་ཕྱག་འཚལ་ལོ། །དྲི་མ་མེད་པ་ལ་ཕྱག་འཚལ་ལོ། །དཔལ་སྦྱིན་ལ་ཕྱག་འཚལ་ལོ། །ཚངས་པ་ལ་ཕྱག་འཚལ་ལོ། །ཚངས་པས་བྱིན་ལ་ཕྱག་འཚལ་
ལོ། །ཆུ་ལྷ་ལ་ཕྱག་འཚལ་ལོ། །ཆུ་ལྷའི་ལྷ་ལ་ཕྱག་འཚལ་ལོ། །དཔལ་བཟང་ལ་ཕྱག་འཚལ་ལོ། །ཙན་དན་དཔལ་ལ་ཕྱག་འཚལ་ལོ། །གཟི་བརྗིད་མཐའ་ཡས་ལ་ཕྱག་འཚལ་ལོ། །འོད་དཔལ་ལ་ཕྱག་འཚལ་
ལོ། །མྱ་ངན་མེད་པའི་དཔལ་ལ་ཕྱག་འཚལ་ལོ། །སྲེད་མེད་ཀྱི་བུ་ལ་ཕྱག་འཚལ་ལོ། །མེ་ཏོག་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་ཚངས་པའི་འོད་ཟེར་རྣམ་པར་རོལ་པ་མངོན་པར་མཁྱེན་
པ་ལ་ཕྱག་འཚལ་ལོ། །དེ་བཞིན་གཤེགས་པ་པདྨའི་འོད་ཟེར་རྣམ་པར་རོལ་པ་མངོན་པར་མཁྱེན་པ་ལ་ཕྱག་འཚལ་ལོ། །ནོར་དཔལ་ལ་ཕྱག་འཚལ་ལོ། །དྲན་པའི་དཔལ་ལ་ཕྱག་འཚལ་ལོ། །མཚན་དཔལ་ཤིན་ཏུ་ཡོངས་གྲགས་ལ་ཕྱག་འཚལ་ལོ། །
1-698
དབང་པོ་ཏོག་གི་རྒྱལ་མཚན་གྱི་རྒྱལ་པོ་ལ་ཕྱག་འཚལ་ལོ། །ཤིན་ཏུ་རྣམ་པར་གནོན་པའི་དཔལ་ལ་ཕྱག་འཚལ་ལོ། །གཡུལ་ལས་ཤིན་ཏུ་རྣམ་པར་རྒྱལ་བ་ལ་ཕྱག་འཚལ་ལོ། །རྣམ་པར་གནོན་པ་
གཤེགས་པའི་དཔལ་ལ་ཕྱག་འཚལ་ལོ། །ཀུན་ནས་སྣང་བ་བཀོད་པའི་དཔལ་ལ་ཕྱག་འཚལ་ལོ། །རིན་ཆེན་པདྨ་རྣམ་པར་གནོན་པ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིན་པོ་ཆེ་པདྨའི་གདན་ལ་རབ་ཏུ་བཞུགས་པ་རི་དབང་གི་རྒྱལ་པོ་ལ་ཕྱག་འཚལ་ལོ། །དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་བཞུགས་ཏེ་མཚོ་ཞིང་བཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་བ་འདི་དང་སྐྱེ་
བ་ཐོག་མ་དང་ཐ་མ་མཆིས་པ་ནས་འཁོར་བ་ན་འཁོར་བའི་ཚེ་སྐྱེ་གནས་གཞན་དག་ཏུ་སྡིག་པའི་ལས་བགྱིད་པ་དང་། བགྱིད་དུ་རྩལ་པ་དང་། བགྱིད་ལ་རྗེས་སུ་ཡི་རང་བའམ། མཆོད་རྟེན་
གྱི་དཀོར་རམ། དགེ་འདུན་གྱི་དཀོར་རམ། ཕྱོགས་བཞིའི་དགེ་འདུན་གྱི་དཀོར་ཕྲོགས་པ་དང་། འཕྲོག་ཏུ་རྩལ་པ་དང་། འཕྲོག་པ་ལ་རྗེས་སུ་ཡི་རང་བའམ། མཚམས་མ་མཆིས་པ་ལྔའི་ལས་བགྱིས་པ་དང་། བགྱིད་དུ་རྩལ་པ་དང་། 
1-699
བགྱིད་པ་ལ་རྗེས་སུ་ཡི་རང་བའམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླང་བ་ལ་ཞུགས་པ་དང་། འཇུག་དུ་རྩལ་པ་དང་། འཇུག་པ་ལ་རྗེས་སུ་ཡི་རང་བའམ། ལས་ཀྱི་སྒྲིབ་
པ་གང་གི་སྒྲིབས་ནས་བདག་སེམས་ཅན་དམྱལ་བར་མཆི་བའམ། དུད་འགྲོའི་སྐྱེ་གནས་སུ་མཆི་བའམ། ཡི་དྭགས་ཀྱི་ཡུལ་དུ་མཆི་བའམ། ཀླ་ཀློར་སྐྱེ་བའམ། ལྷ་ཚེ་རིངས་པོ་རྣམས་ཀྱི་ནང་དུ་སྐྱེ་བའམ།
དབང་པོ་མ་ཚང་བར་འགྱུར་བའམ། ལྟ་བ་ལོག་པར་འཛིན་པར་འགྱུར་བའམ། སངས་རྒྱས་འབྱུང་བ་ལ་མཉེས་པར་མི་བགྱིད་པའི་འགྱུར་བའི་འགྱུར་བའི་ལས་ཀྱི་སྒྲིབ་པ་གང་ལགས་པ་དེ་དག་ཐམས་ཅད་
སངས་རྒྱས་བཅོམ་ལྡན་འདས་ཡེ་ཤེས་སུ་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་ཅིང་གཟིགས་པ་དེ་དག་གི་སྤྱོན་སྔར་མཐོལ་ལོ་བཤགས་སོ། །མི་འཆབ་བོ། །ཉེས་པ་
ལས་ལྡོག་པའི་སྟོབས་ནི་ཤ་དུག་ཅན་ཟོས་པ་ལྟར་ད་ཕྱིན་ཅད་སྲོག་ལ་ཐུག་ཀྱང་དེ་ལྟ་བུ་ཡི་སྡིག་པ་མི་བྱ་སྙམ་པའི་བློས། སླན་ཆད་ཀྱང་སྡོམ་པར་བགྱིད་ལགས་སོ་ཞེས་པའོ། ། འདི་
མན་ཆད་ནི་གཉེན་པོ་ཀུན་ཏུ་སྤྱོད་པའི་སྟོབས་སུ་མཛད་དེ། དེ་ནས་བསོད་ནམས་བྱ་བའི་གཞི་གསུམ་དུ་གནས་སོ། །དང་པོ་སྦྱིན་པ་ལས་བྱུང་བའི་བསོད་ནམས་བྱ་བའི་གཞི་ནི། སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། 
1-700
བདག་གི་སྐྱེ་བ་འདི་དང་སྐྱེ་བ་ཐོག་མ་དང་ཐ་མ་མ་མཆིས་པ་ནས་འཁོར་བ་ན་འཁོར་བའི་ཚེ་སྐྱེ་གནས་གཞན་དག་ཏུ། སྦྱིན་པ་ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་
ཁམ་གཅིག་ཙམ་སྩལ་པ་གང་ལགས་པ་དང་ཞེས་པའོ། །གཉིས་པ་ཚུལ་ཁྲིམས་ལས་བྱུང་བའི་བསོད་ནམས་བྱ་བའི་གཞི་ནི། བདག་གིས་ཚུལ་ཁྲིམས་སྲུང་པ་གང་ལགས་པ་དང་། བདག་གི་ཚངས་པར་སྤྱོད་པ་
ལ་གནས་པའི་དགེ་བའི་རྩ་བ་གང་ལགས་པ་དང་ཞེས་པའོ། །གསུམ་པ་བསྒོམ་པ་ལས་བྱུང་པའི་བསོད་ནམས་བྱ་བའི་གཞི་ནི། འདི་མན་ཆད་ཀྱིས་བསྟན་ཏེ། བདག་གིས་སེམས་ཅན་ཡོངས་སུ་སྨིན་པར་
བགྱིས་པའི་དགེ་བའི་རྩ་བ་གང་ལགས་པ་དང་བདག་གིས་བྱང་ཆུབ་ཏུ་སེམས་བསྐྱེད་པའི་དགེ་བའི་རྩ་བ་གང་ལགས་པ་དང་། བདག་གི་བླ་ན་མེད་པའི་ཡེ་ཤེས་ཀྱི་དགེ་བའི་རྩ་བ་གང་
ལགས་པ་དེ་དག་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་གཞལ་ནས་མ་ལུས་པར། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མི་ཡང་གོང་མས་ཡོངས་སུ་བསྔོ་བས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་བར་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བར་འགྱུར་བ་དང་། 
1-701
ཇི་ལྟར་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ད་ལྟར་ཡོངས་སུ་བསྔོ་བ་མཛད་པ་དེ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། །སྡིག་པ་ཐམས་ཅད་ནི་སོ་སོར་བཤགས་སོ། །བསོད་
ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་གསོལ་བ་འདེབས་སོ། །བདག་གི་ཡེ་ཤེས་བླ་ན་མེད་པའི་མཆོག་ཏུ་གྱུར་ཅིག །མི་མཆོག་རྒྱལ་བ་གང་དག་ད་ལྟར་བཞུགས་པ་
དང་། །གང་དག་འདས་པ་དག་དང་དེ་བཞིན་གང་མ་བྱོན། །ཡོན་ཏན་བསྔགས་པ་མཐའ་ཡས་རྒྱ་མཚོའི་འདྲ་ཀུན་ལ། །ཐལ་མོ་སྦྱར་བ་བགྱིས་ཏེ་སྐྱབས་སུ་ཉེ་བར་མཆི་ཞེས་པའོ། །དེ་ནས་ཇོ་བོས་
མཛད་པའི་སྤྱི་བཤགས་ཞེས་པ་ཚར་གསུམ་གདོན་ཏེ། འདི་ནི་བཅས་པ་དང་། རང་བཞིན་གྱི་སྡིག་པ་ཐམས་ཅད་བཤགས་པ་ཡིན་པས་སྤྱི་བཤགས་ཞེས་པའམ། དེའི་མགོ་ན་བླ་མ་རྡོ་རྗེ་འཛིན་པ་ཞེས་
པ་ཡོད་པས་ཁ་ཅིག་བླ་མ་རྡོར་འཛིན་ཞེས་ཀྱང་ཟེར་རོ། །གསུང་ལས། འདི་ལ་སྦྱང་བྱ་སྡིག་པའི་སྒོ་དྲུག་པོ་ཕལ་ཆེ་བའང་ཚང་སྟེ། དུས་ཀྱི་སྒོ་འཁོར་བ་ཐོག་མ་མེད་པ་ནས་ཐ་
མ་ད་ལྟ་ལ་ཐུག་གི་བར་དུ་ཞེས་པ་དང་། རྒྱུའི་སྒོ་འདོད་ཆགས་དང་ཞེ་སྡང་དང་གཏི་མུག་གི་དབང་གིས་ཞེས་པ་དང་། རྟེན་གྱི་སྒོ་ངམ། སྒོའི་སྒོ་ལུས་དང་ངག་དང་ཡིད་ཀྱི་སྒོ་ནས་ཞེས་པ་དང་། 
1-702
ངོ་བོའི་སྒོ་མི་དགེ་བ་བཅུ་ཞེས་པ་ལ་སོགས་པ་དང་། བྱེད་པའི་སྒོ་མདོར་ན་ཞེས་པ་ལ་སོགས་པས་བསྟན་ཞེས་གསུང་གསུང་ངོ་། །དེ་ནས་འཁོར་བ་ཐོག་མ་མེད་པ་ནས་བསགས་པའི་སྡིག་
པ་རྣམས་རྨི་ལམ་སྒྱུ་མ་ལྟ་བུའི་ཚུལ་དུ་རང་གི་ལྕེའི་སྟེང་ན་ནག་ཕུང་ངེ་ཡོད་པར་བསམས་ནས། བཤགས་པའི་ཚིག་བརྗོད་པ་ན་གོང་དུ་བསྟན་པ་ལྟར་བྱེ་མའི་རགས་ལ་ཕུ་ཆུས་ཕོག་
པའམ། སྣང་བས་མུན་པ་སེལ་བ་ལྟར་སོངས་བར་བསམས་ཏེ་གདོན་ནོ། །དེ་ནི་འདི་ལྟར། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་
དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ། འདོད་ཆགས་དང་ཞེ་སྡང་དང་གཏི་མུག་གི་དབང་གིས་ལུས་
དང་ངག་དང་ཡིད་ཀྱི་སྒོ་ནས་མི་དགེ་བ་བཅུ་བགྱིས་པ་དང་མཚམས་མེད་པ་ལྔ་དང་། དེ་དང་ཉེ་བར་ལྔ་དང་། སོ་སོར་ཐར་པའི་སྡོམ་པ་དང་འགལ་བ་དང་། བྱང་ཆུབ་སེམས་དཔའི་བསླབ་
པ་དང་འགལ་བ་དང་། གསང་སྔགས་ཀྱི་དམ་ཚིག་དང་འགལ་བ་དང་། དཀོན་མཆོག་གསུམ་ལ་གནོད་པའི་ལས་བགྱིས་པ་དང་། དམ་པའི་ཆོས་སྤངས་པ་དང་། འཕགས་པ་ལ་བསྐུར་བ་བཏབ་པ་ལ་སོགས་པ་མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་། 
1-703
འཁོར་བ་དང་ངན་སོང་གི་རྒྱུར་གྱུར་པའི་ཉེས་ལྟུང་གྱི་ཚོགས་ཅི་མཆིས་པ་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་
དཔའ་ཐམས་ཅད་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་པོ། མཐོང་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་དེ་ལྟར་མི་འགྱུར་ལགས་སོ་ཞེས་པའོ། །
གསུང་ལས། ཇོ་བོས་མཛད་པ་དེ་ལ་གསང་སྔགས་ཀྱི་དམ་ཚིག་དང་འགལ་བ་ལ་སོགས་པ་མདོར་ན་ཞེས་པ་དེ་ལྟར་འབྱུང་ལ། བར་སྐབས་ཀྱི་དཀོན་མཆོག་གསུམ་ལ་གནོད་པའི་ལས་བགྱིས་པ་དང་
ཞེས་པ་ལ་སོགས་པ་ཚིགས་གསུམ་དེ་དགེ་བའི་བཤེས་གཉེན་ཕོ་ཆུང་བས་བཅུག་པ་ཡིན་ཅེས་གསུང་སྟེ། ཁོང་གི་ཞལ་ནས། འདི་རྣམས་རང་གི་སེམས་ལ་གནད་ནས་བཅུག་པའི་ཡིན། མདོ་སོགས་ལྷད་འཇུག་
གི་ཉེས་པ་ནི་མི་འབྱུང་སྟེ་མཆི་ཞེས་གསུང་སྐད་ཅེས་གསུང་གསུང་ངོ་། །ཡང་ཁ་ཅིག་ལས། ཕ་དང་མ་ལ་མ་གུས་པ་དང་བྱ་བ་ལ་སོགས་པ་འབྱུང་མོད་ཀྱི། སྣར་ཐང་པའི་བླ་མ་
དམ་པའི་རྣམས་ཀྱི་ཕྱག་ལེན་ལ་དེ་ལྟར་མི་འབྱུང་བས་དེའི་རྗེས་སུ་འབྲང་བར་ཁས་ལེན་པ་དག་གིས་དེ་དག་དོར་བར་བྱའོ། །མཇུག་ཏུ་ཚིག་འདི་དག་གི་གསོལ་བ་གདབ་པར་བྱ་སྟེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། 
1-704
ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་གིས་ཕྱིན་ཅི་ལོག་གི་དྲི་མ་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། ཕྱིན་ཅི་མ་ལོག་པའི་རྟོགས་པ་བསྐྱེད་
དུ་གསོལ། ཐེག་པ་ཆེན་པོའི་ཆོས་སྒྲུབ་པའི་བར་ཆད་ཐམས་ཅད་བསལ་དུ་གསོལ་ཞེས་ལན་གསུམ་དང་། དེ་ནས། བསོད་ནམས་འདིའི་ཐམས་ཅད་གཟིགས་པ་ཡི། །གོ་འཕང་ཐོབ་ཅིང་སྐྱོན་གྱི་དགྲ་བཏུལ་ཏེ། །སྐྱེ་
རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་དང་། མཐོང་ཞིང་ཐོས་སམ་རྗེས་སུ་དྲན་ཡང་རུང་། །རེག་གམ་གཏམ་དུ་བརྗོད་པར་གྱུར་ཀྱང་རུང་། །རྣམ་པ་ཀུན་
ཏུ་འགྲོ་ལ་ཕན་པ་ནི། །བདེ་དང་ལྡན་པ་རྟག་ཏུ་བྱེད་གྱུར་ཅིག །ཅེས་དང་། སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་དང་བྲལ་སྟེ་བདེན་པའི་མཆོག །དགེ་འདུན་འདུས་པའི་གཙོ་
སྟེ་བདེན་པའི་མཆོག །བདེན་པའི་མཆོག་ནི་དཀོན་མཆོག་གསུམ་ཡིན་པས། །དཀོན་མཆོག་གསུམ་གྱི་བདེན་པའི་བྱིན་བརླབས་ཀྱིས། །བདག་ཅག་གི་ཇི་ལྟར་གསོལ་བ་བཏབ་པ་བཞིན་འགྲུབ་པར་གྱུར་ཅིག་ཅེས་བརྗོད་པ་ནི་
དམ་པ་རྣམས་ཀྱི་ཕྱག་ལེན་ཡིན་ནོ། །ཆོས་སྤྱོད་ཡན་ལག་བདུན་པ་རྒྱས་པ་བྱེད་པའི་ཚུལ་བཤད་ཟིན་ཏོ།། །།
༈ ཆོས་སྤྱོད་ཡན་ལག་བདུན་པ་བསྡུས་པ་བྱེད་པའི་ཚུལ་བཤད་པ།
ད་ནི་བསྡུས་པ་བྱེད་པའི་ཚུལ་བཤད་པར་བྱ་སྟེ། ཆུ་མིག་པ་ཆེན་པོའི་ཕྱག་ལེན་གྱིས། 
1-705
བླ་མའི་ཕྱག་གསུམ་དང་། དཀོན་མཆོག་གསུམ་པོ་ཕྱག་རེ་རེ་དང་ཕྱག་གི་ཡུལ་ཐམས་ཅད་བསྡུས་པ། ཕྱོགས་བཅུ་དུས་གསུམ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ་
ཞེས་པས་ཕྱག་བྱས་ནས། དངོས་སུ་བཤམ་པའི་མཆོད་པ་ཨོཾ་ཨཱ་ཧཱུྃ་ཞེས་བརྗོད་ལ་དབུལ་ཞིང་། གཞན་རྣམས་ཀྱང་བློས་ལོངས་སྤྱོད་ཀྱི་བསམས་ལ་དབུལ་ལོ། །དེ་ནས་སྐྱབས་འགྲོ་སེམས་བསྐྱེད་མདོར་བསྡུས་པ་བྱ་
ཞིང་། སྡིག་པ་བཤགས་པ་ལ་སོགས་པའི་བློ་སྣ་དྲན་པར་བྱས་ལ། སྡིག་པ་ཐམས་ཅད་ནི་སོ་སོར་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་གསོལ་བ་
འདེབས་སོ། །བདག་གི་ཡེ་ཤེས་བླ་ན་མེད་པའི་མཆོག་ཏུ་གྱུར་ཅིག་ཅེས་པའོ། །དེ་བས་ཀྱང་བསྡུས་པ་བྱེད་ན་བླ་མའི་ཕྱག་གཅིག་ལ་བསྡུས་ནས་གཞན་སྔར་དང་འདྲ་བར་མཛད་པ་སྣང་ངོ་། །དེ་
ལྟར་མཚན་མོའི་ཆོས་སྤྱོད་ཡན་ལག་བདུན་པ་ལ་ཚར་བ་དང་བསྐོར་བ་ལ་འཇུག་པར་བྱའོ། །དེའི་ཕན་ཡོན་ནི། ལུས་ལས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆུ་
མངས་གང་ན་བ་དེར་འདོང་ངོ་ཞེས་གསུང་ནས་དེར་གཤེགས་པ་དང་། ཕྱོགས་གཞན་ཞིག་ན་བྲམ་ཟེ་ཞིག་ཞིང་རྨོད་པ་དེས། བཅོམ་ལྡན་འདས་ཀྱི་སྐུ་མཚན་དང་དཔེ་བྱད་ཀྱིས་བརྒྱན་པ་མཐོང་ནས། དེས་བསམས་པ། 
1-706
གོའུ་ཏ་མའི་དྲུང་དུ་ཕྱག་འཚལ་དུ་སོང་བ་ན་བདག་གི་ལས་འཆོར་ལ། མ་སོང་ན་ནི་བསོད་ནམས་ཡོངས་སུ་ཉམས་པར་འགྱུར་བས་ཇི་ལྟར་བྱ་སྙམ་པ་དང་། བློ་སྐྱེས་པས། འདི་ནི་འདུག་
བཞིན་དུ་ཕྱག་བྱས་ན་ལས་ཀྱང་མི་འཆོར་ལ། བསོད་ནམས་ཀྱང་ཉམས་པར་མི་འགྱུར་རོ་སྙམ་སྟེ། ལྕགས་གཟེར་བུ་ཅན་ཐོགས་ཏེ་དེ་ན་འདུག་བཞིན་དུ། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ་
ཞེས་ཕྱག་བྱས་སོ། །དེའི་ཚེ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བྲམ་ཟེ་འདིས་ཉེས་ཏེ། འདིའི་བསམ་པ་ལ་ས་ཕྱོགས་འདི་ན་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་
བསྲེལ་གྱི་ཚོགས་མ་ཞིག་པར་བཞུགས་སོ་སྙམ་ནས། ངའི་སྤྱན་སྔར་འོང་སྟེ་ཕྱག་བྱས་པ་ཞིག་ན། རྫོགས་པའི་སངས་རྒྱས་གཉིས་ལ་ཕྱག་བྱས་པར་འགྱུར་ཏེ། ས་ཕྱོགས་འདི་ན་ཡང་དག་པར་རྫོགས་པའི་
སངས་རྒྱས་འོད་སྲུང་གི་རིང་སྲེལ་གྱི་ཚོགས་མ་ཞིག་པར་བཞུགས་པའི་ཕྱིར་རོ་ཞེས་པ་དང་། ཀུན་དགའ་བོ་མྱུར་བར་བླ་གོས་བཞི་ལྟབ་ཏུ་བྱས་ཏེ་བཏིང་ནས་བཅོམ་ལྡན་འདས་གདན་བཤམས་པ་ལ་
བཞུགས་སུ་གསོལ། ས་ཕྱོགས་རྫོགས་པའི་སངས་རྒྱས་གཉིས་ཀྱིས་ལོངས་སྤྱད་པར་འགྱུར་ལགས་ཏེ། རྫོགས་པའི་སངས་རྒྱས་འོད་སྲུང་དང་། ད་ལྟ་བཅོམ་ལྡན་འདས་ཉིད་ཀྱིས་སོ། །དེ་ནས་གདན་བཤམས་པ་ལ་བཞུགས་ནས་བཀའ་སྩལ་པ། 
1-707
དགེ་སློང་དག་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པ་རྣམས་བལྟ་བར་འདོད་དམ། བཅོམ་ལྡན་འདས་དེའི་དུས་ལ་བབ་ལགས་ཏེ། དེ་མཐོང་ན་སེམས་མངོན་པར་
དད་པར་འགྱུར་ལགས་སོ། །དེའི་ཚེ་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་ན། ཀླུ་རྣམས་ཀྱིས་བསམས་པ། བཅོམ་ལྡན་འདས་སངས་རྒྱས་འོད་སྲུང་གི་རིང་སྲེལ་གྱི་ཚོགས་མ་ཞིག་པ་གཟིགས་པར་
བཞེད་པ་མཐོང་ནས། དེ་རྣམས་ཀྱིས་དེ་ཕྱུང་སྟེ་བསྟན་ཏོ། །དེའི་ཚེ་བཀའ་སྩལ་པ། དགེ་སློང་དག་རྟགས་ཟུང་ཤིག་དང་ནུབ་པར་འགྱུར་རོ་ཞེས་པ་དང་ནུབ་པར་གྱུར་ཏོ། །དེ་ནས་རྒྱལ་པོ་གསལ་
རྒྱལ་ལ་སོགས་པ་སྐྱེ་བོའི་ཚོགས་དཔག་ཏུ་མེད་པ་དག་གིས། སངས་རྒྱས་འོད་སྲུང་གིས་རིང་སྲེལ་གྱི་ཚོགས་མ་ཞིག་པར་ཉན་ཐོས་རྣམས་ལ་བསྟན་ཏོ་ཞེས་པ་ཐོས་ནས་ངོ་མཚར་དུ་གྱུར་ཏེ་
དེར་ལྷགས་པ་དང་། དེ་ཉིད་ས་ལ་ནུབ་པར་གྱུར་ཏོ་ཞེས་ཐོས་ནས་ཡིད་མི་བདེ་བར་གྱུར་ཏོ། །དེའི་ཚེ་དགེ་བསྙེན་ཞིག་གིས་ས་ཕྱོགས་དེར་སྐོར་བ་བྱས་ནས། དེ་འདི་སྙམ་དུ་གོམ་པར་
བོར་བ་འདི་ལ་བསོད་ནམས་ཇི་སྙེད་གཅིག་འབྱུང་བར་འགྱུར་སྙམ་པ་དང་། བཅོམ་ལྡན་འདས་ཀྱི་སྐྱེ་བོའི་ཚོགས་ཆེན་པོ་འགྱོད་པ་བསལ་བ་དང་། དགེ་བསྙེན་དེའི་བསམ་པ་ཐུགས་སུ་ཆུད་ནས་བཀའ་སྩལ་པ། 
1-708
མཁས་པ་གང་ཞིག་རབ་ཏུ་སེམས་དང་བས། །སངས་རྒྱས་མཆོད་རྟེན་ལ་ནི་གོམ་འདོན་ན། །འཛམ་བུ་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་དང་དེ་དང་མཉམ་པ་མིན། །ཞེས་གསུངས་ལ། མཆོད་
རྟེན་བསྐོར་བའི་མདོ་ལ་སོགས་པ་དག་ལས་ཀྱང་ཕན་ཡོན་མང་དུ་གསུངས་སོ། །གསུང་ལས་ཀྱང་། ཕན་ཡོན་ཆེན་པོ་འབྱུང་ཐང་སྟེ། ལུས་ཀྱིས་བསྐོར་བ། ངག་གིས་བཟླས་པའམ་ཁ་ཏོན། ཡིད་ཀྱིས་དེ་དག་
གི་དོན་སེམས་ཤིང་བྱེད་པས་ལུས་ངག་ཡིད་གསུམ་གྱི་དགེ་སྦྱོར་ཚང་པས་སོ་ཞེས་གསུང་གསུང་ངོ་། །བསྐོར་བ་བྱེད་པའི་ཚུལ་ནི་རྟེན་བཅས་དང་རྟེན་མེད་གཉིས་ལ། དང་པོ་ནི་རྟེན་གསུམ་གྱི་དྲུང་
དུ་དོང་སྟེ། སྐྱབས་འགྲོ་སེམས་བསྐྱེད་སྔོན་དུ་བཏང་ལ། སྐུའི་རྟེན་གྱི་ཐུགས་ཁ་གསུང་གི་རྟེན་གྱི་ཡིག་འབྲུ་ཐུགས་ཀྱི་རྟེན་གྱི་བུམ་པ་ལས་འོད་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་
དཔའ་ཐམས་ཅད་སྤྱན་དྲངས་སྟེ་རྟེན་གསུམ་རྣམས་ལ་ཐིམ་པར་བསམ་གཞན་ཡང་། དཔལ་རྡོ་རྗེ་གདན་གྱི་བྱང་ཆུབ་ཆེན་པོ་ལ་སོགས་པ་རྟེན་ཁྱད་པར་ཅན་རྣམས་དང་། གནས་བྱིན་བརླབས་ཅན་ལ་སོགས་པ་
མདོར་ན་བསྐོར་བ་བྱ་བའི་ཡུལ་ཐམས་ཅད་འོད་ཀྱི་སྣ་ལ་སྤྱན་དྲངས་ཏེ་རྟེན་གསུམ་རྣམས་ལ་བསྟིམས་ནས་ཕྱི་རོལ་དུ་ཡེ་མ་ལུས་པར་བསམ་མོ། །དེ་ནས་ཡན་ལག་བདུན་པ་མདོར་བསྡུས་ཅིག་བྱས་ཏེ་བསྐོར་བ་ལ་འཇུག་སྟེ། 
1-709
དེ་ནི་བསྐོར་བ་རྐྱང་པའི་དབང་དུ་བྱས་པའོ། །ཡང་མཚན་མོའི་ཆོས་སྤྱོད་ཡན་ལག་བདུན་པ་བྱས་ནས་བསྐོར་བ་ལ་འཇུག་པ་ཡིན་ན། ཡན་ལག་བདུན་པ་ཕུལ་བའི་རྗེས་ཐོགས་ཡིན་པས་སླར་ཡང་
འབུལ་མི་དགོས་ཞེས་གསུང་བས་བསྐོར་བ་ལ་འཇུག་གོ །དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྒྱལ་མཚན་ལ་ཕྱག་འཚལ་ལོ། །ཨོཾ་ན་
མོ་བྷ་ག་ཝ་ཏེ་རད་ན་ཀེ་ཏུ་རཱ་ཛ་ཡཿཏ་ཐཱ་ག་ཏཱ་ཡཿཨ་ར་ཧ་ཏེ་སཾ་མྱཀ་སཾ་བུད་དྷ་ཡཿཏད་ཡ་ཐཱཿཨོཾ་རད་ན་རད་ནེཿམ་ཧཱ་རད་ནེཿརད་ན་བི་ཛ་ཡེ་སྭཱ་ཧཱ་
ཞེས་པ་ལན་བདུན་ཡན་ཆད་ངེས་པར་བཟླས་སོ། །འདི་ལན་གཅིག་བཟླས་པས་ཀྱང་བསྐོར་བ་བྱེ་བ་བྱས་པར་འགྱུར་བར་གསུངས་སོ། །བྱང་ཆུབ་གཞུང་ལམ་ལས། མཆོད་རྟེན་ལ་ཕྱག་བྱེད་པ་ན། འདི་བཏོན་
ཏེ་ཕྱག་བྱས་ན་མཆོད་རྟེན་གཅིག་ལ་ཕྱག་བྱས་པ་མཆོད་རྟེན་བྱེ་བ་ལ་ཕྱག་བྱས་པར་འགྱུར་བར་ཡང་གསུངས་སོ། །གཉིས་པ་བསྐོར་བ་རྟེན་མེད་པ་ནི། བསྐོར་བའི་ཡུལ་རྟེན་གསུམ་མི་བཞུགས་ཀྱང་།
ཡིད་དང་མཐུན་པའི་གནས་ས་ཕྱོགས་དབེན་པ་ཞིག་ཏུ་བསྐོར་བ་བྱ་བར་འདོད་ན། སྐྱབས་འགྲོ་སེམས་བསྐྱེད་སྔོན་དུ་བཏང་ལ། དེར་ཡི་གེ་བྷྲུཾ་ཡོངས་སུ་གྱུར་པ་ལས་རིན་པོ་ཆེའི་གཞལ་ཡས་ཁང་དུ་བསམ། 
1-710
དེའི་ནང་དུ་པཾ་ཡོངས་སུ་གྱུར་པ་ལས་དཔག་བསམ་གྱི་སྡོང་པོ་ཡལ་ག་ལོ་འདབ་དང་མེ་ཏོག་དང་འབྲས་བུ་ཕུན་སུམ་ཚོགས་པས་བརྒྱན་པ་གཅིག་བསམས་ཏེ། དེའི་དབུས་ཀྱི་ཆ་ལ་བླ་མ་
དང་ཡི་དམ་གཉིས་སུ་མེད་པ་དང་། བསྟན་པའི་བདག་པོ་སྟོན་པ་བཅོམ་ལྡན་འདས་འཁོར་དང་བཅས་པ་བཞུགས་པར་བསམ། ཤར་གྱི་ལ། ཤར་ཕྱོགས་ཀྱི་སངས་རྒྱས་དང་བྱང་ཆུབ་སེམས་དཔའ་རྣམས་དང་། དེ་
བཞིན་དུ་ལྷོ་དང་། ནུབ་དང་། བྱང་དང་། དེ་དག་གི་མཚམས་རྣམས་སུ་ཡང་། དེ་ངོས་ཀྱི་སངས་རྒྱས་དང་བྱང་ཆུབ་སེམས་དཔའ་རྣམས་བཞུགས་པར་བསམ་ཞིང་། སྟེང་གི་རྣམས་ཤར་གྱི་ལ། འོག་གི་རྣམས་ནུབ་
ཀྱི་ཆ་ལ་ལྡེབས་ནས་བཞུགས་པར་བསམ་མོ། །དེ་ནས་ཡན་ལག་བདུན་པ་བསྡུས་པ་གཅིག་ཕུལ་ནས། བསྐོར་བའི་གཟུངས་ཏེ་ཚར་བདུན་ཡན་ཆད་ངེས་པར་གདོན་ཅིང་བསྐོར་བ་བྱའོ། །དེ་ནས་དགེ་སྦྱོར་གཞན་
བྱེད་པར་འདོད་ནའང་བྱ་ཞིང་བསྐོར་བ་མང་དུ་བྱས་ནས། མཇུག་ཏུ་ཡན་ལག་བདུན་པ་མདོར་བསྡུས་གཅིག་ཕུལ་ནས་དགེ་བ་བསྔོ་ཞིང་། ཨོཾ་བཛྲ་མུ་ཞེས་བརྗོད་ན་སྔར་གྱི་ཡུལ་རྣམས་གཤེགས་པར་བསམ་
སྟེ་མི་དམིགས་པས་རྒྱས་གདབ་བོ། །ཞར་ལ་རྟེན་མེད་པའི་སྐོར་བ་བྱེད་ཚུལ་བཤད་ཟིན་ཏོ། ། དེ་ལྟར་དགེ་འདུན་རྣམས་འདུས་ནས་མཚན་མོའི་ཆོས་སྤྱོད་བསྐོར་བའི་བར་རྣམས་ཚར་བ་དང་། རྟེན་གསུམ་གྱི་དྲུང་དུ་ཡན་ལག་བདུན་པ་མདོར་བསྡུས་པ་གཅིག་འབུལ་བའམ། 
1-711
དེ་མ་གྲུབ་ནའང་རྟེན་ལ་ཕྱོགས་པར་ལུས་འདུད་པ་དང་བཅས་པའི་སྒོ་ནས་ཡིད་ཀྱི་ཡན་ལག་བདུན་པ་ཕུལ་ནས། རང་རང་གི་ཁང་པར་དོང་སྟེ། དེར་ཡང་རྟེན་མཆོད་རྣམས་ཀྱི་དྲུང་དུ་ཕྱག་
འཚལ་བ་ལ་སོགས་པ་བྱས་ནས་མཚན་མོའི་ཆ་དང་པོ་ལ་བྱ་བའི་དགེ་བའི་སྦྱོར་བ་རྣམས་ཡོངས་སུ་རྫོགས་པར་བྱའོ། །དེ་དག་གིས་ནི་སྔོན་གྱི་སྐྱེས་བུ་དམ་པ་དག་གི་མཛད་པའི་སྲོལ་
ཀུན་སྤྱོད་དྲི་མ་མེད་པ་རྗེས་སུ་བསྐྱང་པའི་ཚུལ་སྟན་ཏོ། །འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་འཕྲིན་ལས་གཅིག་ཏུ་བསྡུས་པའི་བདག་ཉིད། མཆིམས་ཐམས་ཅད་མཁྱེན་པ་ཡིད་བཞིན་གྱི་ནོར་
བུ་རིན་པོ་ཆེ་ཞེས་འཛམ་བུའི་གླིང་ཕལ་ཆེ་བ་ཚད་མའི་སྐྱེས་བུར་གྱུར་པ་དེའི་ཞལ་ནས་ཇི་ལྟར་བྱོན་པའི་གསུང་དྲི་མ་མེད་པ་རྣམས། ཁོ་བོའི་རྣམ་པར་རྟོག་པ་དང་། རང་གཟོའི་དྲི་
མས་མ་བསླད་པར་ཡིད་ཆེས་པའི་ལུང་དང་སྦྱར་ཏེ། སྣར་ཐང་པའི་ཀུན་སྤྱོད་ཉིད་ཞག་ཕྲུག་གཅིག་གི་བྱ་བ་ཆོས་སྤྱོད་ཀྱི་རིམ་པ་ཤེས་པར་འདོད་པ་རྣམས་ལ་ཕན་པའི་ཕྱིར་ཕྱོགས་བཞི་དུ་
སྡེབས་པའོ།། །། ཤིན་ཏུ་རྙེད་དཀའ་དལ་བའི་ལུས། །ཕུན་ཚོགས་འབྱོར་བ་འདི་རྙེད་ནས། །ད་ནི་སུ་ཞིག་སྒོ་གསུམ་ཀུན། །དགེ་བ་ཅི་ཡི་ཕྱིར་མི་སྤྲོ། །དེ་བས་ངེས་འབྱུང་ཚུལ་ཁྲིམས་ལ། །བརྟེན་ནས་ཉིན་མཚན་དོན་ཡོད་པར། །
1-712
བྱེད་འདོད་གང་བ་གནས་དེ་ལ། །ཇི་ལྟར་བྱ་བ་དེ་བཤད་དོ། །གང་འདི་བདག་གིས་ངག་ལས་སམ། །ཡི་གེར་བཀོད་པ་དེ་མཐོང་སྟེ། །འདི་ཡི་རྗེས་སུ་སློབ་འདོད་པ། །དེ་ལ་ལུང་ཡང་བྱིན་
ཟིན་ཏོ། །སྟོན་ཀའི་སྤྲིན་ལྟར་རབ་གཡོ་བའི། །ཚེ་ལ་ཡིད་བརྟན་ག་ལ་རུང་། །རིངས་པར་འཇིག་རྟེན་ཕྱི་མ་ཡི། །དོན་བསམས་ནས་ནི་བག་བྱོས་ཤིག །སྒོ་གསུམ་ཀུན་ནས་དགེ་བ་ཡི། །སྤྱོད་ཚུལ་བཟང་
པོ་འདིར་བཤད་པ། །དེ་ལས་བསོད་ནམས་གང་བྱུང་དེས། །རྒྱལ་བའི་གོ་འཕང་མྱུར་ཐོབ་ཤོག །བདག་སོགས་འགྲོ་ལ་བུ་གཅིག་ལྟར་དགོངས་པ། །བླ་མའི་ཞབས་ཀྱི་པདྨར་བདག་གིས་ནི། །ལག་པའི་ཀུ་མུད་ཅོད་
པན་ལྟར་བྱས་པའི། །ཐལ་སྦྱར་སྤྱི་བོས་གཏུགས་ཏེ་ཕྱག་བགྱིའོ། །ཉིན་ཞག་ཟུང་གཅིག་གི་བྱ་བའི་རིམ་པ་མང་དུ་ཐོས་པ་ཤཱཀྱའི་བཙུན་པ་མཆིམས་ཀྱིས་སྦྱར་བའོ། །འདིས་གཞན་ལ་ཕན་ཐོགས་པར་གྱུར་ཅིག། 
